1. E kia oti akera ta Iesu tuatua anga kia Niphai, e te aronga tana i iki, i na, ko te katoaanga o ratou tei kapikiia, e kua rauka to ratou mana e te tikaanga kia bapetizo, e tai ngauru ma rua, e i na, kua akatika atura i tona rima ki te urupu katoatoa, e kua na ko atura e, e ao to kotou, to te ka akarongo i te au tuatua a teia tino ngauru ma rua, taku i iki mei rotopu ia kotou, ei tauturu ia kotou, ei tavini oki no kotou e kua oronga atu au i te mana kia ratou kia bapetizo ia kotou ki te vai, ka bapetizo ra au ia kotou ki te ai e te Vaerua Tapu, no reira, e ao to kotou me e akarongo to kotou iaku, e kia bapetizoia, no to kotou akara anga mai iaku, e to kotou kiteanga e, te vai nei oki au.

2. E ao to ratou ko tei akarongo i ta kotou au tuatua, no tei akakite oki kotou e, i akara ana kotou iaku e kua kite oki kotou e, te vai nei au, ae, e ao tikai to ratou ko tei akarongo i ta kotou tuatua, e kua taakaaka ia ratou, kia bapetizoia, ka atoroia ratou ki te ai e te Vaerua Tapu e ka rauka ia ratou te tataaraanga i ta ratou au ara.

3. E ao to tei akaaka te ngakau, tei aere mai kiaku, no ratou oki te basileia o te ao.

4. E ao to tei aue, e akapumaanaia ratou.

5. E ao to tei maru, e riro ia ratou te enua.

6. E ao to tei pongi, e tei kaki i te tuatua tika, ka akakiia ratou ki te Vaerua Tapu.

7. E ao to tei aroa i tetai ke ra, ka aroa katoaia mai ratou.

8. E ao to tei mā te ngakau, ka kite oki ratou i te Atua.

9. E ao to tei akatupu i te au, ka karangaia ratou e tamariki na te Atua.

10. E ao to tei takinga kinoia no toku nei ingoa, no ratou oki te basileia o te ao.

11. E ao to kotou, kia akakino mai, e kia takinga kino mai, e kia akaapa pikikaa ua mai ia kotou, i te au kino katoatoa noku nei.

12. Kia rekareka maata kotou, e tutaki maata oki ta kotou i te ao ra, i pera oki ratou i te takinga kinoanga i te aronga peroveta i mua ake ia kotou.

13. E tika tika tikai taku e karanga atu kia kotou, kua akariro au ia kotou ei miti no te enua, ina ra, me ngaro te meitaki o te miti, eaa te mea e tamitiiaʼi te enua? Kare ona puapinga i reira, mari ra, kia titiriia atu e takatakaiia e te vaevae tangata.

14. E tika, tikai taku e karanga atu kia kotou, ko kotou te marama o te ao nei. Te oire i akatuia ki runga i te maunga kare ïa e ngaro.

15. Kare e tangata e tutungi i te mori, ka tuku ei ki raro i te pia, ei runga ra i te vairanga kia marama to te are katoa.

16. Koia katoa to kotou marama, kia kaka ïa ki mua i te aroaro o te tangata nei, kia akara ratou i ta kotou angaanga meitaki, e kia akameitaki ratou i to kotou Metua i te ao ra.

17. Auraka e manako e, kua aere mai au e akakore i te ture e ta te au peroveta, kare au i aere mai e akakore e akatupu ra.

18. Koia mou taku e karanga atu kia kotou, kare tetai iota e tetai ngai meangiti poepoe o te ture i kore, kua ope takiriia i te tupu iaku nei.

19. E i na, te oronga atu nei au kia kotou i te ture e te akaueanga a toku Metua, kia akarongo kotou iaku e kia tataraara kotou i ta kotou au ara, ma te aere mai kiaku ma te ngakau tataraara, e te vaerua maru. I na, tera te au akaueanga tei mua ia kotou, e kua akatupuia oki te ture.

20. No reira, ka aere mai kiaku nei kia ora kotou, e tika tikai taku e karanga atu kia kotou, kia kore ra kotou e akono i taku ra akaueanga taku i akaue atu kia kotou i teianei, kare rava kotou e ō ki te basileia o te ao ra.

21. Kua akarongo ana kotou i tei tuatuaia e te aronga taito e, e kua tata katoaia, e tei mua ïa ia kotou i teia nie, auraka e ta; e ko tei ta ra, e tau iaia te akavaanga a te Atua ra.

