1. E teianei, e tai ngauru ma ono mataiti mei te tae anga mai o te Mesia, kua tae mai tetai episetole mei te arataki e te kavana o te anana keikeia kia Lakonea te kavana o te enua, e teia te au tuatua tei tataia ki roto, i te na ko anga mai e,

2. Kia Lakonea te kavana maata, e te ngateitei o te enua, e i na, te tata atu nei au i teia episetole kia koe, e kia oronga atu kia koe i te akangateitei maata, no toou tu ngaueue kore, e to toou au tangata katoa, i te mou anga i te au mea katoa, ta kotou e manako e, e tika, e rangatiraʼi kotou, ae, te tu meitaki ua ra koe, e mei te mea ra, e te tauturuia ra kotou e te rima o te Atua, no te paruru ia kotou, e ta kotou au apinga katoa e to kotou enua, me kore ra, te au mea tei rauka ia kotou.

3. E tangi tikai au e Lakonea ngateitei, no te neneva ia koe i te manako e, ka tu kotou ki mua i te au tangata mataku kore e manganui tei raro ake i taku akaaereanga. I na, kua papa to ratou au apinga tamaki, i te tiaki ua nei ratou i te tuatua e, E aere ki raro i te ngati Niphai, e e akapou ia ratou.

4. E kua kite oki au i to ratou vaerua autu kore, e kua akapapuia mai te reira i roto i te tamaki, e no to ratou makitakita mutu kore kia kotou no te maata o ta kotou au tarevake ta kotou i rave kia ratou, no reira me aere mai ratou ki raro nei ia kotou, ka takore takiri ia kotou.

5. No reira au i tata atu ei i teia eposetole, e kua topiriia e toku uaorai rima, ma te aroa atu ia kotou, no to kotou tu ngaueue kore ki ta kotou i manako e, e mea tika, e to kotou ngakau toa i roto i te tamaki.

6. No reira, te tata atu nei au kia koe, kia tuku mai i to kotou au oire, to kotou au enua e te au mea tei rauka ia kotou, ki toku au tangata, me kare kotou e omai, ka aravei kotou i te koke e te akapou anga te ka tae mai kia kotou.

7. Koia oki, e piri mai kotou kia matou, e kia taokotai tatou, e kia matau kotou ki ta matou angaanga ngaro, e kia riro ei taeake tikai no matou, e kia aite tikai mei ia matou nei, auraka ei tuikaa, e taeake ra, e ei au toko rua no ta matou au mea ravarai.

8. E teianei, te taputou nei au kia kotou, me ka rave kotou i teia ma te taputou, kare kotou e akapouia, me kore ra kotou e akapera, te taputou atu nei au kia kotou, a te marama apopo, ka akaue au i toku nuku kia aere atu kia kotou, e kare rava ratou e tāpū i to ratou rima, e kare oki e akaora i tetai, mari ra kia ta ia kotou, e ka akatopa ratou i te koke ki runga ia kotou e kia pou takiri.

9. E i na, ko au oki teia ko Kitiani, ko au oki te kavanga o teia aronga ngaro o Katianetona, ko te angaanga oki a teia aronga nei, kua kite au e, e tika, no te au ra taito rava teia angaanga e kua orongaia mai kia matou nei.

10. Te tata atu nei au i teia episetole kia koe e Lakonea, e ma te inangaro e kia tuku mai kotou i toou enua, e tei rauka ia kotou, ma te kore e akamaringi i te toto, e kia rauka i toku au tangata ta ratou tika e te kavamani, ko tei akaruke ia kotou, no to kotou kino, i te rave anga atu i to ratou tika i te akatereanga, e me kore kotou e rave i teia, ka tutaki au i to ratou tarevake. Ko au ko Kitiani.

11. Kia kite ra a Lakonea i teia episetole, kua poitirere tikai aia, no te akama kore o Kitiani, i te umuumu anga mai i te enua o te ngati Niphai, e ma te akamataku i te au tangata, e ma te akaokoanga i te tarevake, ko tei oro ke atu e kua piri ki roto i te aronga kino e te keikeia.

12. E teianei, e tangata tuatua tika oki a Lakonea kavana, e kare rava aia e mataku ua atu i te tuatua akamataku a te keikeia, no reira, kare aia i akarongo atu i te episetole a Kitiani, te kavana o te pupu keikeia, ina ra, kua akakite atu aia ki tona au tangata, kia pati atu ki te Atua no te maroiroi no te tuatau e tae mai ei te keia kia tamaki ia ratou.

