1 Ia raica, sa qai yaco na neimami sasaga ka tarava me keimami taura lesu na koro levu ko Manitai; ia raica, keimami sa lewelailai ga, ka sega sara ni rawa me keimami kauti ira tani mai na lomanikoro levu koya. Ia raica, era sa nanuma vinaka tiko ga na ka keimami a kitaka e liu; o koya sa ka dredre kina me keimami ^abacani ira tani mai na nodra itataqomaki ni valu.

2 Ia era sa rui lewelevu sara, ka keimami sa lewe lailai ga, ka keimami sega kina ni doudou me keimami kaba yani na nodra koro ni ivalu.

3 Io, sa yaga me ra vakayagataki na neimami tagane me ra taqomaka vakavinaka mada ga na veivanua keimami sa taura lesu tale mai; o koya sa kilikili me keimami qai waraka toka me ra yaco tale mai e so na keimami ikuri, kei na keimami kakana mai na vanua ko Saraemala.

4 Ka sa yaco me’u tala e so na mata vua na kovana ni neimami vanua, ka vakamacalataka vua na veika e baleti ira na neimami tamata. Ia sa yaco ni keimami sa waraka tiko ga na kakana kei na so tale na keimami ikuri mai na vanua ko Saraemala.

5 Ia raica, sa sega ni vukei keimami na gagadre ko ya; ni ra sa yacoyaco tiko ga yani e veisiga na ikuri ni nodra mataivalu na Leimanaiti ka vakatale ga kina na kedra kakana; Ia sa vaka tu oqori na veika e sa yaco tiko vei keimami ena gauna oqo.

6 Ia era sa mai valuti keimami vakavuqa na Leimanaiti, ka ra tovolea me ra temaki keimami ena nodra ivadi, me ra vakarusai keimami kina; ia oqo keimami sega ni rawa ni lako me valuti ira, baleta ni dau totolo na nodra dro lesu, ka sa rui kaukauwa tale ga na nodra itataqomaki ni ivalu.

7 Ka sa yaco ni keimami sa wawa tu vakaoqo ena vica vata na vula, me yacova sara ni keimami sa voleka ni mate ni sa sega na kakana.

8 Ia sa yaco ni sa kau mai na keimami kakana, ka ra kauta tiko mai e lewe rua na udolu na tamata ivalu me ra mai vukei keimami; ia sai koya ga oqori na levu ni veivuke e sa soli mai me keimami taqomaka kina na neimami vanua me ra kakua ni taura na neimami meca, io ka veisaqasaqa kei na dua na meca ka ra sa rui lewevuqa sara.

9 Ia oqo keimami sega ni kila se cava na vuna keimami sa vakamaduataki kina oqo se cava na vuna keimami sega ni vakaikuritaki mai kina; ia oqo keimami sa rarawa dina ka rere tale ga, de cudruva na neimami vanua na lewa ni Kalou, ka keimami na vakadrukai ka vakarusai sara.

10 O koya keimami sa sovaraka kina na yaloi keimami ena masu vua na Kalou, me vakaukauwataki keimami ka vakabulai keimami mai vei ira na neimami meca, io, me vakaukauwataki keimami tale ga me keimami rawata lesu tale na neimami veikoro lelevu, kei na veika keimami taukena, me ra vukei kina na wekai keimami.

11 Io, sa yaco ni sa vakatakila mai vei keimami na Turaga na neimami Kalou, ni na vakabulai keimami vakaidina; io, sa vosa ni veivakacegui ena yaloi keimami, ka vakaukauwa taka na neimami vakabauta, ia sa vakavuna me keimami vakanuinui ki na veivuke mai vei koya.

12 Ia keimami sa vakayaloqaqataki mai na mataivalu lailai ga keimami sa mai vakaikuritaki kina, ia sa dei na yaloi keimami ni keimami na rawai ira na neimami meca, ka ^ataura tiko ga na neimami vanua, kei na veika keimami taukena, kei ira na wati keimami, kei na luvei keimami kei na yavu ni neimami ^bbula galala.

13 Ka sa vakakina na neimami lako yani ka saqati ira vakaukauwa na Leimanaiti, ena koro levu ko Manitai; ia keimami sa laki birika na neimami vale laca ena yasana ki na lekutu, volekata ga na koro levu ko ya.

