1 Oh met, I pahn koasoia duwen irail akan me sohte kin kamehlele Krais.

2 Kilang, kumwail kak kamehlele ni rahno me e pahn ketidohng kumwail—kilang, ni ahnsou me Kauno pahn ketido, iei, rahn lapalapo me sampah pahn welpene duwehte tehn doaropwe ieu, oh mehkan me wiahda sampah pahn peikipeseng karakar laud, ei, ni rahn lap me kumwail pahn wisikido pwehn kesihnen mwohn simpwul en Koht—eri, kumwail kak koasoia me sohte Koht?

3 Eri ia duwe, kumwail pahn kin kasohwehte Krais, de kumwail kak kilang simpwul en Kohto? Kumwail leme me kumwail kak mihla reh ma kumwail ese duwen dipamwail akan? Kumwail leme me kumwail kak pereniki mihla rehn Koht Sarawio, ni ahnsou me kumwail ohkilahr amwail ese duwen amwail dipaniki amwail kasapwungelahr sapwellime kosonned akan?

4 Kilang, I ndahiong kumwail me e pahn inenen kansensuwed en mihla rehn Koht sarawi oh pwung, ni amwail ese amwail samin mwohwe sang amwail en mihla rehn irail akan me lekdeklahr nan ehlo.

5 Pwe kilang, ahnsou me kumwail pahn wehwehkihda amwail sapwung kan mwohn Koht, oh pil kilang duwen klohri en Koht, oh duwen sarawi en Sises Krais, me pahn isikada kisiniei me sohte kak tukedi rehmwail.

6 Oh eri kumwail me kin sohte kamehlele kan, kumwail en sohpeiong Kauno; kehlail likiwer ong Sahmo ni mwaren Sises, pwe mweinele kumwail en kak dierek sohte dihp, mwakelekel, mwahu, oh pwetepwet, sang ni kamwakelkihda ntahn Sihmpwulo, ni imwin rahn lapo.

7 Oh I pil ndahiong kumwail me kin kasohwe kaudiahl en Koht akan, oh kin nda me irail solahr pahn wiawi, pwe solahr kaudiahl akan, de pil kokohp akan, de pil kisakis akan, de pil kamwahuiala soumwahu akan, de pil lokaiahki mahsen tohrohr akan, oh wehwehki mahsen akan.

8 Kilang I ndahiong kumwail, mehmen me kin kasohwe mepwukat sohte kin ese rongamwahu en Krais; ei, e saikinte wadek pwuhk sarawih kan; ma iei, e sohte kin wehwehki.

9 Pwe kitail sou kin wadek me Koht kin ketin duduwehte aio, rahnwet, oh pahn kohkohlahte, oh reh e sohte kin wekila de pil sohte mwetehn wekila ieu kin mie?

10 Oh met, ma kumwail medewedahr pein amwail koht emen me kin wekila, oh me pahn mie mwetehn wekila reh, eri kumwail pein medewedahr koht emen me kaidehn Koht me kin wia manaman kapwuriamwei kan.

11 Ahpw kilang, I pahn kasalehiong kumwail me Koht iei Koht me kin wia manaman kapwuriamwei kan, iei Koht en Eipraam, oh Koht en Aisek, oh Koht en Seikop; oh iei Kohtohte me ketin kapikadahr nanleng kan oh sampah, oh mehkoaros me mih nanleng oh sampah.

12 Kilang, e ketin kapikadahr Adam, oh sang ni Adam pwupwilahn aramas eri wiawiher. Oh pwehki pwupwilahn aramas, Sises Krais ketidohr, iei Sahmo oh Sapwellimeo; pwehki ketidohn Sises Krais, komourepen aramas ahpw wiawiher.

