1 Ut anajwan kik’ulman naq eb’ lix tenamiteb’ laj Nefita ke’sutq’i chixjunileb’ sa’ tz’aqal lix ch’och’eb’ sa’ li xwaq xka’k’aal chihab’, li junjunq chi winq rochb’een lix junkab’al, lix ketomq ut lix teep chi xul, lix kawaay ut lix wakax, ut chixjunil li k’a’aq re ru li b’arwan eechaninb’il xb’aaneb’.

2 Ut kik’ulman naq moko ke’xtzeka ta chixjunil li k’a’ru k’uulanb’il xb’aaneb’; jo’kan naq ke’xk’am rik’ineb’ chixjunil li moko k’uxb’il ta xb’aaneb’, re li jar paay chi iyaj nak’uxman, ut lix oor, ut lix plaat, ut chixjunil li k’a’ru terto xtz’aq reheb’, ut ke’sutq’i sa’ tz’aqal lix ch’och’eb’ ut li reechanihomeb’, sa’ xnim li saq’e jo’ ajwi’ sa’ xtz’e, sa’ li ch’och’ sa’ xjayal lix nim li saq’e jo’ ajwi’ sa’ li ch’och’ sa’ xjayal lix tz’e.

3 Ut reheb’ laj elq’ a’an li ke’ok chaq sa’ jun sumwank naq te’xk’uula li tuqtuukilal wan wi’ li ch’och’, li ke’raj kanaak choq’ aj Lamanita, ke’xk’e li ch’och’, jo’ chanru rajlankileb’, re taaruuq taawanq reheb’, rik’in xk’anjeleb’, k’a’ru te’wanq wi’ chi yo’yo; ut chi jo’kan ke’xxaqab’ li tuqtuukilal sa’ chixjunil li ch’och’.

4 Ut ke’ok wi’chik chi usaak ut chi nimank ru; ut kinume’ li xwaq ut xwuq xka’k’aal chihab’, ut kiwan nimla tustuukilal sa’ li ch’och’; ut ke’xk’uub’ chaq xchaq’rab’eb’ jo’ chanru li juntaq’eetalil ut li tiik ruhil na’leb’.

5 Anajwan ut maak’a’ kiwan sa’ chixjunil li ch’och’ te’rame’q wi’ ru li tenamit chi usaak rajlal, ka’aj b’an wi’ wi te’t’ane’q sa’ li q’etok aatin.

6 Anajwan ut a’an laj Gidgiddoni, ut laj raqol aatin aj Lajoneus, ut eb’ li ke’xaqab’aak chaq choq’ aj jolominel, li ke’xaqab’ank re li nimla tuqtuukilal a’in sa’ li ch’och’.

7 Ut kik’ulman naq ke’wan naab’al li tenamit li ke’yiib’aman chi ak’il, ut ke’wan naab’al li najter tenamit li ke’tuqub’aak wi’chik.

8 Ut ke’wan naab’al li nimb’e li ke’tach’ab’aak, ut naab’al li b’e li ke’yiib’aak, li neke’xik sa’ li junjunq chi tenamit, ut sa’ li junjunq chi ch’och’, ut sa’ li junjunq chi na’ajej.

9 Ut chi jo’kan kinume’ li xwaqxaq xka’k’aal chihab’, ut li tenamit ke’wan rajlal sa’ tuqtuukilal.

10 A’b’an kik’ulman sa’ li xb’ele xka’k’aal chihab’ ke’ok chi wank junjunq li wech’ok-ib’ sa’ xyanq li tenamit; ut wankeb’ li ke’taqsiik toj sa’ li q’etq’etil ut li nimank-ib’ xb’aan xb’ihomaleb’ li numtajenaq nim; relik chi yaal, toj reetal ki’ux li nimla rahob’tesink.

11 Xb’aan naq ke’wan naab’al aj k’ay sa’ li ch’och’, ut naab’al aj ch’olob’anel chaq’rab’, ut naab’al xtaql li poopol.

12 Ut eb’ li tenamit ke’ok chi ile’k chi jalan jalanq xwankileb’, jo’ chanru xb’ihomaleb’ ut li tzole’k ke’ru chixk’ulb’al; relik chi yaal, wankeb’ li maak’a’ xnawomeb’ xb’aan xneb’a’ileb’, ut wankeb’ li k’a’jo’ li tzole’k ke’xk’ul xb’aan xb’ihomaleb’.

