1 Cunan ñuca, Moroni, catini ñuca tandachishca quilcaihuan. Chaimanda, riqui, yalishca jipa Akish, paipaj ali rijsicunapaj pacalla tandanajunacunamanda, riqui urmachirca Omerpaj reinota.

2 Shina cashpapash, Apunchij Omerta shungumanda llaquirca, paipaj churicunatapash, paipaj ushicunatapash maijanguna tucuchinata na mascan.

3 Apunchij Omerman villarca shuj muscuipi alpamanda llujshichun; chaimanda Omer alpamanda llujshirca paipaj ailluhuan, tauca punllacunata purirca, Shimpaj urcu ladota rirca, yalircapash pushtuta maipi Nefitacuna tucuchishca carca, chaimanda indi llujshij ladoman rirca, chayarca shuj pushtuman caita shutichirca Ablom, jatun mama cocha manñapi, pai shayachirca paipaj facha huasita, paipaj churicuna, paipaj ushicuna, tucui paipaj huasiucupura, Jared, paipaj aillucunapash na rirca.

4 Yalishca jipa Jared carca ungishca jatun mandaj llactapuracunapaj, na ali rurajcunapaj maquihuan; pai curca Akishman paipaj ushita huarmi cachun.

5 Yalishca jipa Akish paipaj suegropaj causaita quichungapa munarca; pai mañarca maijan jurashcacunata punda juramentocunahuan, paicuna cuchurca paipaj suegropaj umata, imashna paipaj tiarinapi tiajujpi, paipaj llactapuracunaman audienciata cushpa.

6 Shina jatun cashca carca cai na ali rurai jichari, pacalla tandanajui cai huaglichishca carca tucui llactapuracunapaj shungucunata; chaimanda Jared paipaj tiarinapi huañuchishca carca, Akish paipaj pushtupi reinarca.

7 Yalishca jipa Akish paipaj churita celosta chari callarirca, chaimanda paita cárcelpi churarca, ashalla micunahuan charirca nacashpa nima micunahuan imaura huañungacaman.

8 Cunan huañushcapaj huauqui, (paipaj shuti carca Nimra) fiñashca carca paipaj taitahuan paipaj taita imata rurashcamanda paipaj huauquita.

9 Yalishca jipa Nimra tandachirca ashalla runacunata, alpamanda llujshirca, rirca Omerhuan causangapa.

10 Yalishca jipa Akish charirca cutishuj churicunata, llactapuracunapaj shungucunata misharca, masqui paicuna jurashca cashpa paiman rurangapa tucui laya na ali ruraicunata imashna pai munashca.

11 Cunan Akishpaj llactapuracuna munashca carca charijyanata, imashna Akish munashca carca ushaita; chaimanda, Akishpaj churicuna paicunaman culquita cararca, chaicunamanda tucuimanda yalishca llactapuracunata misharca.

12 Tiai callarirca macanajui Akishpaj churicuna Akishhuan, cai tucurirca tauca huatacunapi, ari, ñalla tucui reinomanda llactapuracuna tucuringacaman, ari, tucuilla quimsa chunga almacunalla na, paicuna calparca Omerpaj huasihuan.

13 Chaimanda, Omer carca cutin tigrachishca paipaj chasquina alpaman.

14 Yalishca jipa Omer rucuyai callarirca; shina cashpapash, paipaj rucuyaipi charirca Emerta, Emerta ungirca jatun mandaj cachun paipaj pushtupi reinachun.

15 Emerta jatun mandaj cachun ungishca jipa pai ricurca sumaj causaita alpapi ishcai huatacunata, pai huañurca, ricushca cashpa ninan tauca punllacunata, ima junda carca llaquirihuan. Yalishca jipa Emer paipaj pushtupi reinarca, paipaj taitapaj saruicunata catirca.

16 Apunchij cutin anchuchi callarirca ninan llaquita alpamanda, Emerpaj huasi ninanda ali mirarca Emerpaj reinadopi; sujta chunga ishcai huatacunata paicuna ninan shinllicunaman tigrarca, shinashpa ninan charijcuna tucurca—

17 Charishpa tucui laya fucushcacunamanda, muyucunamandapash, sedacunamandapash, fino linocunamandapash, curimandapash, culquimandapash, juyailla cuzascunamandapash;

18 Tucui laya huagracunamanda, bueycunamanda, huarmi huagracunapash, llamacunamandapash, cuchicunamandapash, chivocunamandapash, tucui laya cutishuj animalcunamandapash imacuna runapaj micunapa minishtirishca carca.

19 Charircapash caballocuna, burrocunapash, tiarcapash elefantecuna, curelomescunapash, cumomescunapash; tucui caicuna runapaj minishtirishca carca, ashtahuanbacha elefantecuna, curelomescunapash, cumomescunapash.

