1. E kia oti ta Iesu tuatua anga, kua tuatua tataki tai akera aia ki tana au pipi, na ko atura, Eaa taau i inangaro iaku kia tae au ki te Metua ra?

2. E kua na ko maira ratou katoatoa mari ra, ko te toko toru, te inangaro nei matou, e kia ora matou e tae ua atu ki te pakari anga o te tangata e kia akaoti ta matou angaanga i kapikiiaʼi e koe, kia oki vave atu matou kia koe ra, i roto i toou na basileia.

3. E kua tuatua atura aia kia ratou, E ao tikai to kotou, ko kotou i inangaro i teia au mea iaku nei, no reira, kia tae kotou ki te itu ngauru ma rua o te mataiti i te pakari, ei reira kotou e aere mai ei kiaku nei i roto i toku basileia, ei ko nei kotou iaku e akangaroi ei.

4. E kia oti tana tuatua anga kia ratou, kua uri akera aia ki te toko toru, e kua na ko atura kia ratou, Eaa to kotou inangaro iaku, me tae au ki te Metua ra?

5. Kua taitaia iora to ratou ngakau, e kua mataku oki ratou i te akakite atu kiaia i te au mea ta ratou i inangaro.

6. Kua karanga maira aia kia ratou, I na, kua kite au i to kotou manako, te inangaro ra kotou i te mea ta Ioane taku akaperepere i inangaro iaku, ka angaanga kapiti ei maua i mua ake ka akateiteiiaʼi au e te ngati Iuda.

7. No reira, e akameitakianga maata to kotou, kare rava kotou e kite i te mate, ka ora ra kotou, kia akara i te au angaanga a te Metua, ki te au tamariki a te tangata nei, e tae ua atu ki te tupuanga o te au mea ravarai, kia tau ki te inangaro o te Metua, e kia aere mai au ma toku kaka, e ma te au nuku o te rangi.

8. E kare rava kotou e kite i te mamae o te mate, ina ra, me tae mai au ma toku kaka, e akatukeia kotou i te kamoanga mata rai, mei te kopapa mate, ki te kopapa mate kore, e ei reira kotou e akameitakiiaʼi i te basileia o taku Metua.

9. E i na, kare rava to kotou kopapa e kite i te mamae i to kotou noo anga i teianei ao, kare oki e tumatetenga, mari ra no te ara a to teianei ao, ko taku teia e rave no kotou, no te mea kua anoano oki kotou i taua au mea ra iaku, e kua anoano katoa oki kotou, kia arataki mai i te au tangata kiaku, koi vai ake te ao.

10. No reira, ka ki kotou i te rekareka, e ka noo oki kotou i te basileia o taku Metua, e tika oki, ka ki meitaki to kotou rekareka mei te rekareka oki ta te Metua i oronga mai noku, e peraia oki kotou, mei iaku nei, e mei iaku nei oki, mei te reira katoa te Metua, ko te Metua e au ra okotai ïa.

11. Ka akakite oki te Vaerua Tapu i te Metua e au, e kua oronga mai oki te Metua i te Vaerua Tapu ki te tamariki a te tangata nei, noku ra.

12. Kia oti akera ta Iesu tuatua anga, kua akatukia maira aia i tona mangamanga rima kia ratou tataki tai, mari ra ko te toko toru te ka noo ake, e kua taka ke atu aia.

13. E i na, kua ngaa maira te rangi, e kua riro ke atura ratou ki te rangi, e kua akara, e kua rongo i te au mea, kare e rauka kia tuatuaia.

14. E kua araiia mai ratou e auraka e tuatua, e kare oki i orongaia te mana kia ratou kia tuatua i te au mea ta ratou i akara, e i akarongo.

15. Me tei roto ratou i te kopapa me tei vao, kare oki e rauka ia ratou kia kite, e mei te mea rai e, kua akatukeia ratou, e kua akatukeia ratou mei teia kopapa kiko nei, ki te turanga mate kore, kia kite ei ratou i te au mea a te Atua.

16. Ina ra, kua oki akaou mai ratou e kua rave i te angaanga i runga i te enua nei, kare ra ratou i akakite ua atu i te au mea tei akaraia e tei akarongoia e ratou, no te akaueanga tei orongaia mai kia ratou mei te rangi mai.

17. E teianei, me e kopapa mate to ratou, me e kopapa mate kore mei te ra mai i akatukeiaʼi, kare au i kite.

18. Ko teia ua taku i kite mei tei tataia, e kua aaere atu ratou na runga i te enua, i te apii anga i te au tangata katoatoa, i te kapiti anga i te au tangata e manganui ki te akonoanga tei ariki i ta ratou apii anga, e kua bapetizoia ratou, e ko ratou oki tei bapetizoia, kua rauka ia ratou te Vaerua Tapu.

19. E kua uriia ratou ki roto i te are tapekaanga e te aronga kare e no te akonoanga. Ina ra, kare e rauka i te are tapekaanga kia tāpū ia ratou no te mea, kua ngaangaa i rotopu.

