1. E tika tikai taku e karanga atu kia kotou, ka oronga atu au i tetai akairo kia kotou e kite ei kotou i te tuatau e vaitataʼi teia au mea i te tupu. E ka akaputu mai au i toku au tangata i te ngutuare o Iseraela, mei to ratou akapueurikiriki anga roa, e ka akamou akaou au i toku Ziona ki rotopu ia ratou.

2. E i na, ko teia te mea taku e oronga atu kia kotou ei akairo, i na, kia vaitata oki teia au mea taku ka akakite atu kia kotou e taku ka akakite atu kia kotou a muri atu na roto i te mana o te Vaerua Tapu, ta te Metua e oronga mai kia kotou ra, na te reira e akakite ki te au Etene, kia kite ratou no runga i teia iti tangata, koia te toenga o te ngutuare o Iakoba, e no runga oki i teia iti tangata noku, tei akapueurikiriki keia e ratou.

3. Koia, tika taku e karanga atu kia kotou, e ka akakiteia kia ratou teia nei au mea e te Metua, e ka riro mai mei te Metua, e mei ia ratou oki kia kotou.

4. Kua tika oki i te Metua e, kia akanooia ratou ki runga i teia enua, e ka riro ei au tangata rangatira na roto i te mana o te Metua, kia riro mai teia au mea mei ia ratou, ki te toenga o to kotou uanga kia tupu te koreromotu a te Metua, tana i koreromotu ki tona au tangata, tengutuare o Iseraela.

5. No reira, me raveia teia angaanga, e te angaanga te ka tupu kia kotou a muri atu ka na roto mai te reira i te au Etene, ki to kotou ra uanga, ko te tupu aea te akarongo kore, no ta ratou au ara.

6. Kua tika oki i te Metua, e kia na roto mai i te Etene, kia akaari aia i tona mana maata ki te au Etene, e tera oki te tumu i akaperaʼi, me kore te au Etene e akamaro i to ratou ngakau, e kua tataraara, e ma te aere mai kiaku nei, kia bapetizoia i roto i toku ingoa, e ma te kite i te akakoroanga tikai o taku nei apiianga, e kia kapitiia mai ki roto i toku au tangata, te ngutuare o Iseraela,

7. E kia riro mai teia au mea nei, ei reira toou uanga e akamataʼi i te kite i teia nei au mea, ka riro te reira ei akairo kia ratou, kia kite oki ratou e, kua akamata ana te angaanga a te Metua i te tupu, tana i koreromotu atu ki tona au tangata, te ngutuare i Iseraela.

8. E me tae mai taua ra ra, ei reira te au ariki e topiri ei to ratou vaa, no te mea, te akara ua nei ratou, no te mea oki kare i akakiteia kia ratou, ki tei kore i akarongoia ana, ko ta ratou ïa e tuatua ra.

9. E i taua ra ra, e rave ei te Metua i te angaanga umere maata i rotopu i te au tangata ra, e tei roto oki ia ratou tetai au aronga kare e akarongo, no atu e ka akakite tetai kia ratou.

10. Ina ra, tei roto i toku rima te ora o toku nei au tavini, no reira, kare e rauka ia ratou te tamamae atu iaia, ka puta oki atu aia ia ratou. Naku e akaora iaia, e akakite atu oki au kia ratou e maata atu toku pakari i te au ravenga pakari a te tiaporo.

11. E no reira, ko tei kore e akarongo mai i taku nei tuatua, ko au ko Iesu Mesia, ta te Metua i akakoro iaia kia apai mai ki te au etene e kia oronga atu kiaia i te mana, kia apai mai ki te au Etene (ka tupu te reira, mei ta Mose i tuatua ana) ka tipu keia ratou mei roto i toku au tangata, koia to te koreromotu ra.

12. E ko toku au tangata koia oki te toenga o Iakoba, ei roto ratou i te au Etene, ae, ei rotopu tikai ia ratou, mei te liona i rotopu i te au manu taae o te metepara ra, e mei te liona ou i rotopu i te anana mamoe ra, e me aere oki aia na roto ka takatakaiia ïa e ka ungaungatiti rava, e kare e tangata ei akaoraʼi.

13. E akateiteiia oki to ratou rima ki rungao i te aronga e maro mai ia ratou ra, e e tipu keia oki to ratou au enemi.

14. E tika oki, ka mate tikai te au Etene, kia kore ratou e tataraara kia tae ki taua tuatau ra, te tuatua maira te Metua, e tipu ke oki au i to au oroenua i roto ia koe ra, e ka takore oki au i toku ra au kariota.

15. E ka tipu ke au i te au oire o to enua ra, e ka tuku akaakaia to au punanga pakari ki te one.

16. E ka tipu ke au i toou au purepure i runga i toou enua, e kare oki oou aronga purepure akaou.

17. Ka tipu ke katoa au i to au tiki i akatikitikiia ra, e to tiki i akatuia i rotopu ia koe ra, e kare rava aau akamori akaou anga i te au mea tei angaia e to rima na.

18. E kokoti ke oki au i te au rakau tanu i roto ia koe ra, e ka takore au i to oire.

19. E ka akakoreia oki i te pikikaa, te akavare, te morimori, te maro, te taunga purepure, e te akaturi.

20. Te tuatua maira te Metua, kia tae ki taua ra ra, ko te kore e tataraara, e ariu mai ki taku tamaiti akaperepere, e tipu ke au ia ratou mei roto i toku au tangata, te ngutuare o Iseraela.

21. E akautunga au ia ratou, ma te riri otooto e kia pakari ki runga ia ratou i ta ratou i rave, mei tei kore ratou i rongo ana.

22. Ina ra, me tataraara ratou, e akarongo mai i taku nei tuatua, e kare e akamaro i to ratou ngakau, ka akamou au i taku akonoanga ki rotopu ia ratou, ei reira ratou ka aere mai ei ki roto i te koreromotu e kia tatauia ratou ki roto i te toenga o Iakoba, ko ratou oki taku i oronga i te enua ei noo anga no ratou.

23. E ka tauturu ratou i toku au tangata te toenga o Iakoba, e te manganui anga o te ngutuare o Iseraela, kia patuia tetai oire kia topaia tona ingoa ko Ierusalema Ou.

24. E ei reira oki ratou ka tauturu ei i toku au tangata, i pueurikiriki ki te orau o te enua, kia akaputuputu mai ki te Ierusalema Ou.

25. Ei reira te mana o te rangi e eke mai ei ki raro nei ia ratou, e ei rotopu katoa oki au ia ratou.

26. Ei reira oki te angaanga a te Metua e akamataʼi me akoia teia evangelia ki te toenga o teia au tangata. Tika tikai taku e karanga atu kia kotou a taua ra ra, e akamataʼi te angaanga a te Metua ki rotopu i te au tangata i pueurikiriki ke ra, ae, ki te kopu i ngaro, ta te Metua i arataki ke, mei Ierusalema mai.

27. E tika oki, ka akamata te Metua i tana angaanga ki rotopu i toku au tangata tei pueurikiriki ke, ei akateateamamao i te ara, e aere mai kiaku, e kia kapiki atu ratou ki te Metua na roto i toku ingoa.

28. Ei reira, e akamataʼi te angaanga a te Metua i rotopu i te au basileia, i te akateateamamao anga i te ara, e akaputuputu ei tona au tangata ki to ratou uaorai enua ipukarea.

29. Ka aere mai oki ratou mei te au basileia ravarai, e kare oki ratou e aere ma te rapurapu, e kare oki e oro ua, e na mua oki au i te aere ia ratou, te tuatua maira te Metua, e ko au rai oki te ka na muri atu.