1 Im ālikin men kein Eaar jiron̄ er bwe ren jeje naan ko Jemān eaar liļo̧k n̄an Malakai, ko E eaikuj ba n̄an er. Im ālikin men kein ālikin aer kar jei Eaar tipdiki. Im erkein rej naan ko Eaar ba n̄an er, im ba: Āindein Jema eaar ba n̄an Malakai—Lo, Inaaj jilkinļo̧k eo ^akarejera, im enaaj kōpooj iaļ eo Im̧aō, im Irooj eo kom̧ naaj kappukot e em̧ōkaj an itok n̄an tampeļ eo An, em̧ool eo karejeran bujen eo, eo kom̧ij m̧ōņōņō kake; lo, enaaj itok, Irooj in Inelep eo ej ba.

2 A wōn emaron̄ ^apād ilo raan in itok An, im wōn enaaj jutak n̄e E ej waļo̧ktok? Bwe E ej āinwōt juon ^bkijeek an rikarreoik māāl ko, im āinwōt soap an rikarreo nuknuk.

3 Im Enaaj jijet āinwōt rikaōnļo̧k im karreoik silver; im Enaaj karreoik m̧aan ro ^anejin Livai, im Enaaj karreoik er āinwōt gold im silver, bwe ren maron̄ ^bkatok n̄an Irooj juon katok ilo weeppān.

4 Innām naaj katok eo an Juda im Jerusalem kabun̄-būruōn Irooj, āinwōt ilo raan ko etto, im āinwōt ilo iiō ko m̧okta.

5 Im Inaaj itok epaak eok n̄an ekajet; im Inaaj rikam̧ool innitōt ņae rim̧adm̧ōd ro, im ņae riļōn̄ ro, im ņae rikanejnej waan ro, im ņae ro rejjab jim̧we aer kōļļā wōņāān rijerbal eo an, im kōrā eo ejjeļo̧k pāleen im eo ^aejjeļo̧k jemān, im eo ej eļļo̧k jān ruwamāejet, im jab mijak Eō, Irooj in Inelep eo ej ba.

6 Bwe N̄aij Irooj, Ij jab ukoktak; kōn menin kom̧ m̧aan ro nejin Jekab kom̧ij jab bwil.

7 Em̧ool jān raan ko an ro jemāmi kom̧ ar ^ajako jān kain̄i ko Aō, im kar jab kōjparoki. Kom̧in ^bro̧o̧ltok n̄an Eō im Inaaj ro̧o̧lwaj n̄an kom̧, Irooj in Inelep eo ej ba. A kom̧ij ba: Ekōjkan am ro̧o̧lwaj?

8 Armej en ko̧o̧te Anij ke? Mekarta kom̧ ar ko̧o̧te Eō. A kom̧ij ba: Ekōjkan am kar ko̧o̧te Eok? Ilo ^ajuon m̧ōttan jon̄oul im ^bjoortak ko.

9 Kar kalia kom̧ kōn juon lia, bwe kom̧ ar ko̧o̧te Eō, em̧ool aolepān aelōn̄ in.

10 Kom̧in bōktok aolep ^ajuon m̧ōttan jon̄oul ko ilo im̧ōn ko̧koņ eo, bwe en maron̄ wōr kanniōk ilo m̧weo Im̧ō; im kam̧ool n̄an Eō ilo wāween in, Irooj in Inelep eo ej ba, eļan̄n̄e I ban kōpeļļo̧k n̄an kom̧ wūntō ko in lan̄, im lutōkleplep ioomi juon ^bkōjeraam̧m̧an eo enaaj ejjeļo̧k jikin ebwe n̄an bōk e.

11 Im Inaaj kauweik eo rikan̄ jonikkan ko kōn kom̧, im e jamin naaj ko̧kkure leen bwidej ko ami; im jamin naaj wōtlo̧k leen wōjke grep ko ami m̧okta jān iien eo an ilo meļaaj ko, Irooj in Inelep eo ej ba.

12 Im laļ ko otemjeļo̧k renaaj kūr kom̧ rijeban, bwe kom̧ naaj juon āne e kam̧ōņōņō, Irooj in Inelep eo ej ba.

13 Naan ko ami raar kajoor ņae Eō, Irooj ej ba. Mekarta kom̧ij ba: Ta kōm ar kōnono ņae Eok?

14 Kom̧ ar ba: Ejjeļo̧k tokjān jerbal n̄an Anij, im ta ej kōļapļo̧k kōj n̄e jaar kōjparok kain̄i ko An im bwe jaar etetal ilo būrom̧ōj im̧aan Irooj in Inelep eo?

15 Im kiiō jej ba eo ej juwa em̧ōņōņō; aaet, er ro rej jerbale nana rej jeraam̧m̧an; aaet, er ro rej kapo Anij kanooj kōtļo̧k er.

16 Innām er ro raar mijak Irooj raar ^akōnono emmakijkij ippān doon, im Irooj eaar eo̧ron̄ im ron̄; im juon ^bbok in keememej kar jeje im̧aan E kōn er ro raar mijak Irooj, im kar ļōmņak kōn Etan.

17 Im renaaj ro doō, Irooj in Inelep ej ba, ilo raan eo n̄e Inaaj ^akōm̧anm̧an dekā aorōk ko Aō; im Inaaj oņaake er āinwōt juon em̧m̧aan ej oņaake ļaddik eo nejin make ej jerbal n̄an e.

18 Innām kom̧ naaj ro̧o̧ltok im ^akile oktak ikōtaan ro rem̧m̧an im ro renana, ikōtaan e eo ej jerbal n̄an Anij im e eo ej jab jerbal n̄an E.