1 Kag natabo ini nga nagligad ang ika-treinta’y kwatro nga tuig, kag amo man ang ika-treinta’y singko, kag tan-awa ang mga disipulo ni Jesus nagtukod sing isa ka simbahan ni Cristo sa tanan nga kadutaan sa palibot. Kag ang tanan nga nagpalapit sa ila, kag matuod gid nga naghinulsol sang ila mga sala ginbunyagan sa ngalan ni Jesus; kag nagbaton man sila sang Balaan nga Espiritu.

2 Kag natabo ini sa ika-treinta’y sais nga tuig, ang katawhan nahaylo tanan sa Ginuo sa tanan nga ibabaw sang kadutaan, pareho nga mga Nefinhon kag mga Lamanhon, kag wala sing mga pag-ilinaway kag mga pagbinaisay sa tunga nila, kag ang tagsa ka tawo nakigbagay sing matarong sa isa kag isa.

3 Kag gintingob nila ang tanan nila nga pagkabutang agud gamiton sang tanan; gani wala sing manggaranon kag imol, ulipon kag hilway, kundi tanan sila ginhimo nga hilway, kag umalambit sang dulot nga langitnon.

4 Kag natabo ini nga nagligad man ang ika-treinta’y siyete nga tuig, kag nagpadayon gihapon nga may paghidaet sa kadutaan.

5 Kag may dalagko kag dalayawon nga mga buhat nga ginhikot ang mga disipulo ni Jesus, sa bagay nga ginpaayo nila ang mga masakiton, kag ginbuhi ang mga patay, kag ginpahanabo nga makalakat ang mga lupog, kag ang mga bulag nga makabaton sang ila panulok, kag ang mga bungol nga makabati; kag ang tanan nga sari sang mga milagro ginhimo nila sa mga anak sang katawhan; kag wala sila naghikot sang mga milagro luwas lang nga ini sa ngalan ni Jesus.

6 Kag nagligad ang ika-treinta’y otso nga tuig, kag amo man ang ika-treinta’y nuebe, kag ang ika-kwarenta’y uno, kag ang ika-kwarenta’y dos, huo, bisan tubtob sa kwarenta’y nuebe ka tuig ang nagligad, kag amo man ang ika-singkwenta’y uno, kag ang ika-singkwenta’y dos; huo, kag bisan tubtob sa singkwenta’y nuebe ka tuig ang nagligad.

7 Kag ang Ginuo nagpauswag sa ila sing tuman sa kadutaan; huo, sa bagay nga nagtukod sila liwat sang mga siyudad kon sa diin may mga siyudad sadto anay nga nagkalasunog.

8 Huo, bisan inang dako nga siyudad sang Zarahemla ginpahanabo nila nga matukod liwat.

9 Apang may madamo nga siyudad nga nalugdang, kag ang mga tubig nagsaka sa lugar sang mga ini; gani ining mga siyudad indi na mapanumbalik.

10 Kag karon, tan-awa, natabo ini nga ang katawhan ni Nefi nagbakod, kag nagdamo sing tuman kadasig, kag nangin tuman kaanyag kag makalilipay nga katawhan.

11 Kag nagpangasawa sila, kag ginpapamana, kag ginpakamaayo suno sa kadamuon sang mga promisa nga ginhimo sang Ginuo sa ila.

12 Kag wala na sila maggawi pa suno sa mga pagpanghikot kag mga ordinansa sang layi ni Moises; kundi naggawi sila suno sa mga kasugoan nga nabaton nila halin sa Ginuo nga ila Dios, nga nagapadayon sa pagpuasa kag pagpangamuyo, kag sa pagtipon nga magkaupod pirme sa pagpangamuyo kag sa pagpamati sang pulong sang Ginuo.

13 Kag natabo ini nga wala sing pagbinaisay sa tunga sang tanan nga katawhan sa bug-os nga kadutaan; kundi may dalagko nga mga milagro nga ginhikot sa mga disipulo ni Jesus.

