1 Ket napasamak a napan ti kabsat ni Jared (ita walo ti bilang dagiti sasakayan a naisagana) iti bantay, a ninagananda iti bantay Shelem, gapu iti nalabes a kinatayagna, ken nangsukog manipud iti bato iti sangapulo-ket-innem a babassit a bato; ket puraw ken natarnawda, a kas iti aganninaw a sarming; ket intugotna ida iti tuktok ti bantay, ket immararaw manen iti Apo, a kinunana:

2 O Apo, kinunam a nasken a malakubkami kadagiti layus. Ita adtoy, O Apo, ket dimo koma kaunget ti adipenmo gapu iti pagkuranganna kenka; ta ammomi a nasantuanka ken agnaedka iti langit, ken saankami a maikari kenka; gapu iti ^apannakatnag nagtultuloy a nagbalin a dakes ti ^bkasasaadmi; nupay kasta, O Apo, inikkannakami iti bilin a nasken nga umawagkami kenka, a manipud kenka umawatkami iti maibatay iti tarigagayanmi.

3 Adtoy, O Apo, sinaplitnakami gapu iti kinamanagbasolmi, ken pinapanawnakami, ket kadagitoy adu a tawen addakami iti kabakiran; nupay kasta, ^anaasika kadakami. O Apo, kitaennak koma a siaasi, ket iwaksim ti pungtotmo kadagitoy a tattaom, ket dimo ipalubos nga agballasiwda iti daytoy narungsot a taaw iti kasipngetan; ngem adtoy dagitoy banag a sinukogko manipud iti bato.

4 Ket ammok, O Apo, nga adda kenka ti amin a ^apannakabalin, ket maaramidmo ti amin a kayatmo a pagimbagan ti tao; ngarud sagidem dagitoy a bato, O Apo, iti ramaymo, ket isaganam ida tapno agrimatda iti kasipngetan; ket agrimatda kadakami iti sasakayan nga insaganami, tapno adda silawmi bayat ti ibaballasiwmi iti baybay.

5 Adtoy, O Apo, maaramidmo daytoy. Ammomi a kabaelam nga ipakita ti naindaklan a bilegmo, a ^akasla bassit iti pannakaawat dagiti tao.

6 Ket napasamak nga idi maisao ti kabsat ni Jared dagitoy a balikas, adtoy, intag-ay ti ^aApo ti imana ket sinagidna dagiti bato a saggaysa iti ramayna. Ket naikkat ti ^bbelo kadagiti mata ti kabsat ni Jared, ket nakitana ti ramay ti Apo; ket kasla iti ramay ti tao, kas iti lasag ken dara; ket nadalupo ti kabsat ni Jared iti sango ti Apo, ta nadaleb iti buteng.

7 Ket nakita ti Apo a nadalupo ti kabsat ni Jared iti daga; ket kinuna ti Apo kenkuana: Bumangonka, apay a nadalupoka?

8 Ket kinunana iti Apo: Nakitak ti ramay ti Apo, ket nagbutengak amangan la ketdi no dangrannak; ta diak ammo a nagtagilasag ken adda dara ti Apo.

9 Ket kinuna ti Apo kenkuana: Gapu iti pammatim nakitam nga addaanak iti ^alasag ken dara; ket awan pay ti asino man a tao nga immasideg kaniak nga addaan iti aglaplapusanan a pammati a kas kenka; ta no saan dimo koma nakita ti ramayko. Adda kadin nakitam a nalablabes ngem iti daytoy?

10 Ket insungbatna: Saan; Apo, agpakitaka kaniak.

11 Ket kinuna ti Apo kenkuana: Mamatika kadi kadagiti balikas nga ibagak?

12 Ket kinunana: Wen, Apo, ammok nga agsasaoka iti pudno, ta sika ti Dios ti kinapudno, ket ^asaanka a makapaglibak.

13 Ket idi maisaona dagitoy a balikas, adtoy, ^anagpakita ti Apo kenkuana, ket kinunana: ^bGapu ta ammom dagitoy a banag masubbotka iti pannakatnag; ngarud maisublika iti imatangko; ngarud ^cagpakitaak kenka.

