1 Yan xan ulʼak baʼal kabét in wáʼalic tech in pal tumen in wiliqueʼ xaʼakaʼan a tucul tu yoʼolal le u caʼa cuxtal tiʼ le quiʼmenoʼoboʼ.

2 Heʼel túnaʼ quiʼn wáʼalic techeʼ, in kát in wáʼaleʼ le wínclil cu químilaʼ maʼ tu búquiʼntiʼc le cuxtal minaʼan u xuloʼ, mix le wínclil kebanilaʼ maʼ tu sut xmaʼ kebanil, mix cu yúchul le caʼa cuxtal hasta cu dzoʼocol u tal Cristo.

3 Heʼel túnaʼ letiʼ cun h betiʼc u caʼa cuxtal le quiʼmenoʼoboʼ. Baʼaleʼ, heʼel túnaʼ in pal, le caʼa cuxtaloʼ maʼ kuchuquiʼ. Beʼoraʼ bín in caʼah in weʼes tech humpʼél baʼax maʼ u yoheʼl maʼquiʼ; quex tumen yaʼabach baʼal maʼ u yoheʼl maʼc cu pʼátal taacaʼantac, mixmaʼc u yoheʼl chén Hahal Dios yoheʼl. Baʼaleʼ bín in caʼah in weʼes tech humpʼél baʼal in kátmaʼh tiʼ Hahal Dios tu yoʼolal u páhtal in wohéltiʼc lelaʼ tu yoʼolal le caʼa cuxtaloʼ.

4 Heʼel túnaʼ dzoʼoc u dzaʼabal humpʼél kin le can líkiʼc le quiʼmenoʼoboʼ. Baʼax kin u tal le kin dzaʼanoʼ, mix maʼc u yoheʼl, baʼaleʼ, Hahal Dioseʼ yoheʼl baʼax kin.

5 Beyoʼ wá yan yantal humpʼél kineʼ, caʼapʼél wá oxpʼél kin utiaʼal ca caʼa cuxlahac maʼcoʼobeʼ ichil le quiʼmenoʼoboʼ mixbaʼal tiʼ; tumen Hahal Dioseʼ u yoheʼl tulácal le baʼaloʼoboʼ; tumen teneʼ chén kabét in woheʼl le heʼelaʼ, dzoʼoc u dzaʼabal humpʼél kin heʼ u líkiʼl tulácal le quiʼmenoʼoboʼ.

6 Yan u yantal dzedzec kin tán chumuc le kinil le químiloʼ yétel tiʼ le caʼa cuxtaloʼ

7 Behlaʼeʼ quiʼn kátiʼc túneʼ, baʼax cun úchul tiʼ u pixan le maʼcoʼob tiʼ le u kinil le químiloʼ tac tiʼ le kinoʼob dzaʼan utiaʼal le caʼa cuxtaloʼ?

8 Wá yan humpʼél kin wá maʼs tiʼ humpʼél kin dzaʼan ca líkiʼc maʼcoʼobeʼ mixbaʼal tiʼ, tumen tulácal maʼc maʼ tu químil humpuliʼ, beyxann mixbaʼal tiʼ le heʼeloʼ tulácaleʼ chén humpʼél kin tiʼ Hahal Dioseʼ, chén tiʼ maʼcoʼob xocaʼan le kinoʼ.

9 Le betiʼqueʼ le maʼcoʼobo, dzaʼan humpʼél kin utiaʼal u caʼa cuxtaloʼob tiʼ ichil le quiʼmenoʼoboʼ, yan xan dzeʼedzec kin chúmuc le químil yétel le caʼa cuxtaloʼ. Tu yoʼolal le baʼax cu úchul tiʼ maʼcoʼob tiʼ le dzeʼedzec kinoʼobaʼ leloʼ le tiʼn kátah in woheʼl tiʼ Hahal Dios, le heʼelaʼ le baʼax in woheʼlaʼ.