22. Ina ra, te karanga atu nei au kia kotou, e ko tei riri ki tona ra taeake, e tau iaia te akavaanga ra. E ko tei karanga atu ki tona taeake, e Raka, e tau iaia te akavaanga, kareka ko tei karanga e, e neneva koe, e tau iaia te ai i te po ra.

23. No reira, me aere mai koe kiaku, me kore ra, te anoano ra kia aere mai kiaku, e ma te akamaara e, e ara ta to taeake ia koe na,

24. E aere tika ki to taeake, e na mua i te akaau i to taeake, ei reira ka aere mai ei kiaku nei ma te ngakau tae tikai, ei reira au e ariki atu ei ia kotou.

25. Kia rapurapu i te akatika i taau tuatua i toou enemi i to korua aereanga na te mataara, ko te tuku atu aea toou enemi ia koe ki roto i te are tapekaanga.

26. Tika, tikai taku e karanga kia koe, kare takiri koe e tukuia mai, e kia tutaki roa koe i te senina openga ra. E i toou noo anga i roto i te are tapekaanga ra, ka rauka ainei ia koe kia tutaki mai ko tai ua ake senine? Tika tikai taku e karanga atu kia kotou e, kare.

27. E i na, kua tataia oki e te aronga taito e, auraka rava koe e akaturi.

28. Te karanga atu nei ra au kia kotou, ko tei akara ki te vaine e kua akatupu i te inangaro, kua akaturi takere aia i roto i tona ngakau.

29. I na, e oronga atu au kia kotou i tetai akaueanga, auraka rava atu kotou e akatika i teia nei au mea, kia tomo ki roto i to kotou ngakau.

30. E mea tau tikai kia patoi kotou i teia nei au mea, i te apai anga kotou i ta kotou satauro, ko te uriia aea kotou kia ade.

31. Kua tataia oki e, ko tei inangaroi te kopae ke atu i tana vaine kia oronga atu i tetai tuatua kopae kiaia ra.

32. Tika tikai taku e karanga atu kia kotou, ko tei kopae i tana vaine, mari no te akaturi, kua akariro aia iaia ei akaturi, e tei akaipoipo i tei kopaeia ra, kua akaturi katoa ïa.

33. E kua tataia oki e, auraka e taputou pikikaa ua, e papau ra koe i taau au taputou ki te Atua.

34. Ina ra, e tika tikai taku e karanga atu kia kotou, auraka e taputou, auraka rava, auraka i te rangi, ko te terono ïa no te Atua.

35. Auraka i te enua nei, ko tona ïa pange vaevae.

36. Auraka katoa koe e taputou i toou uaorai upoko, kare e tika ia koe kia akateatea i tetai io rau e te akakerekere i tetai.

37. Kia riro ra ta kotou koia ei koia, e ta kotou kare ei kare, e ko te mea maata atu i teia no roto ïa i te kino.

38. E i na, kua tataia, e mata ra, ei mata ïa te tutaki, e e nio ra ei nio ïa.

39. Ina ra, te karanga atu nei au kia kotou, auraka rava e akaoki atu i te kino, ina ra, ko tei moto mai i to paparinga katau nei, e ariu katoa atu i tetai.

40. E kia akaapa mai tetai tangata ia koe i te ture, e rave mai i toou kakau, o atu katoa i toou pereue.

41. E ko tei akaue mai ia koe e aere i te tai maire, aere ua atu korua e rua maire.

42. E oronga atu na tei pati mai kia koe ra, e ko tei inangaro i taau ra, auraka e akaoki uaia atu.

43. E i na, kua tataia oki e, E aroa atu koe i toou tangata tupu, e makitakita atu i toou enemi.

44. Ina ra, te karanga atu nei au kia kotou, e aroa atu i to kotou aronga enemi, e akaora atu i tei tao mai, e takinga meitaki atu i te aronga e makitakita mai ia kotou.

45. Kia riro kotou ei tamariki na to kotou Metua i te ao ra, no te mea, te akaiti nei aia i te ra ki rungao i te aronga kino e te meitaki.

46. No reira, ko taua au mea ra o te tuatau taito ra, tei vai ki raro ake i te ture ra, kua akatupuia ia e au.

47. Kua ope te au mea taito, kua riro te au mea ravarai ei mea ou.

48. No reira, te inangaro nei au kia apakore kotou mei iaku, me kore, to kotou Metua i te ao ra e apakore.