1 Oh met kedekedeo nan pahr kapahisek siluh en mwehin sounkopwung kan, sohte pingiping nanpwungen aramas akan en Nihpai ihte mie kisin pohnmwahso kis me pwarada nan mwomwohdiso, me kahrehda mie kisin uhpene kei rehn aramas kan, me wia irair me kameleileidihte ni imwin pahr pahisek siluho.

2 Oh sohte pingiping rehn aramas akan nan pahr kapahisek pahieuo; de pil mie pingiping laud nan pahr kapahisek limauo.

3 Kedekedeo nan pahr kapahisek weneu, ei, mie pingiping laud oh pwupwidi tohto; me kahrehda aramas tohto mehlel kohkohlahsang sahpw en Saraemla, oh kohwei nan sahpw en paliepeng pwe re en sohsohki sahpwo.

4 Oh re seiloak wei wasa doh mehlel, lao re lel ni lehn pihl lap kei oh pilap tohto.

5 Iei, oh re kohpeseng wasa kan koaros nan sahpwo, wasa kan me saikinte wiahla sahpw tehnla oh sohte tuhke, pwehki aramas tohto me sohsohki sahpwo mwowe.

6 Oh met sohte wasa nan sahpwo me tehnla, ihte tuhke me apwal; ahpw pwehki kamwomwala lap en aramas kan me tepin sohsohki sahpwo e kahdankihla sahpw tehnla.

7 Oh mehndahte eh malaulau tuhke me mih nan sahpwo, ahpw aramas me kohla wasahko maila wiewia doadoahk en siment; Eri re wiahda ihmw siment kan, me re kin kousoan loale.

8 Kedekedeo re ahpw kaparaparala oh parpeseng, oh kohsang nan sahpw en palieir kohlahng nan sahpw en paliepeng, oh parpeseng lao re ahpw tohtohla pohn sahpwo pwon, sang ni sehd en palieir kohla lel sehd en paliepeng, sang ni sehd en palikapi kohla lel palimese.

9 Oh aramas akan me mihmi nan sahpw paliepeng kin kousoan nan impwal kan, oh nan ihmw siment kan, oh re kin mweidehng tuhke sohte lipilipil en osada nan sahpwo pwe en keirda, pwe mwurin ahnsouo re en kak alehdi tuhke me re pahn wiahkihda ihmwarail kan, ei, arail kahnihmw kan, oh arail tehnpas sarawi kan, oh arail sinakoke kan, oh arail wasahn kaudok kan, oh soahngen ihmw kan koaros.

10 Kedekedeo pwehki tuhke ah kin apwal nan sahpw en paliepeng, re kin kadarala rehrail sang ni ahr doadoahngki weren nansed.

11 Oh met re kahrehda aramas akan nan sahpw paliepeng ahr kak wiahkihda tuhke oh siment tohtohn kahnihmw kan.

12 Kedekedeo tohto aramas en Amon kan, me wia ntahn Mehn Leimen sang ni ipwidi, pil iang kohla nan sahpw wet.

13 Oh met poadoapoad tohto me ntingda ong wiewia kan en aramas pwukat, sang tohto aramas pwukat, me pisetik oh reirei, duwen irail.

14 Ahpw kilang, pali epwiki en poadoapoad en wiewia kan en aramas pwukat, ei, soaipen Mehn Leimen kan oh Nihpai kan, oh arail mahwin kan, oh pingiping kan, oh pwupwidi kan, oh arail kalohngkan, oh arail kokohp kan, oh arail doadoahngki sohp oh wiahda sohp kan, oh arail kauwada tehnpas sarawi kan, oh sinakoke kan oh arail wasahn kaudok kan, oh arail mour pwung kan, oh arail wiewia suwed kan, oh arail kam aramas kan, oh arail pirap kan, oh arail kulih kan, oh soahngen tiahk suwed kan oh tiahk en nenek kan, sohte kak audehda doadoahk wet.

15 Ahpw kilang, mie soahngen pwuhk tohto oh poadoapoad tohto kan, oh Mehn Nihpai kan me kin keieu kolokol.

16 Oh Mehn Nihpai kan kin kadakadaur kohdo sang ehu dih kohla rehn pil ehu dih, lao re kin pwupwidiong nan sapwung oh kamakamala, kuhliasang, oh pwepweki en kamala, oh pekeusla, oh kamala, oh mwerpeseng nan sahpwo, oh doaloahda Mehn Leimen kan lao re sohla kahdaniki Mehn Nihpai kan, pwehki ahr suwedla, oh lawalohla, oh lemeila, iei, pwehki ahr wiahla Mehn Leimen.

17 Oh met I pahn pwurodohng ei poadoapoadet; eri, dahme I koasoaiahier wiawiher mwurin pingiping lap kan, oh akamai kan, oh mahwin kan, oh pwupwidi kan, rehn aramas en Nihpai kan.

