Balaan ng mga Kasulatan
Jacob 6


Kapitulo 6

Pagabawion sang Ginuo ang Israel sa katapusan nga mga adlaw—Ang kalibutan pagasunogon sa kalayo—Ang mga tawo kinahanglan gid nga magsunod kay Cristo agud malikawan ang linaw nga kalayo kag asupre. Mga 544–421 B.C.

1 Kag karon, tan-awa, mga kauturan ko, pareho sang akon ginsiling sa inyo nga ako magapropesiya, tan-awa, amo ini ang akon propesiya—nga ang mga butang nga ginhambal sining propeta nga si Zenos, parte sa panimalay ni Israel, nga sa diin ginpaanggid niya sila sa isa ka kultibado nga kahoy nga olivo, pat-od gid nga matabo.

2 Kag ang adlaw nga ipahamtang niya liwat ang iya kamot sa ika-duha nga tion sa pagbawi sang iya katawhan, amo ang adlaw, huo, bisan ang katapusan nga tion, nga ang mga alagad sang Ginuo magalakat sa iya gahum, agud saguron kag panapsan ang iya ulubasan; kag pagkatapos sina ang katapusan magaabot sa indi madugay.

3 Kag daw ano kabulahan sa ila nga nagpangabudlay sing matutum sa iya ulubasan; kag daw ano kasinumpa sa ila nga ipanghaboy sa ila kaugalingon nga lugar! Kag ang kalibutan pagasunogon sa kalayo.

4 Kag daw ano kamaluluy-on sang aton Dios sa aton, kay ginadumdum niya ang panimalay ni Israel, pareho nga mga gamot kag mga sanga; kag ginauntay niya ang iya mga kamot sa ila sa bilog nga adlaw; kag sila isa ka batinggilan kag malalison nga katawhan; apang ang tanan nga indi magpatig-a sang ila mga tagipusuon maluwas sa ginharian sang Dios.

5 Gani, pinalangga kong mga kauturan, nagapangabay ako sa inyo sa mga pulong nga seryoso nga maghinulsol kamo, kag magpalapit nga may bug-os nga katuyoan sang tagipusuon, kag magkapyot sa Dios pareho sang iya pagkapyot sa inyo. Kag samtang ang iya butkon sang kaluoy nagauntay sa inyo sa kasanag sang adlaw, indi pagpatig-aha ang inyo mga tagipusuon.

6 Huo, subong nga adlaw, kon inyo mabatian ang iya tingug, indi pagpatig-aha ang inyo mga tagipusuon; kay ngaa mapatay kamo?

7 Kay tan-awa, pagkatapos nga masagod kamo sang maayo nga pulong sang Dios sa bilog nga adlaw, magadala bala kamo sing malain nga bunga, agud nga panapson kamo kag idap-ong sa kalayo?

8 Tan-awa, isikway bala ninyo ining mga pulong? Isikway bala ninyo ang mga pulong sang mga propeta; kag isikway bala ninyo ang tanan nga pulong nga ginhambal parte kay Cristo, pagkatapos sang pagkadamo nga naghambal parte sa iya; kag ipanghiwala ang maayo nga pulong ni Cristo, kag ang gahum sang Dios, kag ang dulot sang Balaan nga Espiritu, kag balabagan ang Balaan nga Espiritu, kag yagutaon ang dako nga plano sang pagtubos, nga ginpahamtang para sa inyo?

9 Wala bala ninyo mahibal-i nga kon himuon ninyo ining mga butang, nga ang gahum sang pagtubos kag sang pagkabanhaw, nga yara kay Cristo, magadala sa inyo sa pagtindog nga may kahuluy-an kag makahaladlok nga kabasulanan sa atubang sang hukmanan sang Dios?

10 Kag suno sa gahum sang hustisya, kay ang hustisya indi mapanghiwala, pat-od gid nga magkadto kamo sa sinang linaw nga kalayo kag asupre, nga ang mga dabadaba sini indi mapalong, kag ang aso sini nagasaka tubtob sa wala’y katapusan, nga ang amo nga linaw nga kalayo kag asupre amo ang nagapadayon nga pagpaantos.

11 O gani, pinalangga kong mga kauturan, maghinulsol kamo, kag magsulod sa sinang makitid nga ganhaan, kag magpadayon sa dalan nga makitid, tubtob nga maangkon ninyo ang kabuhi nga wala’y katapusan.

12 O, mangin maalam kamo; ano pa ang dugang ko nga masiling?

13 Sa katapusan, nagapaalam ako sa inyo, tubtob nga makita ko kamo sa atubang sang makapahamuot nga hukmanan sang Dios, nga ang amo nga hukmanan magahampak sang mga malain sing tuman nga kakulba kag kahadlok. Amen.