1 Nsɛm a Jacob, Nephi no nua no, kãa kyerɛɛ Nephi no nkorɔfo, wɔ Nephi no wu ekyir no:

2 Na afei, mo nuanom adɔfo, emi Jacob, ɔnam Nyame ho asodzi a medze ato mo do, dɛ medze botooyɛ bɔkrɔn me dzibew, na ama meetum eyi hom bɔn nkekãa efi me ntar mu ntsi, maba temple yi mu ndɛ da yi ama meetum mada Nyankopɔn n’asɛm edzi akyerɛ hom.

3 Na homara hom nyim dɛ ɔdze besi mber yi medze enyidahɔ ayɛ dzibew a wɔfrɛɛ me wɔ ho no; mbom ndɛ da yi medze ɔpɛ na ahopopo kasa kyerɛ hom wɔ hom akra n’eyiedzi ho sen dza mayɛ no dada no.

4 Na hwɛ ɔdze besi ndɛ, hom ayɛ setsie ama Ewuradze n’asɛm a medze maa hom no.

5 Mbom hwɛ, hom ntsie me, na hom nhu dɛ ɔnam Bɔadze a ɔyɛ tum nyinara wura, a ɔbɔɔ sor nye asaase ne mboa ntsi mobotum akã dza ɔrokɔ do wɔ hom ^aadwen mu, dɛ mbrɛ hom ahyɛ ase reyɛ bɔn ndwuma, dza ɔyɛ ekyiwadze ma me, nyew, na ɔyɛ ebusudze ma Nyankopɔn.

6 Nyew, ɔhyɛ me kra awerɛhow na ɔdze enyito fɔn me wɔ me Yɛfo no enyim, dɛm ntsi mutum gye dase a ɔfa emumuyɛdze a ɔwɔ hom akoma mu no kyerɛ hom.

7 Na ɔhyɛ me awerɛhow ma dɛm ntsi otwar dɛ menye hom kasa ^andamyɛ mu wɔ hom yernom na hom mba enyim, na hɔn mu dodowara su yɛ mberɛw na ^bɔtsen wɔ Nyame enyim, iyi yɛ adze a ɔsɔ Nyame enyi;

8 Na mususu dɛ wɔaba ha dɛ woribetsie ^aNyankopɔn n’asɛm a ɔyɛ enyigye, nyew, asɛm a ɔyɛ ɔkra a oepira edur.

9 Dɛm ntsi, ɔyɛ adzesoadze kɛse ma me kra dɛ wɔbɛhyɛ me, osian mbrasɛm dzendzen a menya efi Nyankopɔn hɔ no ntsi, dɛ menkã mbrɛ hom bɔn tse ho asɛm, na memma hɔn a woepira dada no hɔn epirakur nyɛ akɛse wɔ aber a nkyɛ ɔwɔ dɛ mekyekye hɔn werɛ na meyɛ hɔn ekur edur; na hɔn a wommpiraa hɔn no, nkyɛ ɔwɔ dɛ wodzi Nyankopɔn n’asɛm a ɔyɛ enyigye no, wɔdze asekan ato hɔ na ɔbɔwowɔ hɔn akra na woepira hɔn adwen a ɔyɛ botoo no.

10 Mbom, moronnhwɛ edwuma no ne kɛse ho, ɔwɔ dɛ meyɛ dza Nyankopɔn nam ne ^ambrasɛm no ahyɛ me dzendzenndzen no na mekasa kyerɛ hom wɔ hom emumuyɛdze na ekyiwadze ho, wɔ hɔn a hɔn akoma mu tsew, na hɔn akoma abobɔ, nye Otumfo Nyankopɔn ^bn’enyiwa a otum hwira no enyim.

11 Dɛm ntsi, ɔsɛ dɛ mekã nokwar no kyerɛ hom dɛ mbrɛ Nyankopɔn n’asɛm ne ^apefeeyɛ tse. Na hwɛ, ber a mibisaa Nyankopɔn no, asɛm no baa mo hɔ dɛ: Jacob, adze kye a soɛr kɔ temple no mu, na kɛda asɛm a medze bɛma wo no edzi kyerɛ nkorɔfo no.

