1 Ug nahitabo nga nianang mao nga tuig dihay misugod na usab nga usa ka gubat tali sa mga Nephita ug sa mga Lamanita. Ug bisan pa sa akong pagkabatan-on, dako ang pamayhon; busa gitudlo ko sa katawhan ni Nephi nga ako mahimo nilang pangulo, o pangulo sa ilang mga kasundalohan.

2 Busa nahitabo nga sa akong ikanapulo ug unom ka tuig ako ang nangulo sa mga sundalo sa mga Nephita, batok sa mga Lamanita; busa tulo ka gatos ug kawhaan ug unom ka tuig ang milabay.

3 Ug nahitabo nga sa ikatulo ka gatos ug kawhaan ug pito nga tuig ang mga Lamanita misulong kanamo uban sa hilabihan ka dako nga gahom, hangtod nga ilang nahadlok ang akong mga kasundalohan; busa dili sila makig-away, ug misibog sila paingon sa amihanan nga mga rehiyon.

4 Ug nahitabo nga naabot kami sa siyudad sa Angola, ug among napanag-iya ang siyudad ug naghimo og mga pagpangandam sa pagpanalipod sa among kaugalingon batok sa mga Lamanita. Ug nahitabo nga gipalig-on namo ang siyudad kutob sa among mahimo; apan bisan pa sa tanan namo nga mga pagpalig-on ang mga Lamanita misulong kanamo ug mipapahawa kanamo sa siyudad.

5 Ug sila usab mipapahawa kanamo sa yuta ni David.

6 Ug nagmartsa kami ug naabot sa yuta sa Josue, nga anaa sa mga utlanan sa kasadpan nga dapit sa baybayon.

7 Ug nahitabo nga gipundok namo ang among katawhan sa labing paspas kutob sa mahimo, aron mapundok namo sila sa usa ka pundok.

8 Apan tan-awa, ang yuta napuno sa mga tulisan ug sa mga Lamanita; ug bisan pa sa dakong kalaglagan nga nagsingabot sa akong katawhan, wala sila maghinulsol sa ilang daotan nga mga buhat; busa dihay pagpaagas sa dugo ug pagpamatay nga mikatap sa ibabaw sa tibuok yuta, sa habig sa mga Nephita ug usab sa habig sa mga Lamanita; ug usa kadto ka hilabihan ka dako nga kagubot sa ibabaw sa tibuok yuta.

9 Ug karon, ang mga Lamanita adunay usa ka hari, ug ang iyang ngalan mao si Aaron; ug misulong siya kanamo uban sa kap-atan ug upat ka libo ka kasundalohan. Ug tan-awa, nakigharong ako kaniya kauban sa kap-atan ug duha ka libo. Ug nahitabo nga napildi nako siya uban sa akong mga kasundalohan ug milayas siya sa akong atubangan. Ug tan-awa, nahitabo kining tanan, ug tulo ka gatos ug katloan ka tuig ang milabay.

10 Ug nahitabo nga ang mga Nephita misugod sa paghinulsol sa ilang pagkadaotan, ug misugod sa pagsinggit sama sa gitagna ni Samuel nga propeta; kay tan-awa walay tawo nga padayong makaangkon nianang iyang gipanag-iya, tungod sa mga kawatan, ug sa mga tulisan, ug sa mga mamumuno, ug sa kahanas sa salamangka, ug sa pamarang nga anaa sa yuta.

11 Sa ingon niana dihay misugod nga pagbangotan ug pagbakho sa tibuok yuta tungod niini nga mga butang, ug labi na gayod taliwala sa katawhan ni Nephi.

12 Ug nahitabo nga sa diha nga ako, si Mormon, nakakita sa ilang pagbakho ug sa ilang pagbangotan ug sa ilang kasubo sa atubangan sa Ginoo, ang akong kasingkasing misugod sa pagmaya sulod kanako, nasayod sa mga kaluoy ug sa pagkamainantoson sa Ginoo, busa nagtuo nga siya magmaluluy-on ngadto kanila nga sila mahimo na usab nga mga tawo nga matarong.

13 Apan tan-awa, kining akong kamaya walay kapuslanan, kay ang ilang kasubo wala mosangpot sa paghinulsol, tungod sa kaayo sa Dios; apan tungod sa kasubo sa mga gipanghimaraot, tungod kay ang Ginoo sa kanunay dili motugot kanila nga maglipay diha sa sala.

14 Ug wala sila moduol ngadto ni Jesus uban sa masulob-on nga mga kasingkasing ug mahinulsolon nga mga espiritu, apan gitunglo nila ang Dios, ug nangandoy nga mamatay. Bisan pa niana nakig-away sila pinaagi sa espada alang sa ilang mga kinabuhi.

