1 Bey maʼalob beʼora, tiʼ u leyil Mosiah dzíbtaan, le maʼxoʼob cu bisicoʼob le leyoʼ wá le maʼxoʼob cu tʼaʼanaloʼoboʼ bey juezoʼobeʼ u deber u kamicoʼob u boʼoltaal segun u tiʼempo cu bisicoʼob teʼ meyah tán u betiʼcoʼob juicio.

2 Wah huntúl maʼc u pʼaxmaʼh ulʼak maʼqueʼ maʼ u kát u boʼot u pʼaxeʼ, cu bisaʼal tiʼ le juez cu tacaʼal u pol; letiʼeʼ cu betiʼc yétel u páhtalil cu túxtiʼc chʼaʼabil le maʼx yan u pʼaxoʼ tu tán letiʼ, utiaʼal ca juzgartaac heʼebix yaʼalic le leyoʼ yétel le baʼax u betmaʼhoʼ; bey túnoʼ le maʼx yan u pʼaxeʼ cu betaal u boʼotiʼc, wá maʼeʼ cu luʼsaʼal tiʼ tulácal baʼaxoʼob yan tiʼ wá cu puʼulul ichil le cahoʼ bey huntúl maʼc cu yoclic.

3 Le juezoʼ cu kamic u boʼolal heʼebix bucaʼah u tiʼempoil meyahnahiʼ, humpʼél senin oro bulkin, wá maʼeʼ humpʼél senum plata u tohol humpʼél senin oro, lelaʼ heʼebix u yaʼalic le ley dzoʼoc u dzaʼabaloʼ.

4 Lelaʼ u heʼheʼlásil u kabaʼ oro yétel le plata heʼebix bahux u toholeʼ, kabaʼ cu dzic caʼachiʼ le u palaloʼob Nefioʼ, tumen letiʼoʼobeʼ maʼatech u xocoʼob heʼebix u xoquiʼc le Judioʼob caʼachoʼ cuxaʼanoʼob teʼ Jerusalenoʼ, mix tu pʼisicoʼob igual yétel letiʼoʼob, baʼaleʼ tu kexahoʼob bix u xocoʼob yétel bix u pʼisoʼob, le bix u kátoʼobeʼ yétel heʼebix baʼax cu yúchul teʼ cahoʼ bey betaabic tac u tatatsiloʼobeʼ hasta u palaloʼob tac u kinil u reino u juezoʼoboʼ dzabaʼan tumen Mosiah.

5 Heʼ túnaʼ bix u xoc u takinoʼob: Humpʼél senin oro, humpʼél seon oro, humpʼél xum oro yétel humpʼél lina oro.

6 Humpʼél senum plata, humpʼél amnor plata, humpʼél Esrom plata yétel humpʼél ontiʼ plata.

7 Humpʼél senum plata u tohol humpʼél senin oro, le humpʼéloʼ wá le ulʼakoʼ cu toholtiʼc humpʼél baʼax yétel cu pʼisil cebada wá ulʼak heʼebaʼaxac ulak clase nekoʼobeʼ.

8 U tohol humpʼél seon oro u tohol caʼapʼél senin.

9 U tohol humpʼél xum oro u tohol caʼapʼél seon.

10 U tohol humpʼél lina oroeʼ cu láh toholtiʼc tulácaloʼoboʼ.

11 U tohol humpʼél amnor plata u tohol caʼapʼél senum.

12 Humpʼél Esrom plata u tohol canpʼél senum.

13 Humpʼél ontiʼ, cu láh toholtiʼc tulácaloʼoboʼ.

14 Lelaʼ u tohol caʼachiʼ u meheʼn takinoʼob:

15 Humpʼél xiblon, u tán chúmuc tiʼ u tohol humpʼél senum; bey túnoʼ humpʼél xiblon u tohol tan chúmuc u pʼisil cebada.

16 Humpʼél xiblum u chúmuc humpʼél xiblon;

17 Humpʼél leah u chúmuc humpʼél xiblum.

18 Lelaʼbey u xoquiʼc u takinoʼob.

19 Humpʼél Antiʼon oroeʼ, cu toholtiʼc óxpʼél xiblon.

20 Behlaeʼ maʼalob tún, u baʼax oʼolal letiʼoʼob chén u ayikaltal tumen cu boʼotaloʼob heʼebix u meyahoʼobeʼ; tu yoʼolaloʼ cu pʼúsic maʼcoʼob u múchʼubaoʼ yétel u heʼheʼlásil kasiʼl baʼaloʼ, utiaʼal ca anac tiʼoʼob yaʼabach meyah beyoʼ yétel yaʼabach takin tu yoʼolal le baʼateltʼanoʼob cu taasal tiʼoʼoboʼ, bey túnaʼ cu pʼúsic le cahoʼ yókol Alma yétel Amulec.

