Pwuhk en Mormon

1 Oh met ngehi, Mormon, ntingihda duwen soahng kan me I kilangehr oh rongehr, oh kahdaniki Pwuhk en Mormon.

2 Oh ahnsou me Amahrohn ekihla poadoapoad ko ong Kauno, e ahpw kohdo rehi, (ahnsou me I sounpar eisek, oh I tepida esehla duwen kaskuhl en nting en nei aramas akan) oh Amahrohn ndahiong ie: I kasawih me ke wia seri mwahu men, oh kin mwadang en esehla;

3 Eri, ahnsou me ke pahn sounpar rieisek pahieu I men ke en tamataman soahng kan me ke kilang wiawihong aramas pwukat; oh ahnsou me ke pahn lel sounparo ke pahn kohla nan sahpw en Andem, pohn dohl ehu me adaniki Sim; oh wasahu I nekidala ong Kauno nting sarawi koaros me pid duwen aramas pwukat.

4 Oh kilang, ke pahn kihsang pileit en Nihpai ko, oh luhwe kan ke pahn pwilikihdi wasahu; oh ke pahn ntingihdi nan pileit en Nihpai ko soahng koaros me ke kilangehr duwen aramas pwukat.

5 Oh ngehi, Mormon, I wia emen kadaudok en Nihpai, (oh ei pahpa adaniki Mormon) I kilelehdi soahng kan me Amahrohn ndahiong ie.

6 Kedekedeo ahnsou me I sounpar eisek ehu, ei pahpa waiehla nan sahpw en palieir, iei kohla nan sahpw en Saraemla.

7 Pohn sahpwo pwon direkihla ihmw akan, oh aramas akan udahn tohtohla mehlel kereniong duwehte pihk en pohn oaroahr.

8 Kedekedeo nan pahrete mahwin tepida wiawi nan pwungen Mehn Nihpai kan, me wiawihkihda Mehn Nihpai kan oh Mehn Seikop kan oh Mehn Sosep kan oh Mehn Soram kan; oh mahwin wet wiawi nanpwungen Mehn Nihpai kan, oh Mehn Leimen kan oh Lemuel kan oh Mehn Ismael kan.

9 Met Mehn Leimen kan oh Mehn Lemuel kan oh Mehn Ismael kan adaniki Mehn Leimen, oh pwihn riau wet iei Mehn Nihpai oh Mehn Leimen.

10 Kedekedeo mahwino ahpw tepida wiawi nanpwungarail ni irepen sahpw en Saraemla, limwahn pihl en Saidon.

11 Kedekedeo Mehn Nihpai ahpw kihpene aramas kei, lao irail tohtohsang meh silinen. Kedekedeo nan pahrohte irail wiahier mahwin kei, oh Mehn Nihpai kan ahpw powehdi Mehn Leimen kan oh kemehla tohto irail.

12 Kedekedeo Mehn Leimen kan ahpw pweieksang arail koasondio, oh popohl ahpw miehda nan sahpwo; oh irail ahneki popohl erein sounpar pahieu, me sohte aramas kamakamala.

13 Ahpw wiewia suwed kehlaila pohn sahpwo pwon, kahrehda Kauno ketikihsang sapwellime tohnpadahk kesempwal oko, oh doadoahk en manaman kapwuriamwei kan oh maiauda kan uhdi pwehki wiewia suwed en aramas akan.

14 Oh sohte kisakis sang Kauno, oh Ngehn Sarawi sohte ketiket rehn aramas tehmen, pwehki arail wiewia suwed oh sohpwoson.

15 Oh ngehi, pwehki ei sounpar eisek limau oh pwehki ei madamadau mehlel, Kauno eri pwarohng ie, oh I kehnehr oh esehier kupwur kalahngan en Sises.

16 Oh I nantihong kalohk ong aramas pwukat, ahpw eweiet sohla mweimweiong, oh I sohla mweimweiong en kalohk ong irail; pwe kilang irail inangih mehlel en uhwong arail Koht; oh tohnpadahk kesempwal oko kohsang nan sahpwo, pwehki arail wiewia suwed kan.

17 Ahpw I mihmihte rehrail, ahpw I sohte mweimwei en kalohkehng irail, pwehki keptakai en mohngiongarail kan; oh pwehki keptakai en mohngiongarail kan sahpwo riahla pwehki irail.

18 Oh pwihn en Kadiendon lipirap oko, me mih rehn Mehn Leimen kan, ahpw rekla nan sahpwo, lao tohn sahpwo tepida ekihla arail dipwisou kesempwal akan nan pwehl; oh irail apwal en kolokol, pwehki Kauno keriahla sahpwo, kahrehda irail sohte kak kolokol arail dipwisou kan, de pwurehng alehdi.

19 Kedekedeo mie sounwunahni kan, oh sounkosetipw kan, oh akmanaman kan; oh manaman en me suwedo kohdohng pohn sahpwo pwon, lao mahsen kan koaros en Apinadai oh pil Samuel Mehn Leimeno pweida.