1 Ket napasamak a naaddaan iti anak nga Omer, ket sinukatan ni Omer a nagturay. Ket naaddaan ni Omer iti anak a ni Jared; ket naaddaan ni Jared iti annak a lallaki ken babbai.

2 Ket sinukir ni Jared ti amana, ket immay nagnaed iti daga a Heth. Ket napasamak nga adu a tao ti pinatpatiray-okanna, gapu kadagiti makaar-arit a balikasna, agingga a nagun-odna ti kagudua ti pagarian.

3 Ket idi magun-odna ti kagudua ti pagarian nakidangadang iti amana, ket innalana a balud ti amana, ket pinagpaayna a sibabalud;

4 Ket ita, kadagiti aldaw a panagturay ni Omer adda iti pagbaludan iti kagudua dagiti aldawna. Ket napasamak a naaddaan iti annak a lallaki ken babbai, a pakaibilangan da Esrom ken Coriantumr;

5 Ket nalaus ti pungtotda gapu kadagiti aramid ni Jared a kabsatda, iti kasta nangummongda iti buyot ket nakidangadangda ken ni Jared. Ket napasamak a nakidangadangda iti rabii.

6 Ket napasamak nga idi napapatayda ti buyot ni Jared papatayenda koma metten; ket nagpakaasi kadakuada a dida patpatayen, ket isukona ti pagarian iti amana. Ket napasamak nga intedda kenkuana ti biagna.

7 Ket ita nagbalin a nalaus ti ladingit ni Jared gapu iti pannakapukaw ti pagarianna, ta impapusona ti pagarian ken amin a dayaw iti lubong.

8 Ita iti nalaus a laing ti babai nga anak ni Jared, ket nakitana ti ladingit ti amana, napanunotna ti mangaramid iti plano a pakaisublianna iti pagarian iti amana.

9 Ita nalaus ti pintas ti babai nga anak ni Jared. Ket napasamak a kinasaritana ti amana, a kinunana kenkuana: Ania unay ti pagladladingitan ti amak? Dina kadi nabasa dagiti sinurat nga inkuyog dagiti ammatayo nga imballasiw iti nalawa a taaw? Adtoy, awan kadi ti kasuratan maipanggep kadakuada a nataengan, nga isuda babaen ti ^analimed a planoda nagun-odda dagiti pagarian ken dakkel a dayaw?

10 Ket ita, ngarud, palubosannak koma ti amak a mapan iti yan ni Akish, ti lalaki nga anak ni Kimnor; ket adtoy, napintasak, ket ^aagsalaak iti sangona, ket gargariek, tapno tarigagayannak nga agbalin nga asawana; gapuna no tarigagayannaka a mangted kaniak nga asawana, kunamto: Itedko no idatagmo kaniak ti ulo ti amak, nga ari.

11 Ket ita gayyem ni Akish ni Omer; gapuna, idi maibaon ni Jared ken ni Akish, nagsala ti babai nga anak ni Jared iti sangona tapno gargarienna, iti kasta tinarigagayanna nga agbalin nga asawana. Ket napasamak a kinunana ken ni Jared: Itedmo nga asawaek.

12 Ket kinuna ni Jared kenkuana: Itedko kenka, no idatagmo kaniak ti ulo ti amak, nga ari.

13 Ket napasamak nga inurnong ni Akish iti sango ti balay ni Jared amin dagiti kabagianna, ket kinunana kadakuada: Ikariyo kadi nga agtalinaedkayo a napudno kaniak iti banag a tarigagayak kadakayo?

14 Ket napasamak a ^anagkarida amin kenkuana, babaen ti Dios iti langit, ken kasta met dagiti langit, ken kasta met iti daga, ken kadagiti uloda, nga asino man a sumuppiat iti tulong a tarigagayan ni Akish mapukawna ti ulona; ket asino man a mangibutaktak ti ania man a banag nga ibaga kadakuada ni Akish, mapukawna met ti biagna.

15 Ket napasamak a kasta ti napagnanaminganda kada Akish. Ket ^apinagsapata ida ni Akish iti naited kadakuada idi un-unana a nagsapul met iti bileg, a nagallaallatiw manipud ken ni ^bCain, a narungsot a mammapatay manipud idi punganay.

