U Libroil Helaman

1 Cah tún úcheʼ tiʼ u haʼabil ochéntiʼseis lailiʼ yan u palal Nefi tu kebanoʼob, bey, tiʼ hach nohoch kasaʼanil, caʼaliquiʼleʼ u palal Lamaneʼ tán u dzicubaoʼob yétel tulácal u yóloʼob u betoʼob le baʼaxoʼob u yaʼalmaʼh Diosoʼ, heʼebix u yaʼalic u ley Moiseseʼ.

2 Cah tún úcheʼ tiʼ le haʼabaʼ h kuch tu cahil Zaraheʼmla huntúl maʼc u kabaʼeʼ Samuel, letiʼeʼ huntúl lamaʼnita h cáh u caʼans teʼ cahoʼ. Letiʼ tu caʼansah tiʼ yaʼabach kinoʼob ca u pʼatoʼob u kebanoʼobeʼ, cah hóksaʼabiʼ, yétel hach ólac sunac tu cahal.

3 Baʼaleʼ heʼel túnaʼ h tʼaʼan tumen Yumtsileʼ cah aʼalaʼab tiʼ ca sunac u yaʼal le baʼax bín úchuc teʼ cahoʼ heʼebix le baʼaxoʼob cu síhil tu tuculeʼ.

4 Cah anchah u yúchul túneʼ maʼ h chaʼab u yocol teʼ nohoch cahoʼ; le oʼolaleʼ cah bineʼ cah naʼac yókol u pakil u baʼpach le nohoch cahoʼ, tu tiʼchah u kabeʼ cah kaʼam tʼanahiʼ, ca tu yaʼalah le baʼax bín úchuc teʼ cahoʼ heʼebix le baʼax cu dzaʼabal tu tucul tumen Yumtsileʼ.

5 Ca tu yaʼalah tiʼoʼobeʼ: Teneʼ, Samuelen, huntúlen u palal Laman, tán in wáʼalic u tʼan Yumtsil cu dzaic tiʼn tucul; Letiʼeʼ dzoʼoc u dzaic tiʼn tucul ca in wáʼal teʼexeʼ le baʼax tohoʼ séb bín boʼotaaqueʼex heʼebix a meyaheʼex a cuxtaleʼexeʼ; yételeʼ maʼ bín maʼnac cuatrocientos haʼaboʼob maʼ u yúchul teʼexeʼ.

6 Bey, tán u paʼtaal a hach tá xuʼululeʼex, hach tu hahileʼ yan u tal ta wókoleʼex, yétel mixbaʼal cu páhtal u yántiʼqueʼex maʼ a xuʼululeʼex chén wá ca pʼatiʼqueʼex a kebaneʼex yétel a creertiʼqueʼex tiʼ Yumtsil Jesucristo, hach tu hahil yan u tal yókolcab yétel yaʼab yah cu yuʼubic yétel yan u químil tu yoʼolal u cahal.

7 Heʼelaʼ, huntúl u angel Yumtsil h aʼal ten yétel tu dzah ten maʼalob tʼanoʼob tiʼn wíl. Heʼelaʼ h túxtaaben xan utiaʼal in wáʼalic teʼex tu yoʼolal a kamiqueʼex maʼalob tʼanoʼob xan baʼaleʼ maʼ ta wóltaheʼex a kamiqueneʼexeʼ.

8 Le betiʼc túneʼ, bey cu yaʼalic Yumtsilaʼ: Tu yoʼolal hach chich a tuculeʼex u palaleʼex Nefieʼ wá maʼ ta pʼatiʼqueʼex a kebaneʼexeʼ bín in hóks in tʼan teʼ ichileʼexeʼ yétel bín in luʼs in pixan tiʼ teʼexeʼ, maʼ tiʼn paʼtiʼqueʼex maʼsiʼ, bín in sut u kuxil a sucuʼuneʼex ta contraeʼex.

9 Maʼ bín maʼnac cuatrocientos haʼaboʼob maʼ in betiʼc a xuʼululeʼexeʼ; bey, bín xiʼiquen ichileʼex yétel baʼatel yétel wiʼih yétel yah ólal.