10 Le quen kuchuc u kinil u líkiʼl tulácal maʼqueʼ, bín tún u yiloʼobeʼ Hahal Dios yoheʼl tulácal le kinoʼob dzaʼabaʼan maʼc.

11 Behlaʼ túneʼ tiʼbix anil pixan ichil le químil yétel le caʼa cuxtaloʼ; heʼel túnaʼ huntúl angel dzoʼoc u dzáic in wohélteʼ u pixanoʼob tulácal maʼc, le quen dzoʼococ u pátiʼc le wínclil cu químilaʼ, beyoʼ u pixanoʼob tulácal maʼc, uts yétel kaseʼ, cu bisaʼaloʼob tuʼux cahlahoʼob úchi, tiʼ le Dios h dza cuxtal tiʼoʼob.

12 Bín tún úchuqueʼ u pixanoʼob le uts maʼcoʼob bín kaʼamicoʼob tiʼ humpʼél quiʼmaʼc ólal, u kabaʼeʼ u cúchil sásil, humpʼél heʼeleʼl, humpʼél paz, tuʼux láh cun heʼeleʼl tiʼ tulácal u mukyahiloʼob yétel maʼ tu yahtal u yól tiʼ mixbaʼal.

13 Bin úchuc túneʼ le u pixan le kakas maʼcoʼoboʼ, beyoʼ minaʼan mix humpʼit u pixan Yumtsil; tumen beyoʼ tu yéyahoʼob kakas baʼaloʼob utiaʼal u betoʼob, maʼ tu betoʼob le utsoʼ; le betiʼc xaneʼ u pixan u kasiʼl baʼal h oc ichiloʼob, yétel tu betuba yumil u nahiloʼoboʼ, tiʼ le nahiloʼob letiʼoʼoboʼ leloʼobaʼ bin púlucoʼob ich eʼhochʼeʼenil tácab, teʼeloʼ yan u yantal okol, cu yah yáwátoʼob yétel hach cu quiʼ quiʼlcoʼohoʼob lelaʼ chén tu yoʼolal u kebanoʼob tumen h bisaʼaboʼob lelaʼ chén tu yoʼolal u kebanoʼob tumen h bisaʼaboʼob kalbiloʼob tumen u yólah quiʼsin.

14 Lelaʼbix aniloʼob u pixanil le kakas maʼcoʼoboʼ, bey eʼhochʼeʼenil yétel tiʼ humpʼél yahil páhtalil táh nohoch sahquiʼl tán u yilicoʼob tiaʼal u kuxil Hahal Dios tʼaʼabaʼan yan u lúbul yókoloʼob, bey pʼataloʼobaʼ, bey heʼebix le utsil maʼcoʼoboʼ yaniʼloʼob teʼ tu cúchil sásil tac tu kinil caʼa cuxtal.

15 Beʼoraʼ yan dzeʼedzec maʼcoʼobeʼ dzocaʼan u naʼatiʼcoʼobeʼ bey anil le quiʼmaʼc ólal yétel le yah ólalaʼ pixan antes le caʼa cuxtal, letiʼeʼ humpʼél yáx caʼa cuxtal. Bey, mín kabaʼintaal humpʼél caʼa cuxtaloʼ, u líkiʼl le pixanoʼ yétel u dzaʼabal tiʼ quiʼmaʼc ólal wá yah ólal, heʼebix le tʼanoʼob dzococ u yaʼalaloʼ.

16 Heʼel túnaʼ dzoʼocaʼan u yaʼalaleʼ yan u humpʼél yáx caʼa cuxtal, humpʼél u caʼa cuxal le haytúl maʼcoʼob dzoʼoc u yantaloʼobeʼ yanoʼob beʼora wá bín anacoʼobeʼ hasta u caʼa cuxtal Cristo ichil le quiʼmenoʼoboʼ.

17 Baʼaleʼ maʼ tán c tucliqueʼ letiʼ yáx caʼa cuxtaliʼl dzoʼoc u yaʼalaʼal beya; maʼ caa cuxtaliʼl le maʼc yétel u kuʼubuloʼob tiʼ le quiʼmaʼc ólal wá tiʼ le yayah ólal. Maʼ a tuclic wá letiʼ le u kát yaʼalaʼ.

