Kadehde en Soukohp Sosep Smith

Pein ehn Soukohp Sosep Smith koasoi kan ong duwen kohdahn Pwuhk en Mormon iei duwe met:

“Ni soutik en … Septempe rieisek-ehu [1831] … I pein kapakap oh pekipeki ni karakarahk rehn Koht Wasa Lapalahpie. …

“Ni ahnsou me I wie kapakapiong Kauno, I diaradahr marain ehu pwaradahr nan ei pereo, me wie maramarainla lao e marain sang marain en souwas, ni ahnsouo aramas emen mwadangete pwarada limwahn ei pehto, keskesihnen nan wehwe, nehkan sohte sair nan tahto.

“E likouki likou puhp ehu me keieu pwetepwet. Me inenen pwetepwet sang mehkoaros me I kilangehr nan sampah; oh I sohte kamehlele me mie mehkot nan sampah me kin pwetepwetala oh linganla duwehte met. Patapa ten pehkan sansal, oh pil peh kan, ekiste pohn angin tepin tupwengen peh; oh pil paten nehkan me pil wie sansal, oh pil duwehte ekiste keidahsang ni koakon en pateneh kan. Moange oh tepinwere pil wie sansal. I kak kilang me sohte ehu likou me e likauih ihte likou puhp wet, nin duwen eh sansal, I kak kilang nan mwarmwarehu.

“Kaidehnte eh likou puhpo me pwetepwet mehlel, ahpw paliwere pwon me lingan sang mehkoaros oh ni mehlel pohn mesehu duwehte lioal. Nan pereo marainla mehlel, ahpw sohte duwehte marain me wie kapkapil ohlo. Ahnsou me I tepin kilangada ohlo; I ahpw masakada, ahpw ahnsou mwadang ei masako sohrasang ie.

“E likweri kin ie edei oh padahkiong ie me ih iei meninkeder men me pedekerdohng ie sang rehn Koht, oh ede iei Moronai; oh e koasoia me mie spawellimen Koht doadoahk ehu me I pahn wia; oh me edeiet pahn kin mwahu oh suwed nan wehi koaros, keinek koaros, oh lokaia koaros, de me aramas akan pahn kin koasoiahki mehkot mwahu oh suwed.

“E koasoia me mie pwuhk ehu serdier, nting kan mihmi pohn pileit kohl kan me audaudiki poadoapoad en tohn sahpwo keilahn aio oh wasa me irail tepisang ie. E pil kosoia me Rongamwahuo poatoapoat unseko mihmi loale, nin duwen Sounkomouro e ketikihongehr tohn wasao keilahn aio;

“Pil mie takai riau me mih pohn mehn iroir ehu me wiawihkihda silper ni mwomwen kesiketieu—oh takai riau wet, katengetengieng mehn perepen nan mwaramware ieu, me wiahda Urim oh Dummim—me seridier iangahki pileit ko; oh mehmen me pahn kolokol oh doadoahngki takai pwukat ih me kin wia ‘ohl sarawi’ keilahn aio de nan mwein kawa; oh me Koht ketin kaunopadahr ong kawehwehdi en pwuhko. …

“E pil pwurehng indahiong ie, me ahnsou me I pahn alehda pileit ko me e koasoiahier—pwe ahnsou me re pahn alahldi saikinte lelledo—I sohte pahn kasalehiong emen aramas; pil iangahki mehn perehpen nan mwaramwaro iangahki Urim oh Dummimo; ihte ong irail kan me I pahn mweimweiong en kasalehiong irail; ma I pahn wia I pahn kamwomwala. Ni ahnsou me e wie koasoakoasoiahiong ie duwen pileit ko, kaudiahl ehu pwarada nan ei madamadau kahrehda I kak kilang wasa me pileit ko seridi ie, oh I ese wasahu ni marain oh sansal mehlel ahnsou me I kohla wasahu.

“Mwurin aht koasoi pene, I diaradahr me marain en nan pereo tepier kohpene limwahn ohlo me wie koasoakoasoi ong ie, oh e wiwiahte mwo lao pereo pwurehng rotorotala, ihte limwah me sohte iang rotorotala; ni ahnsouohte I mwadangete kilangada ahl ehu pa ritpeseng nanleng, ih eri kokohdahla lao e sohrala douluhl, oh nan pereo pwuralahng ni mwomwehu mwohn marain en nanleng wet e pwarada.

