Capitulo 14
Samuel cu yaʼalic de que bín chícpahac nohoch sásil ich ákab yétel humpʼél túmben estrella le cah síhic Cristo. Cristoeʼcu salvartiʼc maʼc tiʼ u químil u wínclil yétel u pixan. Tu kinil u químileʼ letiʼ bín eʼesaʼac tiʼ oxpʼél kin eʼhochʼeʼentac yétel cu haátsal tunichoʼob cu pécsuba le luʼumoʼ.
1 Ca tún anchah u yúchuleʼ, Samuel huntúl u palal Lamaneʼ, yaʼab ulak baʼaloʼob tu yaʼalah cun yúchul maʼ tu páhtal u dzíbtaaliʼ.
2 Ca tu yaʼalah tiʼoʼob: Heʼel túnaʼ quiʼn dzáic teʼex humpʼél baʼal cun yúchul tumen yan u maʼn ulak cinco haʼaboʼob, heʼel túnaʼ, bín talac u Pal Hahal Dios utiaʼal u liʼsic tulácal le maʼxoʼob bín u creertoʼob u kabaʼeʼ.
3 Heʼel túnaʼ lelaʼ letiʼ le baʼax bín in dza teʼex eʼesbil humpʼél baʼax tu kinil u talbal; tumen heʼel túnaʼ, bín chicpahac nucuch sásiloʼob teʼ caʼanoʼ, le betiʼqueʼ maʼ bín yanac eʼhochʼeʼenil tiʼ u yákabil le quen tacoʼ, maʼcoʼobeʼ bey quen u yililoʼob yétel kineʼ.
4 Le betiʼqueʼ, bín yanac humpʼél kin, humpʼél ákab yétel ulʼak humpʼél kin, bin humpʼéliliʼ kin minaʼan ákabeʼ; lelaʼ letiʼ le baʼax bín eʼesaʼac teʼex; tumen bín a wileʼex u túbul yétel u hókol kin; beyoʼ quen a wohélteʼexeʼ hach tu hahil yan u yantal caʼapʼél kin yétel humpʼél ákab; chén baʼaleʼ, maʼ bín anac eʼhochʼeʼenil tiʼ le ákaboʼ, leloʼ u yákabil antes síhiqueʼ.
5 Heʼel túnaʼ bín chicpahac humpʼél túmben estrella mix bikin a wileʼex; lelaʼ, lailiʼ humpʼél baʼax bín eʼesaʼac teʼexeʼ.
6 Heʼel túnaʼ, lelaʼ maʼ láhiʼ tumen yan u yilaʼal yaʼabach baʼaloʼob cu haʼaksic yól maʼc caʼanoʼ.
7 Yan u yúchul bín haʼakac a wóleʼex yan a tucul teʼex, tu yoʼolal beyiloʼ ca lúbuleʼex luʼum.
8 Cun yantal u yúchuleʼ le maʼx cun creertiʼc u Pal Hahal Dioseʼ, bín u náhalt cuxtal minaʼan u xul.
9 Heʼel túnaʼ, dzoʼoc túxtiʼquen Yumtsil, yoʼolal u angeleʼ, ca talaquen in wáʼal teʼex le baʼaloʼobaʼ; beyoʼ dzoʼoc u yaʼalic ten ca in wáʼal teʼexeʼ bín úchuc le baʼaloʼobaʼ; beyoʼ dzoʼoc u yaʼalic teneʼ; kaʼam aʼal tiʼ le cahaʼ; kex a wól tiʼ le baʼax a betiʼqueʼex yétel mentiʼqueʼex listo u bel Yumtsil.
10 Heʼel xaneʼ huntúl u palal Lamanen, tumen dzoʼoc in wáʼalic teʼex baʼax tu yaʼalah ten Yumtsileʼ, yétel tumen hach istiʼcyah atiaʼaleʼexeʼ, ca pʼuʼuhuleʼex tiʼ ten, ca wóltiʼc a quínseneʼex yétel dzoʼoc a hóksiqueneʼex ichileʼex.
11 Baʼaleʼ yaneʼ a wuʼuyiqueʼex in tʼaneʼ tu yoʼolaleʼ h naʼaquen teʼ yókol le u pakiloʼob le cahaʼ, tu yoʼolal a wuʼuyiqueʼex yétel a wohéltiʼqueʼex u juicio Hahal Dios paʼtiʼqueʼex yólal a kebaneʼexoʼ yétel yoʼolal xan a wohéltiʼqueʼex bix a kexic a wóleʼex.
