1 Ha koʼág̃a ojehu ary trescientos sesenta y tres-pe nefita-kuéra oho ijehérsito reheve oñorairõ hag̃ua lamanita-kuéra ndive, tetã Desolación okaháre.

2 Ha ojehu nefita-kuéra ehérsito oñembojevy jey tetã Desolación peve. Ha ikaneʼõ jave gueteri hikuái, hoʼa hiʼarikuéra peteĩ lamanita-kuéra ehérsito ikaneʼõʼỹva; ha oiko peteĩ ñorairõ mbarete, upéicha rupi lamanita-kuéra ojagarra tetã Desolación, ha ojuka heta nefita-kuéra, ha ojagarra heta prisionéro.

3 Ha hembyre oñani ha ojoaju umi oikóvare tavaguasu Teáncum-pe. Koʼág̃a tavaguasu Teáncum opyta pe hembeʼýpe yguasu ykére; ha opyta avei tavaguasu Desolación ypýpe.

4 Ha nefita-kuéra ehérsito ou haguére lamanita-kuéra ári oñepyrũ ojeipyʼajopy chupekuéra; ndaʼupéichai rire, lamanita-kuéra ndaipuʼakaivaʼerãmoʼã hesekuéra.

5 Ha katu, péina ápe, Tupã huísio oúta hekoñañávape; ha hekoñañáva rupi umi hekoñañáva ojehavira; koʼã hekoñáva omokyreʼỹgui yvypóra raʼykuéra korasõ tuguy ñeñohẽrã.

6 Ha ojehu lamanita-kuéra oñembosakoʼi oho hag̃ua tavaguasu Teáncum ári.

7 Ha ojehu ary trescientos sesenta y cuatro-pe lamanita-kuéra ou tavaguasu Teáncum ári, ojagarra hag̃ua avei tavaguasu Teáncum.

8 Ha ojehu nefita-kuéra oñemoĩ hesekuéra ha ombojevy chupekuéra. Ha nefita-kuéra ohechávo ombojevyha lamanita-kuérape oñembotuicha jey hikuái imbaretére; ha osẽ ojeroviávo ipuʼaka rehe, ha ojagarra jey hikuái tavaguasu Desolación.

9 Ha koʼág̃a opa koʼã mbaʼe oikókuri, ha omano miles mokõive hendápe, nefita ha lamanita-kuéra apytépe.

10 Ha ojehu ohasáma ary trescientos sesenta y seis, ha ou jey ñorairõme lamanita-kuéra nefita-kuérare; ha nefita-kuéra noñearrepentíri gueteri umi mbaʼevai ojapovaʼekuégui, ha katu opyta meménte hikuái hembiapoñañáme.

11 Ha ndaikatúi kũ omombeʼu, térã yvypóra ohai peteĩ ñemombeʼupa porã mbaʼevaiete tuguy ha jejuka rehegua oikóva tavayguakuéra apytépe, mokõive, nefita ha lamanita-kuéra apytépe; ha opa korasõ oñemohatã, ha ovyʼa hikuái tuguy ñeñohẽ memépe.

12 Ha arakaʼeve ndaiporivaʼekue tuichaite tekoñaña Lehi raʼykuéra apytépe, ni opa Israel rogagua apytépe, Ñandejára ñeʼẽme heʼiháicha, oĩ haguéicha koʼã tavayguakuéra apytépe.

13 Ha ojehu lamanita-kuéra ojagarra tavaguasu Desolación, ha upéva hetavégui hikuái nefita-kuéragui.

14 Ha oho avei hikuái tavaguasu Teáncum rehe, ha omosẽ ipypégui umi upépe oikóvape, ha ojagarra hikuái heta prisionéro, kuña ha mitãva avei, ha oikuaveʼẽ hikuái chupekuéra hiʼidolokuérape.

15 Ha ojehu ary trescientos sesenta y siete-pe, nefita-kuéra ipochyetereígui lamanita-kuéra oikuaveʼẽ haguére hikuái hembireko ha itaʼyrakuéra hiʼídolope, oho lamanita-kuéra rehe oguerekópe pochyvaiete, upéicha ipuʼaka jey hikuái lamanita-kuérare, ha omosẽ chupekuéra hetãgui.

16 Ha lamanita-kuéra ndouvéi nefita-kuérare ary trescientos setenta y cinco peve.

17 Ha upe arýpe hoʼa hikuái nefita-kuéra ári opa ipuʼaka reheve; ha ndojeipapái hetaitereígui hikuái.

18 Ha upe guive nefita-kuéra ndaipuʼakavéiva lamanita-kuérare, ha katu oñepyrũ ojegueraha hesekuéra jepeve ysapy kuarahy renondepeguáicha.

19 Ha ojehu lamanita-kuéra hoʼa tavaguasu Desolación ári; ha oiko peteĩ ñorairõ mbareteterei Desolación retãme, ha ipuʼaka hikuái nefita-kuérare.

20 Ha oñani jey hikuái henonderãkuéra, ha og̃uahẽ hikuái tavaguasu Boaz-pe; ha upépe oñemoĩ hikuái lamanita-kuérare tuicha kyhyjeʼỹme, ha upéicha rupi lamanita-kuéra ndaipuʼakái hesekuéra ndahaʼéiramo ou jey peve mokõiha jey hiʼarikuéra.

21 Ha ou rire hesekuéra mokõiha jey, nefita-kuéra oñembojevy ha ojejuka tuichaiterei jejukápe; ha hembireko ha imembykuéra oñeikuaveʼẽ jey idolokuérape.

22 Ha ojehu nefita-kuéra oñani jey henonderãkuéra, oguerahávo hendivekuéra opa upépe oikóvape, tavaguasu ha tapỹikuérape.

23 Ha koʼág̃a che, Mormón, ahechávo lamanita-kuéra ojagarratamaha upe tetã, upévare aha yvyty Shim-pe, ha ajagarra opa kuatiajehaipyre Ammarón oñomivaʼekue Ñandejárape g̃uarã.