13 Wankeb’ li taqsinb’ileb’ sa’ li q’etq’etil, ut wankeb’ chik li numtajenaq xtuulanileb’; wankeb’ li neke’sutq’isink re li hob’ok choq’ reeqaj li hob’ok, ut wankeb’ chik li ke’k’uluk re li hob’ok ut li rahob’tesink ut li k’iila paay chi ch’a’ajkilal, ut ink’a’ neke’xsutq’isi li hob’ok, tuulaneb’ b’an ut yot’b’ileb’ xch’ool chiru li Dios.

14 Ut chi jo’kan kiwan xnimal xsachik li juntaq’eetalil sa’ chixjunil li ch’och’, jo’kan naq li iglees ki’ok chi jache’k ru; relik chi yaal, toj reetal naq sa’ li xlaje xka’k’aal chihab’ ak jachb’il rib’ li iglees sa’ chixjunil li ch’och’, ka’ajwi’ sa’ xyanq junjunq reheb’ laj Lamanita ink’a’, li jalb’ileb’ xch’ool choq’ re li tz’aqal paab’aal; ut eb’ a’an ink’a’ ke’raj elk chaq rik’in, xb’aan naq kaweb’ rib’, xaqxookeb’ junelik, ut ink’a’ naru reek’asinkileb’, k’eek’ookeb’ xch’ool chi yalb’il anchaleb’ xq’e chixpaab’ankil lix taqlahom li Qaawa’.

15 Anajwan li kichal wi’ li maa’usilal a’in re li tenamit, a’an a’in—laj Satanas kiwan xnimal xwankil, choq’ re reek’asinkileb’ li tenamit chixb’aanunkil li k’iila paay chi maa’usilal, ut re xnimankileb’ sa’ li q’etq’etil, re raalenkileb’ chixsik’b’al li wankilal, ut li awa’b’ejil, ut li b’ihomal, ut li jo’maajo’il k’a’aq re ru re li ruchich’och’.

16 Ut chi jo’kan laj Satanas kixjalb’ehi xch’ooleb’ li tenamit chixb’aanunkil li k’iila paay chi maa’usilal, jo’kan naq yal chiru junjunq chihab’ ke’xyal li tuqtuukilal.

17 Ut chi jo’kan, sa’ xtiklajik li xlaje xka’k’aal chihab’—ut ak q’axtesinb’il rib’ li tenamit chiru xnumik naab’al kutan re te’k’ame’q xb’aan li aaleek xb’aan laj tza toj b’araq kiraj a’an xk’amb’aleb’, ut re te’xb’aanu k’a’ruhaq chi maa’usilal li kiraj a’an naq te’xb’aanu—ut chi jo’kan sa’ xtiklajik a’in, li xlaje xka’k’aal chihab’, ak xuwajel li maa’usilal wankeb’ wi’.

18 Anajwan ink’a’ ke’maakob’ chi maak’a’ xnawomeb’, xb’aan naq ak ke’xnaw li rajom li Dios chirixeb’, xb’aan naq ak k’utb’il chiruheb’; jo’kan naq ke’xpo’resi xch’ool chiru li Dios chi ajb’il xb’aaneb’.

19 Anajwan ut kiwan sa’ xkutan laj Lajoneus, ralal laj Lajoneus, xb’aan naq laj Lajoneus kiwan sa’ xk’ojarib’aal lix yuwa’ ut kixjolomi li tenamit sa’ li chihab’ a’an.

20 Ut ke’ok chi wank winq musiq’anb’ileb’ chaq sa’ choxa ut taqlanb’ileb’, li ke’xaqli sa’ xyanqeb’ li tenamit sa’ chixjunil li ch’och’, ut ke’xjultika ut ke’xch’olob’ xyaalal chi kaweb’ xch’ool chirix lix maak ut lix maa’usilal li tenamit, ut ke’xch’olob’ xyaalal chiruheb’ chirix li tojb’al-ix tixb’aanu li Qaawa’ choq’ re lix tenamit, malaj sa’ jalan chik aatin, lix waklijik li Kristo chi yo’yo, ut ke’xch’olob’ xyaalal chi kaweb’ xch’ool chirix lix kamik a’an ut li rahilal tixk’ul.