14 Kag natabo ini nga nagligad ang ika-sitenta’y uno nga tuig, kag amo man ang ika-sitenta’y dos nga tuig, huo, sa malip-ot nga pulong, tubtob sa ika-sitenta’y nuebe nga tuig ang nagligad; huo, bisan isa ka gatos nga tuig ang nagligad, kag ang mga disipulo ni Jesus, nga iya ginpili, nagtaliwan na tanan pakadto sa paraiso sang Dios, luwas lang sang tatlo nga magapabilin; kag may iban pa nga mga disipulo nga gin-ordinan bulos sa ila; kag madamo man sa sina nga henerasyon ang nagtaliwan na.

15 Kag natabo ini nga wala sing pagbinaisay sa kadutaan tungod sang gugma sang Dios nga nagpuno sa mga tagipusuon sang katawhan.

16 Kag wala sing mga paghinisaay, ukon mga pag-ilinaway, ukon mga kagamo, ukon mga pagkamakihilawason, ukon mga pagbinutig, ukon mga pagpamatay, ukon bisan ano man nga sari sang imoralidad; kag pat-od gid nga wala na sing mas malipayon pa nga katawhan sa tanan nga katawhan nga gintuga sang kamot sang Dios.

17 Wala sing mga tulisan, ukon mga manugpatay-tawo, kag wala man sing mga Lamanhon, ukon ano nga sari sang mga “hon” ukon mga “non”; kundi nagakaisa sila, ang mga anak ni Cristo, kag mga manunubli sang ginharian sang Dios.

18 Kag daw ano kabulahan sa ila! Kay ginpakamaayo sila sang Ginuo sa tanan nila nga ginahimo; huo, bisan ginpakamaayo sila kag ginpauswag tubtob nga nakaligad ang isa ka gatos kag napulo ka tuig; kag nagtaliwan ang una nga henerasyon halin kay Cristo, kag wala sing pagbinaisay sa bug-os nga kadutaan.

19 Kag natabo ini nga si Nefi, sia nga nagsulat sining katapusan nga kasulatan, (kag ginsulat niya ini sa mga lamina ni Nefi) napatay, kag ang iya anak nga si Amos ang nagsulat sini bulos sa iya; kag ginsulat man niya ini sa mga lamina ni Nefi.

20 Kag ginsulat niya ini sa otsenta’y kwatro ka tuig, kag may paghidaet pa gihapon sa kadutaan, luwas lang sa diutay nga bahin sang katawhan nga nagrebelde sa simbahan kag nagdala sa ila kaugalingon sang ngalan nga mga Lamanhon; gani nagsugod nga may mga Lamanhon liwat sa kadutaan.

21 Kag natabo ini nga napatay man si Amos, (kag isa ka gatos kag nobenta’y kwatro na ka tuig halin sa pagkari ni Cristo) kag ang iya anak nga si Amos ang nagsulat sang kasulatan bulos sa iya; kag ginsulat man niya ini sa mga lamina ni Nefi; kag ginsulat man ini sa libro ni Nefi, nga amo ini nga libro.

22 Kag natabo ini nga duha ka gatos ka tuig na ang nagligad; kag ang ika-duha nga henerasyon nagtaliwan na tanan luwas lang sa pila.

23 Kag karon ako, si Mormon, luyag nga mahibal-an ninyo nga nagdamo ang katawhan, sa bagay nga naglapta sila sa bug-os nga ibabaw sang kadutaan, kag nangin tuman sila kamanggaranon tungod sang ila pag-uswag paagi kay Cristo.

24 Kag karon, sa sining ika-duha ka gatos kag isa nga tuig may ara sa ila nga nagsugod nga maalsa sa bugal, pareho abi sang pagsul-ob sang malahalon nga panapton, kag tanan nga sari sang de-kalidad nga mga perlas, kag sang maayo nga mga butang sang kalibutan.

