1 Oh met kedekedeo nan pahr kawelihsek weneu, Mehn Nihpai kan doulahte nan arail wiewia suwed kan, ei, nan suwed mehlel, ah Mehn Leimen kan ahpw nanantihong enkapwaiada sapwellimen Koht kosonned akan, nin duwen kosonned en Moses.

2 Kedekedeo nan pahrohte mie emen me adaniki Samuel, Mehn Leimen, ahpw kohdo nan sahpw en Saraemla, oh tepida kalohk ong aramas kan. Kedekedeo e ahpw kalohkiong aramas akan erein rahn tohto, re en koluha, oh re kausehla, oh e kereniong en pwuralahng nan pein sapwe.

3 Ahpw kilang, kepitien Kauno ahpw peidohng ih, me e anahne pwurehng pwurala, oh kokohp ong aramas soahng kan me pahn kohieng nan ah mohngiong.

4 Kedekedeo re ahpw sohte mweidehng en pidolong nan kahnihmwo; eri e kohla oh douda pohn kehlo, oh kapahwei peh kan oh werkihla ni ngihl laud, oh kokohp ong aramas kan soahng kan me Kauno ketikihong nan ah mohngiong.

5 Oh e ahpw mahsanihong irail: Kilang, ngehi, Samuel, Mehn Leimen men, pahn ndaiong kumwail mahsen en Kauno me e ketikihong nan ei mohngiong; oh kilang e ketikihongehr nan ei mohngiong I en ndaiong aramas pwukat me kedilahs en kopwungo tentenek pohn aramas pwukat; oh e sohte pahn lel sounpar pahpwiki oh kedilahs en kopwungo pahn pwupwidiong pohn aramas pwukat.

6 Ei, kamwomwala lap awiawih aramas pwukat, oh e udahn pahn wiawihongaramas pwukat, oh sohte mehkot me kak komourala aramas pwukat ihte koluhla oh pwoson Kauno Sises Krais, me udahn pahn ketido pohn sampah, oh pahn ketin lokolongki soahng tohto oh pwoukihla aramas akan.

7 Oh kilang, tohnleng en Kauno pakairkihong ie, oh e wahdo rohng kaperen ong ei palingehn. Oh kilang, I pekederdo rehmwail pwe I en pil pakairkihong kumwail, pwe kumwail en pil iang ahneki rohng kaperen; ahpw kumwail sohte men aleiehda.

8 Eri, Kauno ketin mahsanih: Pwehki keptakai en mohngiong en aramas en Mehn Nihpai kan, ma re sohte pahn koluhla I pahn ketikihsang irail ei mahsen, oh I pahn ketikihsang rehrail Ngehniet, oh I sohla pahn kanengamahiong irail, oh I pahn kamwakidada mohngiong en riarail kan en kailongkin irail.

9 Oh e sohte pahn lel sounpar pahpwiki a I pahn wiahdairail en kamakam; ei, I pahn pwarengkinirail kedlahs oh iangahki lehk oh soumwahu.

10 Ei, I pahn pwarek irail nan ei engieng, oh e pahn mie dih kapahieu me pahn momour de e pahn mie dih kapahieu me pahn momour sang amwail imwintihtih kan me pahn kilang amwail kamwomwala; oh met udahn pahn wiawi ma kumwail sohte pahn koluhla, Kauno ketin mahsanih; oh irail dih kapahieuo me pahn kahrehda amwail kamwomwalao.

11 Kauno ketin mahsanih, ahpw ma kumwail pahn koluhla oh pwurala rehn Kauno amwail Koht I pahn kauhdi ei engieng, ei, met Kauno me ketin mahsanih, meid pai irail akan me pahn koluhla oh sohpeidohng ie, ahpw meid suwediong mehmen me sohte pahn koluhla.

12 Ei, meid suwediong kahnihmw lap en Saraemla; pwe kilang, iei pwehki irail akan me mwahu e pahn doarehla; ei, meid suwediong kahnihmw lap wet, pwe I kasawihadahr, Kauno ketin mahsanih, me tohto, iei, pali laud en kahnihmw wet, me mohngiongarail kan pahn keptakaila ong ie, Kauno ketin mahsanih.

13 Ahpw meid pai irail kan me pahn koluhla, pwe irail me I pahn doarehla. Ahpw kilang, ma sohte aramas mwahu kan me mih nan kahnihmw lap wet, kilang, I pahn wiahda kisiniei en kohdihdosang nanleng oh kamwomwala.

