1 Oh met kedekedeo nan pahr silipwiki weneisek siluho nein Mehn Nihpai sounpei kan ahpw kohdahla mahwiniong Mehn Leimen kan, likin sahpw en Tehnla.

2 Kedekedeo nein Mehn Nihpai sounpei kan pwurehng pweiekido nan sahpw en Tehnla. Oh ni arail wie luluwet, a nein Mehn Leimen kan sounpei kapw kei ahpw kohdohng irail; mahwin kehlail ehu ahpw wiawi nanpwungarail, kahrehda Mehn Leimen kan ahpw kalowehdi kahnihmw en Tehnla, oh kemehla Mehn Nihpai tohto, oh saliedi oh wahsang tohto irail.

3 Oh me luhwehdi kan ahpw tang oh kohla patehng tohn kahnihmw en Dienkom. Met kahnihmw en Dienkom kin mih ni mwahn oaroahro; oh e pil karanih kahnihmw en Tehnla.

4 Oh met pwehki nein Mehn Nihpai kan sounpei kan kohdahlahng Mehn Leimen kan me kahrehda arail tepida kamakam; pwe ma re sohte wia met, Mehn Leimen kan sohte kak powehdi irail.

5 Ahpw, kilang, sapwellimen Koht kopwung kan pahn kalowehdi me suwed kan; oh me suwed kan kin kamakam rehn me suwed kan; pwe me suwed kan me kin kamwakidada nan mohngiong en aramas akan re en kamaramas.

6 Kedekedeo Mehn Leimen kan ahpw kaukaunop en kohdohng kahnihmw en Dienkom.

7 Kedekedeo nan pahr silipwiki weneisek pahieuo Mehn Leimen kan ahpw kohdohng kahnihmw en Dienkom, pwe irail en kak pil kalowehdi kahnihmw en Dienkom.

8 Kedekedeo irail ahpw kohdo mahwin oh Mehn Nihpai kan pwakihirailla. Oh ahnsou me Mehn Nihpai kan kilangada me Mehn Leimen kan pweiekla irail ahpw pwurehng tepida pohnmwahsohki pein arail kehlail; oh irail kohkihwei pein arail kehl, oh pwurehng kalowehdi kahnihmw en Tehnla.

9 Oh met mepwukat koaros wiawiher, oh uwen aramas kei kamakamala pali koaros, koaros Mehn Nihpai kan oh Mehn Leimen kan.

10 Kedekedeo pahr silipwiki weneisek weneu ahpw imwiseklahr, oh Mehn Leimen kan pwurehng pwurodo mahnwiniong Mehn Nihpai kan; ahpw Mehn Nihpai kan sohte koluhkihla arail suwed me irail wiadahr, ahpw wenlahte wiwia arail wiewia suwed kan.

11 Oh e apwal lokaia en kak kawehwehda, de aramas en kawehwehda unsek ni nting soangen kamasepwehk en mwomwen kamaramas oh mehla me kin wiawi rehn aramas, en Mehn Nihpai kan oh Mehn Leimen kan koaros; oh mohngiong koaros keptakaila, kahrehda irail wenwenlahte pereniki kemehla aramas.

12 Oh saikinte pak ehu soangen wiewia suwed lap wet wiawi rehn nein Lihai seri kan koaros, de pil nan peneinei en Israel koaros, nin duwen mahsen kan en Kauno, me rasehng dahme wiawi rehn aramas pwukat.

13 Kedekedeo Mehn Leimen kan ahpw kalowehdi kahnihmw en Tehnla, oh met pwehki arail tohtohsang Mehn Nihpai kan.

14 Oh irail ahpw pil karihs kohwehng kahnihmw en Dienkom, oh pwakihsang tohn kahnihmwo, oh saliedi oh wahsang lih oh seri tohto, oh kin wihkinirail arail mehn meiroang ong arail koht dikadik en eni kan.

15 Kedekedeo nan pahr silipwiki weneisek isuho, pwehki Mehn Nihpai kan ar lingeringerki Mehn Leimen kan arail meirongkihla neiral lih akan oh seri kan, kahrehda irail kohwehng Mehn Leimen kan nan arail lingeringer mehlel, kahrehda irail kemehda Mehn Leimen kan, oh pwakihsang irail nan sapwaraillo.

16 Oh Mehn Leimen kan sohte pwurehng kohdohng Mehn Nihpai kan lao le nan pahr silipwiki isihsek limao.

17 Oh nan pahret irail ahpw kohdihdohng Mehn Nihpai kan ni arail kehlail koaros; oh irail sohte kak wadawadi pwehki uwen tohtohn irail.

18 Oh sang ahnsou wet kohla Mehn Nihpai kan sohte kak powehdi Mehn Leimen kan, ahpw re tepida kamwakidsang mwohrail duwehte pwoaik mwohn ketipino.

19 Kedekedeo Mehn Leimen kan ahpw kohdihdohng kahnihmw en Tehnla; oh mahwin kehlail ehu ahpw wiawi nan sahpw en Tehnla, oh nan mahwino irail kemehda Mehn Nihpai kan.

20 Oh irail pwurehng tangasang mwohrail, oh irail kohdohng kahnihmw en Pwuas; oh wasahu irail pelianda Mehn Leimen kan nan arail eimah mehlel, kahrehda Mehn Leimen kan sohte keme irail wasahu lao lel keriapak en arail pwurodohng irail.

21 Oh ahnsou me irail pwurodohng irail keriapako, Mehn Nihpai kan pwepwekihsang oh kamakamkihla kamakam laud mehlel; neirail lih kan oh seri kan pwurehng wiahla meirong ong dikadik en eni kan.

22 Kedekedeo Mehn Nihpai kan ahpw pwurehng tangasang mwohrail, wahsang towehkan koaros, nan kahnihmw oh kousapw akan.

23 Oh met ngehi, Mormon, pwehki ei kilangadahr Mehn Leimen kan arail pahn kalowehdier sahpwo, eri I ahpw kohla ni dohl en Sim, oh alehda poadoapoad kan koaros me Amaron ekihla ong Kauno.