18 Heʼel túnaʼ quiʼn wáʼalic techeʼ maʼ, baʼaleʼ u kát yaʼaleʼ u caʼa ocol le pixan teʼ ichil le wínclil le maʼxoʼob anchahoʼob tiʼ u kinil Adaneʼ tac úchic u caʼa cuxtal Cristo.

19 Baʼaleʼ wá bín caʼa ococ tu caʼatén humpuliʼ u pixan yétel u wínclil le maʼxoʼob dzoʼoc u yaʼalaʼaleʼ, le kakas maʼcoʼoboʼ heʼebix xan le utsil maʼcoʼoboʼ maʼ tán in wáʼalic chén baʼax quen in wáʼaleʼ tulácaloʼob heʼ líkiʼloʼobeʼ; wá tiʼ ulak tʼaneʼ u caʼa cuxtaloʼobeʼ bin úchuc antes u ca caʼa cuxlacoʼob le maʼxoʼob cu químil cu dzoʼocol u caʼa cuxtaliʼl Cristo.

20 Maʼ tán in wáʼaliqueʼ, in pal, u caʼa cuxtaloʼobeʼ yan u yúchul tu kinil u caʼa cuxtaliʼl Cristo, baʼaxeʼ chén tán wáʼalic bey in wol, u pixan yétel u wínclil le uts maʼcoʼob bín caʼa ococ tu kinil u caʼa cuxtal Cristo yétel u naʼakal tu caʼanoʼ.

21 Lelaʼ wá bín úchuc tu kinil u caʼa cuxtal wá cu dzoʼocoleʼ maʼ ten aʼaliquiʼ, baʼaleʼ quiʼn wáʼalique, yan dzeʼedzec kin chúmuc ichil le químil yétel le caʼa cuxtal le wíncliloʼ, yétel u dzaʼabal tiʼ maʼc u quiʼmaʼc olal wá yayah ólal hasta le kinil dzaʼanoʼ tumen Dios tu yoʼolal u líkiʼl le quiʼmenoʼoboʼ ca caʼa múchʼquiʼntaacoʼob le pixanoʼ yétel le wíncliloʼ yétel ca bisaʼacoʼob xan tu tánil Hahal Dios utiaʼal ca juzgartaacoʼob heʼebix baʼax meyahnicoʼobeʼ.

22 Beyoʼ lelaʼ letiʼ bey bín úchuc u caʼa dzaʼabal tu cúchil tiʼ le baʼaloʼob aʼalaʼan tumen le profetaoʼoboʼ.

23 Le pixanoʼ yan cu caʼa ocol teʼ le wíncliloʼ yétel le wíncliloʼ tiʼ le pixanoʼ, heʼeleʼ tulácal heʼheʼlásil yétel xichoʼobeʼ caʼa dzaʼacacoʼ tiʼ u wínclil, beyoʼ, mix humpʼél u tsoʼotsel pol bín saʼatac wá yan u yutsquiʼntaal hach tu bel anil.

24 Leloʼ in pal letiʼ le caʼa dzaʼabal u yaʼalaʼal tumen le profetaoʼoboʼ.

25 Bey tunoʼ le uts maʼcoʼoboʼ bín lémbalnacoʼob tu reinoil Hahal Dios.

26 Chén baʼaleʼ, heʼel túnaʼ humpʼél nohoch yayah químil bin talac yókol le kákas maʼcoʼoboʼ, tumen cu químiloʼob heʼebix anicoʼob le maʼalob baʼaloʼoboʼ; tumen suciotacoʼob yétel mixbaʼal sucio hu páhtal utiaʼalintiʼc u reinoil Hahal Dios; baʼaleʼ cu puʼululoʼob táncab yétel cu kuʼubuloʼob u hantiʼc u yichil cheʼ u náhaltmoʼob, leloʼ kas, yétel bín u yukoʼob u kákahil ukul.