14 Ka sa yaco ni ra sa raica ena mataka ko ira na Leimanaiti ni keimami sa tiko ena iyalayala ni lekutu sa voleka ki na koro levu ko ya, era sa talai ira mai na nodra yamata me ra mai dikeva yani na kaukauwa ni neimami mataivalu, kei na keimami iwiliwili.

15 Ka sa yaco ena nodra raica ni sega soti ni keimami kaukauwa sara, me vaka na keimami iwiliwili, ka era sa taqaya de keimami na sogota na sala me vakauti yani kina na kedra kakana, ka vakavo me ra lako mai ka vala me vakamatei keimami, io era sa nanuma talega ni na rawarawa sara me ra vakarusai keimami ni ra sa rui lewelevu, o koya era sa vakavakarau sara me ra lako mai ka vorati keimami ena ivalu.

16 Ia ni keimami sa raica ni ra sa vakavakarau tiko me ra lako mai ka vorati keimami, raica, au sa lewa me kauta ko Kiti e dua na iwase ni mataivalu lailai ka laki vuni tiko ena lekutu, io me kauta talega e dua na iwase lailai ko Tiomana, ka ra laki vuni tiko ena lekutu.

17 Oqo a sa kauti ira na nona ilawalawa ko Kiti ki na yasana imatau, ka ra lako na ilawalawa tale kadua ki na yasana imawi; ia ni sa rawa kece ko ya, raica, au sa qai mai tiko yani koi au kei na vo ni neimami mataivalu ena vanua ga keimami sa laki birika taumada kina na neimami vale laca ka waraka na gauna me ra na lako mai kina na Leimanaiti me mai vala.

18 Ka sa yaco ni sa lako sobu mai na nodra mataivalu vakaitamera na Leimanaiti me mai valuti keimami. Ia ni ra sa volekati keimami mai ka via ravuti keimami ena nodra iseleiwau, au sa qai vakaroti ira na noqu tamata, ka ra tiko vata kei au, me ra vakasuka yani ki na lekutu.

19 Ka sa yaco me ra kusarawa na Leimanaiti ka cici muri keimami yani vakatotolo, ni ra gadreva sara me ra toboki keimami ka vakamatei keimami; o koya era sa cici muri keimami yani kina ki na lekutu; ia keimami sa muri ena maliwa ni vanua era vuni toka kina na tamata i Kiti kei na tamata i Tiomana, ia era sa sega ga ni raici ira ko ira na Leimanaiti.

20 Ka sa yaco ni sa lako siviti ira na nodra mataivalu, e sa qai duri mai ko Kiti kei Tiomana mai na vanua rau sa vuni toka kina, ka sogolatia na sala me ra kakua ni lesu tale ki na koro levu ko ira na nodra yamata na Leimanaiti.

21 Ka sa yaco me ra tamusuki ira tani, ka cici yani ki na koro levu ka ravuti ira na yadra era a biu tiko mai me ra yadrava na koro levu koya, io era sa vakarusai ira ka taura na koro levu ko ya.

22 E sa yaco na ka oqo, ni ra sa lako kece yani na mataivalu ni Leimanaiti ki na lekutu, ka ra biu tiko ga mai e vica na yadra.

23 Ka sa yaco ni rau sa rawata ko Kiti kei Tiomana na nodra itikotiko kaukauwa ni ivalu ena sala oqori. Ia sa yaco ni keimami sa dro tiko ga ena lekutu, ia ni sa yawa na vanua keimami dro tiko kina ena lekutu keimami sa qai gole vaka ki na vanua ko Saraemala.

24 Ia era rere na Leimanaiti ni ra raica ni ra sa dro tiko yani ki Saraemala, era sa nanuma ni ra sa veretaki yani me ra laki vakarusai kece; o koya era sa mani vakasuka tale kina ki na lekutu, io, me ra sa muria lesu tale na sala era a lakova mai.

25 Ia raica, ni sa bogi na vanua era sa birika na nodra vale laca, era nanuma na nodra turaganivalu liu na Leimanaiti ni ra sa oca vakalevu na Nifaiti baleta na nodra lako voli mai vakabalavu; ka ra nanuma me ra kauta mai na nodra mataivalu taucoko ka sega ni vakasamataka na veika baleta na koro levu ko Manitai.

26 Oqo sa yaco me’u vakaroti ira na noqu tamata me ra kakua ni moce ena bogi ko ya, ia me keimami muria e dua tale na sala ki na koro levu ko Manitai.

