1 Ha koʼág̃a che ambopaha che kuatiajehaipyre che tavayguakuéra, Nefita-kuéra, ñehundíre. Ha ojehu roguata lamanita-kuéra renonderã.

2 Ha che, Mormón, ahai peteĩ kuatiañeʼẽ lamanita-kuéra rréipe, ha ajerure chupe oheja hag̃ua rombyaty ore tavayguakuéra tetã Cumorah-pe, peteĩ yvyty hérava Cumorah ypýpe, ha upépe romeʼẽ hag̃ua chupekuéra ñorairõ.

3 Ha ojehu lamanita-kuéra rréi omeʼẽ chéve ajerurevaʼekue.

4 Ha ojehu roguata Cumorah retã gotyo, ha romoĩ ore rogaao yvyty Cumorah jerére; ha opyta peteĩ tenda oĩháme heta y, ysyry, ha ykua; ha koʼápe rohaʼarõ orepuʼaka lamanita-kuérare.

5 Ha ohasa rire trescientos ochenta y cuatro ary, rombyatýkuri opa ore tavayguakuéra rembyre tetã Cumorah-pe.

6 Ha ojehu rombyaty rire peteĩme opa ore tavayguakuéra, tetã Cumorah-pe, péina ápe che, Mormón, añepyrũ chetuja; ha aikuaávo haʼeha hína che tavayguakuéra ñorairõ paha, ha Ñandejára heʼíguikuri chéve ani hag̃ua aheja umi kuatiajehaipyre imarangatúva, ojehaivaʼekue ore tuvakuérare, hoʼa lamanita-kuéra pópe, (lamanita-kuéra ohundínegui umíva) upévare che ajapo ko Nefi pláncha kuatiajehaipyre, ha añomi yvyty Cumorah-pe opa kuatiajehaipyre oñemeʼẽvaʼekue chéve Ñandejára po rupive, ha koʼã pláncha mbovymi ameʼẽvakue che raʼy Moroni-pe añónte katu nahániri.

7 Ha ojehu che tavayguakuéra, hembireko ha itaʼyrakuéra reheve, ohecha lamanita-kuéra ehérsito ouha hesekuéra; ha pe kyhyjevai ñemanógui omyenyhẽva opa hekoñañáva korasõ reheve, ohaʼarõ og̃uahẽ hikuái.

8 Ha ojehu ou hikuái orerehe ñorairõme, ha opa ánga henyhẽ kyhyjevaígui hetaiterei haguére hikuái.

9 Ha ojehu hoʼa hikuái che tavayguakuéra ári kysepuku reheve, ha huʼy, ha yvyrapã, ha hácha, ha opáichagua árma ñorairõrã reheve.

10 Ha ojehu oity hikuái che soldadokuérape, heẽ, jepe umi diez mil oĩva chendivépe, ha che ajekutúgui haʼa ijapytepekuéra; ha ohasarei hikuái che aĩha rupi ha upévare ndachejukái hikuái.

11 Ha ohasa rire hikuái mbyte rupi ha oity rire opavave che tavayguakuérape ha veinticuatro orekuérapente nahániri, (ijapytepekuéra oĩ che raʼy Moroni) ha ore roikovévo ore tavayguakuéra omanovaʼekue apytégui, rohecha upe koʼẽme, lamanita-kuéra oho rire hendakuérape, yvyty Cumorah ruʼãgui, umi diez mil ore tavayguakuéra ojeityvaʼekuépe, umi che aisãmbyhyvaʼekue.

12 Ha rohecha avei umi diez mil che tavayguakueraguáva che raʼy Moroni oisãmbyhyvaʼekue.

13 Ha péina ápe, umi diez mil Gidgiddona mbaʼéva hoʼákuri, ha haʼe avei imbytepekuéra.

14 Ha hoʼákuri Lámah idiez mil reheve; ha Gilgad hoʼákuri idiez mil reheve; Límhah hoʼákuri idiez mil reheve; ha Jeneum hoʼákuri idiez mil reheve; ha hoʼákuri Cumeníah, ha Moroníah, ha Antiónum, ha Shiblom, ha Shem, ha Josh, ha opavave idiez mil reheve.

15 Ha ojehu oĩve diez hoʼavaʼekue kysepukúpe, opavave idiez mil reheve; heẽ, jepe opavave che tavayguakuéra hoʼákuri, haʼeʼỹramo umi veinticuatro oĩva chendive, ha avei mbovymi okañyvaʼekue tetã surguápe, ha ambue mbovymi ohasavaʼekue lamanita-kuéra apytépe; ha hoʼo, ha ikanguekuéra, ha huguy oĩ yvy ape ári, ohejarei rire chupekuéra umi ijukaharekuéra po oñembyai hag̃ua yvy ári, ha oñemonguʼi ha ohojey hag̃ua isy yvýpe.

16 Ha che ánga chejopy jepyʼapýgui, che tavayguakueragua ojejukavaʼekuére, ha haʼeʼasy:

17 O peẽ peneporãitéva, mbaʼéicha piko pejeíraʼe Ñandejára rapégui! O peẽ peneporãitéva, mbaʼéicha piko perrechasáraʼe pe Jesús-pe, ohaʼarõva ijyva jepyso reheve penemog̃uahẽ hag̃ua!

18 Péina ápe, ndapejapóirire upéva, ndapeʼaivaʼerãmoʼã. Ha katu péina ápe, peʼákuri, ha ajaheʼo pene ñehundíre.

19 O taʼýra ha tajýra porãite, peẽ túva ha sykuéra, peẽ ména ha tembirekokuéra, peẽ peneporãitéva, mbaʼéicha piko peʼáraʼe!

20 Ha katu péina ápe, napeimevéima, ha che vyʼaʼỹ ndaikatúi pendeguerujey.

21 Ha pyaʼe ou ára pene ñemanokuaa oñemondetaha ñemanokuaaʼỹme, ha koʼã tete koʼág̃a oñembyaíva pyaʼe oñemoambuéta tete oñembyaiʼỹvape; ha upéramo peñemboʼyvaʼerã Cristo trivunal renondépe, pejehusga hag̃ua pene rembiapokuére; ha penderekojojáramo, upéicharõ pejehovasapyre pende rukuéra peẽ mboyvegua ndive.

22 O peñearrepentírire ou mboyve pende ári ko ñehundivaiete. Ha katu péina ápe, napeimevéima, ha Túva, heẽ, Túva Ijapyraʼỹva yvagapegua, oikuaa pene ñeime; ha haʼe ojapóta penendive ihustísia ha iporiahuverekopeguáicha.