1. E teianei, ka akakite atu au kia kotou, e kare ratou i akamou i tetai ariki ki runga i te enua nei, ina ra, i teia mataiti tikai, te toru ngauru o te mataiti, kua takore oki ratou, i na, ka ta oki ratou i te akavanui o te enua e mate atura.

2. E kua ngaa te tangata tetai ki tetai, e kua taka ke tetai kopu mei tetai, te au tangata ki to ratou uaorai kopu, e to ratou au taeake, e kua takore oki ratou i te akaaereanga o te enua.

3. E kua iki akera te au kopu takitai i te tangata ei arataki no ratou, e kua riro maira ratou ei au kopu, e ei au arataki no te au kopu.

4. E i na, kare oki e tangata i roto ia ratou, mari ra, e maata tona kopu tangata e tona au taeake, no reira oki teia au kopu nei, i riro mai ei, ei mea maata rava.

5. I na, kua oti anake teia, e kare oki e tamaki i rotopu ia ratou, kua tae mai teia au kino ki runga i teia au tangata, no te mea, kua kauraro ratou ki te mana o Satani.

6. Kua akakore oki ratou i te au ture o te kavamani, no te angaanga ngaro a to ratou au taeake, e te au kopu tangata o te aronga tei ta i te au peroveta.

7. E ko ratou oki te tumuanga no te pekapeka i roto i te enua, e ko te tuanga meitaki tikai o te au tangata, kua vaitata i te riro ei aronga kino, ina ra, kare e maata te au tangata tuatua tika i rotopu ia ratou.

8. E kare i ope te ono mataiti, i ariu ke atu ei te tuanga maata o te aronga tuatua tika, mei te puakaoa tei akaruke i tona ruaki, e mei te tinana puaka e takaviriviri i roto i te vari.

9. E teianei, ko teia pupu ngaro, tei apai mai i te kino maata ki runga i te au tangata, kua akaputuputu ratou ki te ngai okotai, e kua iki akera ia Iakoba ei upoko no ratou.

10. E kua karanga ratou e, e ariki aia, no reira, kua riro mai aia ei ariki no teia pupu kino nei, e koia tikai te pu maata i te tuku i tona reo patoi ki te au peroveta tei akakite i te tuatua no Iesu.

11. Ina ra, kare rava ratou e maroiroi ana mei to te au kopu, ko tei taokotai ki te ngai okotai. Kua akamou ra to ratou au arataki i ta ratou au ture kia tau ki tona kopu tangata, e enemi oki ratou ravarai, kare oki ratou i te aronga tuatua tika, ina ra, kua taokotai ratou ma te makitakita atu i te aronga tei tomo ki roto i te koreromotu kia akakore i te kavamani.

12. No reira, kia kite a Iakoba e maata atu to ratou enemi ia ratou uaorai, e e ariki oki aia no taua pupu ra, no reira, kua akaue atu aia i tona au tangata, e oro ratou ki te tuanga i apatokerau o te enua, ei reira ratou ka patu ei tetai basileia no ratou, e ka piriia mai ratou e te aronga orureau, e kua akavare oki aia ia ratou e, e manganui te au orureau, e ka rava to ratou maroiroi, kia tamaki atu ki to te au kopu e kua pera rai ratou.

13. E kua viviki tikai ta ratou aere, kare atura ratou i tāpūia ana e te tangata e mamao rava atura. E ope akera te toru ngauru o te mataiti, ko te tu teia o te tangata o Niphai.

14. E tae akera ki te toru ngauru ma tai o te mataiti, kua vavai akera ratou ia ratou ki roto i te au kopu, ko te au tangata kia tau ki tona uaorai kopu tangata, e tona kopu, e tona au taeake, kua taputou oki ratou e, kare ratou e aere ki te tamaki ia ratou uaorai, ina ra, kare ratou i taokotai i ta ratou ture e te akaaere anga a to ratou kavamani, kua akamou ra ratou ki te akaaere anga a to ratou ui rangatira, e to ratou au arataki. Ina ra, kua akamou ratou i tetai ture pakari tikai, e auraka tetai kopu kia aere atu ki to tetai e tamaki, no reira, kua noo ratou ma te au no tetai tuatau, kare ra to ratou ngakau i ariu atu ki te Atua, kua pei atu i te au peroveta ki te toka, e kua uri atu ia ratou ki vao mai ia ratou.

