Alama 47
iVakamacala e botona e ra

Hide Footnotes

Ulutaga

Wase 47

E sa kitaka ko Amalikaia na itovo qaseqase, na laba, kei na ivadi ca me tui kina vei ira na Leimanaiti—Era sa tamata ca ka vakarerevaki vakalevu sara mai vei ira na Leimanaiti ko ira na Nifaiti era a se tani. Rauta na 72 B.K.

1 Oqo me da lesuva tale mada na itukutuku kei Amalikaia kei ira na nona ilawalawa era a adro ki na lekutu; ia raica, a kauti ira yani ko koya ki na bvanua ko Nifai, kivei ira na Leimanaiti ka vakayavalati ira na Leimanaiti me ra cudruvi ira na tamata i Nifai, ka mani vakarota kina na nodra tui na Leimanaiti me ra soqoni vata mai na nona tamata ena vanua taucoko, me ra laki valuti ira na Nifaiti.

2 Ka sa yaco ni sa kacivaki yani na nona itukutuku vei ira na tamata, era sa rere vakalevu sara kina; io, era sa rerevaka me vakacudruya na tui, ia era sa rere tale ga ni vala kei ira na Nifaiti de ra na vakayalia na nodra bula. Ka sa yaco me ra sega ni kitaka vakakina, se na iwase levu cake vei ira era sa talaidredre ki na nona ivakaro na tui.

3 Ka sa qai yaco ni sa cudru vakalevu na tui ena nodra talaidredre; o koya ka lesi Amalikaia kina me liutaki ira na iwase ni nona mataivalu ka ra talairawarawa ki na nona ivakaro; ia sa vakaroti koya me lako yani ka vakasaurarataki ira na kena vo me ra cola iyaragi tale ga.

4 Oqo raica, sa vakaoqo na gagadre i Amalikaia; ni sa tamata daulawaki ka taleitaka ni vakayacora na ka ca, o koya ni sa tugana e lomana me vakasivoya na nodra tui na Leimanaiti.

5 Ia oqo sa tu vua na lewa me baleti ira na iwase ni Leimanaiti ka ra tokona na tui; ia sa segata me rawata na nodra veitokoni ko ira era sa talaidredre; o koya e mani lako kina ki na vanua ka vakatokai ko aOnita, ni ra a dro kece yani kina na Leimanaiti; ena nodra raica na mataivalu ni sa lako tiko mai, ia, era sa nanuma ni ra sa lako tiko mai me vakarusai ira, o koya era a dro kina ki Onita, na vanua ni yaragi.

6 Ia era sa lesia oti e dua na tamata me nodra tui ka nodra iliuliu, ni ra sa nakita ka vakadeitaka sara e lomadra me ra kakua ni vakasaurarataki me ra laki valuti ira na Nifaiti.

7 Ka sa yaco ni ra sa soqo vata ki na dela ni ulunivanua ko Anitipasa, ka ra vakavakarau kina me ra vala.

8 Ia sa sega ni inaki i Amalikaia me kabai ira yani me vaka a vakarota na tui; ia raica sa nakita ga me ra totaki koya na mataivalu ni Leimanaiti, ka me liutaki ira ko koya, ka me vakasivoya na tui ka taura na matanitu vakatui.

9 Ia raica, sa yaco ni sa vakaroti ira na nona mataivalu me ra birika na nodra valelaca ena buca volekata na ulunivanua ko Anitipasa.

10 Ka sa yaco ni sa bogi na vanua, sa talai ira yani na nona mata ki na ulunivanua ko Anitipasa, ni vinakata ko koya me lako sobu mai vua ko koya na nodra iliuliu na tiko mai na ulunivanua, ka yacana ko Leonitai, me rau mai veivosaki ena boto ni ulunivanua.

11 Ka sa yaco ni sa taura ko Leonitai na itukutuku oqo sa sega ni lako sobu ki na boto ni ulunivanua. Ia sa yaco ni sa talatala mai vakarua ko Amalikaia, ni gadreva me lako sobu yani vua. Ia a yaco ni a sega ni lako ko Leonitai, ia a talatala tale mai ko koya ena kena ikatolu ni gauna.

