Pwuhk en Ilemen

1 Oh met kilang, kedekedeo ni tepidahn pahr kapahisek en mwehin sounkopwung kan ong aramas en Nihpai kan, mie kahpwal laud me tepida wiawi rehn aramas en Mehn Nihpai kan.

2 Pwe kilang, Paoran kapilsalehdalahr, oh seridier nan pwehl wasa me koaros pahn kohla; eri pingiping mehlel ahpw tepida wiawi me pid duwen ihs nan pwungen nein Paoran pwutak kan me pahn wiliandi nan sehr en sounkopwungo.

3 Eri iet ederail kan me akamaiki sehr en sounkopwungo, me kahrehda aramas akan ar pil pingida: Paoran, Pahnti, oh Pakumenai.

4 Eri, kaidehn ihte nein Paoran pwutak kan (pwe tohto nah), ahpw irail pwukat me wie akamaiki sehr en sounkopwungo; eri, re kahrehda pali siluh katohrohrpeseng nanpwungen aramas akan.

5 Ahpw, kedekedeo Paoran me pilipilda sang ni usuhs en aramas akan en wiahla sounkopwung oh kepinahn aramas en Nihpai.

6 Kedekedeo Pakumenai, ahnsou me e kilangada me e sohte pahn kak alehdi sehr en sounkopwungo, e ahpw utungada pilipil en aramas akan.

7 Ahpw kilang, Pahnti, oh pali en aramas kan me inangih me ih me pahn wiahla arail kepina, lingeringerda mehlel; eri, e kereniong en ndaiong aramas akan re en uhwongada riarail akan.

8 Kedekedeo ni e kereniong en wia met, kilang, e kolkoldi, oh pakadeikda nin duwen pilipil en aramas akan, oh kamakamkihla; pwehki eh uhwongadahr koasoandio oh song en kawehla saledek en aramas kan.

9 Met ahnsou me aramas kan me inangih en wiahla arail kepina kilangada me e kamakamala, irail ahpw lingeringerkihda, oh kilang, irail kadarala emen me adaniki Kiskumen, pwe en kohla ni sehr en sounkopwung en Paoran, oh kemehla Paoran ni eh mwomwohd nan dowe sehr en sounkopwungo.

10 Oh nein Paoran laduo pwakih; ahpw kilang, pwehki Kiskumen eh marahra sohte me kak koledi.

11 Oh e ahpw kohla rehn irail me kadarala, oh irail koaros wiahda inou, ei, kahukihla ni mwaren arail Sounwiepe poatoapoato, me re sohte pahn ndaiong emen aramas me Kiskumen me kemehla Paoran.

12 Eri, Kiskumen sohte sansal ong aramas en Nihpai kan, pwe e kawekala ih ni ahnsou me e kemehla Paorano. Oh Kiskumen oh ienge kan, me wiahiong ih inouo, kin patehng aramas kan, ni mwomwe me re sohte kak dierekda; ahpw koaros me kin dierekida kin kamakamala.

13 Oh met kilang, Pakumenai pilipilda, nin duwen pilipil en aramas akan, en wia sounkopwung lapalap oh kepina ong aramas kan, en uhsehla kaun mwurin rie pwutak Paoran; oh e pahn sang nin duwen eh pwuhng. Oh mepwukat koaros wiawiher nan pahr pahisek en mwehin sounkopwung kan; oh e imwisekilahr.

14 Kedekedeo nan pahr pahisek ehu en mwehin sounkopwung kan, Mehn Leimen kan ahpw kapokonpenehr polohn sounpei en ohl kei, oh kihong neirail kedlahs kan, oh iangahki naipokos kan oh iangahki kesik ketieu kan, oh iangahki arep kan, oh iangahki lisoarop kan, oh iangahki tehtehn mwaremware kan, oh iangahki soangsoahngen mehn sansar kan koaros.

15 Oh re pwurehng pwuredihdo pwe re en tapiahda mahwin ong Mehn Nihpai kan. Oh ohl men me adaniki Koriandumer me kahre irail; oh e wia kadaudoken Saraemla; oh e wia emen me pwipwidi sang rehn Mehn Nihpai kan; oh e wia ohl paliwar laud oh kehlail men.

16 Eri, nanmwarki en Mehn Leimen kan, me adaniki Dupalod, me wia nein Amoron pwutak, medewehiong pwehki Koriandumer eh wia aramas kehlail, kak pelianda Mehn Nihpai kan, sang ni eh kehlail oh pil ah erpit, kahrehda sang ni eh pahn kadarewei ih, e pahn kak alehdi manaman pohn Mehn Nihpai kan—

17 Eri e kamwakidirailda pwe re en lingeringerda, oh e kihpene nah sounpei kan, oh e pilada Koriandumer en wia arail kaun, oh wiahda re en karisdihla nan sahpw en Saraemla pwe re en mahwiniong Mehn Nihpai kan.