14 Ahpw kilang, iei pwehki mour en aramas mwahu kan me kahrehda re poadoandoarla. Ahpw kilang, ahnsouo pahn kohdo, Kauno ketin mahsanih, me ni ahnsou me kumwail pahn kausehla aramas mwahu kan sang rehmwail, eri kumwail pahn lel ahnsou en kamwomwala; ei, meid suwediong kahnihmw lap wet, pwehki wiewia suwed oh tiahk suwed kan me kin wiawi loale.

15 Ei, oh meid suwediong kahnihmw en Kidion, pwehki wiewia suwed oh tiahk suwed kan me kin wiawi reh.

16 Ei, oh meid suwediong kahnihmw koaros me kapilpene sahpwet, me Mehn Nihpai kan sapwaniki, pwehki wiewia suwed oh tiahk suwed kan me kin wiawi rehrail.

17 Oh kilang, keriah ehu pahn kohdo pohn sahpwe, Kauno Wasalapalap mahsanih, pwehki mour en aramas pwukat pohn sahpwet, ei, pwehki arail wiewia suwed oh arail tiahk suwed kan.

18 Oh e pahn wiawi, Kauno Wasalapalap mahsanih, ei, atail Koht mehlel oh me lapalap, me mehmen me pahn ekihla ah pai kan nan sampah e sohte pahn pwurehng diarada, pwehki keriah lap en sahpwet, ihte ma e wia aramas mwahu men oh pahn ekihla rehn Kauno.

19 Pwe, Kauno ketin mahsanih, I men re en ekihla arail pai kan rehi; oh meid suwediong irail akan me sohte pahn ekihla arail pai kan rehi; pwe sohte me ekihla ah pai kan rehi ihte me mwahu kan; oh mehmen me sohte pahn ekihla rehi, meid suwediong ih, oh pil ah pai kan, oh sohte me pahn kak pwurehng alehdi pwehki keriahn sahpwet.

20 Oh rahno pahn lelledo me re pahn ekihla arail pai kan, pwehki mohngiongarail kan kin noahroke dipwisou kan; oh pwehki mohngiongarail kan tengedi pohn arail dipwisou kan, oh pahn ekihla arail pai kan ahnsou me re pahn tangasang arail imwintihti kan; pwehki arail sohte ekihla rehi, meid suwediong irail oh arail pai kan; oh ni rahno re pahn kalokolok, Kauno ketin mahsanih.

21 Kilang kumwail, aramas kan nan kahnihmw lap wet, oh rong mwahu ei koasoi kan; ei, rong mwahu mahsen kan me Kauno ketin mahsanih; pwe kilang, e mahsanih me kumwail riahla pwehki amwail dipwisou kepwehpweh kan, oh pil amwail dipwisou kepwehpweh kan riahla pwehki amwail noahroke amwail dipwisou kan oh sohte men rong mahsen en ih me ketikihong kumwail.

22 Kumwail sohte kin tamatamanKauno amwail Koht nan soahng kan me e ketin kapaiahkinkumwail, ahpw kumwail kin tamataman amwail dipwisou kepwehpweh kan, oh sohte kapingkihong Kauno amwail Koht; ei, mohngiongamwail kan sohte karanih Kauno, ahpw re direkihla pohnmwahso laud, kahrehda aklapalap, oh kala mehlel, noahrok, akupwung, oh lamalam oh ineng en kawehla meteikan, kailok, oh kam aramas, oh soahngen wiewia suwed kan kaoros.

23 Pwehki kahrepe wet me Kauno Koht ketikidohr keriah pohn sahpwet, oh pil keriahla amwail dipwisou kepwehpweh kan, oh met wiawi pwehki amwail wiewia suwed kan.

24 Ei, meid suwediong aramas pwukat, pwehki ahnsou wet lelledohr, me kumwail kesehieisang soukohp kan, oh kumwail kawe irail, oh katehki takai irail, oh kemeirailla, oh wiahiong irail soahngen wiewia suwed kan koaros, duwehte irail mehn mahs ko.

25 Oh met ahnsou me kumwail kin koasoai, kumwail kin nda: Ma se iang momour nan mwehin aht pahpahn kawahko, se sohte pahn kemehla soukohp kan; se sohte pahn katehki takai irail, oh kausirailla.

26 Kilang kumwail suwedsang irail; pwe nin duwen Kauno e ketin ieias, ma soukohp men pahn ketido rehmwail oh mahsanihong kumwail mahsen en Kauno, me pahn kadehdehki amwail dihp kan oh wiewia suwed kan, kumwail lingeringerda pah, oh kesehieila oh rapahki soahngen wiepe koaros pwe en kawehla ih; ei, kumwail pahn nda me e wia soukohp likamw, oh me e wia aramas dipan men, oh sang tepilo, pwehki eh kadehdehki me amwail wiewia kan suwed.

