Balaan ng mga Kasulatan
Jacob 4


Kapitulo 4

Ang tanan nga propeta nagsimba sa Amay sa ngalan ni Cristo—Ang paghalad ni Abraham kay Isaac kaanggid sang iya sang Dios kag Iya Bugtong nga Anak—Ang mga tawo dapat nga magpakig-uli sang ila mga kaugalingon sa Dios paagi sa Pagbayad-Sala—Ang mga Judio magasikway sang pundasyon nga bato. Mga 544–421 B.C.

1 Karon tan-awa, natabo ini nga ako, si Jacob, pagkatapos nga nagtudlo sing madamo sa akon katawhan sa pulong, (kag indi ko masulat kundi diutay lamang nga bahin sang akon mga pulong, tungod sang kabudlayan sang pagkurit sang amon mga pulong sa mga lamina) kag nahibal-an namon nga ang mga butang nga ginasulat namon sa mga lamina kinahanglan gid nga magpabilin;

2 Apang kon ano man nga mga butang ang amon isulat sa bisan ano luwas lang nga ini sa mga lamina pat-od gid nga maguba kag madula; apang mahimo kami nga makasulat sing pila ka mga pulong sa mga lamina, nga magahatag sa aton mga kaanakan, kag sa aton man pinalangga nga mga kauturan, sing isa ka diutay nga bahin sang ihibalo parte sa aton, ukon parte sa ila mga amay—

3 Karon sa sini nga butang kami nagakasadya; kag nagapangabudlay kami sing matutum sa pagkurit sining mga pulong sa mga lamina, nga nagalaum nga ang aton pinalangga nga mga kauturan kag ang aton mga kaanakan magabaton sang mga ini sing may mapinasalamaton nga mga tagipusuon, kag magabasa sang mga ini sing maid-id agud nga matun-an nila sing may kalipay kag indi sing may kasubo, ukon man paghikay, ang parte sa ila una nga mga ginikanan.

4 Kay sa amo nga tinutuyo ginsulat namon ining mga butang, agud ila mahibal-an nga nakahibalo kami parte kay Cristo, kag nakaangkon kami sing paglaum sang iya himaya madamo nga ginatos ka tuig antes sang iya pagkari; kag indi lamang kami mismo ang nakaangkon sing paglaum sang iya himaya, kundi ang tanan man nga balaan nga mga propeta nga nauna sa amon.

5 Tan-awa, nagpati sila kay Cristo kag nagsimba sa Amay sa iya ngalan, kag nagasimba man kami sa Amay sa iya ngalan. Kag sa amo nga tinutuyo ginatuman namon ang layi ni Moises, bangod ginatudlo sini ang aton mga kalag sa iya; kag sa amo nga kabangdanan ginapakabalaan ini sa aton para sa pagkamatarong, pareho nga ginkabig ini para kay Abraham sa kamingawan nga mangin matinumanon sa mga sugo sang Dios sa paghalad sang iya anak nga si Isaac, nga kaanggid sang iya sang Dios kag iya Bugtong nga Anak.

6 Gani, ginatun-an namon ang mga propeta, kag madamo kami sing mga rebelasyon kag sang espiritu sang propesiya; kag upod ining tanan nga mga saksi nakaangkon kami sing isa ka paglaum, kag ang amon pagtuo nangin di-mauyog, sa bagay nga matuod gid nga makasugo kami paagi sa ngalan ni Jesus kag ang mga kahoy mismo nagatuman sa amon, ukon ang mga bukid, ukon ang mga balod sang dagat.

7 Bisan pa amo sini, ginapakita sa amon sang Ginuong Dios ang amon kahuyangan agud nga mahimo namon mahibal-an nga paagi sa iya grasya, kag iya dako nga pagpakaubos sa mga anak sang katawhan, nga may gahum kami sa paghimo sining mga butang.

8 Tan-awa, dako kag dalayawon ang mga binuhatan sang Ginuo. Daw ano ka di-matungkad ang kadalumon sang iya mga misteryo; kag indi mahimo nga tukibon sang tawo ang tanan niya nga mga paagi. Kag wala sing tawo nga nakahibalo sang iya mga paagi luwas lang nga ini ipahayag sa iya; gani, mga kauturan, indi pag-ibalewala ang mga rebelasyon sang Dios.