21 Anajwan wankeb’ naab’al li tenamit li ke’josq’o’ chi numtajenaq xb’aaneb’ li ke’xch’olob’ xyaalal li k’a’aq re ru a’in; ut li xb’eenileb’ li ke’chal xjosq’il a’aneb’ li xb’eenileb’ aj raqol aatin, ut eb’ li ke’wan chaq choq’ taqenaqil aj tij ut aj ch’olob’anel chaq’rab’; relik chi yaal, chixjunileb’ li wankeb’ choq’ aj ch’olob’anel chaq’rab’ yookeb’ xjosq’il rik’ineb’ li ke’xch’olob’ xyaalal li k’a’aq re ru a’in.

22 Anajwan maajun aj ch’olob’anel chaq’rab’, chi moko aj raqol aatin chi moko taqenaqil aj tij wan li kiru chi wank xwankil re xteneb’ankil li kamk sa’ xb’een anihaq, ka’ajwi’ wi laj jolominel re li ch’och’ kixk’e xk’ab’a’ chiru xhuhil li teneb’anb’il kamk.

23 Anajwan wankeb’ naab’al li ke’xch’olob’ xyaalal li k’a’aq re ru chirix li Kristo, ut ke’xch’olob’ xyaalal chi kaweb’ xch’ool, li ke’k’ame’ ut ke’k’ehe’ chi kamk sa’ muqmu xb’aaneb’ laj raqol aatin, re naq moko nawb’ilaq ta xkamik xb’aan laj jolominel re li ch’och’ toj chirix xkamikeb’.

24 Anajwan k’ehomaq reetal, a’in moko naxk’am ta rib’ rik’in xchaq’rab’il li tenamit, naq taak’ehe’q chi kamk ani junaq chi winq, ka’ajwi’ wi wan wankilal k’eeb’il reheb’ xb’aan laj jolominel re li ch’och’—

25 Jo’kan naq kiwulak resil jun raaxiik’ sa’ li ch’och’ Tzarahemla, rik’in laj jolominel re li ch’och’, chirixeb’ laj raqol aatin a’in li ke’teneb’ank chaq re li kamk sa’ xb’eeneb’ li profeet a’in re li Qaawa’, moko jo’ ta chanru li chaq’rab’.

26 Anajwan kik’ulman naq eb’ a’an ke’chape’ ut ke’k’ame’ chiru laj raqol aatin, re taaraqmanq aatin chirixeb’ xb’aan li maak ke’xb’aanu chaq, jo’ chanru li chaq’rab’ li k’eeb’il chaq xb’aaneb’ li tenamit.

27 Anajwan kik’ulman naq eb’ laj raqol aatin a’an ke’wan naab’al li neke’ochb’eenink reheb’ ut li rech alaleb’; ut li rela’eb’ a’an, relik chi yaal, ka’ch’in chik ma chixjunileb’ laj ch’olob’anel chaq’rab’ ut li taqenaqil aj tij, ke’xch’utub’ rib’ ut ke’xjunaji rib’ rik’in li rech alaleb’ laj raqol aatin a’in, li te’raqe’q aatin chirixeb’ jo’ chanru li chaq’rab’.

28 Ut ke’ok sa’ jun sumwank chirib’ileb’ rib’, relik chi yaal, sa’ ajwi’ li sumwank a’an li kik’ehe’ xb’aaneb’ li ke’wan chaq najter, ut li sumwank a’an k’eeb’il ut k’anjelanb’il xb’aan laj tza, re molk’ank re xpleetinkil chixjunil li tiikilal.

29 Jo’kan naq ke’xmolk’a rib’ chixpleetinkil lix tenamit li Qaawa’, ut ke’ok sa’ jun sumwank re xsachb’aleb’, ut re xkolb’aleb’ li ani ke’b’aanunk chaq re li kamsink, chiru xchapleb’ li raqb’a-aatin li ok re chi k’anjelamank jo’ chanru li chaq’rab’.

30 Ut chi nawb’il ke’xtz’eqtaana lix chaq’rab’ ut lix k’ulub’eb’ lix tenamiteb’, ut ke’ok sa’ sumwank chirib’ileb’ rib’ naq te’xsach laj jolominel, ut naq te’xxaqab’ jun li rey sa’ xb’een li ch’och’, re naq li ch’och’ moko taawanq ta chik chi ach’ab’anb’il, taawanq b’an rub’el xwankileb’ li rey.