Achil quilcashcacuna
Éter 8


8 Capítulo

Tiarca macanajuicuna, randimanda plituricuna reinomanda—Akish ruran shuj juramentoshca pacalla tandanajunacuna jatun mandajta huañuchingapa—Pacalla tandanajushcacuna ayapaj can, chaimanda catin jatun llactacunapaj tucuripi—Moderno Gentilcunata tigrashpa yarichin pacalla tandanajushcacunapaj contra cai mascanga libertad tucuchingapa tucui alpacunapaj, llactacuna, jatun llactacuna.

1 Yalishca jipa pai charirca Omerta, Omer reinarca paipaj pushtupi. Omer charirca Jaredta; Jared charirca churicunata, ushicunatapash.

2 Jared paipaj taitata na cazurca, Hetpaj alpapi causarca. Yalishca jipa pai tauca llactapuracunata pandachirca, paipaj na alipa yachashca shimicunamanda, imaura mishangacaman chaupi reinota.

3 Chaupi reinota mishashca jipa paipaj taitahuan macanajui callarirca, paipaj taitata prezu aparca, huatai tucushcashnapi sirvichirca;

4 Cunan, Omerpaj reinado punllacunapi paica huatai tucushcashnapi carca paipaj punllacunamanda chaupita. Yalishca jipa pai charirca churicunata, ushicunatapash, caicunamanda carca Esrom, Coriántumr;

5 Paicuna ninanda fiñashca carca Jared paicunapaj huauquipaj ruraicunamanda, shinashpa paicuna jatarirca tandachirca macanajujcunata Jaredhuan macanajungapa. Yalishca jipa paicuna macanajurca tutapi.

6 Yalishca jipa imaura Jaredpaj macanajuj runacunata huañuchishpa paitapash ñalla huañuchirca; ama huañuchichun mañarca, paipaj taitapaj reinota cungapa munarca. Yalishca jipa paipaj causaita quishpichirca.

7 Cunan Jared ninanda llaquiri callarirca reinota chingachishcamanda, imashpa paipaj shunguta reino jahuapi, cai pachapaj punchallapipash churashca caimanda.

8 Cunan Jaredpaj ushi ninan yachashca cashpa, ricurca paipaj taitapaj llaquirita, shuj planda yuyaipi charirca imashna tigrachingapa reinota paipaj taitaman.

9 Cunan Jaredpaj ushi ninan juyaillagupacha carca. Yalishca jipa parlarca paipaj taitahuan, nirca: Imashpata ñuca taita shinapacha llaquirin? Nachu liishca tandachishpa quilcashcata imata ñucanchi taitacuna apamurca jatun mama cochata? Riqui, nachu tian shuj quilcashca paicunapaj punda causajcunahuan, paicunapaj pacalla ruraicunahuan chasquirca reinocunata, jatun punchallatapash?

10 Cunan, chaimanda, taita cachai pushamuchun Akishta, Kimnorpaj churi; riqui, ñuca juyaillagu cani, ñuca bailasha paipaj ñaupapi, paita munachisha, munahuanga paipaj huarmi cachun; chaimanda quiquinda mañajpica ñuca paipaj huarmi tucuchun, shina ningui: Ñuca paita cusha can apamujpi ñuca taita, jatun mandajpaj umata.

11 Cunan Omer carca Akishpaj ali rijsi; chaimanda, imaura Jared Akishta cayacacharca, Jaredpaj ushi paipaj ñaupapi bailarca paiman munachirca, shinashpa pai munarca huarmi cachun. Yalishca jipa pai Jaredta nirca: Cuhuai ñucapaj huarmi cachun.

12 Jared nirca: Ñuca paita cusha, ñucaman apamujpi ñuca taita, jatun mandajpaj umata.

13 Yalishca jipa Akish tandachirca Jaredpaj huasipi tucui paipaj aillucunata, paicunaman nirca: Canguna jurahuanguichicha fielcuna cangapa cuzascunapi imatami ñuca cangunapamanda munani?

14 Yalishca jipa tucuilla paiman jurarca, jahua pachapaj Diosmanda, jahua pachacunamandapash, alpamandapash, paicunapaj umacunamandapash, maijanbash Akishpaj munaita na nishpaca paipaj umata chingachinga; maijanbash Akish paicunaman ima cuzasta villashcata villajpica, shinallata paipaj causaita chingachinga.

