1 Tán u yilaʼal tún le u tʼanoʼob Amulec tu maʼcah u chiʼ Zeezrom, tu yilah bix hasaʼabic u yól tumen Amulec tu chucah letiʼ leloʼ tán u dzicuba u tusic yétel u xuʼulsic Amulec, Zeezrom tu yoheltah u keban cah hoʼopʼ u quiʼquiʼlanquiʼl. Almaeʼ tu heʼah u chiʼ cah hoʼopʼ u tʼanic yétel u heʼdzcuntiʼc le u tʼanoʼob Amulec, ca hoʼopʼ u tsolic le baʼaloʼob tyaʼan le escrituraoʼob maʼs tiʼ u betmaʼh Amulecoʼ.

2 Le tʼanoʼob tu yaʼalah Alma tiʼ Zeezrom tu yuʼubah le yaʼabach maʼcoboʼ baʼaleʼ hasta dza tusic tiʼ Dios; tumen heʼ túnaʼ, letiʼeʼ u yoheʼl tulácal a tuculoʼob, dza wilic de que cu yeʼesic toʼon a tuculoʼob tu yoʼolal u Pixan.

4 Ta wilic toʼoneʼ c oheʼl a tuculoʼobeʼ sén cambalnahaʼan hach bey u cambalil quiʼsin, utiaʼal a tusic le cahaʼ utiaʼal ca peʼecs beyoʼ t ókol toʼon utiaʼal ca u pʼúsicoʼon yétel u hoʼsoʼon tancaʼ.

5 Lelaʼ u tuculil quiʼsin yan tiʼ techoʼ letiʼeʼ meyahnah u páhtalil ta woʼolal, in kát ca kaʼahac tech le baʼax quiʼn wáʼalic techaʼ quiʼn wáʼalic tiʼ tulácal.

6 Heʼel túnaʼ, quiʼn wáʼalic tiʼ tulácaleʼex lelaʼ humpʼél u lech quiʼsin u hitʼmaʼh utiaʼal u léchtiʼc le cahaʼ utiaʼal u páhtal u kaxic teʼex yétel u kalic utiaʼal ca u xuʼulseʼex beyoʼ heʼebix anic teʼ u páhtalil u mukil.

7 Le cah dzoʼoc Alma u yaʼalic le tʼanoʼobaʼ, Zeezrom hoʼopʼ u sén quiʼquiʼlanquiʼl, tumen beyoʼ hoʼopʼ yilic u páhtalil Dios, bey xan hoʼopʼ yilic Alma yétel Amulec yoheʼloʼob baʼaloʼob yoʼolal letiʼ, dzoʼoc u yilic beyoʼ u yoheʼloʼob baʼaxoʼob cu tuclic, tumen dzaʼan tiʼoʼob u páhtalil u yoheltiʼcoʼob le baʼaloʼobaʼ heʼebix cu tʼan tiʼoʼob le pixanoʼ yoʼolal le baʼax bín úchuco.

8 Zeezrom hoʼopʼ u hach kátiʼc tiʼoʼob utya al ca pátac u yoheltiʼc maʼs u baʼaliloʼob u reinoil Dios, ca tu yaʼalah tiʼ Alma: Baʼax u kát yaʼal le baʼaxoʼob tu yaʼalah Amulec tu yoʼolal le caʼa cuxtal le quiʼmenoʼoboʼ, tulácaloʼob bín líkiʼcoʼob ichil quiʼmenoʼob, utsil maʼcoʼob yétel kakas maʼcoʼob, yan u bisaʼaloʼob tu tán Dios utiaʼal ca juzgartaac heʼebix u meyahoʼobeʼ?

9 Alma hoʼopʼ u tsolic tiʼ le baʼaloʼoba, tán u yaʼalic: Tiʼ yaʼab maʼxoʼob dzaʼan ca u kahóltoʼob u taacaʼan baʼaliloʼob Dios; quex beyoʼ cu dzaʼabal tiʼoʼob humpʼél tadz maʼndamiento chén cu caʼansicoʼob heʼebix le tʼan dzabaʼan tiʼ u palal maʼcoʼoboʼ, heʼebix cu yuʼubicoʼob u tʼan yétel cu maʼalob betiʼcoʼob le dzaʼabal tiʼoʼ.