10 Bey, bín in xímbateʼex yétel in nohoch kuxil, yétel bín anac ichil u palal a wáʼabileʼex maʼx bín cuxlacoʼob, ichil a enemigoeʼex, ca u yiloʼob a xuʼululeʼexeʼ; lelaʼ hach tu hahil yan u yúchul wá maʼ ta pʼatiʼqueʼex a kebaneʼexeʼ, bey cu yaʼalic Yumtsileʼ; le tún u palal u wáʼabiloʼob a sucuʼunoʼob bín u xuʼulseʼex.

11 Baʼaleʼ wá ca pʼatiʼqueʼex a kebaneʼex yétel ca sutuqueʼex tiʼ Hahal Dioseʼ heʼ in dzaic tu tsel in chʼaʼic kuxileʼ, cu yaʼalic Yumtsileʼ; bey cu yaʼalic Yumtsiloʼ, bín bendecirtaaqueʼex wá ca pʼatiʼqueʼex a kebaneʼex yétel ca sutuqueʼex tiʼ Teneʼ; baʼaleʼ óstiʼleʼex wá maʼ tán a pʼatiʼqueʼex a kebaneʼex.

12 Heʼelaʼ, ótsil le u nohoch cahil Zaraheʼmla tumen heʼel túnaʼ tu yoʼolal le toh u cuxtaloʼoboʼ maʼ tu xuʼulul, ótsil le nohoch cahaʼ tumen quiʼn wiliqueʼ cu yaʼalic Yumtsileʼ, yan yaʼab, bey u maʼs yaʼabil tiʼ le maʼxoʼob teʼ cahaʼ bín chichchahac u yóloʼob tiʼn contra, cu yaʼalic Yumtsil.

13 Baʼaleʼ hach bín bendecirtaac le maʼx cu pʼatiʼc u kebanoʼob, tumen maʼ tu xuʼululiʼ. Heʼelaʼ wá maʼ tu yoʼolal le toh u cuxtaloʼob teʼ cahaʼ quiʼn betiʼc u yémel kák teʼ caʼan ca lah xuʼulsaʼac le cahaʼ.

14 Heʼelaʼ tu yoʼolal u tohil cuxtaloʼobeʼ maʼ tu xuʼululiʼ. Baʼaleʼ heʼel túnaʼ cu yaʼalic Dioseʼ, tán u nadztal le kin le quen a hókseʼex le toh u cuxtaloʼob ichileʼexoʼ ca pʼátaaleʼex utiaʼal a xuʼululeʼex; beyoʼ ótsil le nohoch cahaʼ tu yoʼolal le kasaʼan maʼcoʼob yétel le u kebanoʼob yan tiʼoʼoboʼ.

15 Beyoʼ, ótsil xan le le nohoch cah Gideon, tu yoʼolal le u kebanoʼob yan tiʼoʼ.

16 Bey xan ótsiloʼob le cahoʼob yan tu baʼpachoʼob tuʼux yan u palal Nefi tu yoʼolal le u kebanoʼob yétel le baʼax kasaʼan cu betiʼcoʼoboʼ.

17 Uuyeʼexeʼ, bín kaschahac le luʼum wáyaʼ, cu yaʼalic u Yumtsil le cu baʼateloʼoboʼ, tu yoʼolal le maʼcoʼob cahaʼanoʼob teʼ luʼumaʼ; bey, tu yoʼolal u kebanoʼob yétel le kakas baʼaloʼob cu betiʼcoʼoboʼ.

18 Bín úchuc xan, cu yaʼalic u Yumtsil le cu baʼateloʼoboʼ, bey, c nohoch yétel c hahil Dios, tulácal le maʼxoʼob quen u taacoʼob u ayikaliloʼob ich luʼumeʼ, maʼ bín u caxt tu caʼaténiʼ, tu yoʼolal u tʼan Hahal Dios yókol le luʼumaʼ, chén maʼ tu yúchul wá toh u cuxtal le maʼx cun u taacoʼ yétel ca u bet tumen bey cu yóltiʼc Dios.