14 Adtoy, siak ti naisagana manipud iti pamuon ti lubong a ^amangsubbot kadagiti taok. Adtoy, siak ni Jesucristo. Siak ti ^bAma ken ti Anak. Siak ti pagtaudan ti ^cbiag ti amin a tao, ken iti agnanayon, kasta met dagiti mamati iti naganko; ket agbalinda a ^dlallaki ken babbai nga annakko.

15 Ket saanak pay a nagpakita iti tao a pinarsuak, ta awan pay ti tao a ^anamati kaniak a kas kenka. Makitam a naparsuaka a ^bkalanglangak? Wen, kasta met a naparsua amin a tao manipud pay idi punganay a kalanglangak.

16 Adtoy, daytoy a bagi, a makitkitam, ti bagi ti ^aespirituk; ket pinarsuak ti tao a kalanglanga ti bagi ti espirituk; ket uray no agpakitaak kenka iti espiritu agpakitaak kadagiti taok iti lasag.

17 Ket ita, kas nasaok, siak ni Moroni, saanko a maaramid ti naan-anay a pakaammuan dagitoy a banag a naisurat, ngarud umdasen nga ibagak a nagpakita ni Jesus iti daytoy a tao iti espiritu, a kas iti wagas ken kalanglanga ti isu met la a bagi nga ^aimpakitana kadagiti Nephite.

18 Ket insurona a kas iti panangisurona kadagiti Nephite; ket amin daytoy, tapno maammuan daytoy a tao nga isu ti Dios, gapu kadagiti adu a naindaklan nga aramid nga impakita kenkuana ti Apo.

19 Ket gapu iti pannakaammo daytoy a tao saan a nalapdan a kumita iti ^abelo; ket nakitana ti ramay ni Jesus, nga, idi makitana, nadalupo iti butengna; ta ammona a ramay ti Apo; ket napukaw ti pammatina, ta ammona, nga awanan duadua.

20 Gapuna, iti pannakagun-odna iti naan-anay a pannakaammo iti Dios, awanen ti ^amailimed kenkuana iti belo; ngarud, nakitana ni Jesus; ket isu ti nangisuro kenkuana.

21 Ket napasamak a kinuna ti Apo iti kabsat ni Jared: Adtoy, dimo ipalubos nga agwaras iti lubong dagitoy banag a nakita ken nangngegam, agingga a dumteng ti ^apanawen a panangigloriak iti naganko iti lasag; gapuna, ipategmo dagiti banag a nakita ken nangngegmo, ket awan ti tao a pangipakitaam.

22 Ket adtoy, inton umayka kaniak, isuratmonto ida ken italimengmo, tapno awan ti makaipatarus kadakuada; ta isuratmonto ida iti pagsasao a dida mabasa.

23 Ket adtoy, itedko kenka dagitoy ^adua a bato, ket italimengmonto met ida iti yan dagiti banag nga isuratmo.

24 Ta adtoy, kinirokon ti pagsasao nga isuratmo; gapuna ibilinkonto iti naituding a panawenko nga isilnagto dagitoy a bato kadagiti mata dagiti tao dagitoy banag nga isuratmo.

25 Ket idi maisao ti Apo dagitoy a balikas, impakitana iti kabsat ni Jared ^aamin a nabiag iti daga, ken amin dagiti agnaedto; ket dina pinengdan ida iti imatangna, uray pay iti igid ti daga.

26 Ta naibaganan kenkuana iti napalabas a panawen, a ^ano ^bmamati kenkuana a maipakitana kenkuana ^camin a banag—maipakitanto kenkuana; ngarud saan a mapengdan ti Apo kenkuana ti ania man, ta ammona a maipakita ti Apo kenkuana ti amin a banag.

27 Ket kinuna ti Apo kenkuana: Isuratmo dagitoy a banag ket ^asaluadam; ket ipakitakto ida iti naituding a panawenko kadagiti annak ti tattao.

28 Ket napasamak a binilin ti Apo nga italimengna dagiti dua a ^abato a naawatna, ket dina ida ipakpakita, agingga nga ipakita ida ti Apo kadagiti annak ti tattao.