10 Bey túnaʼ le maʼx cu chichcunsic u pucsiʼkaleʼ cu kamic hach humpʼít tiʼ u tʼan; le maʼx maʼ tu chichcunsic u pucsiʼkaliʼ cu kamic yaʼabiʼ cu dzaʼabal tiʼ u yohelt tac u taacaʼan baʼaxiʼloʼob Dios cu kuchul yohelt tulácal.

11 Le maʼxoʼob cu chichcunsic u pucsiʼkaloʼob cu dzaʼabal tiʼoʼob hach humpʼít tiʼ u tʼan, cu pʼatal hach mixbaʼal yoheʼloʼob tiʼ u taacaʼan baʼaxiʼloʼob Dios, bey túnaʼ h chuʼuc tumen quiʼsineʼ cu bisicoʼob heʼetuʼux u káteʼ hasta xuʼulsaʼacoʼob. Lelaʼ letiʼ u kát yaʼaleʼ u kaxil eʼhochʼeʼenil.

12 Amulec dzoʼoc u tʼan yétel sásil yoʼolal le químililoʼ, ca bisaʼacoʼon tu tánil Dios, utiaʼal ca juzgartaacoʼon heʼebix meyahnahoʼonoʼ.

13 Wá c pucsiʼkal dzoʼoc u chichtaleʼ, heʼeleʼ wá dzoʼoc c chichcunsic c pucsiʼkaleʼ tu contra u tʼan Dios maʼ tu caxtaal tiʼ toʼoneʼ, yah anicoʼon, tumen yan u kaloʼon teʼ eʼhochʼeʼenil.

14 Tumen c tʼaneʼexeʼ bín u kaloʼon beyoʼ, tulácal baʼax c mentmaʼeʼ, cun u kaloʼon ich eʼhochʼeʼenil xan; maʼ; bín pʼátacoʼon xmaʼ kasiʼl; yétel c tuculoʼob cun u kaloʼon ich eʼhochʼeʼenil xan; y bín pʼátacoʼon beyaʼ maʼ t páhtal c pacatiʼc c Dios; beyoʼ ca quiʼmaʼcchac c ól wá cu páhtal c túxtiʼc le tunichoʼob le caʼanal luʼumoʼob ca lúbucoʼob t ókol, ca u taacoʼon tu tánil.

15 Lelaʼ maʼ tu páhtal, yan c bin tu tánil letiʼ teʼ tu caʼaniloʼ, muk, páhtalil, gloria yétel u nohchil yétel utiaʼal c aʼalic tu hahil tiʼ c sublaquiʼl minaʼan u xul de que le boʼolil u dzamaʼh toʼoneʼ hach tu bel, Letiʼ hach tadztac tulácal u meyahoʼob; cu chʼa ótsilil tiʼ u palal maʼcoʼob, yétel yan tiʼ tulácal páhtalil utiaʼal u salvartiʼc tulácal le maʼxoʼob cu creertiʼcoʼob tu kabaʼ cu betiʼcoʼob le baʼax kabétoʼ utiaʼal u pátiʼc u kebanoʼob.

16 Heʼel túnaʼ, quiʼn wáʼalic teʼex; cu dzoʼocoleʼ cu tal humpʼél químil u caʼapʼél químil; beyoʼ u químil ich pixan; bey túnoʼ teʼ kinoʼ wá letiʼeʼ cu químil ich u kebanoʼob wáy h luʼumeʼ, beyxanneʼ letiʼ cu químil ich pixanil, heʼelaʼ yan u químil tiʼ le baʼaloʼob utstacoʼob.

17 Teʼ kinoʼ, u mukyahoʼobeʼ bey humpʼél cúchil kák yétel budz u kakileʼ cu naʼacal maʼntadz utiaʼal mix bikin u tuʼupul, teʼ kinoʼ bín kaʼaxac ca xuʼulucoʼob minaʼan u xul, heʼebix u páhtalil u kalic maʼc Santanas, tumen letiʼeʼ u kalmaʼhoʼob heʼex u káteʼ.

18 Quin wáʼalic tiʼ teʼex, bey aniloʼob mix huntén anchah humpʼél salvacionoʼ tumen maʼ tu páhtal u sutoʼob caʼan tumen bey u tʼan Hahal Diosoʼ, mix u páhtal u químiloʼob tumen maʼ tu páhtal kastaloʼob maʼs.