13 Oh pwehki komourepen aramas, me Sises Krais ketikidohr, iei me kapwurehdo irailehr rehn Kauno; ei, met iei me aramas koaros komourkilahr, pwehki matalahn Krais kahrehda iasada, me kahrehda komourla sang ni meir sohte imwi, sang soangen meir me aramas koaros pahn pirikihda manaman en Koht ni ahnsou me sewi pahn pepeuk; oh irail pahn iasada, me tikitik oh me lapalap koaros, oh koaros pahn kesihnen mwohn sapwellime mwoahlo, sang ni arail komourla oh mweisangehr ni arail selidiong mehla kohkohlahte, mehla me wia mehlahn paliwar.

14 Oh eri kopwung en Koht Sarawio pahn wiawi ong irail; oh eri ahnsouo pahn kohdo me mehmen me kin samin pahn kin samisaminte; oh mehmen me kin pwung pahn kin pwungupwungte; mehmen me kin peren pahn pereperente; oh mehmen me kin nsensuwed pahn kin insensuwedte.

15 Oh met, oh kumwail koaros me kin pein medewehda koht emen me sohte kak wiahda manaman kapwuriamwei kan, I pahn idek rehmwail, dah, mepwukat nekilahr, me I koasoiadahr? Ia duwen, e lelehr ni imwio? Kilang, I ndahiong kumwail, soh; oh Koht sohte ketin uhdihsang wia Koht me kin wia manaman kapwuriamwei kan.

16 Kilang, kaidehn mehkan me Koht ketin wiadahr me kin kapwuriamwei ong nan masatail akan? Ei, oh ihs me kak wehwehkihla doadoahk manaman kapwuriamwei kan en Koht?

17 Ihs me pahn koasoia me kaidehn manaman ehu me sang ni sapwellime mahseno me nanleng oh sampah en duwehla met; oh sang ni manaman en sapwellime mahseno me aramas en kapikipikadahsang pwehl; oh sang ni manaman en sapwellime mahseno me manaman kapwuriamwei kin wiawi?

18 Oh ihs me pahn koasoaia me Sises Krais sohte ketin wiadahr manaman kapwuriamwei laud tohto? Oh mie manaman kapwuriamwei laud tohto me wiawi sangehr ni pehn wahnpoaron akan.

19 Oh ma mie manaman kapwuriamwei kan me wiawiher mahso, dahme kahrehda Koht e ketin uhdihsang wia Koht me kin wia manaman kapwuriamwei men oh pil kin wia Mehmen me sohte kin ketin wekila? Oh kilang, I ndahiong kumwail me e sohte kin ketin wekila; ma mehlel e pahn solahr ketin wia Koht emen; oh e sohte kin ketin uhdihsang wia Koht, oh ih iei Koht manaman kapwuriamwei men.

20 Oh kahrepen e ketin uhdihsang wia manaman kapwuriamwei kan rehn aramas akan pwehki sang ni ahr soupwoson, oh re kohsangehr nan ahl pwungo, oh sohte ese Kohto me irail en kin liki.

21 Kilang, I ndahiong kumwail me mehmen me kamehlele Krais, sohte peikasal, dahme e pahn peki rehn Sahmo ni mwaren Sises Krais pahn kin pweiong ih; oh inou wet kohieng koaros, iei aramas koaros nan sampah.

22 Pwe kilang, iet me Sises Krais, Sapwellimen Kohto, ketin mahsanihongehr sapwellime tohnpadahko me pahn mihmihte, ei, oh pil koaros sapwellime tohnpadahk kan, ni en pokono wie karokaronge: Kumwail kohwei wasa koaros nan sampah, oh padahkihong aramas koaros rongamwahuo.

23 Oh mehmen me kamehlele oh papidaisla pahn komourla, oh mehmen me sohte pahn kamehlele pahn kin lekidekla;

24 Oh iet kilel akan me pahn kin idawehn irail akan me kin kamehlele—ni edei irail pahn kin kauskihla tepil akan; oh irail pahn koasoiki mahsen kapw akan; irail pahn kin pwekada sinek kan; oh ma irail pahn kin nimada mehkot me pahn kemehla irail, e sohte pahn kauwe irailla; irail pahn kin kihwei pehrail akan pohn me soumwahu akan oh re pahn kehlailda.