12 Ka sa yaco ni sa kila ko Amalikaia ni na sega ni lako sobu mai vua mai na ulunivanua ko Leonitai, sa lako cake yani vua ki na ulunivanua, ka volekata sara yani na nona itikotiko ko Leonitai; sa talatala tale yani me kena ikava vei Leonitai me lako sobu mai me rau veivosaki, ka me kauta mai e so na nona sotia me ra yadravi koya tiko.

13 Ka sa yaco ni sa lako sobu mai ko Leonitai kei ira na nona yadra vei Amalikaia, sa kerea ko Amalikaia me kauta na nona mataivalu ko Leonitai ena bogi ga ko ya, ka vakavolivoliti ira na tamata ena nodra keba, ko ira ka solia vua na tui me lewai ira, ena soli ira yani vei Leonitai, ia ko koya me na qai lesi koya (Amalikaia) me ikarua ni iliuliu ena mataivalu taucoko.

14 Ka sa yaco ni sa kauti ira sobu mai na nona mataivalu ko Leonitai ka vakavolivoliti ira na sotia i Amalikaia; ia ni ra qai yadra mai ena mataka, era sa vakavolivoliti ira tu na mataivalu i Leonitai.

15 Ka sa yaco ni ra raica ni ra sa vakavolivoliti tu, era sa vakamasuti Amalikaia me ra tovata ga kei ira na wekadra oqo, me ra kakua kina ni vakamatei. Oqori sara ga na ka e nakita tiko ko Amalikaia.

16 Ka sa yaco ni sa asega ni muria na ivakaro ni tui, ni sa soro ga ka soli ira yani na nona tamata. Oqo na ka a nakita lo tiko mai ko Amalikaia, me rawata kina na ka sa gadreva, me vakasivoya na tui.

17 E sa dau nodra itovo na Leimanaiti, kevaka e vakamatei na iliuliu levu duadua, me na digitaki na ikarua ni iliuliu me iliuliu levu duadua.

18 Ka sa yaco ni sa lesia e dua na nona tamata ko Amalikaia, me vagagai Leonitai tiko vakamalua me yacova ni mate.

19 Ni sa mate ko Leonitai, era sa digitaki Amalikaia sara ko ira na Leimanaiti me nodra iliuliu ka nodra turaganivalu levu duadua.

20 Ka sa yaco ni sa lako vata yani kei na nona mataivalu ko Amalikaia, (ni sa rawata na ka a gadreva), ki na vanua ko Nifai, ki na koro levu ko Nifai, na nodra koro turaga.

21 A sa lako mai na tui kei na nona matayadra me tavaki ira, ni sa nanuma ko koya ni a laki vakayacora ko Amalikaia na nona ivakaro, ka sa vakasoqona vata mai e dua na mataivalu levu me valuti ira na Nifai.

22 Ia raica, ni sa lako mai na tui me tavaki ira, sa talai rau yani na nona tamata ko Amalikaia me rau kidavaka na tui. A rau sa cuva sobu e matana, me vaka ni rau vakarokorokotaka na nona cecere.

23 Ka sa yaco ni sa dodoka yani na tui na ligana me vakaduri rau, ni oqo na nodra ivakarau na Leimanaiti, me ivakatakilakila ni sautu, era a vulica mai vei ira na Nifaiti.

24 Ka sa yaco ni vakaduria cake ga mai na imatai ni tamata mai na qele, raica a suaka sara na tui e utona; a bale sobu kina ki na qele.

25 A ra sa dro na dauveiqaravi ni tui; ia erau sa qai kaci na dauveiqaravi i Amalikaia ka kaya:

26 Raica, era sa suaka na utona na tui ko ira na nona dauveiqaravi; sa bale sobu ko koya ka ra sa dro na nona dauveiqaravi; dou lako mai, ka raica oqo.

