1 Quin wiliqueʼ in pal yan ulak baʼal ca sén tucliqueʼ yétel maʼ tu páhtal a naʼatiʼquiʼ, letiʼ le bix u juzgartaal maʼc tumen Hahal Dios tiʼ bix u haʼadzal le maʼx cu betiʼc kebanoʼ tumen a tucliqueʼ maʼ tu bel ca kuʼubuc le maʼc cu betiʼc kebanoʼ tu cúchil yan yayah olaloʼ.

2 Heʼel túnaʼ in pal in caʼah tsol tech, Hahal Dioseʼ, le cah dzoʼoc u luʼsic c yáx tataoʼob teʼ tu jardin Eden utiaʼal u meyahtiʼc luʼum tuʼux u taloʼoboʼ, beyoʼ, tu dzah tu lakin le jardinoʼ angeloʼob yétel humpʼél tadz maʼscab tʼabaʼan tulácal utiaʼal canántiʼc tu baʼpach le u cheʼil cuxtaloʼ.

3 C ilic túneʼ, maʼqueʼ h kuch u betuba bey Dioseʼ tán yoheltiʼc baʼax uts yétel baʼax kas, yétel tu yoʼolal maʼ u tiʼchic u kab ca u tʼoc xan u yich le u cheʼil cuxtal ca u hánt ca cuxlac minaʼan u xuloʼ, Hahal Dios Yumtsileʼ tu dzah u angeloʼob yétel le tadz maʼscab tʼabaʼan tu yoʼolal maʼ u chʼic maʼc u hant u yich.

4 Bey túnoʼ c iliqueʼ h dzaʼab tiʼ mac u kinil utiaal u kexic u yól, beyaʼ humpʼél u kin utiaʼal u yilaʼal baʼax cu betiʼc, humpʼél u kinil utiaʼal u kexic u yól yétel u meyahtiʼc Hahal Dios.

5 Tumen heʼel túnaʼ wá cu séb tiʼch u kab Adan yétel ca u hant u yich le u cheʼil cuxtaloʼ yan caʼach u cuxtal maʼntadzeʼ, heʼebix u yaʼalmaʼh Hahal Dioseʼ mix tán u yantal u kinil tiʼ utiaʼal u kexic u yól; beyoʼ minaʼan páhtalil tu tʼan Hahal Dioseʼ, dzoʼoc xan caʼach u kastal bix úchic le salvacionoʼ.

6 Baʼaleʼ heʼel túnaʼ dzoʼoc u dzaʼabal ca químic maʼc, beyoʼ hátsaʼaboʼob tiʼ u cheʼil cuxtaloʼ beyoʼ bín hoʼsaʼac tiʼ yókol le luʼumaʼ; beyoʼ maʼqueʼ saʼataab utiaʼal mix bikin, beyoʼ, beychah bey huntúl maʼc lúbaʼan.

7 Tu yoʼolal tún lelaʼ ca wiliqueʼ c yáx tataoʼobeʼ h pʼátoʼob luʼsaʼab tu tánil Hahal Dios, u wínclil beyxann u pixanil, bey túnoʼ c iliqueʼ h páhchah u betiʼcoʼob heʼex u yótiʼqueʼ.

8 Baʼaleʼ heʼel túnaʼ maʼ kabét ca luʼsaʼac maʼc u químil wáy h luʼumeʼ, tumen leloʼ cu kascuntiʼc u quiʼmaʼcchahal maʼc.

9 Baʼaleʼ tumen tún le pixan mix bikin u páhtal u químil, yétel tu yoʼolal le lúbul maʼco tu betah u tal u náchtal u pixan tiʼ Dios heʼebix xan humpʼél químil wáy luʼumeʼ, hátsaʼaboʼob tu tánil Yumtsil, h menchah hach kabétiʼl ca salvartaac tulácal maʼc tiʼ u químil u pixan.

10 Tumen haʼali cah sunahoʼob bakoʼob, hach cu yuʼubicoʼob taquiʼl tu wíncliloʼob yétel tiʼ kasiʼl baʼal u taloʼob heʼex síhicoʼobeʼ, letiʼ le u cúchil tuʼux cu yilaʼal baʼax cu betiʼc maʼqueʼ h kuch u betuba utiaʼaloʼobeʼ humpʼél cúchil utiaʼal cambal.

