Alama 61
    Footnotes

    Wase 61

    Sa tukuna vei Moronai ko Paorani na sasaga ni kovei kei na saqati vakaukauwa ni matanitu—Era sa tauri Saraemala na tamata via vakatui ka era sa tovata kei ira na Leimanaiti—Sa kerea ko Paorani na veivuke vakaivalu me ra sotavi kina o ira era veisaqasaqa tiko. Rauta na 62 B.K.

    1 Raica, oqo, a sa yaco ni se qai vakauta oti ga na nona ivola ko Moronai ki vua na kovana liu, sa taura e dua na ivola mai vei aPaorani, na kovana liu. Oqo na vosa ka a taura:

    2 Koi au ko Paorani na kovana liu ni vanua oqo, au sa vakauta yani na veivosa oqo vei Moronai na turaganivalu liu ni mataivalu. Raica au sa kaya vakaidina vei iko, Moronai ni’u sega sara ni marautaka na aleqa levu ko ni sotava tiko, io, sa vakararawataka sara na yaloqu.

    3 Ia raica, era sa tu e so era rekitaka na leqa ko ni sotava tiko, io era sa yavala mai ka saqati au kei ira na noqu tamata era atokona na galala, ia era sa lewevuqa vakaidina sara ko ira era veisaqasaqa.

    4 Ka sa ira era a segata me ra kovea mai vei au na itikotiko ni veilewai era sa vakavuna tiko na caka ca levu oqo; ka ni ra vakayagataka na veicavilaki levu, ka ra sa vagolea tani na lomadra e vuqa na tamata, o koya na ka ena vakavuna na rarawa levu ena keda maliwa; era sa tarova na vakauti yani ni kakana, ka ra sa vakarerei ira na noqu tamata galala ka ra sa sega kina ni lako yani vei kemuni.

    5 Ka raica era sa vakasavi au tani, ka’u sa dro kina ki na vanua ko Kitioni, kei ira kecega e a rawa me’u taura.

    6 Ka raica, au sa vakauta oti e dua na kaci raraba ena iwase ni vanua taucoko oqo; ka raica era sa vakasoqoni vata tiko mai oqo e veisiga, me ra taura na nodra iyaragi, ena kena taqomaki na nodra vanua kei na nodra abula galala, ka me ra sauma na ca a caka vei keimami.

    7 Era sa lako tiko ga mai vei keimami, ka ra sa rere kina ko ira era a saqati keimami tiko, io, era sa rerevaki keimami ka sega ni doudou me ra lako mai ka vala kei keimami.

    8 Era sa taura tu na vanua, se na koro ko Saraemala; era sa lesia e dua me nodra tui, sa volavola oti sara ko koya vua na nodra tui na Leimanaiti ka kerea kina me rau sa tovata; ia me soli vua me lewa tiko na koro ko Saraemala, raica sa nuitaka ko koya me ra vakavuwa na vo ni vanua ko ya ko ira na Leimanaiti, me qai biu ko koya me nodra tui na tamata oqo ena nodra sa na vakavuwai mai vei ira na Leimanaiti.

    9 Ia oqo, ko sa vakalewai au vakaca sara mai, ena nomu ivola, ia e sega ni dua na ka ko ya; ka’u sega sara ni cudru kina, ia au sa rekitaka ga na dina kei na dodonu ni yalomu. Koi au ko Paorani, au sega ni vakasaqara na veiliutaki, ia au via taura lesu ga na itikotiko ni veilewai me’u maroroya kina na nodra dodonu kei na nodra galala na noqu tamata. Sa tudei tu na yaloqu ki na galala ko ya ka a avakagalalataki keda kina na Kalou.

    10 Ia oqo, raica, keimami na vorata na caka ca, ke mani dave sara mada ga kina na dra. Eda na sega ni vakadavea na nodra dra na Leimanaiti kevaka era na tiko ga ena nodra vanua.

    11 Keimami na sega ni vakadavea na nodra dra na wekai keimami, kevaka era sega ni tu mai ena veisaqasaqa ka taura na iseleiwau me saqati keimami.

    12 Keimami na soli keimami ki na ivau ni veivakabobulataki kevaka e kilikili kei na lewa dodonu ni Kalou, se kevaka me vakaroti keimami kina ko koya.

    13 Ia raica sa sega ni vakaroti keimami ko Koya me keimami soli keimami vei ira na neimami meca, ia me keimami avakararavi ga vua, ka na qai sereki keimami ko koya.

    14 O koya gona, i Moronai na wekaqu lomani, me daru vorata sara na ca, ia na ca kecega ka daru sega ni vorata rawa ena nodaru vosa, me vaka na veisaqasaqa kei na vakauyalona, me daru na avorata ena nodaru iseleiwau, me da na maroroya kina na noda galala, me da rekitaka na noda lotu, kei na inaki ni noda Dauveivueti ka noda Kalou.

    15 O koya gona, mo lako kusarawa mai vei au, kei na vica na nomu tamata, ka laivi ira na kena vo ena nodrau lewa ko Liai kei Tenikamu; mo lesia vei rau na kaukauwa me rau lewa na ivalu ena iwase ni vanua oqori, me vaka na aYalo ni Kalou, sai koya na yalo ni bula galala ka sa tiko vei rau.

    16 Raica au sa vakauta yani e so na kedra kakana me ra kakua mada ni mate me yacova ni ko sa rawa ni lako mai vei au.

    17 Mo vakasoqona vata mai na levu ga ni tamata ivalu ko rawata ena nomu lako mai ki ke, ka eda na laki sotavi ira kusarawa na dau vakaduiduile ko ya ena kaukauwa ni Kalou me vaka na vakabauta sa tiko vei keda.

    18 Ka eda na taura na koro ko Saraemala, me da rawata na kakana ka vakauta vei rau ko Liai kei Tenikamu; io, eda na lako yani vei ira ena kaukauwa ni Turaga, ka na tinia sara na caka ca levu oqo.

    19 Ia oqo, i Moronai, au sa reki ena noqu ciqoma na nomu ivola, ka ni’u a leqataka tiko na ka me keimami cakava, se sa dodonu beka me keimami valuti ira na wekada.

    20 Ia ko sa qai tukuna mai, ni a vakaroti iko na Turaga mo valuti ira kevaka era sa sega ni veivutuni.

    21 Raica mo avakaukauwataki rau ko Liai kei Tenikamu vua na Turaga; tataunaka vei rau me rau kakua ni rere, ka na sereki rau na Kalou, io, ka vakabulai ira kece tale ga era sa tudei tiko ena galala ka sa vagalalataki ira kina na Kalou. Ia oqo au sa tinia na noqu ivola ki vua na wekaqu lomani, ko Moronai.