1 Raica, ka sa qai yaco ni sa kacivaki yani na nona ^aitukutuku na tui Leimanaiti kivei ira na nona tamata, sa lewa me ra kakua ni vakacacani Amoni, Eroni, Omana, Iminai se dua vei ira na nodratou itokani era sa vunautaka yani na vosa ni Kalou ena veivanua ga era sa dui tu kina.

2 Io sa tukuni vei ira na nona tamata me ra kakua ni tarai ira se vesuki ira, se biuti ira ki na vale ni veivesu; se me ra kasiviti ira se yaviti ira, se vakasavi ira tani mai na nodra valenilotu, io me ra kakua ni kanakuitataki ira; se vakaviriki ira ena vatu, ia me ra vakacurumi ira yani ki na nodra veivale, na valetabu kei na nodra valenilotu.

3 Ia oqo me ra lako yani ka vunautaka na vosa me vaka na nodra gagadre, ni sa saumaki vua na Turaga na tui, kei na nona matavuvale; o koya sa vakauta yani kina na nona itukutuku vei ira na nona tamata ena vanua taucoko, me kakua na vakalatilati ki na vunautaki ni vosa ni Kalou, ia me curuma yani na vanua taucoko, ka me ra qai kila kina na nona tamata na ca ni nodra ^aivakarau na nodra qase, ka me rawa ni ra kila kina ni ra sa veiwekani ga, ka me ra kakua kina ni daulaba, se dauvakacaca, se daubutako, me ra kakua ni veibutakoci, se kitaka e dua ga na mataqali caka ca.

4 Ka sa qai yaco ni sa vakauti yani na ivakaro ni tui, eratou sa qai lako ko Eroni kei ira na nona itokani mai na dua na koro levu ki na dua tale na koro levu, mai dua na vale ni sokalou ki na dua tale, me tauyavutaki na lotu, me ra vakatabui ira na bete kei na ivakavuvuli ena vanua taucoko ena kedra maliwa na Leimanaiti, me vunautaki ka vakavulici na vosa ni Kalou vei ira; ka sa yaco me ratou rawata sara vakavinaka.

5 Ia sa yaco me ra kila na Turaga e udolu na tamata, io, e udolu vakaudolu era sa vakabauta na nodra ^aivakarau ni bula na Nifaiti; era sa vakavulici ena ^bivolatukutuku kei na parofisai ka a vakadewataki sobu tiko mai me yacova na gauna oqo.

6 Ia me vaka ga ni sa bula dina tiko na Turaga, ka lewelevu talega era sa vakabauta, se me vaka sa levu era sa kila na dina, ena nodratou ivunau ko Amoni kei ira na wekana, me vaka na yalo ni vakatakila kei na parofisai, kei na kaukauwa ni Kalou ka sa cakacaka mana vei ira—io, au sa kaya vei kemuni, me vaka ni sa bula na Turaga, ka lewelevu vei ira na Leimanaiti era sa vakabauta na nodra ivunau, ka ^asaumaki vua na Turaga, era sa sega ni ^blutu tani tale.

7 A sa yaco me ra tamata ivalavala dodonu; era sa biuta tani na nodra iyaragi ni vakaduiduile, era sa sega ni vorata tale na Kalou, se dua tale vei ira na wekadra.

8 Ia sai ira oqo era sa ^asaumaki vua na Turaga:

9 Ko ira na Leimanaiti ena vanua ko Isimeli;

10 Ka vakakina ko ira na Leimanaiti ena vanua ko Mitonai;

11 Ka vakakina ko ira na Leimanaiti ena koro levu ko Nifai;

12 Ka vakakina ko ira na Leimanaiti ena vanua ko ^aSailomi, kei ira ena vanua ko Semiloni, kei na koro levu ko Lemueli, kei na koro levu ko Siminilomi.

13 Ia oqori na yaca ni veikoro lelevu ka ra tiko kina na Leimanaiti era sa ^asaumaki vua na Turaga; ia sai ira oqo era sa biuta tani sara na nodra iyaragi ni veisaqasaqa, io, na nodra yaragi kece ni ivalu; raica era sa Leimanaiti kecega.

14 Ia era sa sega ni ^asaumaki na Amelekaiti, ka vakavo ga e dua; ka sega sara ni dua na ^bEmulonaiti; ia era sa vakaukauwataka tikoga na lomadra, ka vakakina na lomadra ko ira na Leimanaiti era vakaitikotiko vata ena veivanua era tiko kina, io, ena nodra veikoro kei na nodra veikoro lelevu.

15 O koya au sa cavuta kina na yaca ni nodra veikoro lelevu na Leimanaiti ka ra sa veivutuni ka ciqoma na dina, ka ra saumaki mai.

16 Ka sa yaco ni sa gadreva sara na tui kei ira kecega sa saumaki mai me ra vakatokai ena dua na yaca, me ra kilai tani kina mai vei ira na wekadra; o koya sa veivosaki kina na tui kei Eroni kei ira na bete me baleta na yaca me ra kacivi kina, me rawa me ra na kilai tani kina.

17 Ka sa yaco ni ra sa vakatoka me yacadra na ^aAnitai-Nifai-Liai; era sa kacivi tiko ena yaca oqo ka sega tale ni vakatokai me ra Leimanaiti.

18 Ka ra sa yaco ni ra sa tamata gugumatua sara; io, era sa veiyaloni kei ira na Nifaiti; o koya a ra sa veirogorogoci sara kei ira, ka sa sega ni muri ira tale na ^acudru ni Kalou.