20. E kua uriia ratou ki raro i te one, ina ra, kua ta ratou i te enua ki te reo o te Atua, e na roto i tona mana i akaoraiaʼi ratou mei roto mai i te vaarua o te enua, no reira kare ua e rauka ia ratou kia ko i tetai vaarua tau e mou ei ratou.

21. E toru o ratou uriangaia ki roto i te umu ai, e kare rava ratou i ka ana.

22. E rua o ratou uriangaia ki roto i te vaarua o te manu taae, ina ra, te kangakanga ua ra ratou ma te manu taae mei te tamariki e kanga i te mamoe kai u, e kare ua e kino i tupu.

23. Kua aere atu ratou ki te au tangata o te ngati Niphai, e kua ako atu ia ratou i te evangelia a te Mesia, e ki te au tangata e manganui i runga i te orau o te enua, e kua akaariuia mai ratou ki te Atua, e kua kapitiia mai ratou ki te akonoanga a te Mesia, e kua akameitakiia te au tangata o taua uki ra, no te tuatua a Iesu.

24. E teianei, te akaoti nei au ko Momoni i teia nei tuatua no runga i teia au mea i teianei.

25. I na, kua vaitata rava au i te tata i te ingoa o te toko toru te ka kore e tongi i te mate, ina ra, kua araiia e te Atu, no reira, kare au e tata, kua uunaia te reira i to te ao nei.

26. Ina ra, kua akara ana au ia ratou, e kua tauturu ana ratou iaku.

27. E i na, tei rotopu ratou i teia nei i te au Etene, kare ra te au Etene e kite ia ratou.

28. E riro katoa ratou ki rotopu i te ngati Iuda, e kare katoa te ngati Iuda e kite ia ratou.

29. E me kite oki te Atua e kua tau i tona pakari, e kia tauturu ratou i te au kopu o Iseraela tei pueurikiriki ke, e ki te au basileia, te au kopu, te au reo, e te au tangata, e kia arataki mai ratou i te au tangata e manganui kia Iesu, kia tikaʼi ta ratou i inangaro, e na roto katoa oki i te mana o te Atua no te akaariuanga, tei vai ki roto ia ratou.

30. E tau ratou ki te au angela a te Atua, e me pure ratou ki te Atua na roto i te ingoa o Iesu, ka akaari ratou ia ratou uaorai ki te au tangata ta ratou i manako e ka tau.

31. No reira ka maata rava ta ratou angaanga umere ka rave, na mua ake i te aereanga mai o taua ra maata ra, e tu ei te au tangata katoatoa ki mua i te akavaanga a te Mesia.

32. E tika, ka rave ratou i taua au angaanga maata e te umere ki rotopu i te au Etene, na mua ake i taua ra akavaanga ra.

33. E naringa tei ia kotou te au tuatua i tataia ra, ko tei akakite mai i te au angaanga umere a te Mesia, ka kite kotou, mei ta te Mesia i tuatua mai, e ka tae mai teia au mea e tikai.

34. Aue oki kotou tei kore e akarongo i te tuatua a Iesu, e tana i iki e tono ki rotopu ia ratou, e ko tei kore i ariki i te tuatua a Iesu, e te tuatua a te aronga tana i tono mai, kare rai aia e ariki iaia no reira, kare rai aia e ariki atu ia ratou, kia tae ki te ra openga ra.

35. E ngari ake ratou e auraka i anau mai. Te manako ainei kotou e, ka kopae atu kotou i te tuatua tika a te Atua ora, ko tei takatakaiia e te vaevae o te tangata, ko te mea e oraʼi te tangata?

36. E teianei, mei taku i tuatua ana, no runga i te aronga ta te Atua i iki, ae, ko te toko toru oki tei riro atu ki te rangi kare oki au i kite, me kua tamaia ratou mei te kopapa mate ki te kopapa mate kore.

37. Ina ra, i muri mai i toku tata anga, kua pati atu au ki te Atua, e kua akakite mai aia kiaku, e mea tau rai, ki akatukeia to ratou au kopapa, me kore ra, ka kite rai ratou i te mate.

38. No reira, kia kore ratou e tongi i te mate, kua akatukeia ra to ratou au kopapa, kia kore ei ratou e kite i te mamae e te taitaia, mari ua ra, ei te ara a to te ao ra.

39. I na, kare teia akatuke anga i aiteite ki te akatuke anga te ka raveia i te ra openga, ina ra, kua raveia tetai akatuke anga ki runga ia ratou, kia kore ei o Satani mana ki runga ia ratou, e kia kore e rauka iaia kia timata atu ia ratou, kua akatapuia ratou i te kopapa nei, e kua tapu oki ratou, e kare e mana o te enua kia mou ia ratou.

40. Ko to ratou tu teia, e tae ua atu ki te ra akavaanga a te Mesia. e kia tae ki taua ra ra, e akatukeanga te ka raveia kia ratou, e ka raveaia atu ratou ki te basileia o te Metua e kare ratou e oki akaou ki vao, kia noo tamou atu ra ki te Atua mutu kore ra i te rangi.