1 Im kiiō ālikin men kein eaar wōr juon jarlepju eo eļap eaar kuktok ippān doon, in armej in Nipai, ijo ipeļaakin tampeļ eo ilo āne Bun̄-pāļo̧k; im raar bwilōn̄ im koļmānļo̧kijeņ ippān doon, im kar kwaļo̧k n̄an doon oktak eo eļap im kabwilōn̄lōn̄ eaar bōk jikin.

2 Im raar barāinwōt em̧m̧ao kōn in Jisōs Kraist, eo kakōļļe eo kar leļo̧k kōn mej eo An.

3 Im ālikin men kein ke raar āindein em̧m̧ao ippān doon, raar ron̄ juon ainikien āinwōt n̄e eaar itok jān lan̄; im raar bōk mejaer likļo̧k, bwe raar jab meļeļe ainikien eo raar ron̄; ijoke, im mekarta eaar juon ainikien edik eaar deil er n̄an lowa tata, jon̄an eaar ejjeļo̧k m̧ōttan ānbwinnier eaar jab kōm̧m̧an bwe en wūdiddid; aaet, eaar deil er n̄an lukkuun burueer, im kōm̧m̧an bwe burueer ren bwil.

4 Im ālikin men kein bar juon alen raar ron̄ ainikien eo, im raar jab meļeļe kake.

5 Im bar juon alen kein kajilu raar ron̄ ainikien eo, im kar kōpeļļo̧k lo̧jiln̄ier n̄an ron̄jake e; im mejaer eaar reilo̧k n̄an ijo ainikien eo ej itok jān e; im raar kalimjekļo̧k lan̄, jān ijo ej itok ainikien eo.

6 Im lo, iien eo kein kajilu raar meļeļe ainikien eo raar ron̄; im eaar ba n̄an er:

7 Lo in Nejū Jitōnbōro, eo ilo E, Ebun̄-buruō; ilo E Iaar kaiboojoj Eta—kom̧in ron̄jake E.

8 Im ālikin men kein, ke raar meļeļe raar bōk mejaerļo̧k n̄an lan̄; im lo, raar lo juon Em̧m̧aan ej wanlaļļo̧k jān lan̄; im Eaar kōņak ilo juon liboror mouj; im Eaar wanlaļļo̧k im jutak ilo ioļapļapier; im mejān jarlepju eo eaar oktakļo̧k n̄an E, im raar ekkōl im jab kōpeļļo̧k lo̧n̄ier, em̧ool n̄an doon, im jab jeļā ta meļeļe in, bwe raar ļōmņak eaar juon enjeļ eo eaar waļo̧k n̄an er.

9 Im ālikin men kein Eaar erļo̧keļo̧k Pein im kōnono n̄an armej ro, im ba:

10 Lo, N̄aij Jisōs Kraist, eo rikanaan ro raar kam̧ool ke Enaaj itok n̄an laļ.

11 Im lo, N̄aij meram eo im mour eo an laļ; im Iaar idaak jān kap meo̧ eo Jema eaar letok n̄an Eō, im kar kaiboojoj Jema ilo bōk Ioō jero̧wiwi ko an laļ, eo ilo e Iaar pokake ankilaan Jema ilo men otemjeļo̧k jān jino in.

12 Im ālikin men kein ke Jisōs eaar kōnono naan kein aolepān jarlepju eo ar wōtlo̧k n̄an laļ; bwe raar keememeje bwe em̧ōj kar kanaan ilubwiljier bwe Kraist en kar kwaļo̧ke E n̄an er ālikin An wanlōn̄ļo̧k n̄an lan̄.

13 Im ālikin men kein Irooj Eaar kōnono n̄an er im ba:

14 Kom̧in jutak im wōnm̧aantak n̄an Ippa, bwe kom̧in maron̄ karum̧ļo̧k peimi ilo katū, im barāinwōt kom̧in maron̄ en̄jake jenkwan dila ko ilo peiū im ilo neō, bwe kom̧in maron̄ jeļā bwe N̄a ij Anij an Israel im Anij an aolepān laļ im kar m̧ane Eō kōn jero̧wiwi ko an laļ.

15 Im ālikin men kein jarlepju eo ar wōnm̧aanļo̧k, im karum̧ļo̧k peier ilo katin, im kar en̄jake jenkwan dila ko ilo pein im ilo neen; im men in raar kōm̧m̧ane, wōnm̧aanļo̧k juon ilo̧k juon m̧ae aolep raar wōnm̧aanļo̧k, im kar lo kōn mejaer im en̄jake kōn peier, im kar jeļā ilo m̧ool im kar kam̧ool e, bwe ekar E eo, eo kar jeje jān rikanaan ro, bwe E en kar itok.

16 Im ke raar m̧ōj an aolep wōnm̧aanļo̧k im kar kam̧ool n̄an er make, raar kūr kōn juon wōt ainikien, im ba:

17 Hosana! Em̧ōņōņō etan Anij Eutiejtata! Im eaar wōtlo̧k n̄an laļ ineen Jisōs, im kar kabun̄-jar n̄an E.

18 Im ālikin men kein Eaar kōnono n̄an Nipai (bwe Nipai eaar pād ilubwiljin jarlepju eo) im Eaar jiron̄ e bwe en wōnm̧aanļo̧k.