12 Na afei hwɛ, mo nuanom, iyi nye asɛm a meda no edzi kyerɛ hom, dɛ hom mu dodowara ahyɛ ase rohwehwɛ sika, na dwetɛ, na ^aabo ahorow pii a ɔsom bo wɔ asaase yi mu, ^banohoba asaase ma hom nye hom asefo anohoba no mu a iyinom ahyɛ mu mã.

13 Na adom nsa ehyira hom papanara, ama hom enya ahonyadze pii; na osiandɛ hom mu binom enya no mbordo asen binom ntsi, hom ^aamema hom ho do na ahantanyɛ ahyɛ hom akoma mã, na hom toto hom kɔn na hom mema hom etsir do wɔ wimu osian hom ntar a ɔsom bo kɛse ntsi, na hom tseetsee hom nuanom osiandɛ hom susu dɛ hom ye sen hɔn ntsi.

14 Na afei, mo nuanom, ana hom susu dɛ Nyankopɔn bu hom bem wɔ iyi mu? Hwɛ, mese hom dɛ, Oho. Mbom obu hom fɔ, na sɛ hom kɔ do wɔ dɛm ndzɛmba yi ne nyɛe mu a n’atsɛmbu bɛba hom do ntsɛntsɛm.

15 O kɛtsea nkyɛ wɔakyerɛ hom dɛ obotum ehwira hom mu, na sɛ ɔdze n’enyiwa hwɛ hom kor pɛr a obotum etwa hom ato famu!

16 O nkyɛ oeyi hom efi dɛm emumuyɛ na ekyiwadze yi mu. Na, O nkyɛ hom etsie ne mbrasɛm, na hom amma hom ^aahantan akoma yi annsɛɛ hom akra!

17 Hom ndwen hom nuanom ho dɛ homankasa homho, na hom nye obiara mbɔmu na hom mfa hom ^aahodze nkyɛ, ama ^bhɔn so aayɛ ahonyafo dɛ homara.

18 Mbom ansaana hom bɔhwehwɛ ^aahonyadze no, hom ndzi kan nhwehwɛ Nyankopɔn ^bn’ahenman no.

19 Na hom enya enyidado wɔ Christ mu ekyir no hom benya ahonyadze, sɛ hom hwehwɛ a; hom rohwehwɛ no hom nyɛ hom nsusui dɛ hom bɔhwehwɛ dze ^aayɛ papa—dɛ hom bofura hɔn a wodzi adagyaw, na wɔama hɔn a ɔkɔm dze hɔn edziban, na wɔagye ndɔmmumfo, na wɔama ayarfo na hɔn a wohu amandze enya ahotɔ.

20 Na afei, mo nuanom, makã ahantanyɛ ho asɛm akyerɛ hom; na hom a hom ahaw hom nuanom, na hom atseetsee hɔn osian hom akoma mu ahantanyɛ wɔ ndzɛmba a Nyankopɔn dze ama hom ntsi no, ɛbɛn asɛm na hom wɔ kã wɔ iyi ho?

21 Ana hom nnsusu dɛ dɛm ndzɛmba yi yɛ ekyiwadze ma nyia ɔbɔɔ honam nyinara no? Na nyimpa kor som bo wɔ n’enyido dɛ mbrɛ kor so tse. Na honam nyinara yɛ dɛtse; na osian ewiei kor ntsi na ɔbɔɔ hɔn nyinara; ama woeedzi ne ^ambrasɛm do na woeeyi no ayɛw afebɔɔ.

22 Na afei kasa a merekã kyerɛ hom a ɔfa no ahantanyɛ ho no medze aba ewiei. Na nnyɛ aba no dɛ mekasa kyerɛ hom wɔ bɔn kɛse bi ho a, nkyɛ m’akoma bedzi ehurusi mbordo ama hom.