15. E tae akera ki muri mai, kua araveiia maira e te au angela a Niphai e te reo oki o te Atua, e no te mea, kua kite ana aia i te angela, e kua kite mata oki e mana oki tei orongaia kiaia kia kite aia i te au mea no runga i te angaanga a te Mesia, e ka kite mata aia i to ratou viviki i te ariu anga atu mei te tuatua tika, ki te angaanga kino e te rikarika.

16. No reira, no tona mamae i te marokiakia o to ratou ngakau, e te poiri o to ratou manako, kua aere atura aia ki rotopu ia ratou i taua mataiti rai, ma te akamaroiroi ia ratou kia tataraara, e kia matara te au ara, na roto i te akarongo i te Atu ia Iesu Mesia.

17. E kua akakite aia kia ratou i te au mea e manganui, e kare e rauka kia tata pouroaia te reira, e ko tetai tuanga ua kare rai e rava, no reira kare rai i tataia ki roto i teia puka. Kua rave ra a Niphai i tana angaanga ma te mana maata.

18. E i na, kua riri akera ratou kiaia, no te mea, e maata tona mana i to ratou, kare oki i tika kia kore ratou e irinaki i tana au tuatua, e no tona akarongo maata ki te Atu ia Iesu Mesia, i aere mai ei te au angela kiaia i te au ra ravarai.

19. E na roto oki i te ingoa o Iesu, i tuaru ei aia i te au tiaporo e te au vaerua kino ki vao, e kua akatu mai oki i tona teina mei te mate mai, tei peiia ki te toka e te tangata kia mate.

20. E kua akara tikai te tangata, e kua riro ei kite no te reira, ina ra, kua riri ratou kiaia no tona mana, e manganui katoa tana au semeio i rave i mua i te aroaro o te tangata, na roto i te ingoa o Iesu.

21. E ope akera te toru ngauru ma tai o te mataiti, e toko iti ua te tangata tei ariu mai ki te Atua, ina ra, ko te au tangata tei ariu mai, kua akakite papu tikai ratou ki te au tangata e, kua aravei mai ana te mana e te Vaerua o te Atua ia ratou, ko tei vai ki roto ia Iesu Mesia, ta ratou e akarongo nei.

22. E ko te au tangata e manganui tei tuaruia te au demoni ki vao ia ratou, e kua akaoraia to ratou au maki, e to ratou apikepike, ko ratou tikai tei akakite ki te tangata e, kua raveia ratou e te Vaerua o te Atua, e kua akaoraia mai, e kua akaari atu i tetai au akairo e kua rave i tetai au semeio ki rotopu i te au tangata.

23. E ope akera te toru ngauru ma rua o te mataiti. Kua kapiki a Niphai ki te au tangata i te akamata anga o te toru ngauru ma toru o te mataiti, ma te ako atu ia ratou i te tataraara, e te akakoreanga o te au ara.

24. E teianei, te anoano nei au kia akamaara katoa kotou, e kare rava e tangata i riro mai ki te tataraara, tei kore i bapetizoia ki te vai.

25. No reira, kua akataoongaia ratou e Niphai, e au tangata no teia angaanga, e ko te au tangata te ka aere mai kia ratou kia bapetizoia ratou ki te vai ei kite oki teia ki mua i te aroaro o te Atua, e i te au tangata katoa, e kua tataraara ratou, e kua rauka te akakoreanga o ta ratou au ra.

26. E manganui tikai te aronga tei bapetizoia no te tataraara i te akamataanga o te mataiti, e ope akera te tuanga maata o taua mataiti ra.