19 Tumen Teneʼ, cu yaʼalic Dioseʼ, in kát ca a taaqueʼex a ayikalileʼex tiʼn woʼolaleʼ; bín kaschahac u cuxtal le maʼxoʼob maʼ tu taaquiʼcoʼob u ayikaliloʼob tiʼn woʼolaleʼ, tumen mixmaʼc cu taaquiʼc u ayikalil tiʼn woʼolal wá maʼ chén le toh u cuxtaloʼoboʼ; yétel le maʼ tán u taaquiʼc u ayikalil tiʼn woʼolaleʼ, bín kaschahac u cuxtal yétel xan le ayikaliloʼ; yétel mixmaʼc bín u caxteʼ tu yoʼolal u kastal le luʼumaʼ.

20 Bín kúchuc u kinil u taaquiʼcoʼob u ayikaliloʼob, tumen dzoʼoc u dzaic u pucsiʼkaloʼob tiʼ le ayikaliloʼoboʼ; yétel tumen u dzamaʼhoʼob u pucsiʼkaloʼob tiʼ le ayikaliloʼoboʼ, bín in taac le quen púdzucoʼob tumen u enemigoʼobeʼ yétel tumen maʼ tu taacahoʼob tiʼn woʼolaleʼ, bín kaschahac u cuxtaloʼob letiʼoʼob yétel xan u ayikaliloʼob; tiʼ le kin heʼeloʼ bín xuʼulucoʼob, cu yaʼalic Yumtsil.

21 Uuyeʼexeʼ, teʼexeʼ u maʼquiʼleʼex le nohoch cahaʼ, uʼuyeʼex baʼax quen in wáʼaleʼex in tʼanoʼob; bey, uʼuyeʼex le tʼan cu yaʼalic Yumtsiloʼ; tu yoʼolal Letiʼeʼ dzoʼoc u yaʼaliqueʼ ca kastaleʼex tu yoʼolal a ayikalileʼex, le xan a ayikalileʼexoʼ cu kastal xan tumen dzoʼoc a dzaic a pucsiʼkaleʼex tiʼ letiʼoʼob yétel maʼ ta wuʼuyiqueʼex u tʼanoʼob le maʼx tu dzah teʼexoʼ.

22 Maʼ kaʼahac teʼex le Yumtsil a Hahal Dioseʼex tiʼ le baʼaloʼob úchic u dzaic teʼexoʼ, lailiʼeʼ tán a tucliqueʼex tiʼ a ayikalileʼex, maʼ tu yoʼolal a dzaic diosboʼotiʼc tiʼ Yumtsil a Hahal Dioseʼex tu yoʼolal le heʼeloʼoboʼ, bey, teʼexeʼ maʼ tán a dzaic a pucsiʼkaleʼex tiʼ Yumtsileʼ, hach ca tucliqueʼex minaʼan mixmaʼc heʼebix teʼexeʼ, tac ca wáʼaliqueʼexeʼ hach sén maʼalobeʼex, ca dzíboltiʼc u baʼaxiʼloʼob ulak maʼc, tán a baʼateleʼex, tán a betiʼqueʼex kas, ca chʼaʼapachtiʼcabaeʼex ichileʼex, ca quínsic maʼc, yétel ca betiʼqueʼex u heʼheʼlasil kebanoʼob.

23 Tu yoʼolal lelaʼ Yumtsil Hahal Dioseʼ dzoʼoc u kascuntiʼc le luʼumaʼ yétel a ayikalileʼex, lelaʼ tu yoʼolal a kebaneʼex.

24 Bey, ótsil le cahaʼ, tumen dzoʼoc u kuchul u kinil tuʼux maʼ tán a kamiqueʼex le profetaoʼoboʼ, yétel ca puliqueʼexoʼob, yétel ca chʼiniqueʼexoʼob, yétel ca quínsiqueʼexoʼob, yétel ca betiʼqueʼex tulácal u heʼheʼlásil kebanoʼob tiʼ letiʼoʼob heʼebix u betiʼcoʼob le úchben maʼcoʼoboʼ.