25 Kag sugod sa sina nga tion ang ila mga pagkabutang kag ang ila mga manggad indi na tingob agud gamiton sang tanan.

26 Kag nagsugod sila nga magbinahin-bahin suno sa mga kahimtangan sang pangabuhi; kag nagsugod sila sa pagtukod sang mga simbahan para sa ila mga kaugalingon agud makaangkon sing manggad, kag nagsugod sa pagpanghiwala sang matuod nga simbahan ni Cristo.

27 Kag natabo ini nga sang nakaligad na ang duha ka gatos kag napulo ka tuig may madamo na nga simbahan sa kadutaan; huo, may madamo nga simbahan nga nagasugid nga nakakilala sa Cristo, apang ginpanghiwala nila ang laban nga mga bahin sang iya ebanghelyo, sa bagay nga ginbaton nila ang tanan nga sari sang kalainan, kag ginpanghatag inang sagrado sa iya nga ginadumilian ang paghatag man tungod sang pagkadi-kaangay.

28 Kag ini nga simbahan nagdamo sing tuman tungod sang kalainan, kag tungod sang gahum ni Satanas nga may kapyot sa ila mga tagipusuon.

29 Kag sa liwat, may isa pa ka simbahan nga nagpanghiwala sa Cristo; kag ginhingabot nila ang matuod nga simbahan ni Cristo tungod sang ila pagkamapainubuson kag sang ila pagpati kay Cristo; kag ginakaugtan nila sila tungod sang madamo nga milagro nga nahimo sa ila.

30 Gani naggamit sila sang gahum kag awtoridad batok sa mga disipulo ni Jesus nga nagpabilin upod sa ila, kag ginhunong nila sila sa bilanggoan; apang paagi sa gahum sang pulong sang Dios, nga yara sa ila, ang mga bilanggoan nagkalapihak, kag naggwa sila nga nagahimo sang dalagko nga mga milagro sa ila.

31 Apang, kag sa pihak sining tanan nga milagro, ang katawhan nagpatig-a sang ila mga tagipusuon, kag nagtinguha sa pagpatay sa ila, bisan pareho nga ang mga Judio sa Jerusalem nagtinguha sa pagpatay kay Jesus, suno sa iya pulong.

32 Kag gindap-ong nila sila sa mga hurno sang kalayo, kag naggwa sila nga wala nasamaran.

33 Kag ginhunong man sila sa mga lungib sang mabangis nga mga sapat, kag nakighampang sila sa mabangis nga mga sapat bisan pareho sing isa ka bata upod sa isa ka carnero; kag naggwa sila halin sa ila nga wala nasamaran.

34 Apang, ang katawhan nagpatig-a sang ila mga tagipusuon kay ginpangunahan sila sang madamo nga pari kag di-matuod nga mga propeta sa pagpauswag sang madamo nga simbahan, kag sa paghimo sang tanan nga sari sang kalainan. Kag ginsakit nila ang katawhan ni Jesus; apang ang katawhan ni Jesus wala nagbalus sa ila. Kag gani nag-usmod sila sa pagkawala’y pagtuo kag kalainan, tuig-tuig, bisan tubtob nga nagligad ang duha ka gatos kag treinta ka tuig.

35 Kag karon natabo ini sa sini nga tuig, huo, sa ika-duha ka gatos kag treinta’y uno nga tuig, may dako nga pagbinahin-bahin sa katawhan.

36 Kag natabo ini nga sa sini nga tuig may nagtuhaw nga katawhan nga gintawag nga mga Nefinhon, kag matuod sila nga mga tumuluo kay Cristo; kag sa ila yara ang mga ginatawag sang mga Lamanhon—mga Jacobnon, kag mga Josefnon, kag mga Zoramnon;

37 Gani ang matuod nga mga tumuluo kay Cristo, kag ang matuod nga mga sumilimba ni Cristo, (nga sa ila yara ang tatlo ka disipulo ni Jesus nga magapabilin) gintawag nga mga Nefinhon, kag mga Jacobnon, kag mga Josefnon, kag mga Zoramnon.