23 Mbom Nyame n’asɛm haw me osian hom bɔn akɛse ntsi. Na hwɛ, dɛm na Ewuradze se: Dɛm nkorɔfo yi ahyɛ ase reyɛ emumuyɛ; wɔnntse kyerɛwsɛm no ase, na wɔhwehwɛ biribi egyina do dze agye hɔnho wɔ ndwamambɔ ho, osian dza wɔakyerɛw a ɔfa David na ne ba Solomon ho ntsi.

24 Hwɛ, nokwar David na ^aSolomon nyaa ^byernom na nwewefo pii, dza ɔyɛ ekyiwadze wɔ m’enyido, Ewuradze na ɔse.

25 Dɛm ntsi, dɛm na Ewuradze se, menam m’abasa no tum do meeyi dɛm nkorɔfo yi efi Jerusalem asaase do, ama meeyi ^aabaw tsenenee efir Joseph n’asen eduaba no mu ama moho.

26 Dɛm ntsi, emi Ewuradze Nyankopɔn meremma kwan ma nkorɔfo yi nnyɛ dɛ mbrɛ tsetseberdo mba yɛe no.

27 Dɛm ntsi, mo nuanom, hom ntsie me, na hom ntsie Ewuradze n’asɛm: Na onnyi dɛ banyin biara a ɔwɔ hom mu nya ma ɔbor ^ayer kor; na nwewe dze mma onnya bi koraa;

28 Na emi, Ewuradze Nyankopɔn, mowɔ enyigye wɔ mbaa hɔn ^aahosie ho. Na ndwamambɔ yɛ ekyiwadze wɔ m’enyido; dɛm na Dɔm Ewuradze se.

29 Dɛm ntsi, nkorɔfo yi besie me mbrasɛm, Dɔm Ewuradze na ɔse, anaadɛ ^andom nkã asaase no wɔ hɔn ntsi.

30 Na sɛ mepɛ a, Dɔm Ewuradze na ɔse, mebɛma ^aw’asefo do ama moho, mebɛhyɛ mo nkorɔfo mbra; annyɛ a wobetsie dɛm nsɛm yi.

31 Na hwɛ, emi Ewuradze meehu mo nkorɔfo hɔn mbabaa a wɔwɔ Jerusalem asaase do no hɔn yaw, na maatse hɔn nkɔmbɔdzi, nyew na asaase a mo nkorɔfo wɔ do nyina osian hɔn kunnom hɔn emumuyɛ na ebusudze ntsi.

32 Na meremma kwan, Dɔm Ewuradze na ɔse, mma nkorɔfo yi hɔn mbabaa fɛɛfɛw a miyii hɔn fii Jerusalem asaase do yi hɔn sũ mmfow sor mmba mo hɔ nntsia mbanyin a wofi mo nkorɔfo mu, Dɔm Ewuradze na ɔse.

33 Na wɔremmfa mo nkorɔfo hɔn mbabaa ndɔmmum osian hɔn botooyɛ ntsi, annyɛ dɛm a medze ndom yaayaa bɛba hɔn do, dza ɔdze hɔn bɔkɔ ɔsɛɛ mu mpo; osiandɛ wɔrommbɔ ^aedwaman, dɛ tsetseberdo mba no, Dɔm Ewuradze na ɔse.

34 Na afei hwɛ, mo nuanom, hom nyim dɛ dɛm mbrasɛm yi nyina wɔdze maa hɛn egya, Lehi; dɛm ntsi, hom nyim ne nyina dada; na hom aba afɔdzi kɛse yi mu; osiandɛ hom ayɛ ndzɛmba a nkyɛ onnyi dɛ hom yɛ.

35 Hwɛ, hom ayɛ emumuyɛ ^aakɛse sen Lamanfo, hɛn enuanom no. Hom ebubu hom yernom a wɔyɛ botoo no hɔn akoma, na hom ayew awerɛhyɛmu a hom mba wɔ no wɔ hom mu, osian hom bra bɔn wɔ hɔn enyim ntsi; na hɔn akoma mu nkrumsi afow akɔ Nyame hɔ dze etsia hom. Na osian Nyame n’asɛm ne dzen a osian tsia hom ntsi, akoma dodowara ewuwu osian ekur a etuetue wɔ mu ntsi.