25 Behlaeʼ, le quen tʼanaqueʼexeʼ, ca wáʼaliqueʼex; wá ca yanacoʼon caʼach tu kiniloʼob c tataoʼobeʼ maʼ tán c quínsic le profetaoʼoboʼ, maʼ tán caʼach c chʼinicoʼob mix c pulicoʼobiʼ.

26 Uuyeʼexeʼ, maʼs kasaʼaneʼex tiʼ letiʼoʼob; tumen bey cuxaʼan Yumtsileʼ, wá cu tal huntúl profeta ichileʼex cu yaʼalic teʼex u tʼan Yumtsil, cu yaʼalic a kebaneʼex yétel le kas baʼaloʼob ca betiʼqueʼexoʼ, ca pʼuʼuhuleʼex tiʼ letiʼ yétel ca puliqueʼex táncab yétel a káteʼex a quínsiqueʼex tiʼ tulácal bixiʼl cu páhtaleʼ; bey, ca wáʼaliqueʼexeʼ maʼ hah profetaiʼ, chén huntúl maʼc yaʼab u kebanoʼob, tútaan tumen kasiʼl baʼal, tumen tán u yaʼalic teʼexeʼ kastac baʼax ca mentiʼqueʼex.

27 Baʼaleʼ ca wiliqueʼex, wá ca tac huntúl maʼc ta wicnaleʼex ca u yaʼal teʼexeʼ; beteʼex lelaʼ, minaʼan kas, menteʼex leloʼ, maʼ bín a wuʼuyeʼex yahiʼ, bey, wá ca u yaʼal teʼexeʼ; xímbalneneʼex tiʼ le baʼax cu betiʼc a wuʼuyicabaeʼex hach maʼs maʼalobeʼex tiʼ ulak, yétel beteʼex heʼebaʼax cu dzíboltiʼc a pucsiʼkaleʼexeʼ wá huntúl maʼc cu tal ca u tʼaneʼex beyaʼ, bín a kameʼex yétel bín a wáʼaleʼexeʼ hach tu hahil profeta.

28 Bey, bín a liʼseʼex yétel bín a boʼoteʼex yétel le baʼax yan teʼexoʼ, bín a dzaeʼex a oroeʼex yétel a plataeʼex tiʼ, bín a búquiʼnteʼex yétel hach coʼocoʼoh nokoʼob, yétel tumen cu yaʼalic teʼex hadzuts tʼanoʼob yétel cu yaʼalic teʼexeʼ tulácal baʼaxeʼ uts, bey maʼ ta wileʼex mixbaʼal kas tiʼ letiʼ.

29 Sén kasaʼaneʼex le maʼqueʼex cuxaʼaneʼex behlaʼeʼ; teʼexeʼ humpʼél cah hach chich a tuculeʼex, bucaʼah kin ca tucliqueʼex quen u águantareʼex Yumtsil? Bey, baʼax kin a xuliqueʼex a bisaʼaleʼex tumen maʼcoʼob maʼ toh u tuculoʼobiʼ yétel chʼopoʼob? Baʼax kin a xuliqueʼex a wóltiʼqueʼex a wántaleʼex ich eʼhochʼeʼenil ca anaqueʼex ich sásil?

30 Bey, uʼuyeʼexeʼ, dzoʼoc u tʼaʼabal u kuxil Yumtsil ta contraeʼex; beyoʼ, dzoʼoc u kascuntiʼc le luʼumaʼ yoʼolal a kebaneʼex.

31 Bey yanoʼ, tán u nádzal u kin u kascuntiʼc a ayikalileʼex, maʼ bín pátac a caʼa chʼaʼiqueʼex, maʼ bín pátac a taaqueʼexiʼ, bey tu kinil a wótsilileʼexeʼ maʼ bín pʼátac tiʼ teʼexiʼ.

