Egesieri 13
Amang’ana y’omotoria ase Abanephi akaba akogenderera – – Amachiko aye ase baria ikomi na babere – – Reng’ania Matayo 6.
1. Ekeene, ekeene, nabatebirie nigo nabaganeirie monyare gokora amaya ase abataka; korende renda timwerokia obuya bwaino ase abanto babarore; kero kende timogotwara eng’eria yaino igaria igoro ase Tata.
2. Aseigo ekero mokweng’ata timobugia ebitureri ase more, buna abang’ainereria bagokora ase chinchera, ng’a nario barabe nobonene bwa abanto. Ekeene nabatebirie, mbabwate eng’eria yabo.
3. Korende ekero mokorwa esadaka okoboko kwao okobee tikomanya egio okoboko okorio gogokora;
4. Tiga okorwa kwaino kobe okwabobisi; na Tata oino oria okorora bobisi ere omonyene nabaakane maiso marore.
5. Na ekero mogosaba timokora buna abang’ainereria, ekiagera banchete gosaba, bateneine ase chisunagogi na ebinuchi biechinchera, ng’a nario bararorwe nabanto. Ekeene nabatebirie mbare neng’eria yabo.
6. Korende inwe ekero mogosaba soa ase are bobisi ime yenyomba yao na gogwasiekire ebisieri, saba ase Tata oria ore bobisi; na iso oino oria okorora bobisi nabe ogogoakana eng’eria yao maiso marore.
7. Na ekero mogosaba timoiranerera amang’ana abosa buna abanyabibe, ekiagera bakagete ng’a mbaigugwe ase ogokwana kwabo okonge.
8. Aseigo timoba buna barobwo bare, ekiagera iso oino ore igoro namanyete keria moganetie motaramoboria.
9. Ase engencho eye saba ng’a Tata oito ore igoro, erieta riao ribakwe.
10. Okobua kwao gokoreke ase ense buna gwakorekanete aria igoro.
11. Na twabere chisira chiaito, buna tokobabera abanyasira baito.
12. Na otorusie ase amatemwa, na tototiga tosoe ase ebibe.
13. Ekiagera obonene nobwao ne chinguru nechiao kare na kare. Amina.
14. Na ekero morabere abanto ogosaria kwabo naboigo iso oino ore igoro na babere ogosaria kwaino.
15. Na onye timokwabera abanto ogosaria kwabo naboigo iso oino ore igoro takobabera obobe bwaino.
16. Nonya naboigo ekero mokweng’ata timoba buna abang’ainereria, bare amasio yoborimo, ekiagera bakonyiria amasio abo ng’a nario bararorwe ng’a mbeng’atete. Ekeene nabatebirie mbabwate eng’eria yabo.
17. Korende inwe ekero mokweng’ata eake amaguta emetwe yaino na sibia amasio;
18. Erinde monyare kororekana ng’a mweng’atete, korende mweorokie ase iso oino, oria ore obobisi, nabaakane eng’eria yaino maiso marore.
19. Timwegachera enibo yaino ase ense, aria ase obobosu boranyare gosaria, na abaibi baranyare kobuna na koiba.
20. Korende gacha enibo yaino igoro, ase obobosu botanyare gosaria, na ase abaibi batanyare kobuna na koiba.
21. Ekiagera ase enibo yaino ere na emioyo yaino ere.
22. Oborabu bwomobere namaiso; onye eriso riao rere erimo, omobere Oo bwensi nigo orabe noborabu.
23. Korende onye eriso riao rire eriebibe omobere oo bwonsi nigo orabe oyobwomusunte. Onye oborabu boria bore ime yao bokoba omosunte inee inaki omosunte oyo orabe omonene!
24. Monto tari orakorere abanene babere; nigo barageche oyomo na gwancha oyonde, gose kobwatana noyonde na gochecheria oyonde ase timokonyara gokorera Nyasae na birecha.
25. Erio ekero Yeso akora gokwa akabangereria baria ikomi nababere ababete ogochora, nagoteba ase bare ng’a: Moinyore amang’ana aya nakwanire. Ekiagera ninu rachorine monyare korandia enchiri eye. Aseigo timorengereria obogima bwaino, ekimorarie gose ekimoranywe gose ekimoresoke, na emebere yaino. Inee obogima tibori obonene kobua endagera na omobere kobua chianga?
26. Rigereria chinyoni chiaigoro tichiri gosimeka gose kogesa gose gosangereria kobeka ase ebiage; korende Tata oino oigoro achiragerie. Inee timori abanene gochibua?
27. Inee ning’o ore ase more oraire ebirengererio nakomenta ase aase aamo na kobeka ase obong’aini.
28. Inee ninki gekogera mokobeka ebirengererio ase obobosu? Na manya ng’a amabanchore y’omogondo engencho agokina; tari gotonga, gose gosokia;
29. Na nigo inkobatebia naende ng’a nonya Solomoni ase obonene bwaye bwonsi, tabete buna aya.
30. Aseigo, Onye Nyasae ogosoka obonyansi, obwo boreo bono, na mambia borutwe ase omorero, nabo arabe okobasoka nainwe, onye timokoba abanto bokwegena ogoke.
31. Aseigo tiga koba nekerengererio kende na goteba ng’a inkereki togocha koria? gose inkereki togocha konywa? gose ing’ai toranyare gwesoka korwa?
32. Ekiagera iso oino oigoro namanyete ing’a imore n’okogania kwebinto ebi bionsi.
33. Korende borigie oborwoti bwa’Nyasae ritang’ani na oboikeranu bwaye, na kera egento nkebe gekomenteka ase ore.
34. Timoba nakerengererio igoro ya mambia, ekiagera mambia nebe ekweroberia yoka. Ekiagera ogoisaneka kwerituko nigo kore ase obobe.