12 Tu yoʼolal xan ca a wohélteʼex u tal Jesucristo, u Pal Hahal Dios, u Tata caʼanoʼob yétel luʼum, letiʼ ment tulácal baʼaloʼob ca cáhiʼ yétel tu yoʼolal a wohéltiʼqueʼex u le baʼaloʼob cu yeʼesic u talbal, tu yoʼolal u páhtal a creertiʼqueʼex u kabaʼ.
13 Wá ca creertiʼqueʼex tu kabaʼeʼ, yan a kexic a wóleʼex le baʼax ca betiʼqueʼex a tuculeʼex yoʼolal tulácal a kebaneʼexoʼob, tu yoʼolal le beyaʼ ca anac u boʼotaal tu yoʼolal le baʼaxoʼob utstac u mentmaʼhoʼ.
14 Heʼel túnaʼ, bín in caʼah in dza teʼex ulak humpʼél baʼaxeʼ, beyoʼ, humpʼél baʼax bín eʼesaʼac teʼex tu yoʼolal u químil.
15 Heʼel túnaʼ, hach tu hahil yan u químil tu yoʼolal u tal le salvacionoʼ, ca anac le caʼa cuxtaloʼ; bixmaʼiʼ, hach kabét ca químic tu yoʼolal u betiʼc u caʼa cuxtal le quiʼmenoʼoboʼ, tu yoʼolal le heʼelaʼ ca páhchahac u sut maʼcoʼob tu tánil Yumtsil.
16 Heʼel túnaʼ le químilaʼ cu tasic le caʼa cuxtaloʼ yétel cu salvartiʼc tulácal maʼc tiʼ le yáx químiloʼ, leloʼ letiʼ le u químil le pixanoʼ; tumen tiʼ náchchahoʼob tu tán Yumtsil, tu yoʼolal lúbiʼc Adaneʼ, tulácal maʼcoʼobe cu yilaʼaloʼob bey quiʼmenoʼobeʼ, heʼebix tiʼ baʼaloʼob tiʼ le wíncliloʼ beyxann le pixanoʼ.
17 Baʼaleʼ heʼel túnaʼ, u caʼa cuxtal Cristoeʼ cu salvartiʼc tulácal maʼc, bixmaʼiʼ, tulácal maʼcoʼob, yétel cu bisic tu caʼatén tu tán Yumtsil.
18 Beyoʼ, cu betiʼc ca pátac u kexic yól maʼc, le maʼx cun kex yóleʼ maʼ bín xuʼulsaʼaquiʼ yétel mix bín puʼuluc ichil le kákoʼ; baʼaleʼ le maʼx maʼ tán u kexic yóleʼ bin xoʼotʼoc yétel bín puʼuluc ichil le kákoʼ; tiʼ tún leloʼ cu tal ulak humpʼél químil yókoleʼ, leloʼ u químil u pixaneʼ, tumen náchchacoʼob tiʼ le baʼaxoʼob maʼaloboʼ.
19 Le betiʼqueʼ kex a wóleʼex, kex a wóleʼex, tumen maʼ xaneʼ tu yoʼolal a wohéltiʼqueʼex le baʼaloʼobaʼ baʼaleʼ maʼ tán a betiʼqueʼexeʼ, ca lúbuc kas ta wókoleʼex, yétel ca úchuc teʼex le ulak químilaʼ.
20 Baʼaleʼ dzoʼoc in wáʼalic teʼex ulak humpʼél baʼal eʼesbileʼ tu yoʼolal u químil, heʼel túnaʼ, le kin quen químicoʼ, yan u eʼhochʼeʼental kin, yétel maʼ bín yólt u dza teʼex u sásiliʼ, beyxann yétel le estrellaoʼoboʼ; maʼ bín yanac sásil tulácal yókol le luʼum ichil óxpʼél kinaʼ, cun cáhal le quen químicoʼ tac le quen caʼa cuxlac ichil le quiʼmenoʼoboʼ.
