1 Kedekedeo nan pahr pahisek riau en mwehin sounkopwung kan, mwurin Moronaia eh pwurehng wiahda popohl nan pwungen Mehn Nihpai kan oh Mehn Leimen kan, kilang sohte emen me pahn alehda sehr sounkopwungo; eri e ahpw pwurehng tepida mie pingiping nan pwungen aramas ko nin duwen ihs me pahn mih nan sehr en sounkopwungo.

2 Kedekedeo Ilemen, me wia nein Ilemen pwutak, pilipilda en mih nan sehr en sounkopwungo, sang ni pilipil en aramas kan.

3 Ahpw kilang, Kiskumen, me kemehla Paoran, kaukaunop pwe en pil kemehla Ilemen; oh ah pwihno kin utung, irail]me wiahda inou me sohte emen pahn ese ah wiewia suwed kan.

4 Pwe emen adanki Kadiendon, me kadek koasoai kowahlap, oh pil nan ah doadoahk en widing, pwe en peusehla wiewia doadoahk rir en kam aramas oh pirap; eri e wiahla kaun en pwihn en Kiskumen.

5 Eri e widingehkin irail, oh pil Kiskumen, ma re pahn kihong nan sehr en sounkopwungo e pahn kihong irail me wia tohn arail pwihno me re pahn kohieng nan pwukoah en ahniki manaman oh mweimwei pohn aramas akan; eri Kiskumen song en kemehla Ilemen.

6 Kedekedeo ni eh kohkohwei ni sehr en sounkopwungo pwe en kemehla Ilemen, kilang emen nein Ilemen ladu ko, ni eh mihmi likio pwohngo, oh alehdi, ni rir, duwen koasoandi kan me kaunopdahr sang pwihn wet re en kemehla Ilemen—

7 Kedekedeo e ahpw tuhwong Kiskumen, oh e kasalehiong kilel ehu; eri Kiskumen kasalehiong ih koasoandi en ah inangiho, oh e inangih en kahrehla ni sehr en sounkpwungo pwe en kak kemehla Ilemen.

8 Oh ahnsou me nein Ilemen laduo wehwehkier ineng en mohngiong en Kiskumen, oh me ah koasoandi iei en kam aramas, oh pil ih koasoandi en koaros me wia tohn ah pwihno iei en kam aramas, oh pirap, oh alehdi manaman, (oh met iei arail koasoandi rir, oh arail pwihn) laduo en Ilemen ahpw ndaiong Kiskumen: Kita pahn kohla ni sehr en sounkopwung.

9 Oh met kapereniada Kiskumen mehlel, pwe e medewe me e pahn kapwaiadahr ah koasoandio; ahpw kilang, nein Ilemen laduo, ni ar wia kohkohla ni sehr en sounkopwungo, ahpw doakoahdi Kiskumen lel ni ah mohngiong, kahrehda e pwupwidi mehla ni sohte ngihle. Oh e ahpw tangala oh ndaiong Ilemen soahng koaros me e kilangehr, oh rongehr, oh wiahier.

10 Kedekedeo Ilemen ahpw kadarala arama en koledi pwihn en pirap kan oh kam aramas rir kan, pwe re en kak kamakamala nin duwen kosonnedo.

11 Ahpw kilang, ahnsou me Kadiendon diaradahr me Kiskumen sohte pwurodo e masak pwe ede pil iang kamakamala; eri e kahrehda pwihno re en idawehn. Oh re tangasang nan sahpwo, ni ahl rir ehu, kohla nan sapwtehno; oh met ni ahnsou me Ilemen kadarala aramas en koliraildi, re sohte kak dierekda wasahieu.

12 Oh tohto duwen Kadiendon wet koasoaiepe pahn wiawi mwuhr. Oh met kaimwisekalahr pahr pahisek riau en mwehin sounkopwung kan ong aramas en Nihpai.

13 Oh kilang, ni imwin pwuhk wet kumwail pahn kilang me pwihn en Kadiendon wet kasaledahr pwupwidien, ei, kereniong kamwomwalahn aramas en Nihpai kan koaros.

14 Kilang I sohte nda ni imwin pwuhk en Ilemen, ahpw I nda imwin pwuhk en Nihpai, me I kihsang poadoapoad kan koaros me I ntingdier.