11 Kaʼahs in pal wá maʼ tu yoʼolal u yúchul le salvacionoʼ u pixanoobeʼ cu pʼataloob mukyah le cán químicoʼob caʼachoʼ tumen náchaʼan tu tánil Yumtsil.

12 Minaʼan caʼach ulʼak bix heʼel u salvartaal le maʼcoʼob lubaʼanoʼoboʼ, leloʼ letiʼ tu betah tu hun tu yoʼolal mu yuʼubic tʼan.

13 Le betiʼqueʼ, heʼex cu kátiʼc le justiʼciaoʼ maʼ tu páhtal u yúchul le salvacionoʼ wá maʼ tu yoʼolal u kexic yól maʼc tiʼ le cuxtalaʼ, tumen wá maʼ tu yoʼolal le baʼaloʼobaʼ maʼ tu páhtal u chʼaʼabal ótsilil tiʼ tumen beyoʼ cu xuʼulsic u meyhil le justiʼciaoʼ. Baʼaleʼ u meyah le justiʼciaoʼ maʼ tu páhtal u u xuʼulsaʼal, wá beyoʼ Dioseʼ cu pátiʼc u mentiʼc u Diosil.

14 Beytúnoʼ c iliqueʼ, tulácal maʼcoʼobeʼ lúbaʼanoʼob caʼachiʼ yétel tyaʼanoʼob tu kabil le justiʼciaoʼ, beyoʼ u justiʼciail Hahal Dios letiʼ cu kuʼubuloʼob náchil minaʼan u xul tu tánil Letiʼ.

15 Maʼ xan tán caʼach u páhtal u chʼaʼabal ótsilil wá maʼ u yantal humpʼél sacrificio, beyoʼ Dios mismo cu boʼotiʼc u kebanil tulácal le yokolcabaʼ, ca chaʼabac ótsilil utiaʼal ca boʼotaac le baʼax u kát justiʼcia, beyoʼ Dioseʼ huntúl Dios toh chucaʼan yóliʼ yétel cu chʼaic ótsilil xan.

16 Baʼaleʼ maʼ tu páhtal u kexic yól maʼc wá maʼ yantal humpʼél hadz minaʼan u xul xan heʼebix u cuxtaliʼl le pixanoʼ tu contrail le bix úchic le quiʼmaʼc ólaloʼ, beyoʼ minaʼan u xul xan heʼebix u cuxtaliʼl le pixanoʼ.

17 Bix tún heʼel u páhtal u kexic u yól maʼqueʼ wá minaʼan kebaneʼ? Bix heʼel u páhtal u betiʼc keban wá minaʼan ley? Yétel bix heʼel u páhtal u yantal ley wá minaʼan hadzeʼ?

18 Baʼaleʼ h dzaʼab humpʼél hadz yétel h dzaʼab humpʼél ley toh utiaʼal u subtal maʼc.

19 Tumen wá maʼ u dzaʼabal humpʼél leyeʼ, tuʼux cu yaʼaliqueʼ de que huntúl maʼc cu deber u químil wá cu quínsic huntúl maʼqueʼ, heʼel wá u chʼaʼic sahaquiʼl u químil wá cu quínsic maʼqueʼ?

20 Wáʼ xan minaʼan u leyil tu contra le kebanoʼ maʼcoʼobeʼ maʼ tu chʼaʼicoʼob sahaquiʼl u betiʼcoʼob keban.

21 Wá maʼ dzaʼan u leyileʼ; wá beyoʼ maʼc cu betiʼc kebaneʼ, baʼax u páhtal u betiʼc le justiʼciaoʼ, beyxanneʼ bix u chʼaʼabal ótsilileʼ, tumen minaʼan u páhtalil u meyahtiʼc letiʼ?

22 Baʼaleʼ wá dzaʼan humpʼél ley, wá dzaʼan xan humpʼél hadz, dzoʼoc xan u chaʼabal u kexic yól maʼqueʼ, wá bey cu kexic yóleʼ cu chʼaʼabal ótsilil tiʼ, wá maʼ bey aniloʼ, le justiʼciaoʼ cu chʼaʼic letiʼ yétel cu betiʼc heʼex cu yaʼalic le leyoʼ, le xan le leyoʼ cu dzaic hadz, tumen wá maʼ beyoʼ u meyhil le justiʼciaoʼ heʼel u xuʼulsaʼaleʼ, Hahal Dios xaneʼ cu pʼatiʼc u mentiʼc u Diosil.