13. Kua tono atura aia i te karere ki te au tangata katoatoa kia akaputuputu mai i ta ratou au vaine ki te ngai okotai, e ta ratou au tamariki, ta ratou au mamoe, e ta ratou au puakatoro, e te au apinga katoatoa mari ua ko te enua, ki te ngai okotai.

14. E kua akaue atura aia kia patu ia tetai punanga no ratou e ko te maroiroi o te reira, ei mea pakari tikai. E kua akaue atu aia i te au nuku o te ngati Niphai e te ngati Lamana, e ratou pouroa tei kapitiia mai ki te ngati Niphai, kia akanooia ratou ei tiaki, e ei akara i te aerenga mai o te keikeia i te po e te ao.

15. Ae, kua tuatua atura aia kia ratou, Te ora ra te Atu, kia kore kotou e tataraara i ta kotou au ara, e ma te kapiki atu ki te Atua, kare rava kotou e akaoraia i te rima o taua aronga keikeia o Katianetona ra.

16. E no te maata e te umere o te au tuatua e te au totou a Lakonea, kua mataku te au tangata, e kua taokotai iora ratou ma te maroiroi kia akono i te au tuatua ravarai a Lakonea.

17. E kua iki akera a Lakonea i te au rangatira i runga i te au nuku o te ngati Niphai, ei akaaere ia ratou i te tuatau e tae mai ei te keikeia mei roto mai i te metepara kia ratou.

18. E ko te tangata maata i te au rangatira e te akaaere o te au nuku o te ngati Niphai tei ikiia, ko Kititoni tona ingoa.

19. E angaanga matau rai teia i roto i te ngati Niphai, kia ikiia tetai rangatira maata no ratou, mei te mea e, e tangata aia, tei iaia te vaerua o te eeuanga, e to te totou anga, no reira teia Kititoni i ikiiaʼi no te mea e peroveta maata aia, mei te akavanui katoa oki.

20. E teianei, kua tuatua maira te tangata kia Kititoni. E pure koe ki te Atua, e kia aere tatou ki te maunga, e ki roto i te metepara, e kia ta atu te au keikeia, e kia akapou atu ia ratou ki to ratou uaorai enua.

21. Ina ra, kua tuatua mai a Kititoni kia ratou, kare te Atua e akatika, me ka aere tatou kia ratou, ka oronga te Atua ia tatou ki to ratou rima, no reira, e teateamamao ua tatou i rotopu i to tatou uaorai enua, e ka akaputuputu mai tatou i to tatou au nuku ki te ngai okotai, e kare tatou e aere atu kia ratou, mari ra, ka tiaki tatou ia ratou me aere mai kia tatou nei, te ora nei te Atua, me rave tatou i teia, ka tuku mai aia ia ratou ki to tatou nei rima.

22. E tae akera ki te pae openga o te mataiti tai ngauru ma itu, kua kako rava akera to te enua i te tuatua a Lakonea, e kua apai maira i to ratou au oroenua, e to ratou kariota, e ta ratou anana puakatoro, e ta ratou anana mamoe, e ta ratou au sitona, e ta ratou au apinga, e kua aere maira e tauasani ua atu, e i te ngauru o te tauasani, e tae ua atura ki te ngai tei akatakaia e kia putuputu ei ratou, no te paruru anga ia ratou mei to ratou au enemi.

23. E ko te enua tei akatakaia ko Zarahemela ïa, e te enua ko Bounetifula e tae ua atu ki te kena i rotopu i te enua ko Bounetifula e te enua ko Desolationa.

24. E manganui tikai te tauasani anga o te au tangata tei tuatuaia te ngati Niphai tei akaputuputu mai ki tera ngai. Kua akaue akera a Lakonea, e kia akaputuputu mai ratou ki te enua ki apatonga, no te taumaa i te enua i apatokerau.

25. E kua maani akera i tetai punanga no ratou ei paruru i to ratou au enemi, e kua noo iora ratou ki te enua okotai, e i te ngai okotai, no te mataku oki i te tuatua a Lakonea, kua tataraara iora i ta ratou au ara, e kua pure atura ki to ratou Atua e kia akaora ia ratou me tae te tuatau e tae mai ei to ratou enemi e tamaki ia ratou.

26. Kua tumatetenga tikai ratou no to ratou au enemi. E kua akaue iora a Kititoni kia maani i tetai apinga tamaki na ratou, i te au tu ravarai, ma te akamaroiroi ia ratou i te rakei tamaki e te paruru mei tana i akakite mai.