38 Kag natabo ini nga sila nga nagsikway sang ebanghelyo gintawag nga mga Lamanhon, kag mga Lemuelnon, kag mga Ismaelnon; kag wala sila nag-usmod sa pagkawala’y pagtuo, kundi hungod sila nga nagsupak sa ebanghelyo ni Cristo; kag gintudloan nila ang ila mga anak nga indi sila magpati, bisan pareho nga ang ila mga amay, halin sa ginsuguran, nag-usmod.

39 Kag ini tungod sang kalainan kag kangil-aran sang ila mga amay, bisan pa sa ginsuguran. Kag gintudloan sila nga magdumot sa mga anak sang Dios, bisan pareho nga ang mga Lamanhon gintudloan nga magdumot sa mga anak ni Nefi halin sa ginsuguran.

40 Kag natabo ini nga nagligad ang duha ka gatos kag kwarenta’y kwatro ka tuig, kag amo ini ang kahimtangan sang katawhan. Kag ang mas malain nga bahin sang katawhan nagbakod, kag nangin tuman ka damo sangsa mga katawhan sang Dios.

41 Kag nagpadayon sila gihapon sa pagpauswag sang mga simbahan para sa ila mga kaugalingon, kag ginpatahum ang mga ini sang tanan nga sari sang malahalon nga mga butang. Kag gani nagligad ang duha ka gatos kag singkwenta ka tuig, kag amo man ang duha ka gatos kag sisenta ka tuig.

42 Kag natabo ini nga ang malain nga bahin sang katawhan nagsugod liwat sa pagpauswag sang sekreto nga mga sinumpaan kag mga padihot ni Gadianton.

43 Kag amo man, ang katawhan nga ginatawag nga katawhan ni Nefi nagsugod nga mangin bugalon sa ila mga tagipusuon, tungod sang ila tuman nga mga manggad, kag nangin matinaas-taason pareho sang ila mga kauturan, ang mga Lamanhon.

44 Kag halin sa sini nga tion ang mga disipulo nagsugod sa pagpangasubo tungod sang mga sala sang kalibutan.

45 Kag natabo ini nga sang nakaligad na ang tatlo ka gatos ka tuig, ang katawhan ni Nefi kag ang mga Lamanhon nangin tuman kalain, ang isa pareho sang isa.

46 Kag natabo ini nga ang mga tulisan ni Gadianton naglapta sa bug-os nga ibabaw sang kadutaan; kag wala sing isa nga matarong luwas lang sa mga disipulo ni Jesus. Kag bulawan kag pilak ginpanipon nila sa kabuganaan, kag nagnegosyo sang tanan nga sari sang negosyo.

47 Kag natabo ini pagkatapos nga nakaligad ang tatlo ka gatos kag lima ka tuig, (kag ang katawhan nagpadayon gihapon sa kalainan) napatay si Amos; kag ang iya utod nga si Amaron amo ang nagsulat sang kasulatan bulos sa iya.

48 Kag natabo ini nga sang nakaligad ang tatlo ka gatos kag beynte ka tuig, si Amaron, kay napilitan sang Balaan nga Espiritu, nagtago sang mga kasulatan nga sagrado—huo, bisan ang tanan nga sagrado nga kasulatan nga ginpasa-pasa sa tanan nga henerasyon, nga mga sagrado—bisan tubtob sa ika-tatlo ka gatos kag beynte nga tuig halin sa pagkari ni Cristo.

49 Kag ginpatago niya ang mga ini sa Ginuo agud ang mga ini maggwa liwat sa nagkalabilin sang panimalay ni Jacob suno sa mga propesiya kag mga promisa sang Ginuo. Kag gani natapos ang kasulatan ni Amaron.