27 Ia me baleta na neimami lako tiko ena bogi, raica ni qai kida na mataka keimami sa tiko sara ki liu vei ira na Leimanaiti, ka yaco me keimami sa tadu e liu vei ira ki na koro levu ko Manitai.

28 Ka sa yaco ni sai koya oqo na ivadi keimami sa rawata kina na koro levu ko Manitai, ka sega ni dave kina na dra.

29 Ka sa yaco ni ra qai volekata mai na koro levu na mataivalu ni Leimanaiti, era sa raica ni keimami sa vakarau tu me sota kei ira, era sa kidroa vakalevu sara ka sa tarai ira tale ga na rere, ia ka vakavuna me ra dro yani ki na lekutu.

30 Io, sa yaco me ra sa dro tani mai na veitikina kecega na mataivalu ni Leimanaiti. Ia raica era sa kauta vakavesu yani e vuqa na yalewa kei na gone mai na vanua oqo.

31 Ia ena gauna oqo keimami sa taura tale tu kina na ^aveikoro lelevu kece era sa mai taura tu mada na Leimanaiti; era sa dui suka tale ki na nodra itikotiko ko ira na tamai keimami, na neimami yalewa kei ira na neimami gone, ka ra qai vakavo ga ko ira era sa drotaka na Leimanaiti.

32 Ia raica sa lewelailai ga na neimami mataivalu, ka sega ni keimami taqomaka rawa kina na neimami veikoro lelevu kece kei na levu ni ka keimami taukena.

33 Ia raica, keimami sa vakanuinui ga vua na neimami Kalou o koya sa solia vei keimami na qaqa me baleta na veivanua oqori, ka keimami sa taura lesu rawa tale kina na neimami veikoro lelevu kei na veivanua ka a neimami tu ga.

34 Oqo keimami sega ni kila se cava e sega ni vukei keimami vakalevu mai kina na matanitu; era sega tale ga ni kila na vuna, ko ira na sotia era talai mai me ra mai vukei keimami.

35 Raica keimami sega ni kila na cava ko ni sega ni rawa ka kina, ia ko ni sa kauta yani e dua na mataivalu ki na dua tale na yasa ni vanua; ke sa vakakina, keimami sega ni gadreva me keimami vosa kudrukudru.

36 Ia kevaka e sega, raica, keimami rerevaka de sa tiko ^ae so ena matanitu era sega ni vinakata me so tale na tamata me keimami vukei kina; ni keimami kila deivaki tu ni lewevuqa sara na noda mataivalu, ia e qai lailai wale ga e vakauti mai.

37 Ia raica keimami sega sara ni kauwaitaka oqori—e dina ga ni tu na malumalumu ni neimami mataivalu, io keimami sa vakararavi ga vua na Kalou me ^avakabulai keimami mai na ligadra na neimami meca.

38 Raica sa voleka ni cava na ikaruasagavulu kaciwa ni yabaki, ka keimami sa taura tale tu na neimami vanua; ka ra sa dro na Leimanaiti ki na vanua ko Nifai.

39 Ia era sa tiko vata ga kei au ena koro levu ko Manitai ko ira na luvedra cauravou na tamata i Amoni, ko ira au sa vakacaucautaki ira tiko yani; ia sa tokoni ira tiko na Turaga me ra kua ni bale ena iseleiwau, io, sa taqomaki ira tale ga me sega ni ^aduabulu vei ira e mate.

40 Ia raica, sa vuqa vei ira e vuetaki; ia era sa tudei tu ga ena ^agalala ka sa vakagalalataki ira kina na Kalou; era sa yalodina ena dauqarava na Turaga na nodra Kalou ena veisiga; io, era sa raica me ra muria tikoga na nona lawa, na nona vakatulewa kei na nona ivakaro; era sa vakabauta deivaki ni na yaco vakaidina na veika sa parofisaitaki tu.

41 Ia oqo, i Moronai, na tuakaqu lomani, me karoni iko tikoga ena nona iserau, na Turaga na noda Kalou ko koya ka a sereki keda ka vakavuna me da galala, io me totaki ira na nona tamata, me yacova ni ra sa taura kece tale na veika e nodra ka ra a taura mai vei ira ko ira na Leimanaiti, na veika me tokoni keda. Ia oqo raica, au sa tinia na noqu ivola. Koi au ko Ilamani na luvei Alama.