“I wendi oh medemedewe duwen dahme I kilangehr, oh I medemedewe laud dahme meninkeder kesempwal menet kasalehiongehr ie; oh nan werengen ei wie medemedewe, I mwadangete diarada me ei pereo pil pwurehng wie maramarainda, oh ni ahnsouohte, meninkederohte pil pwurehng miher mpen ei pehto.

“E tepihada, oh pil pwurehng koasoiahdo soahngohte me wiahier ni eh tepin pwarohng ie, sohte kisin wekila ieu mie, eri ni ahnsou me nekiero, e ahpw padahkihong ie duwen kalokolok lap akan me pahn pwarada nan sampah, me pahn sang kahpwal lap akan en lehk, mahwin, oh soumwahu; oh me kalokolok apwal pwukat pahn kohdohng pohn sampah nan dih wet. Mwurin eh koasoiahier mepwukat, e ahpw pwurehng pwuradahla ni mwohmwohte me e wiahier mwowe.

“Sang ni ahnsou wet, I wendier oh pwuriamweikilahr mehlel duwen me I kilangehr oh rongehr nin duwen dahme wiawiher me inen loal nan ei madamadau me kahrehda I sohte kak meirkihla. Ahpw I pwuriamweikihla ahnsou me I pil pwurehng kilangada meninkederohte limwahn ei pehto, oh rong eh pwurehng kasalehda de kapwurehiong irehkohte me e kasaledahr mwowe; oh kapatahiong peneu en kaparkinie, me Sehdan pahn song en kasongosonge ie (pwehki irair en semwemwe me ei pahpa eh peneinei ahneki), en alehdi pileit kan pwe en kepwehpwehkihla. Met e keinapwih sang ie, ndinda me I sohte pahn medewe ehu soang en madamadau nan ei pahn ale pileit kan liki kalinganahla Koht, oh sohte pahn mwekidiki ehu soang tohrohr liki kaukauwada sapwellime wehi; ma soh, I sohte pahn kak alehdi.

“Mwurin kesilipak en eh pwarek ie, e pil pwuradahla nanleng duwehte me e wiahier mahso, oh ngei pwurehng kelehpwla oh medemedewe irair kapwuriamwei me I aptehn lellohng; mwurin ahnsouohte ni en meninkedero eh kesilipak en pwuradala sang rehi, maleko pa koakorot, oh I diaradahr me ni sohrahnehr, eri aht wie kosoakoasoipene udahn pahn mihmi ni erein pwohngo pwon.

“Mwurinte ei piridahsang pohn ei pehto, oh I kolahr pwe I en wia doadoahk kan me I kin kalapw wia nan ehu ehu rahn, ahpw ni ei song en wia ei doadoahk me I kin wia kan, I diaradahr me ei kehl solahr mie oh I ahpw solahr kak [wia ei doadoahk]. Ei pahpao, me wie doadoahk limwahi, diaradahr me mie mehkot sapwung rehi, ih eri ndahng ie I en kohla nihmwo. I ahpw tepida kohkohla nihmwo; ahpw, ni ei song kotehieila kehlo sang nan mwetuwelo wasa me se mihe, ei kehl koaros sohrasang ie, I ahpw pwupwidiongehr pohn pwehlo, oh ni ahnsou kis I sohla kehn mehkot.

“Tepin mehkot me I kak tamanda iei ngihl ehu me peidohng ie, ekehker edeie. I ahpw saradahr, oh kilangadahr meninkederohte me wie kesikesihnen pohn moangei, marain kapilpene duwehte mwowehsang. E ahpw padahkihong ie mehkoaros me e padahkihong ie pwohngo, oh kehkehlikihong ie me I en kohla rehn ei pahpao oh ndaiong ih sansal oh kosonned akan me I alehdahr.

“I peikiong ih; ngehi eri pwurala rehn ei pahpao nan mwetuwelo, oh padahkihongehr ih mehkoaros. Ih eri sapengki me met iei kupwuren Koht, oh e koasoia me I en kohla oh doadoahngki duwen kehkehlik en meninkedero. I ahpw mweseldahsangehr nan mwetuwelo, oh kolahng wasa me meninkedero padahkihong ie me pileitko seridi ie; I ese wasahu ni ahnsouohte me I lel mwo pwehki eh sansal mwahu nan kaudiahlo me I alehdi.