21 Letiʼeʼ cu yaʼalic Zeezrom hoʼopʼ u kátiʼc tiʼ Amulec, ca tu yaʼalah: Heʼel wá bin a núquiʼc ten dzedzec preguntas in mentiʼc tech? Zeezromeʼ cambalnahaʼan tiʼ u meyhuloʼob quiʼsin utiaʼal u yaʼachʼetiʼc le baʼax utseʼ; ca tu yaʼalah tiʼ Amulec: Heʼel wá bin a nuctiʼc ten le preguntas quiʼn in ment techaʼ?

22 Amulec tu yaʼalah tiʼeʼ: Heʼeleʼ, wá maʼ tu contra u Pixan Yumtsil yan tiʼ ten; tumen mixbaʼal bín in wáʼaleʼ wá cu bin tu contra u Pixan Yumtsil. Cah aʼalaʼab tiʼ tumen Zeezrom: Heʼel túnaʼ wá ca kamic seis ontiʼes plata; bín in dza tech wá ca wáʼalic minaʼan huntúl Dios.

23 Ca tu núcah Amulec: U pal quiʼsinech! Baʼaxtén a kát a pʼús ten? Maʼ a woheʼl wá letiʼeʼ le toh maʼcoʼoboʼ maʼ tu lúbuloʼob ich humpʼél trampa beyoʼ?

24 Ca tuclic wá minaʼan Dios? Quin wáʼalic tech maʼ bey a wóleʼ, a woheʼl tu hahil yan huntúl Dios, baʼaleʼ techeʼ maʼs a yabiltiʼc le takinoʼ que letiʼ.

25 Dzoʼoc a tusiquen tu tán Dios. Techeʼ ta wáʼalah ten: Heʼel túnaʼ, bín in dza tech seis ontiʼes yaʼab u toholoʼ, baʼaleʼ ta tuclah ta pucsiʼkal maʼ ta dzaic teniʼ chén ca dzíboltiʼqueʼ ca in wáʼal minaʼan le Hahal Dios cuxaʼanoʼ beyoʼ cu yantal tech u baʼax oʼolal utiaʼal a quínsiquen. Tu yoʼolal le nohoch kasoʼ bín a kam a boʼolil.

26 Zeezrom tu yaʼalah tiʼ: Ca wáʼalic tech yan huntúl u hahil Dios cuxaʼan?

27 Ca tu núcah Amulec: heʼeleʼ, yan huntúl u hahil Dios cuxaʼan.

28 Zeezrom ca tu kátah: Yan wá ulʼak huntúl Dios?

29 Letiʼeʼ ca tu núcah: Minaʼan.

30 Zeezrom ca tu yaʼalah tiʼ: Bix a wohéltiʼc le baʼaloʼobaʼ?

31 Ca tu núcah letiʼ: Huntúl angel eʼes ten.

32 Zeezrom ca tu caʼa kátah: Máx le bín talacoʼ? U Pal wá Dios?

33 Letiʼeʼ ca tu núcah: Letiʼ.

34 Zeezrom ulʼak huntén tu yaʼalah: Bín wá u salvart u cahal ich u kebanoʼob? Ca tu núcah Amulec tán u yaʼalic tiʼeʼ: Quin wáʼalic techeʼ maʼ, tumen maʼ tu páhtal yaʼalic maʼ hah u tʼanil.

35 Zeezrom túneʼ tu yaʼalah tiʼ le cahoʼ: Dza ta wóleʼex a kaʼahsiqueʼex le baʼaloʼobaʼ; letiʼeʼ dzoʼoc u yaʼalic minaʼan ulʼak Dios chén huntúl yaniʼ, quex tún beyoʼ dzoʼoc u yaʼaliqueʼ u Pal Dios bín talac, baʼaleʼ maʼ bín u salvart u cahal; bey yan tiʼ letiʼeʼ u páhtalil yókol Dios.

36 Amulec túmben tʼanahiʼ: Heʼel túnaʼ, techeʼ dzoʼoc a tus; techeʼ ta wáʼalaheʼ tʼanaheʼn bey yan ten páhtalil yókol Hahal Dios, tumen tiʼ wáʼalah maʼ bín u salvart tu cahal ich u kebanoʼob.

37 Quin ca aʼalic tech maʼ tu páhtal u salvartiʼqueʼex ich a kebaneʼex; teneʼ maʼ tu páhtal in wáʼalic maʼ hah u tʼanil, tumen letiʼeʼ tu yaʼalah mixbaʼal tuʼhaʼan cu páhtal u yocol tu reinoil teʼ caʼanoʼ; tu yoʼolal leloʼ, bix cun páhtal u salvartiʼqueʼex wá maʼ tu dzic teʼex u cúchil tu reinoil teʼ caʼanoʼoboʼ? Bey túnaʼ maʼ tu páhtal u salvartiʼqueʼex ichil a kebaneʼex.