19 Im Nipai eaar jutak im eaar wōnm̧aanļo̧k, im eaar bun̄badik im̧aan Irooj im eaar mejenmaik Neen.

20 Im Irooj Eaar jiron̄ e bwe en jutak. Im eaar lōn̄jak im jutak im̧aan In.

21 Im Irooj Eaar ba n̄an e: Ij lewōj n̄an eok kajoor bwe kwōn peptaiji armej rein n̄e Ij bar wanlōn̄ļo̧k n̄an lan̄.

22 Im bar juon alen Irooj eaar kūr ro jet, im ba n̄an er barāinwōt; im Eaar leļo̧k n̄an er kajoor n̄an peptaij. Im Eaar ba n̄an er: Ilo wāween in kom̧ naaj peptaij; im enaaj ejjeļo̧k akwāālel ko ilubwiljimi.

23 Em̧ool Ij ba n̄an kom̧, bwe jabdewōt eo ej ukeļo̧k jān jero̧wiwi ko an kōn naan ko ami, im kōņaan bwe en peptaij ilo Eta, ilo wāween in kom̧ naaj peptaiji er—Lo, kom̧ naaj wanlaļļo̧k im jutak ilo dān eo, im ilo Eta naaj peptaiji er.

24 Im kiiō lo, erkein rej naan ko kom̧ naaj ba, kūr er kōn etaer, im ba:

25 Kōnke kar letok maron̄ n̄an eō jān Jisōs Kraist, ij peptaij eok ilo etan Jemān, im Nejin, im Jetōb Kwōjarjar. Amen.

26 Innām kom̧ naaj kattuļo̧k er ilo dān eo, im bar atoļo̧k jān dān eo.

27 Im ālikin wāween in kom̧ naaj peptaij ilo Eta; bwe lo, em̧ool Ij ba n̄an kom̧, bwe Jemān, im Nejin, im Jetōb Kwōjarjar rej juon; im N̄a ij ilo Jema, im Jema ilo N̄a, im Jema im N̄a rej juon.

28 Im ekkar āinwōt Iaar jiron̄ kom̧ āindein kom̧ naaj peptaij. Im en ejjeļo̧k akwāālel ko ilubwiljimi āinwōt eaar wōr m̧oktaļo̧k; im en ejjeļo̧k akwāālel ko ilubwiljimi kōn unleplep ko an katak eo Aō, āinwōt eaar wōr m̧oktaļo̧k.

29 Bwe em̧ool, em̧ool Ij ba n̄an kom̧, eo ewōr jetōb in jum̧ae ilo e ejjab jān Eō, ak ej jān devil, eo ej jemān jum̧ae, im ej pukwōj būruōn armej n̄an aitwerōk kōn illu, ippān doon.

30 Lo, en̄in ej jab Aō unleplep in katak, n̄an pukwōj būruōn armej kōn illu, ippān doon; a en̄in ej unleplep in katak eo Aō, bwe men rot kein rej aikuj jako.

31 Lo, em̧ool, em̧ool, Ij ba n̄an kom̧, Inaaj kwaļo̧k n̄an kom̧ katak eo Aō.

32 Im en̄in ej unleplep in katak eo Aō, im ej unleplep in katak eo Jema eaar letok n̄an Eō; im Ij kam̧ool kōn Jema, im Jema ej kam̧ool kōn Eō, im Jetōb Kwōjarjar ej kam̧ool kōn Jema im kōn Eō; im Ij kam̧ool bwe Jema ej jiron̄ armej otemjeļo̧k, ijoko jabdewōt, n̄an ukeļo̧k im tōmak ilo N̄a.

33 Im eo ej tōmak ilo N̄a, im ej peptaij, ejja in wōt enaaj mour; im rein rej er ro renaaj jolōt aelōn̄ in Anij.

34 Im eo ej jab tōmak ilo N̄a, im ej jab peptaij, enaaj jako.

35 Em̧ool, em̧ool, Ij ba n̄an kom̧, bwe en̄in ej unleplep in katak eo Aō, im Ij kam̧ool kōn e jān Jema; im eo ej tōmak ilo N̄a ej tōmak ilo Jema barāinwōt; im n̄an e Jema Enaaj kam̧ool kōn Eō, bwe Enaaj loļo̧k e kōn kijeek im kōn Jetōb Kwōjarjar.

36 Im āindein Jema Enaaj kam̧ool kōn Eō, im Jetōb Kwōjarjar enaaj kam̧ool n̄an e kōn Jema im N̄a; bwe Jema, im N̄a, im Jetōb Kwōjarjar kōmij juon.

37 Im Ij bar ba n̄an kom̧, kom̧ aikuj ukeļo̧k, im peptaij ilo Eta, im erom āinwōt juon ajri edik, ak ilo ejjeļo̧k wāween kom̧ naaj bōk men kein.

38 Im Ij bar ba n̄an kom̧, kom̧ij aikuj ukeļo̧k, im peptaij ilo Eta, im erom āinwōt juon ajri edik, ak ilo ejjeļo̧k wāween kom̧ ban jolōt e aelōn̄ in Anij.

39 Em̧ool, em̧ool, Ij ba n̄an kom̧, bwe en̄in ej unleplep in katak eo Aō, im eo ej ekkal ioon ej ekkal ioon Aō ejm̧aan, im aor ko an hell reban jutak ņae er.

40 Im eo enaaj kabun̄bun̄ļo̧k eļapļo̧k ak dikļo̧k jān in, im kajutak e bwe en Aō unleplep in katak, ejja in wōt ej itok jān nana, im eaar jab ekkal ioon Aō ejm̧aan; a ej ekkal ioon pedped ebokbok, im kōjām ko an hell rej jutak eļļo̧k n̄an bōk rein n̄e ibwijleplep ko rej itok im kōto ko rej bun̄leplep ioer.

41 Kōn menin, ilo̧k n̄an armej rein, im kabun̄bun̄ļo̧k naan ko Iaar kōnono, n̄an jem̧ļo̧k ko in laļ.