23 Baʼaleʼ Dioseʼ maʼ tu pʼatiʼc u betiʼc u Diosil, yétel cu chʼaʼic ótsilil tiʼ le maʼx cu kex u yóloʼ, cu páhtal u chʼaʼic ótsilil tu yoʼolal le sacrificio Cristooʼ, beyxann le sacrificiooʼ cu betiʼc u yúchul u caʼa cuxtal le quiʼmenoʼoboʼ, le u caʼa cuxtal le quiʼmenoʼoboʼ cu betiʼc u sut maʼc tu tánil Hahal Dios, beyoʼ cu caʼa dzaʼabaʼaloʼob tiʼcnal letiʼ utiaʼal ca juzgartaacoʼob heʼex meyahnicoʼobeʼ, heʼebix cu kátiʼc le leyoʼ yétel le justiʼciaoʼ.

24 Tumen heʼel túnaʼ le justiʼciaoʼ cu chʼaʼic tulácal le baʼax cu kátiʼcoʼ, beyxann cu chʼaʼabal ótsilil tiʼ tulácal maʼc cu páhtaleʼ; beyoʼ mixmaʼc heʼel u páhtal u salvartaal wá maʼ tu háhil cu kexic yóleʼ.

25 Heʼel wá a tucliqueʼ, cu páhtal wá u chʼaʼabal ótsilil tiʼ huntúl maʼc wá le maʼcoʼ yanal u páhtalil le justiʼciaoʼ? Quin wáʼalic techeʼ maʼ; mix humpʼít. Wá beyoʼ Hahal Dioseʼ yan u pʼatiʼc u betiʼc u Diosil.

26 Lelaʼ letiʼ le bix u mentiʼc Hahal Dios u nucuch meyah minaʼan u xul, le h betaaboʼob desde u cáhal le yokolcabaʼ. Bey u yúchul u salvacionil maʼc yétel u luʼsaʼal u kebanil maʼc, beyxann u xuʼulsaʼal yétel u mukyah ólal.

27 Le betiʼc túneʼ in pal le maʼx u kát taleʼ heʼel u páhtal u tal hálkabil tiʼ u haʼil cuxtaleʼ, le maʼx xan maʼ u kát taleʼ maʼ tu obligartaal ca tac, chén baʼaleʼ tu dzoʼoc kineʼ yan u caʼa dzaʼabal tiʼ heʼebix baʼax u mentmaʼheʼ.

28 Wáʼ xan dzoʼoc u dzíboltiʼc u betiʼc le kasoʼ yétel maʼ kexic u yól tu kinil u cuxtaloʼ heʼel túnaʼ bin u kam le kasoʼ, heʼebix u caʼa dzaʼabal le baʼaloʼoboʼ tumen Hahal Dios.

29 Behlaʼ túneʼ in pal in kát ca a xuʼuls a xaʼaktal a tucul tu yoʼolal le baʼaloʼobaʼ, ca yanac a tuclic chén ta kebanoʼob yétel le tam tuculoʼob u biseʼch utiaʼal ca kex a wól.

30 In pal in kát maʼ a wáʼalic minaʼan u justiʼciail Hahal Dios. Maʼ a tiʼchtiʼc mix humpʼít a kebanoʼob, tán a wáʼalic minaʼan u justiʼciail Hahal Dios, sino ca a pʼat ca meyahnac u justiʼciail Hahal Dios, yétel cu chʼa tech ótsilil, yétel cu paʼtiʼquech ca a kex a wól yétel ca a humillartiʼcaba teʼ polvooʼ.

31 Heʼel túnaʼ in pal, dzoʼoc a tʼaʼanal tumen Hahal Dios utiaʼal a caʼans le tʼan tiʼ le cahal. Xen ta bel in pal, aʼal toh u hahil tʼanoʼ ca pátac a bisic pixanoʼob tiʼ tac cu kexicoʼob u yóloʼob, utiaʼal ca pátac u chʼaʼabal ótsilil tiʼoʼob bey aʼalaʼan teʼ tʼanoʼ. Ca anac u dzaʼabal tech tumen Hahal Dios heʼebix dzoʼoc in wáʼalicoʼ. Amen.