9 Kay tan-awa, paagi sa gahum sang iya pulong ang tawo nag-abot sa ibabaw sang duta, nga ang amo nga duta gintuga paagi sa gahum sang iya pulong. Gani, kon ang Dios makasarang sa paghambal kag natuga ang kalibutan, kag maghambal kag natuga ang tawo, O dayon, ngaa indi makasarang sa pagsugo sang duta, ukon sang mga hinimo sang iya mga kamot sa ibabaw sini, suno sa iya kabubut-on kag ikalipay?

10 Gani, mga kauturan, indi pagtinguhai ang paglaygay sa Ginuo, kundi nga magbaton sing laygay halin sa iya kamot. Kay tan-awa, kamo mismo nakahibalo nga nagalaygay sia sa kaalam, kag sa hustisya, kag sa dako nga kaluoy, sa tanan niya nga binuhatan.

11 Gani, pinalangga nga mga kauturan, magpakig-uli kamo sa iya paagi sa pagbayad-sala ni Cristo, ang iya Bugtong nga Anak, kag mahimo kamo nga makaangkon sing pagkabanhaw, suno sa gahum sang pagkabanhaw nga yara kay Cristo, kag ihalad bilang unang mga bunga ni Cristo sa Dios, nga may pagtuo, kag nakaangkon sing maayo nga paglaum sang himaya sa iya antes niya ginpakita ang iya kaugalingon sa unod.

12 Kag karon, mga pinalangga, indi matingala nga ginsugiran ko kamo sining mga butang; kay ngaa indi naton paghambalan ang pagbayad-sala ni Cristo, kag makaabot sa perpekto nga ihibalo parte sa iya, agud nga makaabot sa ihibalo parte sang pagkabanhaw kag sang kalibutan nga magaabot?

13 Tan-awa, mga kauturan ko, sia nga nagapropesiya, tuguti sia nga magpropesiya sa ikahangop sang mga tawo; kay ang Espiritu nagahambal sang kamatuoran kag wala nagabutig. Gani, nagahambal ini sang mga butang suno sa kon ano gid ang mga ini, kag sang mga butang suno sa mangin kon ano gid ang mga ini; gani, ining mga butang ginapakita sa aton sing maathag, para sa kaluwasan sang aton mga kalag. Apang tan-awa, indi kami nagaisahanon nga mga saksi sa sining mga butang; kay ang Dios naghambal man sang mga ini sa mga propeta sang dumaan nga panahon.

14 Apang tan-awa, ang mga Judio isa ka batinggilan nga katawhan; kag wala nila ginsapak ang mga pulong sang kaathagan; kag ginpamatay ang mga propeta, kag nagpangita sang mga butang nga indi nila mahangpan. Gani, tungod sang ila pagkabulag, nga ang amo nga pagkabulag nag-abot tungod sang pagtulok sing lapaw sa tanda, kinahanglan gid sila nga malaglag; kay ginkuha sang Dios ang iya kaathagan halin sa ila, kag ginhatag sa ila ang madamo nga butang nga indi nila mahangpan, bangod ini ang ila luyag. Kag bangod ini ang ila luyag ginhimo ini sang Dios, agud nga masandad sila.

15 Kag karon ako, si Jacob, gintuytuyan sang Espiritu sa pagpropesiya; kay nahangpan ko paagi sa pagpanghikot sang Espiritu nga yari sa akon, nga paagi sa pagkasandad sang mga Judio igasikway nila ang bato nga sa diin mahimo sila nga makapasad kag makaangkon sing mabakod nga pundasyon.

16 Apang tan-awa, suno sa balaan nga mga kasulatan, ining bato mangin ang dako, kag ang katapusan, kag ang amo lamang nga pat-od nga pundasyon, nga sa sini ang mga Judio mahimo nga makapasad.

17 Kag karon, mga pinalangga ko, paano matabo nga ang mga ini, pagkatapos nga ginsikway ang pat-od nga pundasyon, mahimo pa nga makapasad sa sini, agud nga mahimo ini nga mangin ila sadsaran?

18 Tan-awa, pinalangga ko nga mga kauturan, ipahayag ko ini nga misteryo sa inyo; kon indi ako, sa ano man nga paagi, mauyog halin sa akon kalig-on sa Espiritu, kag masandad tungod sang akon tuman nga kabalaka para sa inyo.