21 Tiʼ le hun sútuc quen u kub u pixanoʼ, yan u yanal u hadz chác yétel u lémbal chác ichil yaʼabcach horaoʼob, le luʼumaʼ yan u pécs yól yétel yan quílbal, le xan le nucuch tunichoʼob yan yókol le luʼumaʼ, heʼebix le yanoʼob yókoloʼ beyxann le yanoʼob yánaloʼ, behlaʼeʼ a woheʼleʼex hach dzuʼuytac, wá u maʼsileʼ hach chichtac, yan xeʼexeʼetʼaʼaloʼob.
22 Beyoʼ, yan u xeʼexeʼetʼaʼaloʼob tu tán chúmuc yételeʼ bey cun h pʼátaloʼob yétel paʼakahaʼan tunichoʼob yókol le luʼumoʼ, beyoʼ, heʼebix yókol le luʼumoʼ beyxann yanal.
23 Heʼel túnaʼ yan u yantal hach kaʼamcach chácoʼob; yétel yaʼabach caʼanal luʼumoʼobeʼ cun pʼátal tánxel, yaʼab cúchiloʼob behlaʼ cu kabaʼtiʼc tánxel luʼumeʼ, bín líkiʼc bey caʼanal luʼumoʼ.
24 Yan tún u hóksaʼal u xeʼexeʼetʼal behoʼob yétel yaʼabach cahoʼobeʼ yan u xuʼulsaʼal.
25 Yétel yan heʼeʼpahal yaʼabach mucnaloʼob yétel bín u kub yaʼab u quiʼmeniloʼob yétel yaʼabach maʼalob maʼcoʼobeʼ bín chicpahacoʼob tiʼ yaʼabach maʼcoʼob.
26 Heʼel túnaʼ lelaʼ letiʼ le baʼax tu yaʼalah ten le angeloʼ; tumen tu yaʼalah teneʼ yan u yantal u hadz chác yétel u lémbal chác ichil yaʼabach horaoʼob.
27 Ca tu yaʼalah teneʼ, caʼaliquiʼl tán le u hadz le chác yétel tán u lémbal le chácoʼ, yétel le chac ikaloʼ, cu yúchul le baʼaloʼobaʼ, le xan le eʼhochʼeʼeniloʼ ichil óxpʼél kin cun yantal yókol luʼum.
28 Ca yaʼalah ten le angeloʼ yaʼabach maʼcoʼob bín u yiloʼob baʼaloʼob maʼs nuctac tiʼ le heʼeloʼobaʼ, tu yoʼolal u creertiʼcoʼob le baʼal eʼesaʼan yan u yúchul tiʼ tulácal le luʼumaʼ, tu yoʼolal maʼ u yantal mixtuʼux u tal utiaʼal maʼ tu creertoʼob u palal maʼcoʼob.
29 Tu yoʼolal lel maʼxoʼob cun creertoʼobeʼ ca páhchac u salvartiʼcoʼob, tu yoʼolal xan le maʼxoʼob maʼ u kátoʼob u creertoʼobiʼ, ca anac u yémel humpʼél hach tadz juicio; wá xan cu dzaʼabal kas tiʼoʼobeʼ, cu tasic u hach kasiʼloʼob tu yókoloʼob.
30 Bey túnoʼ, kaʼahac teʼex, kaʼahac teʼex, in sucuʼuneʼex, le maʼx cun h químileʼ, cu químil chén tu yoʼolal letiʼ mismo, le maʼx xan cu betiʼc kebaneʼ, tu contra letiʼ mismo cu betiʼc, heʼel túnaʼ, libreeʼex; cu chaʼabal a betiʼqueʼex baʼaloʼob heʼex a káteʼex, tumen Hahal Dioseʼ u dzamaʼh teʼex a wohélteʼexeʼ yétel dzoʼoc u hálkabtiʼqueʼex.
31 Letiʼeʼ dzoʼoc u dzaic teʼex u páhtalil a kahóltiʼqueʼex baʼax maʼalob yétel baʼax kas yétel ca a yéyeʼex cuxtal wá químil; heʼel xan u páhtal a betiʼqueʼex le baʼal utsoʼ ca yanac a caʼa dzaʼabaleʼex tiʼ le baʼaloʼob utstacoʼ wá ca caʼa dzaʼabac teʼex le baʼal utsoʼ; wá xan ca a beteʼex le baʼaloʼob kastacoʼ ca a menteʼex u caʼa sut teʼex le baʼaloʼob kastacoʼ.