18 Pahr kapahisek weneu en mwehin sounkopwung kan imwiseklahr;

19 Kedekedeo pingiping lap pil wiwiawihte nan sahpwo, ei, nan pahr kapahisek isuh, oh pil nan pahr kapahisek waluh.

20 Ahpw Ilemen wiliandi nan sehr en sounkopwung ni kopwung pwung oh pahrek; ei, e nsenohki kapwaiada koasoandi kan, oh kopwung kan, oh sapwellimen Koht kosonned akan; oh e kin wia me pwung mwohn silangin Koht ahnsou koaros; oh e kin weweidki koasoandi en ah pahpao, kahrehda e pweida nan sahpwo.

21 Kedekedeo e ahpw nainkihda pwutak riemen. E ahpw kihong me laudo eden Nihpai, oh ong me tikitiko, eden Lihai. Oh re ahpw tepida kekeirda ong Kauno.

22 Kedekedeo mahwin kan oh pingiping kan ahpw tepida ekis uhdi, rehn aramas en Mehn Nihpai kan, ni imwilahn pahr kapahisek waluh en mwehin sounkopwung kan ong aramas en Nihpai kan.

23 Kedekedeo nan pahr kapahisek duwauo en mwehin sounkopwung kan, meleilei mimihehte nan sahpwo, wasa koaros ihte wasa me pwihn rir me Kadiendon lipirapo koasoaneiraildier nan sahpw me mie kousoan ie, me ni ahnsouo irail kaun en koapworment kan sohte wehwehki; kahrehda pwihn wet sohte kamwomwasang nan sahpwo.

24 Kedekedeo nan pahrete mie keirida lap mehlel nan mwomwohdiso, kahrehda mie aramas kid kei me towehla nan mwomwohdiso oh papidaisla sang ni koluhla.

25 Oh keiridahn nan mwomwohdiso udahn lap, oh kapai tohto me mweredieng pohn aramas akan, me kahrehda samworo lapalap kan oh sounpadahk kan iang pein pwuriamweikihla mehlel.

26 Kedekedeo sapwellimen Kauno doadoahk ahpw pweida ong papidais oh utuhtpenehn mwomwohdisohn Koht, aramas tohto, iei, nen kei.

27 Met kitail kak kilang me Kauno kin ketin kupwurkalahngan ong irail koaros me pahn, nan mohngiongirail ni mehlel, eker ni mware sarawio.

28 Ei, met kitail kilang me ewen kehl en wenihmw en nanleng ritidahng koaros, iei ong irail kan me pahn kamehlele mwaren Sises Krais, me iei Sapwellimen Kohto.

29 Ei, kitail kilang me mehmen me pahn koledi teng mahsen en Koht, me ieias oh manaman, me pahn pwalangpeseng koaros widing oh lidip kan oh mwersuwed en tepilo, oh kahluwa aramas en Krais nan ahl inen oh tehtiko kotehla wahu en pahtou poatoapoat me kaunopadahr en kapwonehla me suwed kan—

30 Oh wahla palingehnarail kan, ei, palingehnarail poatoapoat kan, ni palimaun en Koht nan wein nanleng, pwe re en iang mwohndi rehn Eipraam, oh Aisek, oh rehn Seikop, oh rehn atail pahpa sarawi kan koaros, oh sohla pwurasang mwo.

31 Oh nan pahr wet pereperen wiwiawihte nan sahpw en Saraemla, oh nan sahpw kan me kapilpene, iei nan sahpw koaros me Mehn Nihpai kan sapwaniki.

32 Kedekedeo mie popohl oh peren lap mehlel nan luhwen pahr kapahisek duwauo; ei, oh pil mie popohl oh peren lap nan pahr kelimeisek en mwehin sounkopwung kan.

33 Oh nan pahr kelimeisek ehu en mwehin sounkopwung kan pil mie popohl, ihte pohnmwahso me tepida doulong nan mwomwohdiso—kaidehn nan mwomwohdiso en Koht, ahpw nan mohngiong en aramas me kin nda re wia tohn mwomwohdiso en Koht—

34 Oh re pohnmwahsolahr, kahrehda ahr kaloke riarail me tohto. Met e wia suwed lap ehu, me kahrehda aramas akan me opampap ahr lokolongki kalokolok lap kan, oh lelohng kahpwal tohto.

35 Ahpw re kin kalapw kaisihsol oh kapakap, oh kehkehlaila nan arail opampap, tengetengedi nan pwoson Krais, kahrehda palingehnarail kan direkihla peren oh popohl, iei, lao mohngiongarail kan mwakelekelkihla oh sarawihkihla, oh sarawihla wet kohdo pwehki ahr mweidala mohngiongarail kan ong Koht.

36 Kedekedeo pahr kelimeisek riauo pil imwisekla nan popohl, ihte pohnmwahso lap me pidelongehr nan mohngiong en aramas kan; oh met pwehki ahr kepwehpwehla mehlel oh arail pweida nan sahpwo; oh e wie lalaudla rehrail nan ehu ehu rahn.

37 Kedekedeo nan pahr kelimeisek siluh en mwehin sounkopwung kan, Ilemen ahpw kepinsalehdala, oh nah pwutak me keieu laud, Nihpai, weliandi tepida kakaun. Kedekedeo e ahpw wiahla sounkopwung me kin kopwung pwung oh pahrek; ei, e ahpw kapwaiada sapwellimen Koht kosonned akan, oh idawehn koasoandi en ah pahpao.