1 Le cah dzoʼoc u yaʼalaʼal le tʼanoʼob tiʼoʼob tumen Almaeʼ cah culah luʼumeʼ, ca tún h lík Amulequeʼ, ca hoʼopʼ u caʼansicoʼob tán u yaʼalic:

2 In sucuʼuneʼex, bey in wóleʼ teʼexeʼ maʼ tu páhtal a wáʼaliqueʼex maʼ a wohéltiʼqueʼex le baʼaxoʼob dzoʼoc u yaʼalaʼal tu yoʼolal u talbal Cristo, le maʼx, heʼebix c caʼansmaʼhileʼ, u Pal Hahal Dios; beyoʼ, teneʼ in woheʼl h caʼansaʼab teʼex yaʼab yoʼolal le baʼaloʼob heʼelaʼ antes úch u yantal humpʼél baʼatel ichil toʼoneʼ.

3 Dzoʼoc xan a kátiʼqueʼex tiʼ in yabilah sucuʼuneʼ ca u yaʼal teʼex baʼax cu deber a betiʼqueʼex, tu yoʼolal a mukyaheʼex, letiʼ túneʼ dzoʼoc u yaʼalic teʼex chén dzeʼedzec baʼal utiaʼal u listocuntiʼc a pixaneʼex, beyoʼ, dzoʼoc u yaʼalic teʼex ca yanac teʼex fe yétel paciencia.

4 Beyoʼ, anac teʼex chucaʼan fe utiaʼal u paʼakal ta pucsiʼkaleʼex le tʼanoʼ yétel ca a túmteʼex u yutsil.

5 Dzoʼoc tún c iliqueʼ le nohoch baʼal a kát a wohéltiʼqueʼexeʼ wá tún tyaʼan le tʼanoʼ tiʼ u Pal Hahal Dios, wá tún maʼ bín anac Cristoiʼ.

6 Dzoʼoc xan a wiliqueʼexeʼ in sucuʼuneʼ dzoʼoc u yaʼalic le hahiloʼ tiʼ heʼheʼlas baʼaloʼob, le tʼanoʼ tyaʼan tiʼ Cristo utiaʼal a salvartiʼcabaeʼex.

7 In sucuʼuneʼ dzoʼoc u tsolic teʼex u tʼan Zenos, tuʼux cu yaʼalic de que le salvacionoʼ tiʼ u Pal Hahal Dios u tal, beyxann u tʼan Zenoc, dzoʼoc xan u tʼan tu yoʼolal Moises utiaʼal u yeʼesic hach tu hahil le tʼanoʼobaʼ.

8 Heʼel túnaʼ bín in caʼah in wáʼal tu hahil tiʼ teʼexeʼ le baʼaloʼobaʼ u hahiloʼob, heʼel túnaʼ teneʼ quiʼn wáʼalic teʼexeʼ, teneʼ in woheʼl Cristoeʼ bín talac ichil u palal maʼcoʼob utiaʼal u cuchic tu yókol letiʼ u kebanoʼob u cahal yétel utiaʼal u boʼotiʼc u keban yókolcab tumen bey u yaʼalmaʼhil Hahil Dios Yumtsil.

9 Tumen hach kabét u sacrificioil tu yoʼolal keban, tumen heʼebix u yaʼalmaʼhil Hahal Dios minaʼan u xuleʼ, kabét u yantal humpʼél sacrificio, wá maʼeʼ tulácal maʼcoʼobeʼ yan u láh xuʼulsaʼaloʼob; beyoʼ, tulácaloʼob chich yóloʼob, beyoʼ, tulácaloʼob h lúboʼob, saʼataloʼob, yan xan u xuʼulsaʼaloʼob; wá maʼ tu yoʼolal u sacrificioil Cristo yan u betaaloʼ.

10 Tumen hach kabét ca anac humpʼél nohoch yétel dzoʼoc sacrificio. Maʼ u sacrificioil maʼquiʼ mix baʼalcheʼiʼ, mix huntúl chʼíchiʼ, tumen maʼ humpʼél sacrificioil maʼquiʼ, baʼaleʼ humpʼél sacrificio minaʼan u xul.