“Mie dohl ehu me saise mwahu oh me keieu ileile nan kousapwo, me karanihte kahnihmw en Manchester, New York. Ni pali kapi en aulo, pahnanginte koadokehu, pileitko seridihte nan kohpwahn takai ehu, pahn takai sais mwahu ehu. Takai wet me mosul oh pwonopwon nan werengehu wasa me pwerpwerda, oh menipinipla kohiei ni keileh kan, kahrehda nan werengehu me sansal pohn pwehlo, ahpw pwehlo saripidi ni keileh kan koaros.

“Mwurin ei oarehsang pwehlo, I ahpw ale lepin tuhke ehu, oh katengehiong pahn keilen takaio, oh pwisikada. I ahpw kilenglong loale, ngehi ahpw kilangada pileit ko, Urim oh Dummimo, oh mehn perehpen nan mwaramwaro, nin duwen meninkedero eh koasoia. Kohpwa me dipwsou ko mih loale wiawihkihda koaskoasok en takai me katengetengkipene soangen siment ehu. Nan kapin kohpwahu takai riau koasoansoandier, oh pileit ko oh soahng teikan koasoansoandier pohn takai pwukat.

“I song en kihsang dipwsou pwukat loale, ahpw meninkedero sohte mweidehng ie, oh pwurehng ndaiong ie me ahnsou en ale dipwsou pwukat saikinte lel, oh e sohte pahn wiawi, lao lel mwurin sounpar pahieu sang ahnsouo; ahpw e ndaiong ie me I pahn kohdo wasahu mwurin sounpar ehu sang ahnsouo, oh me e pahn tuhwong ie, oh me I pahn wiahte soahngo lao lel ahnsou me I pahn alehda pileit ko.

“Nin duwen kehkehlik me wiawihong ie, I kohla wasahu ni imwin ehu ehu pahr, oh nan ehu ehu ahnsou ko I kin tuhwon meninkederohte mwo, oh alehdi kaweid oh kamarain sang reh nan ehu ehu tuhpene ko, duwen dahme Kauno pahn ketin wia, oh ia pahn oh mwomwen sapwellime wehi eh pahn doadoahk ni imwin rahn akan. …

“Kedekedeo ahnsou en alehda pileit ko, Urim oh Dummimo, oh mehn perehpen nan mwaramwaro ahpw lel. Ni Septempe rieisek-riau, kid welipwiki rieisek-isuh, mwurin ei kin pwurupwure wasa me dipwisou ko seridi ie ni imwin ehu ehu pahr, meninkeder en nanlengohte ahpw kihong ie I en apwalih: me I pahn pwukoahki dipwisou ko; me ma I pahn mweidala ni sohte keneinei, de sang ni ei soukautih, I pahn lekidekla; ahpw ma I pahn doadoahngki ei kak koaros en apwalih mwahu, lao, meninkedero, pahn pwurehng ale irail, re udahn pahn silasildi.

“Ahnsou mwadang I esehda kahrepen ei alehdi kehkehlik kehlail me I en apwalih mwahu dipwisou ko, oh kahrepen meninkedero e nda me ahnsou me I pahn neksang dahme anahnepe I pahn wia, e pahn pwurehng ale irail. Pwe sohte pwand koaros esehier me I kolokol dipwisou ko, kahrehda irail doadoahngki arail kehlail unsek pwe irail en kihsang ie. Soangen koasondi koaros me kin kak wiawihda re song en doadoahngkihong pwe re en kihsang ie. Kalokolok en kailoko kamedekla oh doarasang mwowe, oh aramasoko kin wie songosong en kihsang ie ma kak. Ahpw sang ni eripit en Koht, dipwisou ko wie ekiek mwahu rehi, lao I kanekehla dahme anahnepe sang rehi. Nin duwen koasondi kan, ahnsou me meninkedero malipe I en wahla, I ahpw wahla dipwisou ko reh; oh ih me pwukoaki kolokol dipwisou ko lel rahn wet, ni keriau en rahn en May, kid welipwiki silisek-waluh.”

Ong soiepe me ekis unsek sang met, tehk Sosep Smith—Poadoapoad nan Takai Kesempwal Ehu.

Poadoapoad en keilahn aio me kohsangehr nan pwehl rasohng ngihl en aramas ehu me koasoakoasoi sang nan pwehl, oh kawehwehdiongehr ni mahsen en ahnsou wet sang ni kisakis oh manaman en Koht me pein Ihr ketin mahsaniher, tepin ntingda ong sampah ni lokaiahn wai nan pahr 1830 nin duwen The Book of Mormon.