20 Shina Apunchij paipaj achil yachishcacunata jicharca cai alpa jahuapi, imata tucui cutishuj alpacunamanda yali ajllashca carca; pai mandarca maijanbash alpata charishpaca caita charinga Apunchijpaj munashcapa, nacashpa paicuna tucuchi tucushca canga imaura paicuna na ali ruraicunapi fucushca cajpi; caicunapi, Apuchij nin: Ñuca jichasha ñucapaj tucui fiñaita.

21 Emer ricushpa chasquichinata rurarca ali ruraipi tucui paipaj punllacuna, pai charirca tauca churicuna, ushicuna; pai charirca Coriántum, ungirca Coriántumda paipaj pushtupi reinachun.

22 Coriántumda paipaj pushtupi reinachun ungishca jipa chuscu huatacunata causarca, ricurcapash sumaj causaita alpapi; ari, Ali Ruranapaj Churitapash ricurca, cushijurcapash, ninanda cushijurcapash paipaj punllapi; sumaj causaipi huañurca.

23 Yalishca jipa Coriántum paipaj taitapaj chaquicunata purirca, ninan jatun llactacunata shayachirca, rurarca ima ali cajta paipaj llactapuracunapa paipaj tucui punllacunapi. Yalishca jipa huahuacunata na charirca imaura pai ninan rucu cangacaman.

24 Yalishca jipa paipaj huarmi huañurca, cashpa patsaj ishcai huatacuna cashpa. Yalishca jipa Coriántum huarmita japirca, paipaj rucu huatapi, viñaj huarmita, charirca churicunata, ushicunatapash; chaimanda pai causarca patsaj chuscu chunga ishcai huatacunata charingacaman.

25 Yalishca jipa pai charirca Com, Com reinarca paipaj pushtupi; pai reinarca chuscu chunga iscun huatacunata, pai charirca Het; paipash charirca cutishuj churicuna, ushicunapash.

26 Llactapuracuna cutin caiman chaiman chajchurishca carca alpa jahuallaman, cutin callarirca ninan jatun na ali rurajcuna cangapa alpa jahuallapi, Het callarirca pacalla punda ruraicunata cutin rurangapa, paipaj taitata tucuchingapa.

27 Yalishca jipa paipaj taitata tiarinamanda anchuchirca, paita huañuchirca paipaj propio espadahuan; paipaj pushtupi pai reinarca.

28 Cutin shamurca achil villachijcuna, yachachishpa arrepentimientota paicunaman—paicuna preparanapacha carca Apunchijpaj ñanda nacashpa shamunga shuj llaquichina alpa jahuallaman; ari, shina tianga shuj jatun ninan yarjai, maipi paicuna tucuchishca canga na arrepentirijpica.

29 Ashtahuangari llactapuracuna na crirca achil villachijcunapaj shimicunata, ashtahuangari paicunata calpachirca; huaquingunata utujucunaman shitarca huañuchun saquircapash. Yalishca jipa paicuna tucui cai cuzascunata rurarca jatun mandaj, Het rurachunbacha saquimanda.

30 Yalishca jipa tiai callarirca jatun nimata na tarina alpa jahuapi, causajcuna ñapash tucuri callarirca nimata na tarimanda, imashpa na tiarca tamia alpa jahuallapi.

31 Tiarca venenosa culebracuna alpa jahuallapi, tauca llactapuracunata venenarca. Yalishca jipa paicuna ataju llamacuna calpai callarirca venenoso culebrecunamanda, urai alpaman, imami Nefitacuna shutichishca carca Zarahemla.

32 Yalishca jipa taucacuna ñanbi huañurca; shina cajpipash, huaquinguna calparca urai alpaman.

33 Yalishca jipa Apunchij culebracunata paicunata ama ashtahuan catichun saquirca, ashtahuangari paicunata ñanbi jarcachun llactapuracuna ama yalichun, maijanbash yalingapa munajpi urmachun venenoso culebracunamanda.

34 Yalishca jipa llactapuracuna sacha animalcunapaj rishcata catirca, yarjaihuan micurca huañushca animalcunata imacuna urmarca ñanbi, imaura tucuchingacaman. Cunan imaura llactapuracuna ricurca huañugrinata arrepentiri callarirca paicunapaj na ali ruraicunamanda Apunchijta mañarcapash.

35 Yalishca jipa paicuna ninanda humillarirshca jipa Apunchijpaj ñaupapi tamiata cachamurca alpa jahuaman; llactapuracuna cutin causari callarirca, fucushcacuna tiai callarirca vichai llactacunapi, tucui muyundi llactacunapi. Apunchij ricuchirca paipaj ushaita paicunaman ninan yarjaimanda alchishpa charishpa.