11 Minaʼan mixmaʼx cu páhtal u boʼotiʼc yétel u kiʼikel utiaʼal u boʼotiʼc u keban ulak maʼc, tumen wá huntúl maʼc cu quínsiqueʼ, heʼel túnaʼ heʼel wá u chaʼic le toh leyoʼ u lubsaʼal u cuxtal u sucuʼun? Quin wáʼalic teʼexeʼ maʼatán.

12 Baʼaleʼ le toh leyoʼ cu kátiʼc u cuxtal le maʼx tu quiʼnsahoʼ, le betiʼqueʼ chén humpʼél sacrificio minaʼan u xul bín páhchahac u lubsic u kebanil yókolcab.

13 Le betiʼqueʼ hach kabét humpʼél dzoʼoc sacrificio hach nohoch, bey túnoʼ kabét ca xuʼuluc u weʼequel kiʼik, bín kabétchahac u xuʼulul u weʼequel kiʼik, bey túnoʼ bín dzoʼococ u leyil Moises, beyoʼ yan u láh dzoʼocol, cada humpʼít chuchʼanil, beyoʼ mixbaʼal cun maʼnil.

14 Heʼel túnaʼ, lelaʼ letiʼ tulis baʼax u kát yaʼal le leyoʼ, tumen cada humpʼít eʼesic le dzoʼoc sacrificio hach nohochoʼ, leloʼ letiʼ le u dzoʼoc sacrificio hach nohoch u Pal Hahal Diosoʼ; beyoʼ, minaʼan u xul.

15 Beyoʼ bín u tas salvacion tiʼ heʼebucaʼah bín u creert tu kabaʼeʼ tumen u belal letiʼ le u dzoʼoc sacrificio utiaʼal cu chʼaʼabal ótsililoʼ cu lénchʼentiʼc le justiʼciaoʼ, cu tasicoʼob tiʼ le maʼcoʼoboʼ ca anacoʼob fe cu kexic yóloʼob.

16 Bey túnoʼ le quen chʼaʼabac ótsilil leloʼ hu páhtal u chupic le aʼaloʼob u kátiʼqueʼ justiʼcia cu tíchʼic tu kaboʼob cu canántiʼc maʼc, le maʼx maʼ tu meyahtiʼc yétel u feil utiaʼal u kex yóloʼ cu pʼaʼatal tiʼ tulácal baʼax cu kátiʼc tiʼ le justiʼciaoʼ; le nohoch sacrificiooʼ chén cu lubsic u keban le maʼx yan fe utiaʼal u kexic u yól.

17 Le betiʼc túneʼ in sucuʼuneʼex, quexiʼ, ca u dzaʼ teʼex Hahal Dios u cáhal a meyahtiʼc yétel a feeʼex tac utiaʼal kexic a wóleʼex tu yoʼolal u cáhal a kátiʼqueʼex tiʼ u yutsil kabaʼeʼ ca páhchac u chʼaic ótsilil tiʼ teʼex;

18 Beyoʼ, káteʼex tiʼ cu chʼa teʼex ótsilil, tumen hach yan páhtalil tiʼ utiaʼal u salvartiʼc.

19 Bix maʼiʼ, humillartabaeʼex yétel maʼ xuʼuls a mentiʼqueʼex oracion tiʼ.

20 Káteʼex tiʼ quen anaqueʼex ta colileʼex ich tulácal a baʼalcheʼoʼobeʼex.

21 Káteʼex tiʼ ta wotocheʼex, beyoʼ, tu yoʼolal tulácal le maʼxoʼob yan ta wotocheʼexeʼ, tiʼ hadzcab kin, chúmuc kín yétel ocsah kín.

22 Beyoʼ, káteʼex tiʼ tu contra le maʼxoʼob tac u betiʼqueʼex kas.

23 Beyoʼ, káteʼex tiʼ tu contra quiʼsin tumen letiʼeʼ cu bin tu contra tulácal le baʼal utsoʼ.

24 Káteʼex tiʼ tu yoʼolal u yich a pakilil a kaxileʼex u maʼalobtal teʼex tu yoʼolaloʼob.

25 Kát tiʼ tu yoʼolal a baʼalcheʼoʼob ta kaxileʼex tu yoʼolal u páhtal u yaʼabtal.

26 Baʼaleʼ lelaʼ maʼ tulácaliʼ; hach kabét ca a dzaeʼex tulácal a wól ta wotocheʼex, ta cúchileʼex chén kahóltaan tumeneʼex yétel ta kaxeʼex.