27 Ahpw kilang, ma aramas men pahn kohdo rehmwail oh nda: Kumwail wia met, pwe e sohte suwed; kumwail wia mwo pwe kumwail sohte pahn lokolok; ei, e pahn nda: Kumwail idawehn ineng en pein amwail mohngiong kan; ei, kumwail idawehn ineng en nan masamwail kan, oh wia dahme amwail mohngiong kan inangih—oh ma aramas men pahn kohdo rehmwail oh nda met, kumwail pahn alehda, oh nda me e wia soukohp men.

28 Ei, kumwail pahn wahuneki, oh kumwail pahn kihong amwail dipwisou kan; kumwail pahn kihong noumwail kohl, oh noumwail silper, oh kumwail pahn kalikawihki likou pweilaud; oh pwehki eh widingehkin kumwail koasoai kan, oh e pahn nda me koaros mwahu, kumwail sohte pahn kilang eh sapwung.

29 Oh kumwail dih suwed oh kahngohdi; kumwail kekeluwakalahr oh kumwail wia aramas keptakai, ia uwen werei en amwailmedewe me Kauno pahn ketin kanengamahiong kumwail? Ei, ia uwen werei en amwail pahn mweidehng pein kumwail en idawehn kaweid likamw oh maskun kan? Ei, ia uwen werei en amwail pahn pilada rotorot sang marain?

30 Ei, kilang, engieng en Kauno lelohngehr kumwail; kilang, e ketin kerialahr sahpwet pwehki amwail wiewia suwed kan.

31 Oh kilang, ahnsouo pahn kohdo me e pahn ketin keriahla amwail dipwisou kepwehpweh kan, pwe re en likekirisla, pwe kumwail en sohte kak koliraildi; oh nan ahnsou me kumwail pahn semwehmwehla kumwail sohte pahn kak koliraildi.

32 Oh nan ahnsou me kumwail pahn semwehmwehla kumwail pahn pekipek rehn Kauno; oh amwail pekipek pahn sohte katepe, pwehki tehnla lelohngehr kumwail, oh amwail kamwomwala udahn pahn wiawi; oh kumwail udahn pahn sengiseng oh wie weriwer nan rahno, Kauno Wasalapalap ketin mahsanih. Oh kumwail ahpw pahn mwahiei, oh nda:

33 Oh ma I koluhlahtehu, oh sohte kemehla soukohp kan, oh kostakaiih irail, oh kausirailla. Ei, nan rahno kumwail pahn nda: Oh ma kitail tamatamante Kauno atail Koht nan ahnsou me e ketikihong kitail atail pai kan, oh pai kan sohte pahn likekirisla oh salongasang kitail; pwe kilang, atail pai kan kohsangkitailehr.

34 Kilang, kitail kin pwil dipwisou en doadoahk oh manda e kin salongala; oh kilang, neitail kedlahs kan kin kohsang kitail nan ahnsou me kitail kin rapahki ong mahwin.

35 Ei, kitail nekidalahr atail pai kan oh re kin salongasang kitail, pwehki keriahn sahpwet.

36 Oh ma kitail koluhlahtehu nan rahno me mahsen en Kauno kohieng kitail; pwe kilang sahpwe rialahr, oh soahng koaros likekirislahr, oh kitail sohte kak koliraildi.

37 Kilang, tepil kan kin kapilkitailpenehr, ei, ih me songosong en kawehla palingenatail kan, nah tohnleng kan kin kapilkitailpene. Kilang, atail wiewia suwed kan me laud. Maing Kaun, komw sohte kak kasohpeiwei sapwellimomwi engieng sang reht? Oh met pahn mwomwen amwail koasoi nan ahnsou ko.

38 Ahpw kilang, amwail ahnsou en kaunopada dauliher; kumwail wie kasakasaula ahnsou en amwail komourla lao e udahn pwandala mehlel, oh amwail kamwomwala udahn pahn wiawi; ei, pwe kumwail rapahki erein amwail mour me kumwail sohte kak alehdi; oh kumwail rapahki peren nan wiewia suwed, me kin uhwong ahnepen mour pwung me wia sapwellimen atail lapalap oh Kaun Soutuk.

39 Oh kumwail aramas en sahpwet, I men kumwail en rong ei koasoi kan! Oh I kapakapki me engieng en Kauno pahn sohpeisang kumwail, oh me kumwail pahn koluhla oh komourla.