1 Ha koʼág̃a, péina ápe, che añeʼẽse ko tavayguakuéra rembyre opytavaʼekuépe, Tupã omeʼẽramo chupekuéra che ñeʼẽ, oikuaa hag̃ua hikuái ituvakuéra rehegua; heẽ, che añeʼẽ peẽme, Israel róga rembyre; ha koʼãva haʼe ñeʼẽ che haʼéva peẽme:

2 Peikuaáke peẽ haʼeha Israel rogagua.

3 Peikuaáke peg̃uahẽvaʼerãha arrepentimiéntope, térã ndaikatumoʼãi pejesalva.

4 Peikuaa pehejavaʼerãha pene árma ñorairõguasurã, ha napendehoryvéimavaʼerã tuguy ñeñohẽme, ha ndapejagarravéimavaʼerã, ndahaʼéiramo Tupã heʼi jave peẽme.

5 Peikuaa pejuvaʼerãha pende rukuéra jeikuaápe, ha peñearrepentivaʼerã opa pene angaipa ha pene rembiapovaígui, ha peguerovia Jesucristo-pe, haʼe haʼeha Tupã Raʼy, ha judio-kuéra ojukahague chupe, ha Túva puʼaka rupi oikovejeyhague, ha upévape ohupyty puʼaka ñeñotỹha ári; ha ipype oñembogue avei pe ñemano popĩa.

6 Ha haʼe ojapo omanovaʼekue jeikovejey, upéva rupi yvyporakuéra opuʼãjeýta oñemboʼy hag̃ua itrivunal renondépe.

7 Ha haʼe ojapókuri yvóra rredensiõ, upéicha upe árape ojejuhúva angaipaʼỹre henondépe oñemeʼẽta oikove hag̃ua Tupã renondépe irréinope, opurahéi hag̃ua ñemomorã opaveʼỹva umi opurahéiva ndive yvágape, Túvape, ha Taʼýrape, ha Espíritu Santo-pe, haʼéva hikuái peteĩ Tupã, peteĩ vyʼapavẽ ñeime opaveʼỹvape.

8 Upévare peñearrepenti, ha peñemongarai Jesús rérape, ha pejejagarra Cristo evanhélio rehe, oñemeʼẽtava peẽme, ndahaʼéi koʼã kuatiajehaipyrépente ha katu avei kuatiajehaipyrekuéra oútava judio-kuéragui gentil-kuérape, kuatiajehaipyrekuéra oútava gentil-kuéragui peẽme.

9 Ha péina ápe, ojehai koʼãva peguerovia hag̃ua umíva; ha pegueroviáramo umíva pegueroviáta avei koʼãva; ha pegueroviáramo koʼãva peikuaa pende rukuéra rehegua, ha avei tembiapo techapyrã ojejapovaʼekue ijapytepekuéra Tupã puʼaka rupive.

10 Ha peikuaáta avei peẽ haʼeha peteĩ Jacob ñemoñare rembyre; upévare pejeipapa tavayguakuéra peteĩha konvénio apytépe; ha pegueroviáramo Cristo-pe, ha peñemongarai, ýpe raẽ, ha upe rire tatápe ha Espíritu Santo-pe, pejapóvo ñande Salvador ohechaukáva, haʼe heʼi haguéicha ñandéve, upéicharamo ohoporãta peẽme huísio árape. Amén.