1 Ha ojehu lamanita-kuéra ndouvéi ñorairõme ohasa peve diez ary. Ha péina ápe, che amombaʼapókuri che tavayguakuéra, nefita-kuérape, ombosakoʼi hag̃ua hikuái ijyvy ha hiʼarmakuéra ñorairõ árape g̃uarã.

2 Ha ojehu Ñandejára heʼi chéve: Ere koʼã tavayguakuérape—Peñearrepenti, ha peju cherendápe, ha peñemongarai, ha pemoĩ jey che tupao, ha pejesalváta.

3 Ha haʼe koʼã tavayguakuérape, ha katu haʼerei; ha ndohechakuaái hikuái Ñandejára operdonahague chupekuéra, ha ohejahague chupekuéra oñearrepenti hag̃ua. Ha péina ápe omohatã hikuái ikorasõ Ñandejára Itupã rehe.

4 Ha ojehu ohasa rire ko désimo ary, haʼévo, trescientos sesenta ary Cristo jeju guive, lamanita-kuéra rréi ombou chéve peteĩ kuatiañeʼẽ oikuaaukávo oñembosakoʼiha hína hikuái ou jey hag̃ua ñorairõme orerehe.

5 Ha ojehu ambyatyka che tavayguakuéra tetã Desolación-pe, peteĩ tavaguasu oĩva rembeʼýpe, tape poʼi ohóva surgua yvy ypýpe.

6 Ha upépe romoĩ ore ehérsito, rojoko hag̃ua lamanita-kuéra ehérsito, ani hag̃ua ohupyty hikuái ni peteĩ ore yvykuéra; upévare roñemombarete hesekuéra opa ore soldádo reheve.

7 Ha ojehu ary trescientos sesenta y uno-pe lamanita-kuéra og̃uahẽ tetã Desolación-pe oñorairõ hag̃ua orendive; ha ojehu orepuʼaka hesekuéra upe arýpe, upéicha rupi oho jey hikuái hetãme.

8 Ha ary trescientos sesenta y dos-pe ou jey hikuái ñorairõme. Ha orepuʼaka jey hesekuéra, ha rojuka hetápe, ha heʼõnguekuéra oñemombo yguasúpe.

9 Ha koʼág̃a, ko tuichaite mbaʼe ohupytyvaʼekuére che tavayguakuéra, nefita-kuéra, oñepyrũ oñembotuicha hikuái imbarete haguére, ha oñepyrũ oñeʼẽmeʼẽ hikuái yvagakuéra renondépe ovengataha ijoykeʼykuéra ruguy ojejukavaʼekue ijehayhuʼỹhakuérare.

10 Ha oñeʼẽmeʼẽ hikuái yvágare, ha avei Tupã apykajeguáre, ohotaha hikuái ñorairõme ihayhuʼỹhakuéra rehe, ha omosẽtaha chupekuéra yvy ape árigui.

11 Ha ojehu upe ára guive che, Mormón, añenega haʼe hag̃ua koʼã tavayguakuéra tendota ha mburuvicha, hembiapoñaña ha hembiapokyʼa rupi.

12 Ha péina ápe, che aisambyhýkuri chupekuéra, jepe hembiapoñaña hikuái che aisãmbyhy chupekuéra ñorairõme heta ára, ha ahayhúkuri chupekuéra, Tupã mborayhu oĩva chepypéicha, che korasõite guive; ha che ánga oñeñohẽvaʼekue ñemboʼépe Tupãme hesekuéra opa ára pukukue; upevére, haʼékuri jeroviaʼỹme, ikorasõ atãgui hikuái.

13 Ha mbohapy jey amosãsovaʼekue chupekuéra ihayhuʼỹhakuéra pógui, ha noñearrepentíri hikuái iñangaipakuéragui.

14 Ha oñeʼẽmeʼẽ rire hikuái opa mbaʼe Ñandejára Jesucristo ombotovevaʼekue chuguikuéra rehe, ohotaha hikuái ihayhuʼỹhakuérare ñorairõme, ha ovengataha ijoykeʼykuéra ruguy, péina ápe Ñandejára ñeʼẽ ou chéve, heʼívo:

15 Che mbaʼe pe vengánsa, ha che ahepymeʼẽta; ha koʼã tavayguakuéra noñearrepenti haguére amosãso rire chupekuéra, péina ápe, oñemosẽta hikuái yvy ape árigui.

16 Ha ojehu añenega aha hag̃ua che rayhuʼỹhakuéra rehe; ha ajapo Ñandejára heʼi haguéicha chéve; ha haʼe testígonte ahechauka hag̃ua yvórape umi mbaʼe che ahecha ha ahenduvaʼekue, pe Espíritu ohechaukaháicha, otestifikáva umi mbaʼe oútavagui.

17 Upévare che ahai peẽme, gentil-kuéra, ha avei peẽme, Israel róga, oñepyrũ vove pe tembiapo, peiméma hag̃ua ñembosakoʼípe pehojey hag̃ua pende yvy jehejapyrépe.

18 Heẽ, péina ápe, che ahai opa yvy pahápe g̃uarã; heẽ, peẽme, doce trívu Israel-pegua, pejehusgátava pene rembiapokuére umi doce Jesús oiporavovaʼekuére Jerusalén retãme haʼe hag̃ua hemimboʼekuéra.

19 Ha ahai avei koʼã tavayguakuéra rembyrépe g̃uarã, ojehusgátava avei umi doce Jesús oiporavovaʼekuére ko tetãme; ha koʼãva ojehusgáta umi ambue doce Jesús oiporavovaʼekue Jerusalén retãme rehe.

20 Ha pe Espíritu ohechauka chéve koʼã mbaʼe; upévare ahai mayma peẽme. Ha upévare ahai peẽme, peikuaa hag̃ua opavave pehovaʼerãha Cristo trivunal renondépe, heẽ, opavave ánga haʼéva Adán yvypóra rogaygua; ha peñemboʼyvaʼerã pejehusga hag̃ua pene rembiapokuére, tahaʼe iporãva térã ivaíva;

21 Ha avei peguerovia hag̃ua Jesucristo evanhélio, peguerekótava pende apytépe; ha avei judio-kuéra, Ñandejára konvénio tavayguakuéra, oguereko hag̃ua ambue testígo ohecha ha ohenduvaʼekuégui, upe Jesús, ojukavaʼekuépe hikuái, haʼehague Cristo añetegua ha Tupã añetegua.

22 Ha ikatúmoraʼe pomokyreʼỹ opavave peẽme yvy pahakuérape peñearrepenti ha peñembosakoʼi hag̃ua peñemboʼy hag̃ua Cristo trivunal renondépe.