27 Beyoʼ, le quen maʼ tán a kátiʼqueʼex tiʼ Hahal Dios, chaʼeʼex u chuʼupul a wóleʼex, kubabaeʼex tiʼ maʼntadz tu yoʼolal u yántiʼqueʼex teʼex, bey heʼebix xan tu yoʼolal u yántiʼc le maʼxoʼob yan ta wicnaleʼexoʼ.

28 Heʼel túnaʼ in yabilah sucuʼuneʼex, quiʼn wáʼalic teʼexeʼ maʼ a tucliqueʼex wá le heʼelaʼ tulácaliʼ; tumen cu dzoʼocol a betiʼqueʼex tulácal le baʼaloʼobaʼ, wá ca pʼectiʼqueʼex le ótsil yétel le minaʼan u nokoʼ mix tán a bin a xímbateʼex le kohaʼan yétel u mukyahiloʼ, wá maʼatán a tʼoxiqueʼex le baʼax yan teʼex ichil a batsileʼex wá yan teʼexoʼ, tiʼ le ótsiloʼoboʼ, quiʼn wáʼalic teʼexeʼ, wá maʼ tán a mentiʼqueʼex mix humpʼél tiʼ le baʼaloʼob heʼelaʼ, heʼel túnaʼ a oracioneʼexeʼ minaʼan u páhtaliliʼ, beyoʼ caʼapʼél a wicheʼex ca betiʼqueʼex tu contra le ca creertiʼqueʼexoʼ.

29 Le betiʼc túneʼ wá maʼ kahaʼan teʼex a betiʼcabaeʼex utsil maʼquiʼleʼexeʼ, beyeʼex soholeʼ le cu puʼulul tumen le meyhul maʼcoʼoboʼ (tumen maʼ páhtaliʼ) yétel cu pepeʼchaktaal tumen maʼcoʼob.

30 Behlaʼ tún in sucuʼuneʼexeʼ, cu dzoʼocol a kamiqueʼex sén yaʼabach hahil tʼanoʼobeʼ, tumen le escrituraoʼoboʼ cu hach aʼalicoʼob u hahil tiʼ le baʼaloʼobaʼ, in kát ca meyahnaqueʼex ca a kex a wóleʼex.

31 Beyoʼ in kát ca talaqueʼex yétel maʼ a chichcunsic a tuculeʼex, tumen, heʼel túnaʼ behlaʼeʼ letiʼ u kinil ca salvartiʼcaba, le betiʼc túneʼ wá tumen cu kexic a wóleʼex yétel maʼ tán a chichcuntiʼqueʼex a tuculeʼex, yan u meyah sébaʼan atiaʼalinteʼex u sacrificio Cristo, cu luʼsaʼal a kebaneʼex.

32 Tumen heʼel túneʼ le cuxtal heʼelaʼ, u kinil utiaʼal u cambal maʼc utiaʼal u bin tu tánil Hahal Dios, beyoʼ, u kinil le cuxtal heʼelaʼ letiʼ u kinil cu deber u betiʼc maʼc u meyah.

33 Heʼebix tiʼn wáʼalil teʼex caʼacheʼ bey dzoʼoc u yantal teʼex yaʼabach u hahil tʼanoʼob quiʼn kátiʼc teʼex maʼ u xántal u kinil a kexic a wóleʼex tac u dzoʼocol. Tumen cu dzoʼocol u kinil u cuxtalaʼ le cu dzaʼabal toʼon utiaʼal c listocuntiʼcba utiaʼal le kinoʼ minaʼan u xul, heʼel túnaʼ wá maʼ tán c utsquiʼntiʼc le tiʼempo yan toʼon tiʼ le cuxtaliʼlaʼ cu tal u yákabil le eʼhochʼeʼenilaʼ tuʼux maʼ tu páhtal betiʼc mix humpʼél meyah.