32 Tu kinil a wótsilileʼexeʼ bín kaʼam tʼanaqueʼex tu tán Yumtsil; baʼaleʼ maʼ tu yutstal mixbaʼal yoʼolal a kaʼam tʼaneʼexiʼ, tumen dzoʼoc u tal tiʼ teʼex a xuʼululeʼex, a xuʼululeʼexeʼ hach heʼ u yúchuleʼ; bey túnoʼ bín ókolnaqueʼex yétel bín kaʼam tʼanaqueʼex, cu yaʼalic u Yumtsil le cu baʼateloʼoboʼ. Yan tún a wókoleʼex yétel quen a wáʼaleʼexeʼ;

33 Quexieʼ ca in pʼat in kebanoʼob caʼacheʼ, wá maʼ úchic in quínsic le profetaoʼoboʼ, wá maʼ úchic chʼinchʼinicoʼob mix in pulicoʼobeʼ! Bey, tiʼ le kinoʼoboʼ bín a wáʼaleʼex: Quexieʼ ca kaʼahaʼac toʼon caʼach Yumtsil c Hahal Dios tiʼ le kinoʼob ca tu dzah toʼon c ayikaliloʼoboʼ behlaʼ cu páhtal c caʼa chʼaʼiqueʼ maʼ tu saʼataal tiʼ toʼoniʼ, tumen beyoʼ, c ayikaliloʼobeʼ púdzoʼob tiʼ toʼon!

34 Beyoʼ c pʼatiʼc wáyeʼ u nuʼ ucul le meyahoʼ, sámaʼleʼ minaʼaniʼ; bey, cu toʼocol toʼon c maʼscaboʼob tiʼ le kin ca t caxtah utiaʼal le baʼateloʼ.

35 Bey, dzoʼoc c taquiʼc c ayikaliloʼobeʼ cah saʼatiʼ tu yoʼolal kasquiʼntaan le luʼumoʼ.

36 Quexieʼ ca c pʼat c kebanoʼob caʼach tiʼ le kin cah tal tiʼcnal u tʼan Yumtsiloʼ; tumen beyoʼ, dzoʼoc u kastal le luʼumaʼ, yételeʼ tulácal baʼaloʼobeʼ dzoʼoc u sutoʼob maʼ tu páhtal c caʼa chʼaʼic, maʼ tu páhtal c taaquiʼc tiʼcnal.

37 Beyoʼ, u baʼpachmaʼhoʼon quiʼsinoʼob; bey, bakaʼan c pach tumen u angel le maʼx u kát u xuʼulsic c pixanoʼoboʼ. Beyoʼ, nohochtac c kebanoʼob. Yumtsilecheʼ, maʼ tán u páhtal a luʼsic a kuxil t ókoliʼ? Bey bín tʼanaqueʼex tiʼ le kinoʼoboʼ.

38 Baʼaleʼ uʼuyeʼexeʼ, u kinil a weʼesic bix a bisic a cuxtaleʼ dzoʼoc u maʼn; dzoʼoc u xántal u kinil a wántaaleʼex tac hach xánchahiʼ, a xuʼulsaʼaleʼexeʼ hach yan u yúchul; bey, tumen ta dza a wóleʼex tulácal u kinil a cuxtaleʼex a chʼaʼiqueʼex le baʼax maʼ tu páhtal u yantal teʼexoʼ, dzoʼoc xan a caxtiʼc a quiʼ ólaleʼex tán a mentiʼqueʼex baʼaloʼob kastac, le heʼeloʼ maʼ bey u yaniʼl u toh cuxtal le c nohchil Pól minaʼan u xul.

39 Le maʼxoʼon cahaʼanoʼon teʼ luʼum wáyaʼ, quexiʼcʼ ca a wuʼuyeʼex in tʼanoʼobeʼ! Yételeʼ quiʼn kátiʼc ca náchchahac tiʼ teʼex u kuxil Yumtsil, yétel ca a pʼateʼex a kebaneʼex ca salvartaaqueʼex.