Éterpaj Quilcashca
Jareditacunapaj tandachishca quilcashca, japishca ishcai chunga chuscu jirru fangacunamanda tarishca Limhipaj llactapuracunamanda jatun mandaj Mosíahpaj punllacunapi.
1 Capítulo
Moroni tandachin Éterpaj quilcashcacunata—Éterpaj genealogíata rijsichishca can—Jareditacunapaj shimirimaicunata na pandachishca can Babelpaj Torrepi—Apunchij paicunata pushasha ninbacha shuj ajllashca alpaman paicunata rurangapa shuj jatun llactata.
1 Cunan ñuca Moroni, rurai callarini shuj tandachishpa quilcashcata chai punda causajcunamanda picuna tucuchishca carca Apunchijpaj maquihuan cai vichai llacta alpa jahuallamanda.
2 Ñuca japini tandachishpa quilcashcata ishcai chunga chuscu jirru fangacunamanda caicuna Limhipaj llactapuracuna tarishca carca, caicuna shutichishca carca Éterpaj Quilcashca.
3 Ñuca imashna yuyani cai tandachishca quilcashcapaj callaripi, maipi parlan cai pachata rurashcamanda, Adánmandapash, shuj tandachishpa quilcashcata chai punllamanda jatun torrecaman, imapash cuzascuna yalishca runacunapaj huahuacunahuan chai punllacaman, Judíocunapapi cashca can.
4 Chaimanda ñuca na quilcani chai cuzascunata ima yalishca Adánpaj punllacunamanda chai punllacaman; ashtahuangari jirru fangacunapi can; maijan caicunata tarij, ushaita charinga chasqui ushangapa tucuilla tandachishpa quilcashcata.
5 Ashtahuangari riqui, na quilcanichu tucuilla tandachishpa quilcashcata, ashtahuangari ashatalla quilcani, torremanda urai imaura paicuna tucurishcacaman.
6 Cai layapi ñuca tandachishpa quilcani. Pimi caita tandachishca quilcarca Éter carca, pai carca Coriantorpaj cati aillu.
7 Coriantor carca Morónpaj churi.
8 Morón carca Etempaj churi.
9 Etem carca Ahahpaj churi.
10 Ahah carca Setpaj churi.
11 Set carca Shiblónpaj churi.
12 Shiblón carca Compaj churi.
13 Com carca Coriántumpaj churi.
14 Coriántum carca Amnigaddapaj churi.
15 Amnigadda carca Aarónpaj churi.
16 Aarón carca Hetpaj cati aillu, pimi carca Heartompaj churi.
17 Heartom carca Libpaj churi.
18 Lib carca Kishpaj churi.
19 Kish carca Corompaj churi.
20 Corom carca Levípaj churi.
21 Leví carca Kimpaj churi.
22 Kim carca Moriantónpaj churi.
23 Moriantón carca Riplákishpaj cati aillu.
24 Riplákish carca Shezpaj churi.
25 Shez carca Hetpaj churi.
26 Het carca Compaj churi.
27 Com carca Coriántumpaj churi.
28 Coriántum carca Emerpaj churi.
29 Emer carca Omerpaj churi.
30 Omer carca Shulepaj churi.
31 Shule carca Kibpaj churi.
32 Kib carca Oríahpaj churi, pimi carca Jaredpaj churi;
33 Cai Jared shamurca paipaj huauquihuan, paicunapaj aillucunahuan, cutishujcunahuanbash paicunapaj aillucunahuan, jatun torremanda, imaura Apunchij pandachirca llactapuracunapaj shimirimaita, paipaj fiñaipi jurarca paicuna caiman chaiman chajchushca cagrijta tucui alpa jahuallapi; Apunchijpaj shimimanda llactapuracuna chajchushca carca.
34 Jaredpaj huauqui cashpa shuj jatun, shinlli runa, shuj runa Apunchijpaj ninan achilyachishca, Jared, paipaj huauqui, nirca paita: Mañai Apunchijta, pai ama pandachichun ñucanchita shinashpa ñucanchi shimicunata na entendi ushashun.
35 Yalishca jipa Jaredpaj huauqui Apunchijta mañarca, Apunchij llaquirca Jaredta; chaimanda pai na pandachirca Jaredpaj shimirimaita; Jared, paipaj huauquipash na pandachishca carca.
36 Shina Jared paipaj huauquita nirca: Mañai cutin Apunchijta, paipaj fiñaita anchuchipapash paicunapamanda maijanguna ñucanchi ali rijsicunamanda, ama pandachichun paicunapaj shimirimaita.
37 Yalishca jipa Jaredpaj huauqui mañarca Apunchijta, Apunchij llaquirca paicunapaj ali rijsicunata paicunapaj aillucunatapash, chaimanda na pandachishca carca.
38 Yalishca jipa Jared parlarca cutin paipaj huauquita, nishpa: Ri tapui Apunchijta ñucanchita calpachigrinllu alpamanda, calpachigrijpica, mañai paita maiman ñucanchi rinata. Pita yachan, Apunchij ñucanchita nacha apanga chai alpaman maijan ajllashca can tucui alpamanda? Shina cajpica, fiel cashunchi Apunchijman, ñucanchi caita chasqui ushangapa ñucanchipa chasquinata.
39 Yalishca jipa Jaredpaj huauqui mañarca Apunchijta imashna parlashca carca Jaredpaj shimihuan.
40 Yalishca jipa Apunchij uyarca Jaredpaj huauquita, paita llaquirca, paita nirca:
41 Ri tandachi quiquinba ataju llamacunata, ishcandi jarita, huarmitapash, tucui laya; alpamanda muyutapash tucui layata; quiquinba aillucunatapash; quiquin Jaredpaj huauquipash paipaj aillupash; quiquinba ali rijsicunapash paicunapaj aillucunapash, Jaredpaj ali rijsicunapash paicunapaj aillucunapash.
42 Imaura quiquin caita rurashpaca ringui paicunapaj umaman urai pugru alpaman imami can vichaipi. Chaipi ñuca quiquinhuan tuparisha, ñuca risha quiquinba ñaupata shuj alpaman imata ajllashca can cai alpamanda tucui alpacunamanda.
43 Chaipi ñuca quiquinda achilyachisha quiquinba cati aillucunatapash, quiquinba huauquipaj cati aillucunatapash, maijan quiquinhuan rijcunatapash, shayachishapash shuj jatun llactata. Na tiangachu tucui alpa jahuallapi cutishuj yali jatun llacta, ñuca shayachishca ñucapaj cati aillumanda. Shina ñuca rurasha quiquinhuan cai unai punllacunata quiquin ñucata mañashcamanda.