27 Ka sa yaco ni sa vakarota ko Amalikaia me ra lako cake yani na nona mataivalu ka raica na ka sa yaco vua na tui; ia ni ra sa yaco yani ki kea, era sa raica ni sa davoca koto na nona dra na tui; sa vosa cudrucudru ena nona veicavilaki ko Amalikaia ka kaya: Ko koya ga sa lomana na tui, me cici muri ira yani na nona dauveiqaravi, me rawa ni ra vakamatei.

28 Ka sa yaco ni sa ra cici muri ira yani na dauveiqaravi ni tui, ko ira kecega sa lomana na tui ka rogoca na veivosa ko ya.

29 Oqo ni ra sa raica na dauveiqaravi ni tui ni sa cici muri ira yani e dua na mataivalu, era sa rere vakalevu sara ka dro ki na loma ni lekutu, ka basika yani ki na vanua ko Saraemala ka laki tovata sara kei ira na atamata i Amoni.

30 Ia era sa lesu lala na mataivalu ni sa tawayaga na nodra veicemuri; ia sa mani rawa sara na lomadra na tamata ko Amalikaia, ena nona ilawaki qaseqase.

31 Ka sa yaco ena mataka sa kauta yani ko koya na nona mataivalu ki na koro levu ko Nifai, ka taura na koro levu ko ya.

32 Ka sa yaco me rogoca na ranadi ni sa vakamatei na tui—ka ni a vakauta yani na kena itukutuku ko Amalikaia ni ra sa labati koya ga na nona dauveiqaravi, ka a kauta ko koya na nona mataivalu me vakasasataki ira, ia sa tawayaga na nodra vakasaqaqara ka ra lesu lala mai, ni ra sa dro sara yani—

33 Ia ni sa rogoca na itukutuku oqo na ranadi, sa talatala yani vei Amalikaia ka kerei koya me lomani ira na lewenikoro; ka sa vinakata tale ga me lako yani ko Amalikaia, kei ira na ivakadinadina era a vakadinadinataka na nona a bale mate na tui.

34 Ka sa yaco ni sa kauta yani ko Amalikaia na dauveiqaravi ka vakamatea na tui, kei ira kece ka a tiko vata kei koya, vua na ranadi ena vanua ka dabe toka mai kina; ia era sa vakadinadinataka kece vua ni o ira ga na nona dauveiqaravi era a vakamatea na tui; ia era kaya talega: Era sa dro kece; e sega beka ni ivakadinadina oqo me na beitaki ira? Ia sa yaco ni sa ra vakaceguya na ranadi me baleta na nona sa leqa na tui.

35 Ka sa yaco ni sa segata ko Amalikaia na nona veitokoni na ranadi, ka tauri koya me watina, ia oqo ena nona ilawaki qaseqase, kei na nodra veivuke na nona dauveiqaravi lawakica, e mani nona kina na matanitu vakatui; io, ka vakadeitaki ko koya me tui ena vanua taucoko, vei ira na Leimanaiti, ka kovuti vata kina ko ira na aLeimanaiti, kei na Lemuelaiti, kei na Isimelaiti, kei ira kece era a se mai vei ira na Nifaiti, mai na gauna a veiliutaki kina ko Nifai me yacova mai na gauna oqo.

36 Ko ira na ase tani oqo, sa soli vei ira na ivakasala kei na itukutuku vata ga a soli vei ira na Nifaiti, io, ni ra sa vakasalataki ena dua na ivakarau ni bkila na Turaga, o koya, e sa dredre kina me siqemi, ni sega ni dede ga na nodra se tani, era sa ca vakaukauwa sara, ka csega ni dau veivutuni, era sa kila vakalevu cake ka dau caka ca, ka vakarerevaki vakalevu cake sara mai vei ira na Leimanaiti—era sa gunu ena nodra ivakarau na Leimanaiti; era sa vucesa cake mai, era sa dauvakayacora na itovo vakasisila kecega; io, era sa guilecava vakadua na Turaga na nodra Kalou.