1 Kedekedeo I ahpw kohwei rehn Mehn Nihpai kan, oh peki mahngki kahula me I wiahda me sohte pahn pwurehng sowese irail; oh irail kihong ie I en pwurehng kaunda neirail sounpei kan, pwe irail kilang ie duwehte me I pahn kak doarehsang irail nan arail kahpwal kan.

2 Ahpw kilang, I sohla ahneki koapworopwor, pwe I ese me sapwellimen Kauno kopwung me pahn kohdohng irail; pwe irail sohte koluhkihla diparail akan, ahpw wie nannantihong nan arail mour ni arail sohte peki rehn Kauno me kapikada irail.

3 Kedekedeo Mehn Leimen kan ahpw kohdohng kiht ni aht tang kohla nan kahnihmw en Sordan; pwe kilang, irail pwepwekihla kahrehda irail sohte kihsang kahnihmwo ahnsouo.

4 Kedekedeo irail pwurehng kohdohng kiht, oh se katengetengdi nan kahnihmwo. Oh pil mie ekei kahnihmw me mehn Nihpai kan kolokolete, me silepe kan kauhdi irail sang re en pidelong nan wehio me mih mwoht, pwe en kawehla tohn sapwato.

5 Ahpw kedekedeo sahpw koaros me se daulih, oh toweh kan sohte kohpene, Mehn Leimen kan kamwomwala irail, oh arail kousoan kan, oh kousapw kan, kahnihmw kan isihsla; oh met kaimwsekalahr pahr silipwiki isihsek duwao.

6 Kedekedeo nan pahr silipwiki welihseko Mehn Leimen kan ahpw pwurehng kohdohng mahwiniong kiht, oh se peliankinirail aht eimah; ahpw e sohte katepe, pwehki uwen tohtohn irail irail tiakpene aramas en Nihpai kan pahn nehrail kan.

7 Kedekedeo se ahpw pwurehng tang, oh irail kan me tang mwadang sang Mehn Leimen kan irail pitila, oh irail kan me tang pwand sang Mehn Leimen kan irail palidi oh kamwomwala.

8 Oh met kilang, ngehi, Mormon, sohte inangih I en kalokehki loallen aramas ni ei pahn kasalehda mwohrail kilel en kamaramas oh mehla me mih mwohn meseiet; ahpw pwehki ei wehwehki me mepwukat udahn pahn sansalada, oh me soahng koaros me ekiekla udahn pahn sansalada pohn ihmw kan—

9 Oh me pil wehwehn mepwukat udahn pahn kohdohng kisehng aramas pwukat, oh pil ong Mehn Liki kan, me Kauno ketin mahsanih pahn kamwerepeseng aramas pwukat, oh aramas pwukat pahn sohte katepe ong irail—eri I pahn ntingihda ekiste oarelap, oh sohte pahn udahn sair ni unsek soahng kan me I kilang, pwehki kosonned me I alehdi, oh pil me kumwail sohte pahn ahneki pahtou laud pwehki wiewia suwed en aramas pwukat.

10 Oh met kilang, I koasoieng kadaudokerail kan, oh pil Mehn Liki kan me kesempwaliki peneinei en Israel, me wehwehkihda oh ese sang iawasa arail kapai kohsang.

11 Pwe I ese me met pahn kahrehda arail pahtouki kahpwal me pahn kohieng peneinei en Israel, ei, irail pahn pahtoukihla kamwomwala aramas pwukat; irail pahn pahtouki aramas pwukat arail sohte koluhkihla pwe Sises en kak aleirailda nin lime kan.

12 Met mepwukat ntingwehng luhwen peneinei en Seikop; oh e ntingdi ni mwohmw wet, pwehki Koht ketin mwahngi me wiwia suwed sohte pahn kahluwahdo mepwukat ong irail; oh mepwukat pahn nekinekla ong Kauno pwe sang pein sapwellime ahnsou mepwukat pahn kohdo.

13 Oh met iei kosonned me I alehdi; oh kilang, mepwukat pahn kohdo nin duwen sapwellimen kauno kosonned, ahnsou me e pahn ketin mwahngi me e konehng, sang ni sapwellime eripit.

14 Oh kilang, mepwukat pahn kohwei rehn mehn Suhs me sohte kamehlele kan; oh iei kahrepe wet mepwukat pahn kohwei—pwe irail en kak esehda me Sises iei Krais, Sapwellimen Koht ieiaso; me Sahmo pahn ketikihda, sang rehn sapwellime keieu Kempoako, sapwellime koasoandi lap oh soutuk, ong kapwurehdo mehn Suhs kan, de peneinei en Israel koaros, ong nan sapwarail sahpw en sohso, me Kauno arail Koht ketikihong irail, pwe sapwellime inouo en pweida;

15 Oh pil pwe kadaudok en aramas pwukat en kamehlelehda ni unsek sapwellime rongamwahu, me pahn kohwei sang rehrail ong Mehn Liki kan; pwe aramas pwukat pahn mwerpeseng, oh pahn wiahla aramas rotorot, samin, oh kailok, me pahn siksang me wiawihong kitailehr, iei, dahme wiawihiong Mehn Leimen kan, oh me pwehki arail sohpwoson oh kin pwongi dikadik en eni.

16 Pwe kilang, Ngehn en Kauno solahr ieiang arail pahpa ko; oh sohte Krais oh Koht rehrail nan sampah; oh irail pwepwekihwei duwehte dihpw kisinieng eh kin ipirseli dihpw meng.

17 Irail wia aramas mwahu ahnsou ehu, oh irail kin wiahki Krais silaparail; ei, Koht Sahm kin kahluwa irail.

18 Ahpw met, kilang, Sehdan me kakahluwa irail, iei duwehte kisinineng eh kin ipirseli dihpw meng, de duwehte wahr ieu me kin lekidekseli nan ilok kan, ni eh sohte serek de angke, de sohte mehkot kak kainene; oh nin duwen met, iei pil pahn mwomwarail.

19 Oh kilang, Kauno ketin koledi arail kapai kan, me irail kakete alehdi nan sahpwo, pwe Mehn Liki kan me pahn kousoanla nan sahpwo.

20 Ahpw kilang, ahnsou pahn lelledo me Mehn Liki kan pahn pwakih irail oh kamwereirailpeseng; oh mwurin Mehn Liki kan ar pahn pwakih irail oh kamwereirailpeseng, kilang, Kauno ahpw pahn tamanda inou me ketin inoukihong Eipraam oh ong peneinei en Israel koaros.

21 Oh pil Kauno pahn tamataman kapakap en me mwahu kan, me kohlahngehr ih sang irail.

22 Oh eri, kumwail Mehn Liki kan, ia mwomwen amwail pahn kak kesihnen mwohn manaman en Koht, ma kumwail sohte koluhla oh sohpeisang amwail wiwia suwed kan?

23 Kumwail sohte ese me Koht me ketin doandoare kumwail? Kumwail sohte ese me e ketin sapwellimaniki manaman koaros, oh sang ni sapwellime pahngok sampah pahn kohpene duwehte doaropwe ehu me weliwelpene?

24 Eri, kumwail koluhla, oh karakarahkala mwowe, pwe e de pahn kohdohng kumwail nan kopwung pwung—pwe luhwen kadaudok en Seikop pahn kohwei nanpwungamwail rasohng laion, oh tehr kumwailpeseng, oh sohte me pahn kak doarehla.