18 Kedekedeo pwehki pingping laud oh kahpwal laud me wiwiawi nan koapworment, kahrehda re sohte kihong itar sounsilasil kan nan sahpw en Saraemla; pwe re medewe me Mehn Leimen kan sohte pahn men kohdo nan mohngiong en sapwarail oh mahwiniong kahnihmw lap en Saraemla.

19 Ahpw kedekedeo Koriandumer ahpw tihengki kahre nah sounpei ngedero, oh kohdohng tohn nan kahnihmwo, oh arail karis kohdo me mwadang mehlel kahrehda Mehn Nihpai kan sohte ahniki ahnsou mwahu en kihpene neirail sounpei kan.

20 Eri Koriandumer ahpw pelehdi sounsile kehlo ni ewen kehl en kahnihmwo, oh kariskihlongala nah sounpei ko pwon nan kahnihmwo, oh re kemehla aramas koaros me uhwong irail, kahrehda re kalowehdi kahnihmwo pwon.

21 Kedekedeo Pakumenai, me wia sounkopwung lapalap, ahpw tangasang mwohn Koriandumer, kohlahng ni kehl en kahnihmwo. Kedekedeo Koriandumer ahpw kemehiong ni kehlo, lao e ahpw mehla. Oh met kaimwisekalahr mwehin Pakumenai.

22 Oh met ahnsou me Koriadumer kilangadahr me e kalowehdier kahnihmw en Saraemla, oh kilangadahr me Mehn Nihpai kan tangasang rehrail, oh kamakamala, oh kolkoldi, oh lekideklong nan imweteng, oh me e kalowedier wasa me keieu kehlail nan sahpwo pwon, ah mohngiong ahpw loallapkihda kahrehda e pahn kohla peiong sahpw kan koaros.

23 Oh met e sohte mihmihte nan sahpw en Saraemla, ahpw e kariskihwei nah pokon en sounpei iei kohlahng kahnihmw en Rahk; pwe e koasoanehdi me e pahn wiahkihwei ahl nah kedlahso, pwe en kak alehdi paliepeng en sahpwo.

24 Oh, pwehki e medemedewe me arail kehlail koaros mihmi nan werengen sahpwo, eri e ahpw kariswei, oh sohte kiheng irail ahnsou en kohpene ihte ni kisin pwihn tikitik; oh ni mwomw wet me re kolahng irail oh pelehkiniraildi nan pwehl.

25 Ahpw kilang, karis wet me Koriandumer wiahdo nan werengen sahpwo elehiong Moronaia en kak kaloweiraildi, mehndahte arail pokon mehlel en Mehn Nihpai kan me kamakamala.

26 Pwe kilang, Moronaia medewe me Mehn Leimen kan sohte pahn men kohdo nan werengen sahpwo, ahpw re pahn kin mahwiniong mahs kahnihmw me mih ni irepen sahpwo nin duwen arail kin kalapw wia; eri Moronaia kahrehda neirail sounpei kehlail kan pahn kin tetehk wasahko ni irepen sahpwo kan.

27 Ahpw kilang, Mehn Leimen kan sohte masepwehk nin duwen ehineng, ahpw re kohdo nan werengen sahpwo, oh kalowehdi kahnihmw lapo me iei kanihmw en Saraemla, oh karkariskohwei nan sahpw me keieu kesempwal kan, kemekemehla aramas akan, koaros ohl, lih, oh seri kan, kalkalowehdi kahnihmw tohto oh wasa kehlail tohto.

28 Ahpw ahnsou me Moronaia esehlahr met, e mwadangete kadarala Lihai iangahki sounpei kei kohpeseng pwe re en supuk irail mwohn arail pahn lel nan sahpwen Rahk.

29 Oh e ahpw wia met; oh e supuk irail mwohn arail pahn lel nan sahpwen Rahk, oh mahwiniong irail, kahrehda irail tepida pweiekla mwurirail nan sahpw en Saraemla.

30 Kedekedeo Moronaia ahpw supuk irail nan arail pwurupwur, oh mahwiniong irail, kahrehda e wiahla mahwin me mehla laud; ei, tohto me kamakamala, oh nanpwungen irail me mehla Koriandumer dierekda.

31 Oh met, kilang, Mehn Leimen kan sohla kak pwurala wasahieu, sohte kak paliepeng, de palieir, de palimese, de palikapi, pwe Mehn Nihpai kan kapidak irailpene ni pali koaros.

32 Oh met Koriandumer kihongehr Mehn Leimen kan nan pwungen Mehn Nihpai kan, kahrehda re mihla pahn manaman en Mehn Nihpai kan, oh pein ih kamakamala, oh Mehn Leimen kan mweidirailehng nan pehn Mehn Nihpai kan.

33 Kedekedeo Moronaia ahpw pwurehng kalowehdi kahnihmw en Saraemla, oh wiahda me Mehn Leimen kan me selidi ko re en mweselsang nan sahpwo ni popohl.

34 Oh met kaimwisekalahr pahr pahisek ehu en mwehin sounkopwung kan.