38 Zeezrom ca tu caʼa aʼalah tiʼ: Le u Pal Diosoʼ letiʼ wá hach u hahil le Tata Minaʼan u Xuloʼ?

39 Amulec ca tu yaʼalah tiʼ: Bey, letiʼ le Tata Minaʼan u Xuloʼ yókol caʼan, luʼum yétel tulácal baʼaxoʼob yanoʼ, letiʼ le yáx anhi, letiʼ le dzoʼoc, letiʼ le yáx, letiʼ le xuliloʼ.

40 Bín talac yókolcab utiaʼal u salvartiʼc u cahal; cu chʼaʼic tu yókol letiʼ tulácal u keban le maʼxoʼob cu creertiʼcoʼob tiʼ u kabaʼeʼ, tiʼ letiʼoʼobaʼ yan u yantal cuxtal minaʼan u xul, mixmaʼc maʼs cun kamic salvacion.

41 Tu yoʼolal lelaʼ, le kasaʼanoʼob cu pátaloʼob bey maʼ anchah salvacion haʼali wá ca wáchʼac u kaxiloʼob tiʼeʼ químiloʼ; tumen heʼel túnaʼ, cu tal u kinil tulácal cun líkiʼloʼob ichil le quiʼmenoʼoboʼ ca xiʼicoʼob tu tánil Dios utiaʼal ca boʼotaac heʼebix meyahnahiʼcoʼobeʼ.

42 Yan humpʼél químil cu yaʼalaʼal u kabaʼeʼ u químil le wíncliloʼ; u químil Cristoeʼ letiʼ cun wáchʼic u kaxil le u químil le wínclilaʼ, tulácal maʼc bín líkiʼc ichil le quiʼmenoʼoboʼ.

43 Le pixan yétel le wíncliloʼ bin caʼa múchʼquiʼntaac tu caʼatén, yétel tulácal baʼax yan tiʼeʼ, u xicheloʼob u pʼiʼiquel u baqueloʼob yan u caʼa sútuloʼob heʼebix anicoʼon behlaʼaʼ, beyoʼ c bin bisbil tu tán Diosoʼ, yan c kahóltiʼc baʼal heʼebix c kahóltiʼc beʼora, yétel yan u yantal toʼon humpʼél naʼat cuxaʼan tiʼ tulácal c keban.

44 Letiʼeʼ cu caʼa dzaʼabal tu cúchil bín talac tulácal maʼcoʼob. Heʼebix nuxíb wá tanquelenoʼ, esclavo wá hálkaboʼ, xíboʼob wá coʼoleloʼob, kasaʼanoʼob wá utsoʼob, maʼ tún saʼatal mix humpʼél u tsoʼotsel u pol u caʼa sútul hach heʼebix caʼacheʼ, teʼ tu wíncliloʼ heʼebix a wilic anic beʼora; bey cun bisbiloʼob tu tánil u juicio Cristo u Pal Hahal Dios Tata yétel le Pixan cu túxtiʼc Diosoʼ, letiʼoʼob huntúliliʼ Dios minaʼan u xul utiaʼal ca juzgartaacoʼob heʼex úch u meyahoʼoboʼ wá utsoʼob wá kasoʼob.

45 Heʼel túnaʼ, dzoʼoc in wáʼalic tech baʼax le químiloʼ, u químil le wíncliloʼ wáy luʼumeʼ beyxanneʼ caʼa cuxtaliʼl wínclil wáy yókol luʼumeʼ. Quin wáʼalic tech letiʼeʼ wínclil químil, bin líkiʼc yétel humpʼél wínclil mix bikin bín químic tu caʼatén, u kát yaʼaleʼ tiʼ le químil heʼeleʼ, tiʼ le yáx químiloʼ tac tiʼ cuxtal, maʼ tu páhtal u caʼa químil u pixaneʼ cu yocol ich u wínclil tu caʼatén utiaʼal mix bikin cu hókol tu caʼatén, le humpʼélilaʼ pixan yétel wínclil maʼ tu químiliʼ yoʼolal maʼ u sut keban.

46 Le cah dzoʼoc u yaʼalic Amulec le tʼanoʼob heʼelaʼ, le cahoʼ hoʼopʼ u kákal yóloʼob tu caʼatén, Zeezrom hoʼopʼ xan u quiʼquiʼanquiʼl. Bey dzoʼoquiʼc u tʼanoʼob Amulec, lelaʼ letiʼeʼ tulácal baʼax tiʼn dzíbtahoʼ.