1 Oh met I kanekelahr ei ntingih duwen kamwomwalahn nei aramas, Mehn Nihpai kan. Kedekedeo se ahpw karis kohwei mwohn Mehn Leimen kan.

2 Oh ngehi, Mormon, ntingihda ehu kisin likou ong nanmwarki en Mehn Leimen kan, oh peki reh en mweidehng kiht ma se kak kihpene nait aramas akan ong nan sahpw en Komora, ni dohl ehu me adaniki Komora, oh wasahu se pahn mahwiniong irail.

3 Kedekedeo nanmwarki en Mehn Leimen kan ahpw mweidehng ie dahme I peki rehu.

4 Kedekedeo se ahpw karis kohla nan sahpw en Komora, oh se ahpw kihda aht impwal akan kapilpene dohl en Komora; oh e wia sahpw me diren pihl, pil lap kan, oh utuhnpil kan; oh wasa se kasik me se pahn kak powehdi Mehn Leimen kan.

5 Oh ahnsou me pahr silipwiki welihsek pahieu imwiseklahr, se ahpw kihpenehier luhwen nait aramas koaros nan sahpw en Komora.

6 Kedekedeo ahnsou me se kihpenehier nait aramas koaros nan sahpw en Komora, kilang ngehi, Mormon, tepier mahla; oh pwehki ei ese me ih lahs en nei aramas ahr pahn wia arail kak koaros, oh pwehki Kauno eh ketin mahsanihong ie me I sohte pahn mweidehng poadoapoad sarawi ko me aht pahpa kahlapoko kadakadaur kohdo en kohieng nan pehn Mehn Leimen kan, (pwe Mehn Leimen kan pahn kawehla) eri I ntingihda poadoapoad wet sang nan pileit en Nihpai, oh ekihla koaros poadoapoad kan ni dohl en Komora me Kauno ketin likihkihong ie sang ni lime kan, ihte ekei me I kihong nei pwutak Moronai.

7 Kedekedeo nei aramas akan, iangahki arail pwoud kan oh neirail seri kan, ahpw kilangada nein Mehn Leimen kan sounpei kan ahr karkaris kohdohng irail; oh irail awiawih irail nan arail ahneki lemw me kin sansal pohn aramas koaros me dipan ahpw masak mehla.

8 Kedekedeo irail ahpw kohdohng mahwiniong kiht, oh aramas koaros direkihla masepwehk pwehki uwen tohtohn irail.

9 Kedekedeo irail ahpw mahwinkihong nei aramas akan kedlahs, oh kesik ketieu, oh arep, oh sile, oh soangsoangen dipwisou en mahwin kan.

10 Kedekedeo nei ohl akan kamakamala, iei, nei meh nen me iangie, oh I pwupwidi nanpwungarail ohla; oh irail daulih ie oh sohte kemeiehla.

11 Oh ahnsou me irail kohlahr oh kemehla nei aramas akan koaros ihte kiht meh riehk pahmen, (emen iei nei pwutak Moronai) oh pwehki aht mourla sang nait aramas akan, se ahpw kilangidi mandahu, ahnsou me Mehn Leimen kan pwuralahr wasahn arail kommoalo, sang pohn dohl en Komora, pwehki ei tiehngkihla mwowehu nei aramas meh kido, irail kamakamala.

12 Oh se pil kilangidi nein Moronai aramas meh nen me e kahluwahu.

13 Oh kilang, nein Kidkiddona meh nen pil mehla, oh pil iangahki ih nanpwungarail.

14 Oh Leima pil mehla iangahki nah meh nen; oh Kilkal pil mehla iangahki nah meh nen; oh Limah pil mehla iangahki nah meh nen; Seneium pil mehla iangahki nah meh nen; oh Kumenaia, Moronaia, oh Andionem, oh Siplom, oh Sem, oh Sohs, koaros mehla iangahki neirail meh nen kan.

15 Kedekedeo mie ekei meh ehk me pil kamakamkihla kedlahs, iangahki meh nen kan me emen emen irail kin nainiki; iei, koaros nei aramas akan mehla, ihte meh riehk pahmeno me iangie, oh pil ekei me pitila oh tangala nan wehin palieir kan, oh ekei me iangala Mehn Leimen kan; oh uduken me mehla kan, oh tihrail kan, oh ntahrail mihseli pohn pwehl, pwe irail me kemeirailla kohkohlahsang oh paliwar akan mwoasoahngotpene pohn sahpwo, oh mwerpeseng oh pwuralahng pwehl.

16 Oh palingeniet ohkilahr lokolok, pwehki kamakamalahn nei aramas akan, oh I ahpw werikihla:

17 Oh kumwail me kaselel akan, ia duwen amwail kak kohsang nan sapwellimen Kauno ahl akan! Oh kumwail me kaselel akan, ia duwen amwail kak soikala Sises, me ketin kesikesihnen nin lime kan onopadahr en ale kumwail!

18 Kilang, ma kumwail sohte wia met, kumwail sohte pahn pwupwidi. Ahpw kilang, kumwail pwupwidier, oh I sengisengki amwail melahr.

19 Oh kumwail pwutak oh serepein kaselel kan, kumwail pahpa kan oh nohno kan, kumwail ohl oh lih pwopwoud kan, kumwail me kaselel kan, ia duwen amwail kak pwupwidi!

20 Ahpw kilang, kumwail solahr mie, oh ei pahtou kan sohte kak kapwureikumwaildo.

21 Oh rahno pahn kereniong leledo me amwail mour pahn wiahla mour poatoapoat, oh paliwar pwukat me ahnsou wet mweremwerkipeseng eh mwoasoahngot pahn alehda paliwar me pahn sohte kak mwerpeseng; oh kumwail ahpw pahn kesihnen mwohn mwoalen kopwung en Krais, pwe en pakadeingki duwen amwail doadoahk kan; oh ma kumwail mour pwung, eri kumwail pahn meid pai iang amwail pahpa ko me tienglahr mwohmwail.

22 Oh ma kumwail koluhlahte mwohn kamwomwala lap wet eh kohieng kumwail. Ahpw kilang, kumwail solahr mie, oh Sahmo, ei, Sahm Soutuk en nanleng, ketin mwahngih irair en amwail mour; oh e pahn ketin wiahiong kumwail nin duwen sapwellime kopwung pwung oh kupwur kalahngan.