16 Ket naparegtada babaen ti bileg ti sairo a mangaramid iti sapata kadagiti tao, a mamagtalinaed kadakuada iti kasipngetan, a tumulong a mangsapul iti bileg a manggun-od iti bileg, ken narungsot a mamapatay, ken agsamsam, ken agulbod, ken agaramid iti amin a kita ti kinadangkes ken kinamannakiabig.

17 Ket ti babai nga anak ni Jared ti nangimula iti pusona a mangtunton kadagitoy a banag iti un-unana; ket immula ni Jared iti puso ni Akish; gapuna, inaramid ni Akish kadagiti kabagian ken gagayyemna, a nangiturong kadakuada iti napintas a karkari a mangaramid iti tunggal banag a tarigagayanna.

18 Ket napasamak a nangbukelda iti nalimed a ^akinnunsabo, a kas iti un-unana; dayta kinnunsabo a kakaruan a makadurmen ken kadangkesan iti amin, iti imatang ti Dios;

19 Ta saan nga agaramid ti Apo iti nalimed a kinnunsabo, wenno agaramid iti pakaibukbokan ti tao iti darana, ngem ipawilna amin dagitoy a banag, manipud pay idi punganay ti tao.

20 Ket ita siak, ni Moroni, diak isurat dagiti wagas ti sapata ken kinnunsaboda, ta naipakaammo kaniak nga addada kadagiti amin a tao, ket addada kadagiti Lamanite.

21 Ket isuda ti nakaigapuan ti ^apannakadadael dagitoy a tao a sarsaritaek ita, ken kasta met ti pannakadadael dagiti tao ni Nephi.

22 Ket ania man a pagilian a mangitandudo iti dayta a nalimed a kinnunsabo, a mamataud iti bileg ken rang-ay, agingga a maiwarasda iti pagilian, adtoy, madadaeldanto; ta saan nga ipalubos ti Apo a ti ^adara dagiti santona, nga ibukbokda, agnanayonto nga um-umkis kenkuana manipud iti daga nga agdawat iti ^bpanagibales ngem dinanto met ida ibales.

23 Gapuna, O dakayo a Gentil, nakem ti Dios a maipakita kadakayo dagitoy a banag tapno iti dayta mabalinyo nga ibabawi dagiti basolyo, ket dina ipalubos a rumimbaw kadakayo daytoy kinnunsabo a makapapatay, a nabangon tapno makagun-od iti ^abileg ken rang-ay—ken ti aramid, wen, uray pay ti aramid a makadadael umay kadakayo, wen, uray pay ti espada ti linteg ti Agnanayon a Dios agdisso kadakayo, para iti pakapadisianyo ken pakadadaelanyo no ipalubosyo a maaramid dagitoy a banag.

24 Gapuna, imbilin kadakayo ti Apo, nga inton makitayo a dumteng kadakayo dagitoy a banag a nasken nga agriingkayonto iti rikna ti nakaam-amak a kasasaadyo, gapu iti daytoy nalimed a kinnunsabo nga addanto kadakayo; wenno ay-ayto pay, gapu iti dara dagiti napapatay; ta umkisda manipud iti tapok para iti panagibales iti dayta, ken kasta met kadagiti nangbukel iti daytoy.

25 Ta mapasamakto nga asino man a mangbangon iti daytoy kayatnanto a padisien ti ^awayawaya dagiti amin a daga, il-ili, ken pagilian; ket mapasamakna ti pannakadadael ti amin a tao, ta binukel ti sairo, nga ama ti amin a kinaulbod; nga isu met la dayta ulbod a ^bnangallilaw kadagiti immuna a nagannak kadatayo, wen, isu met la dayta ulbod a nangsugsog iti tao nga agaramid iti narungsot a pammapatay manipud idi punganay; a nangpatangken iti puspuso dagiti tao ket pinapatayda dagiti propeta, ken binatoda ida, ken pinapanawda ida manipud idi punganay.

26 Gapuna, siak, ni Moroni, nabilinak a mangisurat kadagitoy a banag tapno mapapanaw ti dakes, ken tapno dumteng ti panawen nga ^aawanton ti bileg ni Satanas iti puspuso dagiti annak ti tattao, ngem ^bmaallukoyda ketdi nga agaramid iti nasayaat nga awan ressatna, tapno dumtengda iti ubbog ti amin a kinalinteg ket maisalakanda.