34 Maʼ tu páhtal a wáʼaliqueʼex le can aniqueʼex tu tanil le sénquech mukyahilaʼ yan in kexic in wól, yan in sutiʼc in wól tiʼn Hahal Dios. Maʼatán, maʼ tu páhtal wáʼaliqueʼex lelaʼ tumen letiʼeʼ pixan yan ta wínclileʼex le can lukuqueʼex tiʼ le cuxtaliʼlaʼ letiʼ le pixan yan teʼexaʼ yan u páhtalil utiaʼal ca u chʼa a wínclileʼex teʼ yókolcab minaʼan u xuloʼ.

35 Tumen wá dzoʼoc u xántal u kinil a kexic a wóleʼex tac le químiloʼ heʼel túnaʼ dzoʼoc a pʼataleʼex yánal u pixan quiʼsin. Letiʼ cu u kaxeʼex bey baʼaloʼob utiaʼaleʼ. Beyoʼ cu náchtal ichileʼex u pixan Yumtsil yétel minaʼan tuʼux u yantal ichileʼex. Beyoʼ le quiʼsinoʼ yan tulácal u páhtalil ta woʼolaleʼex; lelaʼ bix u dzoʼocol le kasaʼan maʼcoʼoboʼ.

36 Lelaʼ in woheʼl tumen Yumtsileʼ dzoʼoc u yaʼalic maʼatech u cahtal tiʼ humpʼél sucio templo, aʼaleʼ tu pucsiʼkal le maʼalob maʼcoʼob cu cahtal, dzoʼoc xan u yaʼaliqueʼ le maʼalob maʼcoʼob bín culacoʼob tu tseloʼ tu reinoil, maʼ bín hókocoʼob tu caʼatén, u nokoʼob bín saccuntaac yétel u kiʼkel le Tamaʼnoʼ.

37 Behlaʼ túneʼ in yabilah sucuʼuneʼex, in kát ca kaʼahac teʼex le baʼaloʼobaʼ, ca náhaltiʼqueʼex a salvacioneʼex tu tánil Hahal Dios yétel sahquiʼl, ca a pʼateʼex a wáʼaleʼex maʼ tu tal Cristoiʼ.

38 Maʼ a baʼateleʼex tu contra le Hahil Pixanoʼ, baʼaleʼ ca a kameʼex yétel ca a chʼaʼeʼex ta wókoleʼex u kabaʼ Cristo, ca a humillartiʼcabaeʼex tac le luʼumoʼ, ca a meyahtiʼc Hahal Dios, heʼtuʼuxac cúchil ca anaqueʼexeʼ yétel a pixaneʼ beyxann tu hahiloʼ, yétel ca cuxlaqueʼex tán dzaic diosboʼotiʼc tiʼ tulácal kin tu yoʼolal le sénquech utsil yétel le bendicionoʼob cu wequiʼc ta wókoleʼexoʼ.

39 Beyoʼ, quiʼn dzic in tʼan tiʼ teʼex in sucuʼuneʼex ca pʼil a wicheʼex a orareʼex maʼntadz tu yoʼolal maʼ a bisaʼaleʼex tumen le baʼax cu betiʼc le kásil baʼaloʼ, utiaʼal mu páhtal u chʼic páhtalil ta wókoleʼex mix a betiʼcabaeʼex u meyhul maʼqueʼex tu dzoʼoc kin, tumen heʼel túnaʼ letiʼeʼ maʼatán u dzáic teʼex maʼalob boʼolil.

40 In yábilah sucuʼuneʼex in kát in dzic teʼex in tʼan ca anac teʼex muk tu yoʼolal u páhtal a cuchiqueʼex tulácal u heʼheʼlásil mukyahil yétel maʼ pʼectiʼqueʼex le maʼxoʼob u pʼequeʼexoʼoboʼ yoʼolal hach ótsileʼexeʼ utiaʼal maʼ a beytaleʼex heʼex letiʼoʼoboʼ.

41 Baʼaleʼ ca anac teʼex paciencia maʼ tu naʼacal a wóleʼex yoʼolal mukyaheʼex, tán a paʼtiʼqueʼex u kinil a heʼeleʼleʼex tiʼ tulácal a mukyaheʼex.