1 Ket napasamak dagiti aldaw ni Ether kadagiti aldaw ni Coriantumr; ket ni ^aCoriantumr ti ari iti intero a daga.

2 Ket ni ^aEther ti propeta ti Apo; gapuna dimteng ni Ether kadagiti aldaw ni Coriantumr, ket rinugianna ti nagipadto kadagiti tao, ta saan a ^bmalapdan gapu ta adda kenkuana ti Espiritu ti Apo.

3 Ta ^aimmararaw manipud iti agsapa, nga agingga a lumneken ti init, a manggutgutugot kadagiti tao a mamati iti Dios ket agbabawida di la ket mamin-ano ta ^bmadadaelda, a kunkunana kadakuada a mapasamak amin a banag babaen ti ^cpammati—

4 Gapuna, dakkel ti ^anamnama ti mamati iti Dios iti nasaysayaat a lubong, wen, uray pay iti lugar iti makanawan ti Dios, a yeg ti pammati dayta a namnama, a ^blumansad iti kaunggan dagiti tao, a mangikkat iti duaduada ken mamatibker kadakuada, a kanayon a mangsursurot kadagiti ^cnaimbag nga aramid, ta naibagnosda a ^dmangigloria iti Dios.

5 Ket napasamak nga impadto ni Ether dagiti naindaklan ken datdatlag a banag kadagiti tao, a dida pinati, gapu ta dida ida nakita.

6 Ket ita, siak, ni Moroni, adda ibagak maipanggep kadagitoy a banag; ipakitak iti lubong a bambanag ti ^apammati a mabalin a ^bnamnamaen ken ^csaan a makita; gapuna, saanyo a balusingsingen gapu ta diyo makita, ta awan ti maawatyo a saksi agingga iti ^dpannakasuot ti pammatiyo.

7 Ta babaen ti pammati ti nagpakitaan ni Cristo kadagiti ammatayo, kalpasan ti ibabangonna iti tanem; ket saan a nagpakita kadakuada agingga a naaddaanda iti pammati kenkuana; gapuna, nasken unay nga adda pammati dagiti dadduma kenkuana, ta saan a nagpakita iti lubong.

8 Ngem nagpakita iti lubong gapu iti pammati dagiti tao, ket intan-okna ti nagan ti Ama, ken nangisagana iti pamuspusan a mabalin a pakiranudan dagiti dadduma iti nailangitan a sagut, ta bareng no mangnamnamada kadagidiay banag a dida makita.

9 Gapuna, mabalinyo met ti maaddaan iti namnama, ken makiranud iti sagut, no adda la ketdi pammatiyo.

10 Adtoy babaen ti pammati ti ^anakaawagan dagidi nagkauna a naibatay iti nasantuan nga urnos ti Dios.

11 Gapuna, naited ti paglintegan ni Moises babaen ti pammati. Ngem iti sagut ti Anakna nangisagana ti Dios iti ^anasaysayaat a wagas; ket natungpal babaen ti pammati.

12 Ta no awan ti ^apammati dagiti annak ti tao saan a makaaramid ti Dios iti ^bmilagro kadakuada; gapuna, saan a nagpakita agingga nga adda pammatida.

13 Adtoy, ti pammati da Alma ken Amulek ti nangrebba iti ^apagbaludan iti daga.

14 Adtoy, ti pammati da Nephi ken Lehi ti nanggutugot iti ^apanagbalbaliw dagiti Lamanite, tapno mabuniaganda iti apuy ken iti ^bEspiritu Santo.

15 Adtoy, ti pammati da ^aAmmon ken dagiti kabsatna ti nanggutugot iti ^bnaindaklan a milagro kadagiti Lamanite.

16 Wen, ken kasta met amin dagiti nanggutugot kadagiti ^amilagro ginutugotda babaen ti ^bpammati, uray dagiti immun-una ngem ni Cristo ken kasta met dagiti simmaruno kenkuana.

17 Ket babaen ti pammati nagun-od dagiti tallo a disipulo ti kari a ^adida maramanan ti patay; ket saanda a nagun-od ti kari agingga a namatida.

18 Ket awan ti nagutugotda a milagro iti kaano man agingga a namatida; gapuna immuna pay a namatida iti Anak ti Dios.

19 Ket adu ti aglaplapusanan ti pigsa ti pammatida, uray pay idi ^asakbay a dumteng ni Cristo, a saan a nailinged iti ^bbelo, ngem pudno a nakitada kadagiti matada dagiti banag a nakitada babaen ti mata ti pammati, ket naragsakanda.

20 Ket adtoy, makitatayo iti daytoy a kasuratan a maysa kadagitoy ti kabsat ni Jared; ta nalaus ti pammatina iti Dios, ta idi isagid ti Dios ti ^aramayna saanna a nailinged iti imatang ti kabsat ni Jared, gapu iti balikas nga imbagana kenkuana, ti balikas a nagun-odna babaen ti pammati.

21 Ket kalpasan ti pannakakita ti kabsat ni Jared iti ramay ti Apo, gapu iti ^akari a nagun-od ti kabsat ni Jared babaen ti pammati, awan ti ania man a mailinged ti Apo iti imatangna; gapuna nga impakitana amin a banag kenkuana, ta awanen ti mailimed kenkuana ti ^bbelo.

22 Ket babaen ti pammati ti nakagun-odan dagiti ammak iti ^akari a dumteng dagitoy a banag kadagiti kabsatda babaen dagiti Gentil; ngarud binilinnak ti Apo, wen, nga isu ni Jesucristo.

