1 Behláʼ túneʼ in pal yan baʼax quen in wáʼal tech yoʼolal le caʼa dzaʼabaloʼ le dzoʼoc u yaʼalaʼaloʼ, tumen heʼel túnaʼ yan maʼcoʼob dzoʼoc u kexoʼob le escrituraoʼob yétel dzoʼoc u nachtaloʼob tu yoʼolal lelaʼ. Quin wilic xaneʼ xaʼakaʼan a tucul tu yoʼolal le baʼal heʼelaʼ. Baʼaleʼ heʼel túnaʼ bín in caʼah in tsol tech.

2 Quin wáʼalic tún techeʼ in pal, cu caʼa dzaʼabal baʼal, beyoʼ kabét tiʼ u justiʼcia Hahal Dios; tumen kabét ca utsquiʼntaac tulácal baʼaloʼob hach tu tsoʼolil. Heʼel túnaʼ, hach kabét yétel hach toh heʼebix u páhtalil yétel u caʼa cuxtaliʼl Cristoeʼ, u pixan maʼqueʼ ca caʼa anac u yutsquiʼntaal tu wínclil, yétel caʼa dzaʼabal tu cúchil tulácal keketal u wínclil.

3 Yétel kabét xan utiaʼal u justiʼcia Hahal Dios, u juzgartaal le maʼcoʼoboʼ heʼebix baʼax u betmaʼhoʼobeʼ, yétel xaneʼ, wá maʼalob baʼax tu bétahoʼob tiʼ le cuxtalaʼ, maʼalob xan u dzíbolal u pucsiʼkaloʼobeʼ, ca caʼa dzacoʼob maʼalob baʼaloʼob tu dzoc kin.

4 Wá xan kas u betmaʼhoʼobeʼ, bín dzaʼabac tiʼoʼob utiaʼal kas. Le betiʼqueʼ tulácal baʼaloʼob bín dzaʼabac hach tu tsolol. Hunhunpʼélil baʼal heʼebix anileʼ, le wínclil cu químiloʼ cu líksaʼal utiaʼal maʼ cu químil, le kastaloʼoboʼ tiʼ maʼ kasiʼ, cu líksaʼal ich quiʼmaʼc ólal minaʼan u xul utiaʼal u utiaʼalintiʼc u reinoil Hahal Dios wá utiaʼal humpʼél mukyahil minaʼan u xul utiaʼal cu utiaʼalintiʼc u reinoil quiʼsin, humpʼél tiʼ humpʼél kabeʼ ulak tiʼ ulak kab.

5 Huntúleʼ cu líksaʼal utiaʼal quiʼ ólal, heʼebix u dzíbolal tiʼ quiʼmaʼc ólaleʼ wá tiʼ le utsil heʼebix u dzíbolal tiʼ utsileʼ, le ulak xanoʼ tiʼ kas heʼebix u dzíbolal tiʼ u kasiʼleʼ, tumen heʼebix dzoʼoc u dzíboltiʼc u mentiʼc kas bulkinoʼ, beyxann bín u kam u boʼolil kas le quen ákabchahac.

6 Bey anil tiʼ ulak kab. Wá dzoʼoc u kexic yól tu yoʼolal u keban yétel dzoʼoc u dzíbotiʼc baʼal toh tac tu dzoc kin tiʼ u cuxtaleʼ, bey xanoʼ bín boʼotaac utsil tiʼ.

7 Leloʼobaʼ le cu salvartaaloʼob tumen Yumtsiloʼ, beyoʼ letiʼoʼob le bín luʼsaʼacoʼob tiʼ eʼhochʼeʼen ákab minaʼan u xuloʼ, beyxann u wáʼataloʼoboʼ wá u lúbuloʼob tumen heʼel túnaʼ letiʼoʼob cu juzgartiʼcubaoʼob utiaʼal u betiʼcoʼob baʼaloʼob maʼalobtac wá utiaʼal u mentiʼcoʼob kas.

8 Le baʼax u yaʼalmaʼh Hahal Diosoʼ maʼ tu páhtal u keʼexel, le betiʼqueʼ dzoʼoc dzaʼabal humpʼél beh, tu yoʼolal heʼemaʼxac u káteʼ huʼ páhtal u xímbal tiʼ yétel u salvartaal.

9 In pal, maʼ ta betiʼc baʼal kas tu caʼatén tu contra Dios tu yoʼolal le dzeʼedzec baʼaloʼob tiʼ le caʼansahaʼ tumen tac behlaʼeʼ dzoʼoc a chaʼic a kebanchahal.

10 Bic tuculnen, wá tumen dzoʼoc u yaʼalaʼal tʼan tu yoʼolal le caʼa dzaʼabal baʼal tu cúchileʼ, bín luʼsaʼaquech teʼ ich le kebanoʼob can dzaʼabil tech tiʼ quiʼmaʼc ólal. Heʼeleʼ quiʼn wáʼalic techeʼ le kásoʼ mix huntén tu betuba quiʼmaʼc ólaliʼ.

11 Tulácal le maʼcoʼob yanoob heʼebix síhicoʼobeʼ, u kát yaʼaleʼ tu bakel tiʼ yanoʼob, tyaʼan ich kákahileʼ yétel tiʼ u kaxil keban, yaniloʼob minaʼan Dios tiʼoʼob wáy yókolcabaʼ yétel tu betoʼob u baʼal kas tu contra bix anil Hahal Dios, le betiʼc túneʼ anicoʼob tún letiʼoʼob dzoʼoc u binoʼob tu contra bix anil le quiʼmaʼc ólaloʼ.

12 Heʼel túnaʼ, u kát wá u yaʼaleʼ u caʼa dzaʼabal baʼal tu cúchileʼ, u chʼaʼabal humpʼél baʼax bix anil ca dzaʼabac bey maʼ aniloʼ, wá cu dzaʼabal tiʼ humpʼél cúchil cu bin tu contra bix anileʼ?

13 Maʼatech in pal, maʼ beyiʼ, baʼaleʼ u kát yaʼaleʼ le tʼanoʼ le caʼa dzaʼabal tu cúchiloʼ ca sunac kas tu yoʼolal kas, wá bakel tiʼ bakel, wá quiʼsinil tiʼ quiʼsinil; uts tu yoʼolal utseʼ, toh tiʼ toheʼ, justiʼcia tiʼ justiʼciaeʼ, cu chʼaʼabal ótsilil tiʼ le maʼx cu chʼaʼic ótsilil.

14 Le betiʼqueʼ in pal ilawil a chʼaʼic ótsilil tiʼ a sucuʼunoʼob, bisaba toh yétel juzgart tu bel yétel maʼ u xuʼulul a bétiʼc baʼax uts; wá xan ca dzoʼocsic tulácal le baʼaloʼobaʼ, bín tún a kam a boʼolil, bey bín caʼa chʼaʼabac tech ótsilil, bín caʼa suʼutuc tech justiʼcia, bín caʼa dzaʼabac tech maʼalob juicioil, yétel yan a boʼotaal tu caʼatén yétel le utsoʼ.

15 Tumen le baʼax hókol tiʼ techeʼ yan u caʼa sut tiʼ tech yétel bín caʼa dzaʼabac tech, le betiʼqueʼ le tʼanoʼ, u caʼa dzaʼabal baʼal tu cúchileʼ, maʼs chucaʼaniʼl cu lúbul tu yókol le maʼx cu betiʼc kasoʼ, yétel beyaʼ maʼ tu yutsquiʼntaal bix aniliʼ.