Scriptures
2 Nefi 5


U tas 5

Ri Nefi, cäpixabax rumal ri Dios, cutas rib chquiwäch ri cäcaj cäquicämisaj; ri Zoram, Sam, Jacob, José, y ri nicʼaj chic cäcachilaj; ri u machet ri Labán; cäyactajic jun lokʼalaj rachoch ri Dios; ri Nefi jun ajawinel o chajinel que ri winak; cäcʼajisax qui wäch ri quecʼulalanic y cäkʼekarisax ri qui tzʼumal; ri cʼo u takanic ri Dios pa qui kʼab, y ri tijonelab quechʼajchʼojarisaxic.

1 Xcʼulmataj cʼut chi ri in, Nefi, sibalaj xinchʼaw akʼanok che ri Ajawaxel nu Dios rumal ri coyowal ri wachalal.

2 Tzare kastzij xpe na ri coyowal wucʼ. Rumal riʼ xcaj xinquicämisaj.

3 Xejasjat chwij, xquibij: Ri ka chakʼ cuchomaj cätakan pakawiʼ, y sibalaj cʼäx ka rikom rumal ri areʼ. Rumal cʼu riʼ, cäkacämisaj areʼ rumal rech chi man cäkarik tä chi cʼäx rumal ri u tzij ri areʼ. Kastzij man cäkayaʼ tä u kʼij ri areʼ rech cätakan pakawiʼ. Kas kech ri uj, ri nabial tak achalalaxel, cujajawanic paquiwiʼ we winak riʼ.

4 Man quintzʼibaj taj cho we u xak chʼichʼ riʼ ronojel ri jasjatem ri xquiban chwij. Xane xak xuwiʼ quinbij chi xcaj xinquicämisaj.

5 Xcʼulmataj cʼut chi ri Ajawaxel xinupixabaj chi ri in, Nefi, quintas wib cucʼ, y chi quinanimaj bic pa ri ulew cätzʼinowic cucʼ ri cäcaj quincachilaj.

6 Xcʼulmataj cʼut chi ri in, Nefi, xebincʼam bic ri nu familia, y ri Sam, ri wätzʼ, y ri u familia ri areʼ, y ri Jacob y ri José ri nu chakʼ, y xukujeʼ ri tak wanab. Y conojel ri e areʼ ri xcaj xincachilaj. Ri e areʼ ri winak ri xecojon che ri u pixabanic y ri lokʼalaj tzij ri u yaʼom can ri Dios. Rumal cʼu riʼ, xquitatabej ri nu tzij.

7 Y xkacʼam bic ri ka panibal y ronojel ri rajwaxic chke ri xujcuinic cäkacʼam bic. Xujbin cʼut qʼui kʼij pa ri cʼächelaj, y aretak uj benak chic qʼui kʼij, xkacoj ri ka panibal cho ri ulew.

8 Y ri nu winak xcaj chi cäkayaʼ Nefi che ri u biʼ wi jun cʼolibal riʼ. Rumal cʼu riʼ, xkabij Nefi che.

9 Y conojel ri e cʼo wucʼ xcaj cäquicoj ri u winakil ri Nefi che ri qui biʼ.

10 Xkanimaj cʼut ri kʼatbal tzij, ri pixab, y ri takbal re ri Kajawal pa ronojel ri xkabano je jas u beyal ri pixab re ri Moisés.

11 Cʼu ri Kajawal xcʼojiʼ kucʼ, y sibalaj xujnimarisax che ri utzil, rumal cʼut xkaticʼ tak ijaʼ y xkaban chic nimalaj kʼatoj. Xkachap u qʼuiyarisaxic ri kʼataj chicop, jumulaj awäj, y conojel qui wäch tak chicop.

12 Cʼu ri in, Nefi, nu cʼamom ulok xukujeʼ ri lokʼalaj tak tzij tzʼibatal can chuwach ri tak u xak chʼichʼ bronce. Xukujeʼ nu cʼamom ulok ri cʼoloquic chʼichʼ, o ri cʼutbal be, ri xbanow rumal ri u kʼab ri Ajawaxel chupatanixic ri nu tat jas u beyal ri tzʼibatal canok.

13 Xcʼulmataj chi sibalaj xujnimarisax che utzil y xujwinakiric pa ri ulew.

14 Cʼu ri in, Nefi, xinwesaj u wäch ri machet re ri Labán, y xinban qʼui xaʼ junam rucʼ. Xinbano rech man quekaj tä chkij chkacämisaxic ri winak ri cäbix aj Lamanitas chque. Rumal kastzij wetaʼm ri qui cʼululanic chwij y chrij ri walcʼual, y conojel ri e areʼ ri cäbix nu winak chque.

15 Y xebintojoj ri nu winak che ri qui yaquic tak ja. Xukujeʼ xebintijoj rech cäquichacuj conojel qui wäch tak cheʼ, cowilaj chʼichʼ, kʼän chʼichʼ, quiäk chʼichʼ, chʼichʼ acero, kʼän puak, sak puak, y jeʼlalaj tak chʼichʼ. E conojel queqʼuiyar chiriʼ.

16 Cʼu ri in, Nefi, xinyac jun lokʼalaj rachoch Dios y xinbanow je jas u cholaj ri lokʼalaj rachoch Dios re Salomón, xak xuwiʼ chi man banom tä rucʼ qʼui jeʼlalaj jastak, rumal man querik tä waral cho we ulew riʼ. Rumal cʼu riʼ, man yaʼom taj cäyactajic jacha ri lokʼalaj rachoch Dios re Salomón. Tzare ri u cholaj ri u yaquic kas je jas ri lokʼalaj rachoch Dios re Salomón, y sibalaj jeʼlic ri chac banom che.

17 Xcʼulmataj cʼut chi ri in, Nefi, xinban chi ri nu winak cäquiban chacunelab, y chi xechacun rucʼ ri qui kʼab.

18 Xcʼulmataj cʼut chi ri areʼ xquirayij chi xinux ri cajawinel. Tzare ri in, Nefi, xinrayij chi majun winak coc na che ri cajawinel. Pune tä jeriʼ, xinban ri xincuinic rumal quech.

19 Kastzij tzʼakatinak ri tzij ri u bim ri Ajawaxel chquij ri wachalal. U bim chi ri in quinoc ri takanel paquiwiʼ, y ri qui tijonel. Kastzij wi ri in xinoc cajtij y xintakan paquiwiʼ, jas u beyal ri takbal re ri Ajawaxel, aretak xcaj xinquicämisaj.

20 Rumal cʼu riʼ, xtzʼakatisax ri tzij ri u bim chwe ri Ajawaxel. Cʼu jeriʼ xubij: We tä man cäquitatabej tä ri a tzij quetasotajic chrij ri Ajawaxel. Y kas wi ri e areʼ xetastaj chrij.