1. Akarongoia akera tetai reo i rotopu i te au tangata e noo i te enua nei, ki runga i te aro o teia nei enua.

2. Aue, aue, aue teia au tangata, aue te tangata tei noo ki teia nei enua e, kia kore ratou e tataraara; kua kata e kua rekareka te tiaporo e tana au angela no te mate oki o te au tamaroa manea, e te au tamaine manea o toku au tangata, no ta ratou au ara e te au mea rikarika i ingaʼi ratou.

3. E i na, ko te oire maata ko Zarahemela taku i tau ki te ai, e te aronga tei noo ki reira.

4. E tera oire maata ko Moronai, taku i taruku ki roto i te tai, e te au tangata katoa.

5. E tera oire maata oki ko Moroniha, kua tapokiia e au ki te one, e ko tei noo ki reria, kia uuna i ta ratou au ara, e to ratou kino mei mua i toku nei aroaro, kia kore ei te toto o te au peroveta e te aronga tapu e tu akaou mai ki mua iaku.

6. E i na, ko te oire o Kirikara, e te au tangata tei noo ki reira, kua tapokiia ki raro i te enua.

7. Ae, ko te oire ko Oniha, e tei noo ki reira, e te oire ko Mokoma, e tei noo ki reira, e te oire ko Ierusalema, e tei noo ki reira, e kua akaue oki au i te vai kia tae ki runga, ei uuna atu i to ratou tu viivii e te kino mei mua i toku nei mata, kia kore te toto o te au peroveta, e to te aronga tapu, e kapiki akaou mai kiaku no ratou oki.

8. E i na, te oire o Katianiti, e te oire o Katiomanā, e te oire o Iakoba e te oire o Kimikimono, ko ratou anake taku i akaue kia ngaromia e kua tuku mai i te au tuaivi e te au ō ki to ratou ngai, e te aronga e noo ki reira, ko taku ïa i tapoki atu ki te one ei uuna i to ratou viivii e to ratou kino mei mua mai i toku mata kia kore ei te toto o te au peroveta e to te aronga tapu e kapiki akaou mai ki mua iaku no ratou oki.

9. E i na, ko taua oire maata ra ko Iakobakata, tei nooia e te au tangata o te ariki ko Iakoba, naku ïa i akaue kia taunaia ki te ai, no ta ratou au ara, e to ratou au kino, ko tei teitei rava ïa ki runga i te au kino e manganui o te enua nei, no ta ratou au angaanga ngaro e te ta tangata, na ratou oki i akakino i te au o toku ra iti tangata e te akaaereanga o te enua, no reira kua akaue au kia ka ratou i te ai, kia pou atu ratou i mua i toku aroaro, kia kore te toto o te au peroveta, e te aronga tapu e tae mai ki mua iaku no ratou oki.

10. E te oire o Lamana, te oire o Iosa te oire o Kata, te oire o Kitikumeni, ko taku ia i akaue kia taunaia ki te ai, e te aronga e noo ki reira, no to ratou kino i te tuaru anga i te au peroveta ki vao ma te pei anga ki te toka, ko te aronga taku i tono atu kia ratou, no ta ratou angaanga kino e te au mea rikarika ta ratou i rave.

11. E no tei tuaru ratou i te au peroveta ki vao e kare atura e tangata tuatua tika i rotopu ia ratou, no reira kua tuku mai au i te ai ei akapou ia ratou, kia ngaro ke atu to ratou kino e to ratou viivii i mua i toku mata, kia kore te toto o te au peroveta e te aronga tapu taku i tono atu kia ratou e kapiki mai mei te one no runga oki ia ratou.

12. E maata oki te akapouanga taku i tuku ki runga oki i teia au tangata no to ratou kino e to ratou viivii.

13. E kotou te aronga katoatoa i ora, no to kotou tuatua tika, kare ainei kotou e uri mai kiaku, e ma te tataraara i ta kotou au ara, e ariu mai, kia akaora au ia kotou?

14. Ae, tika tikai taku e karanga atu kia kotou, me aere mai kotou kiaku, ka rauka ia kotou te ora mutu kore. E i na, e totoa atu au i toku rima aroa kia kotou, e ko te ka aere mai ra, koia taku ka ariki, e ao oki to ratou tei aere mai kiaku.

15. E i na, ko au teia, ko Iesu Mesia, te tamaiti a te Atua. Ko au tei anga i te enua e te rangi, e te au mea ravarai i roto. Ei te Metua ra oki au i te akamataanga. Tei roto au i te Metua, e tei roto te Metua iaku, e na roto iaku ra, kua akakaka te Metua i tona ingoa.

16. Kua aere mai au ki toku tikai, e kare ratou i ariki mai iaku. E kua tupu ïa mei te tuatua i tataia no toku nei aereanga mai.

17. E ko tei ariki mai iaku ra, ko ratou oki taku e akariro ei tamariki na te Atua, e ka akapera oki au ia ratou tei akarongo mai i toku ingoa, e i na, ka tae mai te akaoraanga na roto iaku, e na roto iaku nei oki e akatupuiaʼi te ture a Mose.

18. Ko au te marama, e te ora o teianei ao. Ko au te Alefa e te Omega te muatangana e te openga.

19. E kare oki kotou e oronga akaou mai kiaku i te akamaringianga toto, ae, ko ta kotou atinga e te atinga karakaratio, kua oti te reira, e kare rava au e ariki akaou i ta kotou atinga e te atinga karakaratio.

20. Ko te atinga ra o te tataraara e te vaerua maru, ko ta kotou ïa ka oronga mai kiaku. E ko te ka aere mai kiaku ma te ngakau tataraara, e te vaerua maru, koia taku e bapetizo ki te ai e te Vaerua Tapu, mei te ngati Lamana i bapetizoia ki te ai e te Vaerua Tapu, no to ratou akarongo kiaku i te tuatau i akaariuiaʼi ratou ra, kare ra ratou i kite i te reira.

21. I na, kua aere mai au ki to te ao nei, e akaora i to te ao, ei akaora oki i to te ao i ta ratou au ara.

22. No reira, ko tei tataraara, e tei aere mai kiaku mei te tamariki meariki, ko taku ïa ka ariki, mei ia ratou oki te basileia o te Atua ra, E i na, no ratou oki i oronga atu ei au i toku nei oraanga, e e rave akaou oki au i te reira, no reira, e tataraara, e aere mai kiaku, e to te openga o te ao nei e, kia akaoraia kotou.