19 Úch tún le cah dzoʼoc u yaʼalic Alma le tʼanoʼob heʼelaʼ le maʼcoʼoboʼ cah hoʼopʼ u sénquech haʼakal yóloʼob.

20 Baʼaleʼ yan huntúl maʼc Antiʼona huntúl u nohchil le cahoʼ ca tu yaʼalah tiʼ: Baʼax le dzoʼoc a wáʼalicoʼ de que maʼc bín caʼa cuxlac ichil quiʼmenoʼob bín keʼexec le wíncliloʼ yoʼolal maʼ caʼa químic le wínclil yétel le pixanoʼ?

21 Baʼax u kát yaʼal le escrituraoʼob tuʼux cu yaʼaliqueʼ Dios tu dzah angeloʼob yétel humpʼél maʼscab tʼabaʼan tu lakin le jardin Eden tu yoʼolal c yáx tataoʼobeʼ maʼ u hantoʼob u yich le u cheʼil cuxtaloʼ ca cuxlacoʼob maʼntadz? C iliqueʼ minaʼan humpʼél páhtalil u betiʼc ca cuxlacoʼob maʼntadziʼ.

22 Almaeʼ tu yaʼalah tiʼ: Lelaʼ letiʼ le quiʼn in tsol tech caʼachaʼ. C oheʼl Adaneʼ h lúb tumen tu hantah yich le cheʼ aʼalan tiʼ maʼ u hantiʼqueʼ heʼebix u yaʼalmaʼhil Dios, bey túnaʼ, c ilic tu yoʼolal lúbiʼqueʼ tulácal maʼqueʼ beychahoʼob humpʼél cah saʼataan yétel lúbaʼan.

23 Heʼel túnaʼ, quiʼn wáʼalic tiʼ teʼex wá Adan ca u hant caʼach u yich le u cheʼil le cuxtaloʼ le kin heʼeloʼ minaʼan químil, yétel leloʼ maʼ hahil le tʼanoʼ, le cu betiʼc cu tusic Hahal Dios, tumen tu yaʼalah: Wá ca hanal yan a químil.

24 C iliqueʼ le químiloʼ tán u tal yókol tulácal maʼc heʼeleʼ, le químil tu yaʼalah Amulecoʼ, letiʼeʼ u químil wínclil, quex beyoʼ dzaʼab tiʼ maʼc dzedzec kin utiaʼal ca u kex u yól, bey túnoʼ le cuxtal heʼelaʼ utiaʼal ca ilaʼac wá c betiʼc uts wá kas dzedzec kinoʼob utiaʼal u cambal utiaʼal u kinil cu bin tu tánil Diosoʼ, humpʼél kin utiaʼal u cambal utiaʼal le cuxtal minaʼan u xuloʼ heʼebix dzoʼoc aʼalicoʼ, le quen dzoʼococ u caʼa cuxtal le quiʼmenoʼoboʼ.

25 Beʼoraʼ wá maʼ tu yoʼolal u plan le salvacionoʼ dzaʼan le cah mentaab le quiʼmenoʼoboʼ; baʼaleʼ anchah u menchahal humpʼél plan salvacion ca bisaʼac u yúchul le caʼa cuxtaloʼ le quiʼmenoʼoboʼ heʼebix dzoʼoc u yaʼalaloʼ.

26 Heʼel túnaʼ, wá ca pátac caʼach le c yáx tataoʼob u hantiʼcoʼob u yich le u cheʼil le cuxtal minaʼan u xuloʼ, behlaʼ ótsiloʼob maʼntadzeʼ, tumen maʼ antal tiʼoʼob u kiniloʼob u cambaloʼob, bey túnaʼ u plan le salvacionoʼ cu pʼátal mixbaʼal u beliʼl, yétel u tʼan Diosoʼ maʼ hahil, caʼachaʼ minaʼan u páhtalil.

27 Baʼaleʼ maʼ bey úchiquiʼ, caʼacheʼ dzoʼoc u yaʼalal tiʼ maʼcoʼob de que yan u químil maʼc; le cah dzoʼococ u químiloʼobeʼ cu binoʼob utiaʼal ca juzgartaac heʼebix u meyahoʼobeʼ; heʼelaʼ le juicio dzoʼoc c aʼalicaʼ, lelaʼ u xul.