15 Yalishca jipa shina paicuna ari nirca Akishhuan. Akish paicunahuan juramentocunata rurarca maijangunata pundamanda cushca carca maijan ushaita mascajcunaman, imata maquin maquin urai apamushca carca Caínmanda, pimi carca shuj huañuchij callarimanda.

16 Paicuna huacaichirca ayapaj ushaita cai juramentocunata llactapuracunaman rurashpa, paicunata yanapi alichingapa, ayudangapa shina laya ushaita mascajcunata, mishangapa ushaita, huañuchina, shuhuana, llullana, tucui laya na ali ruraicunata rurana, fornicacióncunatapash.

17 Jaredpaj ushi carca pimi churarca paipaj shungupi cai punda cuzascunata mascachun; Jared Akishpaj shungupi churarca; chaimanda, Akish caita rurarca paipaj aillucunaman, ali rijsicunaman, paicunata caruyachishpa juyailla nishcapachacunahuan imatapash rurachun pai munashcata.

18 Yalishca jipa paicuna shuj pacalla tandanajunacunata rurarca, punda tiempocunashna; cai pacalla tandanajui can tucui millanayaimanda, na ali ruraimanda tucuita yali, Diospaj ñavipi;

19 Apunchij na ruranllu pacalla tandanajunacunapi, pai na munanllu runa yahuarta jichachun, ashtahuangari tucui cuzascunapi caita napacha saquishca, runapaj callarimanda.

20 Cunan ñuca, Moroni, na quilcani paicuna imalaya juramentocunata, pacalla tandanajunacunata, imashpa yachaj chayachihuashca caicuna tiajta tucui llactapuracunapi, tarinchipash Lamanitacunapapi.

21 Caicuna tucuchirca cai llactapuracunata pimanda ñuca cunan parlajuni, Nefipaj llactapuracunatapash tucuchirca.

22 Maijan llacta shinllichijpi shina pacalla tandanajunacunata, charingapa ushaita, charijyangapapash, imaura tucui llactaman chajchungacaman, riqui, paicuna tucuchishca canga; imashpa Apunchij na saquinga paipaj santocunapaj yahuar, imami paicunamanda jichashca cashca, punllan punllan venganzapa paita mañachun alpamanda paicunapaj jahuapi, pai na shinallata rurashpa.

23 Chaimanda, Oh Gentilcuna, cai can Diospi jatun yachaipi cai cuzascuna ricuchishca cachun, shina canguna arrepentirichun cangunapaj juchacunamanda, ama saquichipash cai huañuchina tandanajuicuna cangunata mishachun, imami shayachishca can mishangapa ushaita, charijyangapa—ruraipash, ari, tucuchinapallata rurai cangunapaj jahuaman ama shamuchun, ari, Mana Tucurina Diospaj alicaipaj espada shamunga cangunapaj jahuaman, urmachingapa, tucuchingapapash canguna saquijpi cai cuzascuna tiachun.

24 Chaimanda, Apunchij cangunata mandan, imaura ricushpa cai cuzascuna cangunapa shamujta, rijcharinguichi shuj yachaiman cangunapaj manllanayai canaman, cai pacalla tandanajunacunamanda ima tian cangunapi; nacashpa ay cai can, paicunapaj yahuarmanda maijan huañushcacunamanda; paicuna mañan alpamanda venganzata, maijan caita churashcacunamandapash.

25 Cai yalishca jipa maijan caita churan tucuchingapa mascan libertadta tucui alpacunamanda, llactacuna, jatun llactacuna; tucuchinata alichun apan tucui llactapuracunata, imashpa caita aya churashca can, pimi can tucui llullacunapaj taita; chai llullajllata pimi umarca ñucanchi callari taitacunata, ari, chai llullajllata pimi runata huañuchichirca callarimanda; pimi shinlliyachirca runacunapaj shungucunata paicuna achil villachijcunata huañuchirca, rumihuan paicunata macarca, calpachircapash callarimanda.

26 Chaimanda, ñuca, Moroni, mandashca cani quilcachun cai cuzacunata, na ali rurai tucuchishca cachun, punlla shamunga imaura Satanás na ushaita charinga runacunapaj huahuacunapaj shungucunapi, ashtahuangari cumbidachun catilla alita rurachun, shamuchun tucui ali ruraipaj pujyuman, quishpirishca cachun.