23 Ket kinunak kenkuana: Apo, laisento dagiti Gentil dagitoy a banag, gapu iti ^akinakapsutmi nga agsurat; ta Apo inaramidnakami a maingel iti balikas babaen ti pammati, ngem dinakami inaramid a ^bmaingel nga agsurat; ta inaramidmo a nalaing amin dagitoy a tao nga agsao, gapu iti Espiritu Santo nga intedmo kadakuada;

24 Ket inaramiddakami a makasurat laeng iti sangkabassit, gapu iti kinatiweng dagiti imami. Adtoy, dinakami inaramid a maingel nga ^aagsurat a kas iti kabsat ni Jared, ta inaramidyo a naindaklan dagiti banag nga insuratna a kas iti arte, iti nalaus a pannakaammo ti tao a mangbasa kadagitoy.

25 Inaramidmo met dagiti balikasmi a nabileg ken naindaklan, nga uray la a dimi ida kabaelan nga isurat; gapuna, nadlawmi ti pagkapsutanmi idi agsuratkami, ket nagbiddutkami iti panagilugarmi kadagiti balikasmi; ket maamakak di la ket mamin-ano ta ^alaisen dagiti Gentil dagiti balikasmi.

26 Ket idi maisaok daytoy, nagsao kaniak ti Apo, a kinunana: ^aManglais dagiti maag, ngem agladingitdanto; ket umdas ti kaasik kadagiti naemma, tapno saanda a gundawayan ti pagkapsutanyo;

27 Ket no umasideg kaniak dagiti tao ipakitak kadakuada ti ^apagkapsutanda. ^bInikkak dagiti tao iti pagkapsutan tapno agpakumbabada; ket umdas ti ^cparaburko iti amin a tattao a ^dmangipakumbaba iti bagbagida kaniak, ket adda pammatida kaniak, sakonto aramiden a napigsa kadakuada dagiti ^enakapsut a banag.

28 Adtoy, ipakitakto kadagiti Gentil ti pagkapsutanda, ken ipakitakto kadakuada a mayeg kaniak ti ^apammati, namnama ken kaasi—ti burayok ti amin a kinalinteg.

29 Ket siak, ni Moroni, iti pannakangngegko kadagitoy a balikas, naliwliwaak, ket kinunak: O Apo, maaramidto ti kinalintegmo, ta ammok nga agtrabahoka kadagiti annak ti tattao a maibatay iti pammatida;

30 Ta kinuna ti kabsat ni Jared iti bantay Zerin, ^aMaikkatka, ket naikkat. Ket no awan ti pammatina saan koma a naisin; gapuna agtrabahokayo a kas iti kaadda ti pammati dagiti tao.

31 Ta kasta ti panagpakitam kadagiti disipulom; ta idi maaddaandan iti ^apammati, ken nagsaoda babaen ti naganmo, nagpakitaka kadakuada a napnuan bileg.

32 Ken kasta met a malagipko nga imbagam nga insaganam ti balay ti tao, wen, uray pay dagiti ^adakkel ken nadaeg a balay ti Amam, a pakagun-odan ti tao iti nabilbileg a ^bnamnama; gapuna nasken a mangnamnama ti tao, wenno saanna a maawat ti tawidna iti lugar nga insaganam.

33 Ken manen, malagipko nga imbagam nga ^aay-ayatem ti lubong, nga uray pay no ibuismo ti biagmo para iti lubong, a mabalin nga alaem manen tapno isaganam ti lugar a para kadagiti annak ti tattao.

34 Ket ita ammok a kaasi daytoy ^aayat nga insangratmo kadagiti annak ti tattao; gapuna, malaksid no adda kaasi dagiti tao dida matawid ti lugarda nga insaganam iti dakkel ken nadaeg a balay ti Amam.

35 Gapuna, ammok iti daytoy a banag nga imbagam, a no awan ti kaasi dagiti Gentil, gapu iti pagkapsutanmi, a paneknekam kadakuada, ket ikkatem ti ^apagsiribanda, wen, uray pay dayta naawatdan, ket itedmo kadagiti umawat a nabusbuslon.

36 Ket napasamak nga inkararagko iti Apo nga ikkanna dagiti Gentil iti ^aparabur, tapno maaddaanda iti kaasi.

37 Ket napasamak a kinuna ti Apo kaniak: No awan ti kaasida awan ti aniamanna kenka, sika a napudno; gapuna, maaramidto a ^anadalus ti pagan-anaymo. Ket gapu ta nakitam ti ^bpagkapsutam mapapigsakanto, uray pay iti pagtugawam a lugar nga insaganak iti dakkel ken nadaeg a balay ti Amak.

38 Ket ita, siak, ni Moroni, agpakadaakon kadagiti Gentil, wen, ken kasta met kadagiti kabsatko nga ay-ayatek, agingga nga agkikitatayo iti ^apangukoman ni Cristo, a pakaammuan amin a tao a saan a natulawan ti ^bpagan-anayko iti darayo.

39 Ket isunton ti pannakaammoyo a ^anakitak ni Jesus, ken nagsaokami a ^brupanrupa, ken imbagana a sipapakumbaba, a kas iti panangibaga ti tao iti sabali iti pagsasaok, maipanggep kadagitoy a banag;

40 Ket sumagmamano laeng ti insuratko, gapu iti kinakapsutko nga agsurat.

41 Ket ita, ipaganetgetko a ^asapulenyo daytoy a Jesus nga insurat dagiti propeta ken apostol, tapno ti parabur ti Dios nga Ama, ken kasta met ti Apo a Jesucristo, ken ti Espiritu Santo, a nangipaneknek kadakuada iti ^bkasuratan, mabalin ken surotendakayo iti agnanayon. Amen.