28 Dioseʼ bey u dzamaʼil ca úchucoʼ tiʼ maʼc, tu yilah kabét ca u yohelt maʼc baʼaxoʼob letiʼ u yaʼalmaʼh tiʼoʼob.

29 Tu yoʼolal leloʼ tu túxtah u angeloʼob yanoʼob teʼ caʼanoʼ ca tsicbalnac yételoʼob, letiʼoʼobeʼ tu mentahoʼob u yilaʼal u sásilil u nohchil Dios.

30 Tu yoʼolal leloʼ le maʼcoʼoboʼ hoʼopʼ u kátiʼcoʼob u kabaʼ; Dioseʼ h tsicbalnah yétel maʼcoʼob ca tu tsolah tiʼoʼob bix cun salvartubaoʼob, le dzoʼoc u betaal antes u betah le yokolcabaʼ; tu yeʼesah tiʼoʼob heʼebix u fe, yétel cu kexic u tuculoʼob, yétel u maʼalob meyah.

31 Tu yoʼolaleʼ tu dzah u maʼndamientoʼob tiʼ maʼcoʼob, letiʼoʼob yáxeʼ maʼ tu betah u yáx maʼndamientoʼob yoʼolal le baʼax wáy h luʼumeʼ, ca h beychah Diosoʼobeʼ, u yoheʼloʼob uts yétel kas, cu pʼátaloʼob u yéyicoʼob u beloʼ heʼex u yólaleʼ u mentiʼc kas wá uts.

32 Bey túnaʼ, Dios tu dzah tiʼoʼob maʼndamientoʼob, cu dzoʼocol u tsolic bix cun salvartubaoʼob ca u pʼatoʼob le kasoʼ, wá kasoʼobeʼ cu tasic le caʼatén químiloʼ, químil minaʼan u xul tiʼ le baʼaloʼob utstacoʼ; beyoʼ minaʼan páhtalil u salvartiʼcubaoʼob, tumen u justiʼciail yan u betaal heʼex u maʼs nohoch utsil Hahal Dioseʼ.

33 Baʼaleʼ Dios tu tʼanah le maʼcoʼob tu kabaʼ u Pal (bey tsolaʼanic bix u salvartiʼcuba maʼcoʼ) cu yaʼalic: Wá ca pʼatiʼqueʼex le baʼal kasoʼ maʼ tán a chichcunsiqueʼex a pucsiʼkaleʼex, heʼel tún beyoʼ u chʼaʼabal teʼex otsilileʼ tu yoʼolal huntúliliʼ Pal.

34 Tu yoʼolaloʼ le maʼx cu kexic yól maʼ tu chichcunsic u pucsiʼkaleʼ yan tiʼ bín chʼic ótsilil tu yoʼolal in Pal utiaʼal u luʼsaʼal u kebanoʼob letiʼoʼobeʼ cu yocoloʼob tiʼn heʼeleʼl.

35 Le maʼx cu chichcunsic u pucsiʼkaleʼ cu metiʼc baʼaloʼob kastaqueʼ, heʼel túnaʼ quiʼn wáʼalic tu hahil yétel in wól maʼ tu yocol tiʼn heʼeleʼliʼ.

36 Bey túneʼ, in sucuʼuneʼex, quiʼn wáʼalic teʼex wá ca chichcunsic a pucsiʼkaleʼexeʼ maʼ bin ocoqueʼex tiʼ u heʼeleʼl Yumtsil; tu yoʼolal lelaʼ a kebaneʼexeʼ cu lecsic u pʼuʼuhulil ta wókoleʼex heʼebix yáxeʼ tu yókol Adan, bey, heʼex u yaʼalmaʼh yoʼolah u químil le pixanoʼ beyxann yoʼolal Adanoʼ hasta cu xuʼulul umpuliʼ a wóleʼex; bey túnoʼ heʼex yaʼalmilacoʼ tiʼ le dzoʼoc químiloʼ beyxann le yáx químiloʼ.

37 Bey túnoʼ, in sucuʼuneʼex, bey tún c oheʼl le baʼaloʼob heʼelaʼ, hahtacoʼobaʼ, coʼox kexic c tuculeʼex yétel maʼ c chichcunsic c pucsiʼkaleʼex utiaʼal maʼ pʼuʼusic c Yumtsil Dios utiaʼal ca tac kuxil yókol toʼon tiʼ le ulak maʼndamientoʼob tán u dzic toʼoneʼ, baʼaleʼ coʼox ocol ichil u heʼeleʼl Dios le betaan heʼebix u yaʼalmiloʼ.