15 Ug nahitabo nga ang akong kasubo mibalik ngari kanako pag-usab, ug akong nakita nga ang adlaw sa grasya milabay na kanila, sa temporal ug sa espirituhanon nga paagi; kay akong nakita nga ang liboan kanila gipatay diha sa dayag nga pagsupil batok sa ilang Dios, ug nagtipun-og sama sa mga iti sa ibabaw sa yuta. Ug sa ingon niana tulo ka gatos ug kap-atan ug upat ka tuig ang milabay.

16 Ug nahitabo nga sa ikatulo ka gatos ug kap-atan ug lima nga tuig ang mga Nephita misugod sa pagpanglayas sa atubangan sa mga Lamanita; ug gipanggukod sila hangtod nga miabot sila gani ngadto sa yuta sa Jashon, sa dili pa mahimo ang pagpahunong kanila sa ilang pagsibog.

17 Ug karon, ang siyudad sa Jashon anaa duol sa yuta diin gitipigan ni Ammaron ngadto sa Ginoo ang mga talaan, aron dili kini madaot. Ug tan-awa miadto ako sumala sa pulong ni Ammaron, ug midala sa mga palid ni Nephi ug mihimo og usa ka talaan sumala sa mga pulong ni Ammaron.

18 Ug diha sa mga palid ni Nephi mihimo ako og hingpit nga asoy sa tanang pagkadaotan ug pagkasalawayon; apan dinhi niini nga mga palid akong gilikayan ang paghimo og hingpit nga asoy sa ilang pagkadaotan ug pagkasalawayon, kay tan-awa, ang nagpadayon nga talan-awon sa pagkadaotan ug pagkasalawayon anaa kanunay sa akong panan-aw sukad pa niadtong makahimo na ako sa pagsabot sa pamaagi sa tawo.

19 Ug alaot ako tungod sa ilang pagkadaotan; kay ang akong kasingkasing napuno sa kasubo tungod sa ilang pagkadaotan, sa akong tanang adlaw; bisan pa niana nasayod ako nga ako pagabayawon sa kataposan nga adlaw.

20 Ug nahitabo nga niini nga tuig ang katawhan ni Nephi gigukod na usab ug gipapahawa. Ug nahitabo nga gipapahawa kami hangtod nga miabot kami sa amihanan nga bahin ngadto sa yuta nga gitawag og Shem.

21 Ug nahitabo nga among gipalig-on ang siyudad sa Shem, ug among gipundok ang among katawhan kutob sa mahimo, aron maluwas namo sila gikan sa kalaglagan.

22 Ug nahitabo nga sa ikatulo ka gatos ug kap-atan ug unom nga tuig misugod sila sa pagsulong kanamo pag-usab.

23 Ug nahitabo nga namulong ako sa akong katawhan, ug nag-awhag kanila uban sa dako nga kalagsik, nga sila mobarog nga maisogon atubangan sa mga Lamanita ug makig-away alang sa ilang mga asawa, ug sa ilang mga anak, ug sa ilang mga balay, ug sa ilang mga panimalay.

24 Ug ang akong mga pulong mitandog kanila ngadto sa kalagsik, nga niana wala nila sibogi ang mga Lamanita, apan nakigharong uban sa kaisog batok kanila.

25 Ug nahitabo nga kaming mga sundalo nga katloan ka libo nakig-away batok sa mga sundalo nga kalim-an ka libo. Ug nahitabo nga nakigharong kami sa ilang atubangan uban sa ingon niana nga kalig-on nga sila misibog sa among atubangan.

26 Ug nahitabo nga sa dihang misibog na sila gigukod namo sila uban sa among mga kasundalohan, ug nakig-away kanila pag-usab, ug mipildi kanila; bisan pa niana ang gahom sa Ginoo wala mag-uban kanamo; oo, gipasagdan kami sa among mga kaugalingon, nga ang Espiritu sa Ginoo wala magpabilin uban kanamo; busa nahimo kaming huyang sama sa among kaigsoonan.

27 Ug ang akong kasingkasing nagsubo tungod niining dako nga katalagman sa akong katawhan, tungod sa ilang pagkadaotan ug sa ilang pagkasalawayon. Apan tan-awa, among gisulong ang mga Lamanita ug ang mga tulisan ni Gadianton, hangtod nga among nabawi pag-usab ang mga yuta nga among kabilin.

28 Ug ang ikatulo ka gatos ug ikakap-atan ug siyam nga tuig milabay. Ug sa ikatulo ka gatos ug kalim-an ka tuig mihimo kami og usa ka kasabotan uban sa mga Lamanita ug sa mga tulisan ni Gadianton, diin among bahinon ang mga yuta nga among kabilin.

29 Ug ang mga Lamanita mihatag kanamo sa yuta sa amihanan nga bahin, oo, gani ngadto sa pig-ot nga agianan nga paingon sa yuta sa habagatan nga bahin. Ug among gihatag ngadto sa mga Lamanita ang tanang yuta sa habagatan nga bahin.