25 Oh mehmen me pahn kamehlele edei, ni sohte peikasal, ong ih I pahn kamanahiong ei mahsen akan, pil duwehte aramas koaros nan sampah.

26 Oh met, kilang, ihs me kak pelianda doadoahk kan en Kauno? Ihs me kak kasohwe sapwellime mahsen akan? Ihs me pahn pelianda manaman kohwahlapie en Kauno? Ihs me pahn kailongki doadoahk kan en Kauno? Ihs me pahn kailongki seri en Krais kan? Kilang, kumwail koaros me kin kailongki sapwellimen Kauno doadoahk kan pahn kin sohte kamehlele oh salongala kohkohlahte.

27 Oh eri dehr kin kailongki, oh dehr kin sohte kamehlele, ahpw kin karonge mahsen akan en Kauno, oh kin peki Sahmo ni mwaren Sises mehkoaros me kumwail pahn kin anahne. Dehr peikasal, a en kin kamehlele, tapihada wia duwehte mahso, oh kohkidohng Kauno amwail mohngiong unsek, oh koadoahkehda pein amwail mour sang ni masak oh rerrer mwowe.

28 Kumwail en kin marain ni ahnsou en amwail kasongosong kan; sipedalahsang rehmwail samin koaros; dehr kin peki pwe kumwail pahn doadoahngki ong amwail noahrok kan, ahpw kehlail tengediong amwail pekipek pwe kumwail dehr lohdi ong nan songosong, oh me kumwail en papah Koht mehlel oh ieias.

29 Kilang pwe kumwail en dehr papidaisla ni amwail sohte warohng; kilang pwe kumwail en kin warohng ale kamadipw sarawio; ahpw kilang pwe kumwail en wia mehkoaros ni duwen amwail kin warohng, oh kin wiahki ni mwaren Sises Krais; oh kin dadaurete lel imwi, kumwail eri sohte pahn lekdekla.

30 Kilang, I koasoiwei rehmwail, nin duwen I koasoi sang rehn me melahr akan; pwe I ese me kumwail pahn ale mahsen kan sang ie.

31 Dehr kauwe ie pwehki ei sapwung, de pil ei pahpahu pwehki eh sapwung, de pil irail akan me pil ntingehr mwowe; ahpw kumwail en kapinga Koht me ketin kasalehiong kumwailehr aht sapwung kan, pwe kumwail en kak esehla duwen maraino laudsang kiht.

32 Oh met, kilang, se ntingidier poadoapoad wet nin duwen aht ese, ni mwomwen nting kan me se kin kahdaniki wekideklahn nting en Mehn Isip, me se alehier oh wekidalahngehr nin duwen mwomwen aht mahsen.

33 Oh ma nait pileit akan pahn laud oh itar, se pahn ntingihdi ni lokaiahn Ipru; ahpw se pil wekidalahr lokaiahn Ipru; oh ma se kak ntingihdi ni mahsen en Ipru, kilang, e sohte pahn mie sohitar kan nan aht nting kan.

34 Ahpw Kauno ketin mwahngih mehkan me se ntingihdier, oh pil sohte aramas ese aht lokaia; oh pwehki sohte aramas me ese aht lokaia, ihme kahrehda e ketin kaunopada mehn kawehwehpe.

35 Oh mepwukat ntingdier pwe sen kak kamwakelehsang aht likou karmend kan ntahn riat akan, me pwupkilahr arail soupwoson.

36 Oh kilang, mepwukat koaros me se kin anahne me pid riat akan, ei, pwe irail en pwurehng esehla duwen Krais, iei me sang nin duwen kapakap akan en souleng kan koaros me miher nan sahpwo.

37 Oh Kauno Sises Krais en ketikihong irail pasapeng en arail kapakap kan me pahn sang ni duwen arail pwoson; oh Koht Sahm en ketin kupwukupwure inouo me e ketin wiahiongehr tohn Israel akan, oh en ketin kapai irailda kohkohlahte sang ni arail pwoson mwaren Sises Krais. Ahmen.