Mormón Kuatiañeʼẽ

1 Ha koʼág̃a che, Mormón, ajapo peteĩ kuatiajehaipyre umi mbaʼe ahecha ha ahenduvaʼekuégui, ha ambohéra Mormón Kuatiañeʼẽ.

2 Ha ára Ammarón oñomiramoguare rupi Ñandejárape g̃uarã kuatiajehaipyrekuéra, haʼe ou chéve, (che oiméne aguerekókuri upéramo 10 ary, ha añepyrũ añehekomboʼeʼimi che tavayguakuéra kuaapýpe) ha Ammorón heʼi chéve: Ahecha nde haʼeha peteĩ mitã iñakãguapýva, ha ipyaʼéva ojesareko hag̃ua;

3 Upévare, reguereko vove veinticuatro ary aipota nemanduʼa umi mbaʼe rehechavaʼekue ko tavayguakuéra reheguáre; ha rehupyty vove upe ary tereho Antum retãme, peteĩ yvyty hératava Shim-pe; ha upépe amoĩkuri Ñandejára rembipotápe opa kuatiajehaipyre marangatu koʼã tavayguakuéra rehegua.

4 Ha péina ápe, rejagarráta nendive Nefi planchakuéra, ha ambuekuéra rehejáta tenda oĩhámevoi; ha Nefi planchakuéra ári rehaíta opa mbaʼe rehechavaʼekue koʼã tavayguakuéra rehegua.

5 Ha che, Mormón, haʼévo Nefi ñemoñare, (ha che ru réra haʼékuri Mormón) chemanduʼa umi mbaʼe Ammarón heʼivaʼekuére chéve.

6 Ha ojehu aguerekópe che, once ary, che ru chegueraha sur gotyogua retãme, jepe Zarahemla retãme.

7 Ha opa yvy ape henyhẽkuri ogaguasúgui, ha tavayguakuéra hetaiterei, haimete yvykuiʼi yguasupeguáicha.

8 Ha ojehu ko arýpe oñepyrũ peteĩ ñorairõguasu nefita-kuéra apytépe, haʼéva nefita, jacobita, josebita ha zoramita-kuéra; ha ko ñorairõguasu haʼékuri nefita, ha lamanita ha lemuelita ha ismaelita-kuéra apytépe.

9 Koʼág̃a lamanita, lemuelita ha ismaelita-kuéra oñembohéra lamanita, ha mokõive aty héra nefita ha lamanita-kuéra.

10 Ha ojehu oñepyrũ ñorairõguasu ijapytepekuéra Zarahemla rembeʼýpe, Sidón ykuéra ypýpe.

11 Ha ojehu nefita-kuéra ombyaty heta kuimbaʼe, jepe hetave treinta mil-gui. Ha ojehu ko arýpe oikókuri heta ñorairõ, nefita-kuéra ipuʼakahápe lamanita-kuérare ha heta ojuka chupekuéra.

12 Ha ojehu lamanita-kuéra ohejarei pe ojaposéva, ha oĩ pyʼaguapy upe tetãme; ha pyʼaguapy hiʼare irundy ary aja, ha upéicha ndaipóri tuguy ñeñohẽ.

13 Ha katu imbareteve tekoñaña yvy ape ári, upéicha rupi Ñandejára oipeʼa hemimboʼekuéra marangatu, ha ndaiporivéi milágro ha ñemonguera tavayguakuéra rembiapovai rupi.

14 Ha ndaipóri umi Ñandejára don, ha pe Espíritu Santo ndoguejýi avave ári, hekoñaña ha ijegueroviaʼỹ rupi.

15 Ha che, ag̃uahẽvo quince arýpe ha cherekokatu haguére, upévare Ñandejára ou cherendápe, ha añandu ha aikuaa Jesús pyʼaporã.

16 Ha añehaʼã ahekomboʼe koʼã tavayguakuérape, ha katu ajejurumboty, ha oñembotove chehegui ahekomboʼe hag̃ua chupekuéra; péina ápe oñemoĩ haguére hikuái oñemoĩséguikuri Itupãre; ha umi temimboʼe ojehayhuetéva ojeipeʼákuri yvy ape árigui, hembiapovai rupi.

17 Ha katu che apyta ijapytepekuéra, ha katu oñembotove chehegui ahekomboʼe hag̃ua chupekuéra, ikorasõ atãgui hikuái; ha ikorasõ atã haguére yvy oñemoñeʼẽngái hesekuéra rupi.

18 Ha koʼã Gadiantón mondahakuéra, oĩva lamanita-kuéra apytépe, omyenyhẽ upe tetã, upéicha rupi umi upépe oikóva oñepyrũ oñomi imbaʼehepykuéra yvyguýpe; ha umíva okañyrei, Ñandejára omoñeʼẽngáigui pe yvy, upéicha rupi ndaikatúi ojoko ni ohupyty jey hikuái imbaʼehepykuéra.

19 Ha ojehu oĩ paje, ha echisería, magia; ha aña puʼaka ombaʼapo opa upe yvy ape ári, jepe oñekumplipa peve ñeʼẽ heʼivaʼekue Abinadí ha avei Samuel upe lamanita.