Alama 59
    Footnotes

    Wase 59

    Sa kerei Paorani ko Moronai me vakaukauwataka na mataivalu i Ilamani—Era sa taura na koro levu ko Nifaia ko ira na Leimanaiti—E sa cudruva na matanitu ko Moronai. Rauta na 62 B.K.

    1 Sa yaco ni sa wilika oti ko Moronai na aivola i Ilamani ena ikatolusagavulu ni yabaki ni nodra veiliutaki na turaganilewa vei ira na tamata i Nifai, sa vuabale na nona marau ena vuku ni nodra vinaka, io, na nodra sa taura lesu rawa mai ko Ilamani na vanua a sa kaliraki mada vei ira.

    2 Io sa tukuna yani na kena itukutuku vei ira kece na nona tamata ena yasayasa ko ya, me ra kila ka marau tale ga kina.

    3 Ka sa yaco ni sa vakauta sara vakatotolo e dua na aivola vei bPaorani, ka gadreva me vakasoqona vata ka vakauta e dua na mataivalu me vakaukauwataki Ilamani, se na mataivalu i Ilamani, io me vukei koya ena kena taqomaki na vanua era sa taura lesu tale tu oqo.

    4 Ka sa yaco ni sa vakauta oti na ivola ko ya ko Moronai ki na vanua ko Saraemala, sa qai tekivu vakavakarau tale ga, ka navuca na sala me na taura lesu tale kina na veikoro lelevu era sa taura tu na Leimanaiti.

    5 Ka sa yaco ni sa vakavakarau tiko ko Moronai me vorati ira na Leimanaiti ena ivalu, raica, era sa kabati mai vei ira na Leimanaiti, ko ira na tamata i Nifaia, ko ira ka ra a soqoni vata mai na koro levu ko Moronai kei na koro levu ko Liai kei na koro levu ko Morienitoni.

    6 Io era sa lako tale ga mai ko ira ka a vakasaurarataki me ra dro mai na vanua ko Manitai kei na veivanua volekata, era sa lako mai ka mai cokovata kei ira na Leimanaiti ena yasa ni vanua oqo.

    7 Ia oqo era sa lewevuqa sara, io, sa tubu cake tiko ga na kedra iwiliwili ena veisiga, ena ivakaro i Amoroni me ra kaba na koro ko Nifaia, era sa lako mai kina ka vorati ira na tamata i Nifaia, ia era a mokuti ira ena ravuravu levu.

    8 Ia me vaka ni sa mataivalu levu sara, era sa vakasaurarataki kina me ra dro kina na vo ni lewenikoro ko Nifaia; ia era sa dro yani ka laki cokovata kei na mataivalu i Moronai.

    9 Ia oqo a sa nanuma tiko ko Moronai me ra talai yani e so na tagane me ra laki veivuke ena taqomaki ni koro levu ko Nifaia, io ena nodra vukei na tamata ena kena taqomaki na koro levu ko ya, ka ni kila ni rawarawa cake na kena tovolei me taqomaki toka mai na kena qai sagai me tauri lesu tale ni ra sa kaliraka tani na Leimanaiti, e nanuma ko koya ni na rawarawa vei ira me ra na taqomaka toka na koro levu ko ya.

    10 O koya oqo sa taura tu ga kina na nona mataivalu, me ra taqomaka na veivanua kece era sa taura lesu tale.

    11 Ia oqo sa rarawa vakalevu sara ko Moronai ni sa raica ni sa rawai na koro levu ko Nifaia, ka sa tekivu rivarivabitaka tale ga de ra na rawai mai vei ira na wekadra ena vuku ni nodra ivakarau ca.

    12 A vaka talega oqori na nodra nanuma na nona turaganivalu liu. Era sa vakatitiqa ka kurabuitaka na nodra qaqa mai oqo na Leimanaiti, ka ra rivarivabi de ra sa qaqa ena vuku ni nodra ivakarau ca na lewenikoro.

    13 Ka sa yaco ni sa rarawataka tale ga vakalevu ko Moronai na kena vakaweleweletaki ka sega ni akauwaitaki mai na matanitu na veika me baleta na bula galala ena nodra vanua.